ءتۇرى: ەل-ارنا گازەتى | وسى ارادان ەلارنا گازەتىنىڭ بارلىق ماقالالارىن كورۋگە بولادى..

مەندە ال-ارناعا جازبا-ماقالا جازامىن، وندا وسى ارانى باسىڭىز!

جولدانعان ۋاقىتى: 23:43 - 2020/12/25

ماقالا جولداۋشى: kanat Alhazi
ماقالا اپتورى: سىماعۇل ەلۋباي
اپتوردىڭ مەكەن-جايى: الماتى قالاسى
وسى ماقالانىڭ كىرىلشە نۇسقاسى، وسى ارانى باسىڭىز

Осы мақаланың кірілше нұсқасы, осы араны басыңыз

جالپى ءارىپ سانى: 28012
سماعۇل ەلۋباەۆ
اقىرزامان الدىندا
جاراتۋشى بۇ دۇنيەنى 6 كۇندە جاراتتى دەيدى. قۇراندا اللانىڭ ءاربىر كۇنى جەر بەتىندەگى مىڭ جىلعا تەڭ ەكەنى ايتىلادى. عىلىم جەر بەتىندەگى تىرشىلىك العاش سۋدا ءبىر جاسۋشا كلەتكا قالپىندا پايدا بولىپ ەۆوليۋتسيا سودان باستالدى دەيدى. الايدا ءبىر جاسۋشالى تىرشىلىكتىڭ قايدان، قالاي پايدا بولعانىن ناقتى تۇسىندىرە المايدى. تىرشىلىك باستاۋىنا جەر بەتىندە قولايلى تابيعي جاعداي قالىپتاستى دەپ تۇسىندىرەدى. ياعني، عىلىم بويىنشا جەر بەتىندەگىدەي قولايلى تابيعي جاعداي عارىشتىڭ قاي تۇكپىرىندە پايدا بولسا سول جەردە تىرشىلىك مىندەتتى تۇردە پايدا بولۋعا ءتيىس. الايدا، ول «قولايلى تابيعي جاعداي» وز-وزىنەن قالاي پايدا بولادى؟ نەمەسە ول جاعدايدى كىم جاسايدى، و جاعىنا عىلىم بارمايدى. ال، كيەلى كىتاپتار بولسا جەر بەتىندەگى «تىرشىلىككە قولايلى جاعدايدى» قۇدىرەت يەسى جاراتتى دەيدى. سونىڭمەن، عىلىم تىرشىلىك ءولى تابيعاتتان ەۆوليۋتسيا ناتيجەسىندە شىقتى دەپ بىلەدى. تىرشىلىككە ءتان جان مەن سانا سول تىرشىلىك يەسىنىڭ ەۆوليۋتسيالىق دامۋىنىڭ ناتيجەسى دەپ بىلەدى. ال، ءدىن بولسا جان مەن ءتاندى ءبولىپ قارايدى. ءتان – تابيعاتتان، جان – اللادان. عىلىم مەن ءدىن اراسىنداعى وسىناۋ عاسىرلارعا سوزىلعان الامان ايتىسقا قاراپ وتىرىپ، عىلىم بەتكە ۇستاپ وتىرعان سول ەۆوليۋتسيانىڭ ءوزى جەر بەتىندەگى جاراتۋشى جوباسى بولماسىنا كىم كەپىل دەگەن وي كەلەدى. قۇرانعا جۇگىنسەك عالامداعى ءىلىم كىلتى – اللادا. ولاي بولسا ادامزات بالاسىنىڭ ەرتەلى-كەش اشقان عىلىمي جاڭالىقتارىنىڭ ءبارى جەر بەتىندەگى جاراتۋشى جوباسىنىڭ جۇزەگە اسۋى. ياعني، سول تابيعات زاڭدارىن بىر-بىرلەپ تارقاتىپ كەلە جاتقان عىلىمي قادامداردىڭ بارلىعى تۇپتىڭ-تۇبىندە ءوز جاراتۋشىسىنا الىپ باراتىن تاراۋ-تاراۋ جولدار. ءاربىر ۇلكەندى-كىشىلى عىلىمي جاڭالىق دۇنيەنى تانۋ جولىنداعى، ياعني اقيقاتتى تانۋ جولىنداعى باسپالداقتار. ول باسپالداقتار بيىكتەگەن ۇستىنە بيىكتەپ ءابسوليۋتتى تانۋعا باستاپ بارادى. ال، ءابسوليۋتتى اقيقات - حاقتاعاللانىڭ وزى. دۇنيەتانىمداعى عىلىمنىڭ بۇگىنگى بيىگى كۆانتتىق فيزيكا اشقان جاڭالىقتار. سول بيىككە العاشقى كوتەرىلگەن عالىمداردىڭ ءبىرى ۇلى فيزيك ماكس پلانكتىڭ كوزى ەڭ الدىمەن ءابسوليۋتتى اقيقاتقا ءتۇستى. ءوز كوزى كورگەن وسىناۋ اقيقاتتى الەم الدىندا اشىق مويىندادى: «عالامدى جوعارى سانا بيلەيدى. الەمدەگىنىڭ ءبارى ونىڭ كوزگە كورىنبەيتىن، بايقالمايتىن، ءبىراق راستىعى كۇمان تۋدىرمايتىن قۋاتىمەن بايلانىسىپ تۇر» دەپ مالىمدەدى. بۇل مالىمدەمەدەن نەنى كورەمىز؟ بۇل مالىمدەمەدەن ءبىز تابيعات تۇڭعيىعىنا تەرەڭ سۇڭگىگەن زاماناۋي عىلىم الدىنان جوعارعى سانانىڭ شىققانىن كورەمىز. قاسيەتتى كىتاپتار ادام رۋحىنىڭ اللادان ەكەنىن ايتادى. سونىڭ ءبىر دالەلى – ادامنىڭ جاسامپازدىعى. جاسامپازدىق - اللاعا ءتان قاسيەت. جالپى سانا، جاراتۋشىعا ءتان سانا، ءبىر ورىندا تۇرمايتىن، ۇنەمى قوزعالىس، ىزدەنىس، تالپىنىس ۇستىندە بولاتىن رۋح. ۇڭگىردە تۇرعان جابايى ءداۋىرىنىڭ وزىندە ادام مال ءتارىزدى تەك قارىن توقتىعىمەن عانا شەكتەلمەپتى.قولىنا قاشاۋ الىپ سول ۇڭگىر قابىرعاسىنا سۋرەت سالىپتى. بۇدان ءبىز بالاڭ سانانىڭ قورشاعان ورتا تۋرالى ويلانا باستاۋىن، ونى تۇسىنۋگە تالپىنا باستاۋىن كورەمىز. نەمەسە، ادام شىعارماشىلىعىنىڭ، جاسامپازدىعىنىڭ ءتاي-تاي باسقان شاعىن كورەمىز. سول تالپىنىس، جاسامپازدىققا دەگەن مىڭداعان جىلدىق تالپىنىس ادام بالاسىن ورگە سۇيرەپ بۇگىنگى وركەنيەتكە الىپ كەلىپتى. العاشقى ادامدار الدىمەن ءوزىن قورشاعان ورتانى تانۋعا تالپىنىپتى. ءوز كوزىنە كورىنىپ تۇرعان تابيعاتتى قۇدىرەت دەپتى. كۇركىرەگەن كۇن، تۇنەرگەن ءتۇن، ايلاپات اسپان، كوك تىرەگەن تاۋ، جاپىراق جايعان اعاش، سىلدىراعان سۋ، - وسىنىڭ ءبارى ولار ءۇشىن تىلسىم دا تۇسىنىكسىز قۇدىرەت يەسى بولىپ كورىندى. سوندىقتان جابايى ادامعا جارقىراعان كۇن دە ءتاڭىر، اسپانداعى اي دا ءتاڭىر، تۇنەرگەن تاۋ دا ءتاڭىر، جالىنداعان وت تا ءتاڭىر، سىلدىراعان سۋ دا ءتاڭىر، جاپانداعى جالعىز اعاش تا ءتاڭىر. سولارعا تابىندى. دۇنيەتانىم جولىنداعى وسىناۋ ىزدەنىستەرى الايدا ادامدى اڭنان الىستاتا بەردى. ادامدىققا باستادى. ادام شىن يەسىن تاني الماسا دا، سول يەسى جاراتقان نارسەلەرگە تابىندى. بۇل دا بولسا پروگرەسس ەدى. دامۋ ادامزاتتى ءوزىنىڭ شىن يەسىن تانۋعا الىپ كەلە جاتتى. دامي كەلە ادام، جاراتۋشى جىبەرگەن پايعامبارلار ارقىلى ءوزىنىڭ شىن يەسىن تانىدى. پايعامبارلار ادامزاتقا وسىناۋ ۇلى اقيقاتتان حابار بەردى. الايدا، ءتانى – جەردەن، جانى- حاقتان جاراتىلعان ادام ەكىۇداي ءومىر ءسۇردى.تان قورەگى ءۇشىن كۇن قۇرعاتپاي الىستى، ارپالىستى. الايدا جان قورەگىن تابا المادى. ادام بايعۇس شارق ۇرىپ جان قورەگىن ىزدەدى. قۇدايىن جەردەن ەمەس ، كوكتەن ىزدەدى. ادام جانى، ءسويتىپ، ءوزىنىڭ يەسىن، تەگىن ىزدەدى. وسى تۇستا پايعامبارلار ارقىلى جاراتۋشى ولارعا ۋاحي تۇسىرە باستادى. ادام ءجايلى، الەم ءجايلى ۇلى اقيقاتتان حابار بەرە باستادى. بۇ دۇنيەنىڭ باسى مەن اياعى ءجايلى، جەر بەتىندەگى ادام ميسسياسى ءجايلى حابار ەدى ول. ءوزىنىڭ شىن يەسىن تاپقان ادامزات ءۇشىن بۇل حابار ۇلى اسۋ بولدى. ادام ادام بولىپ ەڭسە كوتەردى. «وقى! وقى! وقى!» دەۋمەنەن قۇراني-كارىم تۇسە باستادى. ادام بالاسى عىلىمعا بوي ۇردى، تابيعات زاڭدارىنا ءۇڭىلدى. اسىرەسە، رەنەسسانس تۇسىندا ادام زاماناۋي دۇنيەتانۋ نەگىزىن قالادى. 19 عاسىردا ءومىردىڭ پايدا بولۋى جايلى ەۆوليۋتسيا تەورياسى ومىرگە كەلدى. ەۆوليۋتسيانىڭ ومىرگە كەلۋى ء«ومىردى بىزگە قۇداي بەردى» دەگەن سەنىمگە سوققى بولىپ ءتيدى. ادام قۇدايعا كۇماندانا باستادى. 19 عاسىر اياعىندا فريدريح نيتسشە: «قۇداي ءولدى!» دەپ جار سالدى. ونى ەستىگەن فەدور دوستوەۆسكي: «ەسلي بوگ ۋمەر، تو چەلوۆەكۋ ۆسە پوزۆولەنو؟» دەپ ءۇن قاتتى. 19 عاسىر اياعىندا عىلىمعا، ينجەنەرلىك تاپقىرلىققا نەگىزدەلگەن يندۋستريالدى كاپيتاليستىك قوعام تاريح ساحناسىنا شىقتى. ال، كاپيتاليزمنىڭ قۇدايى اقشا ەدى. سول اقشا قۇدايىنا تابىنعان يمپەرياليستىك جاڭا زامان جىرتقىشتارىنا مورالدىك قاعيدالارى جوعارى ءدىن كەدەرگى بولا باستادى. ءبارىن ءامورالدى اقشا بيلەگەن جىرتقىش زامانعا قۇداي كەدەرگى بولدى. سوندىقتان ودان قۇتىلۋ كەرەك بولدى. قۇدايدى ودان ارمەن تومپەشتەۋ جاڭا 20 عاسىردا ودان ارمەن بەلەڭ الدى. قۇدايدى قۋدالاۋدا حح عاسىر كوممۋنيستەرى الدىنا جان سالمادى.كەڭەس وداعىنىڭ العاشقى جىلدارى جاستار اراسىندا «قۇدايسىزدار قوعامى» قۇرىلدى. ولار قۇراندى ورتەدى، مەشىت، شىركەۋلەردىڭ كۇلىن كوككە ۇشىردى.ناتيجەسىندە كەڭەس وداعى شىن مانىندەگى «قۇدايسىزدار قوعامىن» قۇردى. الايدا، بۇل قوعام قۇدايدىڭ قارعىسىنا ۇشىراپ كوپ ۇزاماي وز-وزىنەن قۇلادى. حح- عاسىر اياعىنداعى باتىس الەمىندەگى ءدىني احۋالدى امەريكاندىق ايگىلى عالىم-قايراتكەر پات بيۋكەنەن «باتىس اجالى» كىتابىندا بىلاي باعالادى. «1950 جىلدارى اجىراسۋ دەگەن نەگىزدەردىڭ نەگىزىن شايقايتىن جانجال بولاتىن، جاساندى تۇستىك تاستاۋ قىلمىس بولاتىن. ال گوموسەكسۋاليزم بولسا ايتۋعا اۋىز بارمايتىن ازعىندىق بولاتىن. ال، بۇگىنشە؟! قيىلعان نەكەلەردىڭ جارتىسى جارتى جولدا جايراپ جاتىر. ايتۋعا اۋىز بارمايتىن قىزتەكەلىك اقپارات قۇرالدارىنىڭ اۋىز سۋى قۇرىپ ايتاتىن تاقىرىبىنا اينالدى». «تاۋرات قۇدايىن ىسىرىپ تاستاپ ونىڭ ورىنتاعىن نارىق قۇدايى اقشا يەلەندى. سەكس، داڭق، اقشا، بيلىك – مىنە بۇگىنگى جاڭا امەريكانىڭ جاڭا قۇدايلارى وسىلار» «كاتوليك، پروتەستانت، پراۆوسلاۆتار- بۇگىندى بۇلاردىڭ ءبارى بىرىگىپ باتىس وركەنيەتىنىڭ جانازاسىن شىعارىپ جاتىر» «قىرىق جەتى ەۋروپا ەلى ىشىندە تەك جالعىز مۇسىلمان البانيا عانا 2000 جىلعى كورسەتكىش بويىنشا حالىقتى قۇرىپ كەتۋدەن ساقتايتىن دەموگرافيالىق ءوسۋ دەڭگەيىن ساقتاي العان. ال، قالعان ەۋروپا قۇرۋ ۇستىندە ەكەنى بەلگىلى بولدى» «وتباسى الدىنداعى جاۋاپكەرشىلىكتەن ەركەك، ايەل، بالا دەمەي ءبارىن بوساتۋ ارقىلى ەۋروپا سوتسياليستەرى جالپى وتباسى ينستيتۋتىنىڭ ومىردەگى ءرولىن السىرەتتى. ناتيجەسىندە وتباسى جويىلۋعا بەتتەدى. ونىڭ سالدارىنان ەۋروپا جويىلۋعا بەتتەدى» «حح-عاسىردىڭ ەڭ سۇراپىل ورىناۋىسۋى ايەلدىڭ وتباسىنان وفيسكە ورىناۋىسۋى بولدى. ءسويتىپ ادامدى ىستىق ۇياسىنان اجىراتقان بۇ قۇبىلىس سالدارىنان بولاشاقتا وتباسى وتباسى بولۋدان قالۋعا بەتتەدى. سونىڭمەن فەمينيزم ءداستۇرلى وتباسىنىڭ عانا ەمەس، كۇللى باتىستىڭ تۇبىنە جەتەتىن بولدى» (پات بيۋكەنەن: «باتىس اجالى») وسى تۇستا ايەل تەڭدىگى دەگەن ۇرانمەن باتىستىڭ شىعىسقا ۇسىنىپ وتىرعان گەندەرلىك ساياساتى (ايەل تەڭدىگى ادەمى ۇعىم. وعان ەشكىم قارسى ەمەس) شىعىس ەلدەرىندەگى دەموگرافيالىق ءدۇمپۋدى تەجەۋ كىلتى ەدى. دەمەك، گەندەرلىك ساياساتقا دالاقتاپ ىلەسە كەتۋ - ءوز ەلىڭنىڭ دەموگرافيالىق وسۋىنە ەمەس، وشۋىنە ۇلەس قوسۋ. قازاقستانعا دا كەلىپ جەتكەن بۇ باعدارلاما ماقساتى تۇپتىڭ-تۇبىندە قازاقتىڭ كوپ بالالى ءداستۇرلى وتباسىن ازايتىپ، سالت باستى، ساباۋ قامشى شەنەۋنىك ايەلدەر ارمياسىن كوبەيتۋگە اكەلەدى. بۇنى ءبىز بيۋكەنەن كەلتىرگەن مىسالداردان ۇقتىق. دەمەك، كوپ بالالى وتباسى دەگەن ۇعىم سالت باستى، ساباۋ قامشى ايەلدەر ءۇشىن ولاردىڭ مانساپ جولىنداعى كەدەرگىلەر بولىپ كورىنەرى حاق. وركەنيەت كوشىن باستاپ كەلە جاتقان بۇگىنگى باتىس ەلدەرىندەگى ادام احۋالىنا ەرەكشە نازار اۋدارۋ سەبەبىمىز بۇگىنگى باتىس پروبلەمالارى كۇنى ەرتەڭ شىعىس الدىنان دا شىعارى حاق. ويتكەنى بۇگىنگى باتىس – ەرتەڭگى شىعىس. سوندىقتان، پات بيۋكەنەننىڭ جان ايقايىنا تاعى دا قۇلاق تۇرەلىك: «وسىدان قايشىلىق كەلىپ شىعادى: ەل نەعۇرلىم باي بولعان سايىن حالىق ازايا باستاماق، قۇري باستاماق. ءوز مۇشەلەرىنە مەيلىنشە بوستاندىق، باقىت، راحات سىيلاۋعا ۇمتىلعان قوعام، سونىڭ ناتيجەسىندە ءوز حالقىنىڭ جانازاسىن شىعارا باستاماق. مىنا تابالدىرىقتان اتتاعان جاڭا عاسىردا، ءبىزدىڭ بولجاۋىمىزشا، تاريحي تاۋقىمەتتى كوپ تارتقان مۇسىلمان، قىتاي ءتارىزدى حالىقتاردىڭ ايى وڭىنان تۋى مۇمكىن. ەندىگى جەردەگى الەم قوجاسى وسى حالىقتار بولۋى مۇمكىن. قاسيەتتى كىتاپتاردا: ء«تۇپتىڭ –تۇبىندە جارىلقاناتىن مومىندار بولادى. جەر سولارعا قالادى » دەلىنگەن عوي...» باتىس وركەنيەتى ولەدى دەگەن العاشقى دياگنوزدى حح-عاسىر باسىندا ءوزىنىڭ اتىشۋلى «ەۆروپا ىمىرتى» كىتابىندا نەمىس فيلوسوفى وسۆالد شپەنگلەر جاسادى. ادام ءوزىنىڭ تابيعي ورتاسىنان كەتىپ ۇلكەن مەگاپوليس-شاھارلارعا شوعىرلانا باستادى. جانە بۇل تەندەتسيا بارعان سايىن ۇدەي تۇسۋدە. ءالىمساقتان جەرگە جاقىن بولعان، بۇكىل تىرلىگى جەرمەن بىتە قايناسقان ادام بالاسى ەندى جەردەن الىستاپ الىپ شاھارلاردا كوپ قاباتتى ۇيلەردە تۇرا باستادى. بۇل ادام پسيحيكاسىن تۇبەگەيلى وزگەرىسكە ۇشىراتقان قادام بولدى. تابيعات انانىڭ اياۋلى اياسىنان شىققان ادام بالاسى ۇيدە دە، تۇزدە دە تاس ۇيلەردەن شىقپايتىن بولدى. ادام جەردەن جاراتىلعان. جانە ادام ادام بولعالى تابانى جەردەن اجىراماعان. مەگاپوليستەر ادامدى جەردەن اجىراتتى. جەردەن اجىراعان ادام باقىتتان اجىرادى. ونىمەن قويماي مەگاپوليستەر ادامدى ءداستۇرلى مادەنيەت، ءداستۇرلى وتباسى، ءداستۇرلى دۇنيەتانىمىنان دا اجىراتتى دەيدى بۇل فيلوسوف. شپەنگلەردىڭ ءتۇيىندى پىكىرى تومەندەگىدەي: « ءدىنسىز، ءداستۇرسىز، شارۋا بىتكەندى سۋقانى سۇيمەيتىن جاڭا پارازيت قالا حالقى پايدا بولدى» «بۇنداي الەمدىك استانانى قۇرايتىن حالىق ەمەس - قالىڭ بۇقارا» «بۇنداي قالالارعا ءوز مادەنيەتىن الىپ كەلگەندەر بۇنداي قالانىڭ جاڭا تۋىندىسىنا، اتقارۋشى ورگانىنا، اقىرى ونىڭ قۇربانىنا اينالىپ تىنادى» (و.شپەنگلەر. «زاكات ەۆروپى») شىعىس ەلدەرى اراسىنان وسىنداي زاماناۋي وركەنيەتكە قول جەتكىزگەن ەل جاپون ەلى ەكەنى بەلگىلى. ءسوزسىز، توكيودا ءبىرىنشى بولعان ادام بۇ قالانىڭ جالت-جۇلت ەتكەن سىرتقى كورىنىسىنەن كوز الا المايدى. ءبىز دە سونداي كۇيدى باستان كەشتىك. قالاي قاراساڭ دا ينجەنەرلىك ويدىڭ شىرقاۋ دامۋىن كورەسىڭ.كورەسىڭ دە، وسىنداي دامىعان، الەمدى ارتقا تاستاپ كەتكەن جاپوندار قانداي باقىتتى دەپ تاڭ قالاسىڭ. سويتسەك، بۇل العاشقى اسەردەن تۋىنداعان الدامشى سەزىم ەكەن. دامىعان قالالىق وركەنيەتتىڭ ەكىنشى بەتىن ەرتەسىنە كوردىك. تۇندە جەراستى وتكەلدەن ءوتىپ كەلە جاتىپ جەردە كارتون قاعاز توسەنىپ جاتقان ەكى جۇزدەي كىسىنى كوردىك. بۇلار قارسىلىق اكتسياسىن وتكىزىپ جاتقان جۇرت بولار دەپ ويلادىق. سۇراستىرساق ولاي ەمەس ەكەن. بۇل جاتقاندار باسپاناسىز، جۇمىسسىز، ۇيسىز-كۇيسىز دالادا قالعان بومجدار ەكەن. ءبىز كورگەن وتكەل بۇل الىپ شاھاردىڭ ءبىر عانا جەراستى وتكەلى! ال بۇل قالادا جەراستى وتكەلدەر سانى مىڭداپ سانالادى ەمەس پە؟ سوندا دالادا قالعان بايعۇستار سانى تىم كوبەيىپ كەتپەي مە؟ ءسويتىپ، ءبىز باقىتتى جاپوندار تۋرالى شاپشاڭ بايلام جاساعان بولىپ شىقتىق. ءبىز جاپونيادا جۇرگەن كەزدە (26.09.10 – 02.10.10) جاپونيا پرەمەر-مينيسترى ەل پارلامەنتى الدىندا سويلەدى. بايانداماسىندا وتكەن 2009 جىلى سۋيتسيدپەن 30 000 جاپوننىڭ وز-وزىنە قول سالعانىن ايتتى. ەگەر ءبىز جاپونيانى زاماناۋي وركەنيەت كوشىن باستاپ كەلە جاتقان ەلدىڭ ءبىرى دەسەك، توكيونى ادام جانە اقشا رەسۋرستارى مول شوعىرلانعان الەمدىك استانالاردىڭ ءبىرى دەسەك، وندا وسى دەڭگەيگە ۇمتىلعان دامۋشى ەلدەردىڭ ەرتەڭى قالاي بولاتىنىن ەدەستەتۋ قيىن ەمەس. پارادوكستىڭ كوكەسى سول - الىكۇنگە دەيىن ادامزات دامۋدىڭ وسىناۋ كاپيتاليستىك جولىنان وزگە جولدى تاپپاپتى. ال وسىناۋ، بىزدەردى جارقىن بولاشاققا باستاپ بارا جاتقان، تەك اقشاعا، تابىسقا تابىنعان جولدىڭ قانداي «باقىتقا» الىپ بارا جاتقانىن كورىپ وتىرمىز. پارادوكستىڭ كوكەسى وسى. پوستسوۆەتتىك كەڭىستىكتە سول «جارقىن بولاشاققا» بىزبەن بىرگە بەتتەگەن ەل – رەسەي. ەندەشە رەسەيلىك زەرتتەۋشى سەرگەي ۆالتسەۆتىڭ وسى تاقىرىپقا بايلانىستى پىكىرىنە دەن قويالىق. مىسالدار ونىڭ سوڭعى شىققان اتىشۋلى «زاكات چەلوۆەچەستۆا» اتتى كىتابىنان الىندى. «1999 جىلى كانن كينوفەستيالىندە ەرەكشە ءبىر رەكورد تۋرالى دەرەكتى فيلم كورسەتىلدى. فيلم كەيىپكەرى سەكس مايدانىندا الدىنا جان سالماعان جەزوكشە بولىپ شىقتى. ول قاتارىنان 151 ەركەكتى بۇتىنىڭ اراسىنان ءۇزلىسسىز وتكىزىپ الەمدىك رەكورد جاساعان ەكەن» «2005 جىلى ۆەنەتسيا فەستيۆالى باس بايگەنى ەكى قىزتەكە گوموسەكسۋاليست كوۆبوي تۋرالى « بۇكىر تاۋ» اتتى فيلمگە بەردى» «وركەنيەتتى باتىستىڭ دانيا، بەلگيا، گەرمانيا، شۆەتسيا، نورۆەگيا، يسلانديا، گوللانديا، فرانتسيا ءتارىزدى 30 ەلىندە بۇگىندە ەركەككە – ەركەك، ايەلگە- ايەل ۇيلەنە بەرەتىن زاڭ قابىلداندى» «گوللانديادا رەسمي تۇردە ەركەككە ەركەك ۇيلەنگەن 50 000 «وتباسى» تىركەلگەن. اي سايىن بۇل ەلدە بۇنداي ءبىر جىنىستى ادامداردان تۇراتىن 3 مىڭداي نەكە تىركەلەدى ەكەن. جانە ولاردىڭ بالا اسىراپ الۋىنا رۇقسات ەتىلگەن» «تەك 2003 جىلدىڭ وزىندە عانا اقش-تىڭ 28 شتاتىندا بالالاردى جىنىستىق قاتىناسقا تارتقانى ءۇشىن 176 سۆياششەننيك قىزمەتتەن قۋىلدى. ال، قالعان 18 شتات بولسا ونداي پەدوفيل-ازعىنداردى شىركەۋدەن قۋدى قولعا العان جوق» «بۇگىندە شامامەن 20 ملن. امەريكاندىق دەپرەسسياعا ۇشىراعان. دەپرەسسيا سۋيتسيدكە اپاراتىن جول ەكەنى ايان. «1970 جىلى اقش-تىڭ ۇلتتىق شىركەۋلەر كەڭەسى مۇشەلىككە سايتان شىركەۋىن قابىلدادى» «بانديت، جەزوكشە، كيللەر، الاياق – مىنەكي بۇگىنگى كىتاپ، پرەسسا، كينو، تەلەەكراننىڭ باستى كەيىپكەرلەرىنە اينالدى». «وركەنيەتتىڭ ودان ارمەن دامۋى ادامدى ادامدىق تۇعىردان تۇسىرۋگە بەتتەگەن. تۇرپايى تۇلعا – مىنەكي كاپيتاليزمگە كەرەگى. وسىندايلار كاپيتاليزمنىڭ تابىس كوزى» «سوندىقتان دا 2005 جىلى شىققان ءبىر امەريكاندىق ءفيلمنىڭ اتى «بايى نەمەسە باقىل بول!!» - دەپ جار سالادى. «رەسەي كاپيتاليزمگە اياق باسقان جىلدار ىشىندە ەلدەگى ناشاقورلار سانى 12 ەسە ءوستى» «حىح- عاسىر اياعىندا فريدريح نيتسشە «قۇداي ءولدى!» - دەپ جار سالسا، اراعا عاسىر سالىپ ەريح فرومم: «ەگەر ءحىح- عاسىردا قۇداي ولگەن بولسا، وندا حح-عاسىردا ادام ءولدى!» - دەپ مالىمدەدى. حىح- عاسىردا قۇداي، حح-عاسىردا ادام ولسە، وندا مىنا جاڭا ءحىح –عاسىر... سايتاننىڭ سالتاناتى بولماعاندا نە؟ بايقاپ وتىرعانىڭىزداي، ءبىز باتىس، شىعىس زەرتتەۋشىلەرى بولىپ قارعاپ وتىرعانىمىز كاپيتاليزم ەكەن. بۇدان كەلىپ باتىستان باسقا ەلدەردە پروبلەما جوق ەكەن دەگەن پىكىر تۋماۋى كەرەك. اڭگىمە، جالپى ادامزاتتىڭ دامىعان بولىگى بۇگىن ۇرىنعان، ال دامۋشى بولىگى ەرتەڭ ۇرىناتىن ىندەت تۋرالى بولىپ وتىر. بۇل ىندەتتىڭ كىسى شوشىرلىقتاي اسقىنۋىنىڭ بىرنەشە سەبەپتەرى ايتىلدى. الايدا ادام ازعىنداۋىنىڭ باستى سەبەبى بىزدىڭشە – قۇدايسىزدىق. «ەگەر قۇداي ولسە، وندا ادام بىلگەنىن ىستەي بەرەتىن بولاتىن شىعار؟» دەپ وسىدان 1،5 عاسىر بۇرىن دوستوەۆسكي ايتقان كورەگەندىك شىندىققا اينالدى. جوعارىدا كەلتىرىلگەن بۇگىنگى ادام ازعىنداۋىنىڭ قىسقا عانا كورىنىستەرى. سونىڭ ءوزى نەنى كورسەتەدى؟ بۇل... قۇدايدان قۇتىلعان ادامنىڭ ادام ايتقىسىز ەركىندىككە قولى جەتكەنىن كورسەتەدى. سول ەركىندىكتى ابسۋردقا اينالدىرعانىن كورسەتەدى. ابسۋردقا عانا ەمەس جۇگەنسىزدىككە اينالدىرعانىن كورسەتەدى. جەر بەتىندە سايتاننىڭ سالتاناتى باستالعانىن كورسەتەدى. قۇدايدان قۇتىلعان ادام سايتاننىڭ جەتەگىندە كەتكەنىن كورسەتەدى. الايدا ادامزات شىعارعا تەسىك تابا الماستاي تىعىرىققا تىرەلدى دەۋدەن اۋلاقپىز. ويتكەنى، ادامعا جاراتۋشى بەرگەن پوتەنتسيال -مۇمكىندىك تىم زور، تىم وراسان. ول مۇمكىندىك ادامنىڭ ماتەريالدىق ەمەس، - رۋحاني سۋبستانتسياسىندا. ادام دەنەسى –حايۋاننان، رۋحى - اللادان. ادام ماتەريالدىق سۋبستانتسيا جەتەگىندە كەتە بەرۋى مۇمكىن ەمەس. الىستاپ بارىپ، تىعىرىققا تىرەلىپ بارىپ ادام ماتەريالدىق مولشىلىقتان جەرىپ ءوزىنىڭ رۋحاني سۋبستانتسياسىنا بەت بۇرارى ءسوزسىز. ماتەريالدىق مولشىلىقتان باقىت تابا الماعان ادام جوعالتقان جاراتۋشىسىن قايتا ىزدەيتىن بولماق.

قوسىمشا جۇكتەلگەن سۋرەتتەرى:

كەلۋ قاينارى: http://www.elarna.net/oku.php?tur=11&id=2398

پىكىرلەر:

---

جازعان لەبىزىڭىز300 ارىپتەن اسپاسىن!

ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە 99 دەپ جازىڭىز، راحىمەت!

98 + 1 = ? sozsiz sifermen tolteringiz.