ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-11-161216428648 %52 %
2019-11-171215391738 %62 %
2019-11-18417125451 %49 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: ەل-ارنا گازەتى | وسى ارادان ەلارنا گازەتىنىڭ بارلىق ماقالالارىن كورۋگە بولادى..

مەندە ال-ارناعا جازبا-ماقالا جازامىن، وندا وسى ارانى باسىڭىز!

جولدانعان ۋاقىتى: 03:19 - 2016/11/22

ماقالا جولداۋشى: Almasbek
ماقالا اپتورى: جاۋاپتى رەداكتور: بارشا تەگىس قىزى، نۇرلان جارىلقاسىن ۇلى
اپتوردىڭ مەكەن-جايى: قۇلجا قالاسى
وسى ماقالانىڭ كىرىلشە نۇسقاسى، وسى ارانى باسىڭىز

Осы мақаланың кірілше нұсқасы, осы араны басыңыз



: PDF Download - Жұктеұ - Скачать - ءتۇسىرۋ

ايتۋلى حالىق ونەرپازى ماعاۋيا بايمۇحامەت ۇلىمەن سىر - سۇحپات
كەلۋ قاينارى: ىلە گازەتى

نۇرلان جارىلقاسىن ۇلى

نۇرلان: سالەمەتسىز بە، ماعاۋيا اعا، كوپتەن بەرى وزىڭىزبەن، ءومىرىڭىز جايلى سىر - سۇحپاتتا بولۋدى ويعا ءتۇيىپ جۇرگەن ەدىم. مىنەكي، ءساتى ءتۇسىپ، ءديدارلاسقانىما ايرىقشا قۋانىپ وتىرمىن. ءبىر باسىڭىزدا انشىلىك، اقىندىق، تەرمەشىلىك، سازگەرلىك سىندى ءتورت ءتۇرلى ونەردىڭ توعىسقانىنا حالقىمىز كۋا، وسىنداي كوپ ونەر سىزگە قايدان دارىدى ەكەن؟

ماعاۋيا: راقىمەت، نۇرلان باۋىرىم، وسىنداي دارا ونەر قۇدىرەتىن سيلاعان تابيعاتقا نەگە رازى بولمايىن. ودان سوڭ، بۇل ونەر انامنىڭ اق سۇتىمەن دارىدى، سوندىقتان ناعاشىلارىما دا كىشىلىكپەن قۇرمەت بىلدىرەمىن. شەكسپير «دارىن دەگەنىمىز ۇشىقىن عانا، ونى لاۋلاتىپ قوزدىراتىن تالانت، تالانت بولماسا ءوشىپ قالۋى دا مۇمكىن» دەگەن ەكەن، از عانا ەرەكشەلىگىممەنەن «ءبىردىڭ ونەرى مىڭنىڭ يگىلىگى» دەگەندەي كوپتىڭ يگىلىگىنە جاراسام، ماعان بۇدان ارتىق باقىت بولماس، ءسىرا. قۋاناتىنىم ءوز ۇرپاقتارىم نۇرگۇل مەن گۇلزيناتىم مەنىڭ جولىمدى قۋىپ ءجۇر. مەنىڭ عانا جولىم ەمەس - اۋ، قازاقتىڭ ونەر مۇراگەرلەرى بولىپ، ءداستۇرلى ءان - تەرمە ورىنداپ جۇرگەنى اتا - انا بولعان بىزدەردى ماقتانىش الەمىنە قالىقتاتادى.

نۇرلان: ءوزىڭىزدى جانە ونەر جولىنداعى ءومىرىڭىزدى قىسقاشا تانىستىرا كەتسەڭىز؟

ماعاۋيا: مەن 1956 - جىلى توعىزتاراۋ اۋدانى جىرعالاڭ اۋىلىندا داۋلەتتى وتباسىندا دۇنيەگە كەلگەن ەكەم. 1970 - جىلى باستاۋىش مەكتەپتىڭ 4 - كلاسىن وقىپ جۇرگەن جەرىمنەن «باي شارۋانىڭ بالالارى مەكتەپتە وقۋىنا بولمايدى» دەيتىن اسىرا سىلتەۋدىڭ كەسىرىنەن مەكتەپتەن قايتارىلىپ، ءوندىرىس جۇمىسىنا جەگىلدىم. 1974 - جىلى جىرعالاڭ اۋىلدىق ورتا مەكتەپ قوعامنان بالا جيىپ وقىتقاندا، سول قاتاردا ورتا مەكتەپكە ءتۇسىپ وقىدىم. 1978 - جىلى جىرعالاڭ اۋىلدىق وشاعاندى مال شارۋاشىلىق مەكتەبىنە وقىتۋشى بولۋمەن قوعامدىق قىزمەتكە ارالاستىم. مەنىڭ ونەرگە جول تارتۋىم 17 جاسىمنان باستالدى، اسىرەسە، ورتا مەكتەپ قابىرعاسىندا كونسەرتتەرگە قاتىناسىپ جۇرگەن كەزىمدە دومبىرا تارتىپ ءان سالۋ جاعىنان العاشقى ساۋاتقا يە بولدىم دەسەم بولار، 1978 - جىلدان باستاپ اۋدان، ايماق، وبلىستا وتكىزىلگەن بۇقارالىق مادەنيەت قيمىلدارىنا قاتىناسىپ تالاي مارتە سيلىق الدىم. سول ەڭبەكتەرىمدى تانىعان جەرگىلىكتى پارتيا، ۇكىمەت تاراۋلارى 1984 - جىلى جىرعالاڭ اۋىلدىق مادەنيەت فۋنكتىنە قىزمەتكە ورنالاستىردى. 1989-، 1990 - جىلدارى شينجياڭ مادەنيەت - كوركەمونەر كادرلار مەكتەبىنەن ءبىلىم تولىقتىردىم. 1995 - جىلى توعىزتاراۋ اۋداندىق مادەنيەت - دەنەتاربيە مەكەمەسى مادەنيەت سارايىنا سول كەزدەگى اكىم سامارحان اعايدىڭ قولداۋىمەن جوتكەلىپ كەلدىم.

نۇرلان: ماعاۋيا اعا، ورىنداعان اندەرىڭىزدى بالا جاسىمىزدان باستاپ راديودان، ءان - تەرمە تاسپالارىڭىزدان تىڭداپ سۋسىنداپ ەرجەتكەنبىز، سول ءان - تەرمەلەرىڭىزدى قايدان ۇيرەندىڭىز؟ كىمدەردى ۇستاز تۇتتىڭىز؟

ماعاۋيا: اكەم جاس كەزىندە اۋىلداعى حالىق اقىندارىنا ىلەسىپ ولەڭ ايتقان، ءان - جىرعا جانى قۇمار كىسى ەكەن. شەشەم - گۇلداري دا جاس كەزىندە توي - تومالاقتاردا ايتىسقا تۇسكەن دەگەندى ەل اۋزىنان ەستىگەنىم بار. مەن بىلگەندە، شەشەم سوزگە شەشەن ادام بولاتىن، ءبىزدى سىنداپ ۇرىسقاندا سوزىنە جاۋاپ تاۋىپ بەرە الماي قالاتىنبىز. اكەمنىڭ ءان - جىرعا قۇمارلىعىنان بولار، ءبىزدىڭ ۇيدەن مەن ەس بىلگەلى راديو قابىلداعىش ۇزىلگەن ەمەس. مەنىڭ ءان ۇيرەنۋىمە قازاقستاننىڭ «شالقار» راديو پروگرامماسى ۇلكەن مەكتەپ بولدى. ودان سوڭ، اۋىلىمىزدا اعاشتان بىتەۋ شاۋىپ جاساعان دومبىراسى بار نۇق قاسىم ۇلى دەگەن دومبىراشى اتامىز بولعان. سول جارىقتىق اتامىز ماعان دومبىرانىڭ قۇلاق كۇيىن كەلتىرۋ مەن پەرنە باسۋدى كورسەتىپ بەرگەن ەدى. سول كىسىگە قوسا بۇرىنعى ءبي - شەشەندەردىڭ سارقىتى- سوزگە شەشەن ءانسار كەرۋەن ۇلى دەگەن اتامىز بولدى، سول كىسىدەن دە از ونەگە - ۇلگى العامىن جوق. 1984 - جىلى العاش شينجياڭ حالىق راديو ستانسياسىنا شاكەن قاليوللا ۇلى اعامىز ەستايدىڭ «جاي قوڭىرى»، ءماديدىڭ «ءۇش قاراسى» سياقتى اندەردى جازىپ الدى. كەيىن راديودا تاراتقاندا وسى اندەردىڭ تەكستەرىنىڭ ارەدىك جەرلەرىندە ازداپ قاتەلىكتەر بولىپ جۇرگەنىن سەزدىك. ول تۇستا قازىرگىدەي ءان جيناقتارى جانە باسقا ۇيرەنۋ ماتەريالدارى كەمشىل بولاتىن، سوندىقتان ونداي قاتەلىكتەردى جۇرت كەشىرەر دەپ ويلايمىن. 1978 - جىلدان كەيىن زامان وڭالىپ ەل ىشىندەگى تويلاردا ولەڭ ايتاتىن بولدى. ەل اۋزىنان دا ءبىرقىدىرۋ حالىق اندەردى دە ۇيرەندىم. وسىلاردىڭ ناتيجەسىندە قازىرگە دەيىن شينجياڭ حالىق راديو ستانسياسى مەن ورتالىق حالىق راديو ستانسياسىنا 100 دەن ارتىق ءان تەرمە جاريالادىم. «سيلاماساڭ بولاما»، «قارعاش - اي»،«ءاري - اي»، «ەلۋ ەردىڭ جاسى» سياقتى ءتورت جىر تاسپاسىن حالقىما جىردان شاشۋ ەتتىم، وبلىستىق، اۆتونوميالى رايوندىق تەلەۆيزيادا 1986 - جىلدان بەرى مەن ورىنداعان قىرۋار ءان - تەرمەلەر جاريالانىپ كەلەدى.

نۇرلان: ءسىز ايتىس اقىنى سيپاتىمەن ايماقتىق، وبلىستىق ايتىستاردىڭ الامان بايگەسىنە تۇسكەن ەكەنسىز، ايتىس ونەرىنە قانشا جاسىڭىزدان باستاپ بەيىمدەلدىڭىز؟ كىمدەرمەن ايتىستىڭىز؟ ودان سوڭ تەرمەگە قالاي اۋىستىڭىز؟

ماعاۋيا: مەن 1980 - جىلدان باستاپ، توعىزتاراۋ اۋدانىندا وتكەن اقىندار ايتىسىندا ايتىسقا ءتۇسىپ ءجۇردىم. 1983 - جىلى شىلدەدە ىلە ايماعىنىڭ 2 - كەزەكتى اقىندار ايتىسى موڭعۇلكۇرە اۋدانى قاشاجار اۋىلىنىڭ سۋىقتوعاي دەگەن جەرىندە وتەتىن بولىپ، توعىزتاراۋدان تانىمالى قالامگەر اعامىز كوپبوسىن ساسكين ءۇش اقىندى باستاپ جولعا شىقتى. ول كەزدە جول دا ناشار بولاتىن، سۋىقتوعايعا جەتكەنشە اۆتوبۋزداعى اقىندار اندەتىپ، ولەڭدەتىپ باردىق. كوپبوسىن اعامىز بارعانشا مەنى اۆتوبۋزدا تۇرەگەلتىپ قويىپ ءان سالدىردى. كەيدە اۆتوبۋزدىڭ باسىنا توبەمدى ۇرىپ تا الام. مەن جاس بالامىن، ماعان ءبارى دە قىزىق سەزىلەدى. قازىر ويلاسام، سول رەتكى ساپار مەنى شىڭداۋدىڭ، ەلگە تانىتۋدىڭ ءبىر ءتاسىلى ەكەن - اۋ... مەن سول رەتكى ايتىستا كۇنەس اۋدانىنىڭ اقىنى نۇرسارامەن ايتىسۋعا ساحناعا شاقىرىلدىم. ەكەۋىمىزدىڭ ايتىسىمىزدىڭ ۇلكەن مازمۇنى - ءوزدى ءوز اۋدانىمىزدىڭ ەرەكشەلىگىن ماقتانىشپەن جىرلاۋ بولدى. ايتىس قىزبا تابانعا جەتكەندە، نۇرسارا:

ارىپتەس قانداي جاقسى سەزىمدەرىڭ،

بالقىتتى جان - جۇيەمدى ءسوزىڭ سەنىڭ.

اتاقتى اۋدانىڭدا نەمەنەڭ بار؟

سياقتى مەنىڭ سوناۋ بەجىڭگەرىم دەگەندە،

مەن:

جولىمنىڭ الىس - جاقىن شيىرى بار،

نۇرسارا بۇنى داعى ۇعىنىپ ال.

نەمەنە بەجىڭگەرىڭ،

اۋدانىمنىڭ -

ەت كەنى شارولايداي سيىر بار.

الامىز ءبىر وزىنەن ءۇش توننا ەت،

سوعىمعا شاقىرعانىم بيىل ءبىر بار - دەپ جاۋاپ قايىردىم.

سودان وسى جولعى اقىندار ايتىسىندا ايتىسقا تۇسۋمەن قاتار «سويلە دەسەڭ سويلەيىن» اتتى حالىق تەرمەسىن ورىنداپ ەدىم، كورەرمەن كوپتىڭ دۇرىلدەگەن قول شاپالاعى باسىلماي قويدى، جيىن اساباسى تاعى ءبىر تەرمە ورىنداۋىما رۇقسات ەتتى. سونىمەن شىلبى ءالىماقىن ۇلىنىڭ «جىگىت سىنى» اتتى تەرمەسىن ورىنداپ تىڭدارمان كوپتىڭ العىسىنا جاۋاپ قايتاردىم. سول رەتكى قيمىلدا ىلە قازاق اۆتونوميالى وبلىستىق مادەنيەت مەكەمەسىنىڭ سول كەزدەگى باستىعى ءسابيعازى اعامىز اقىندارعا اشقان شاعىن جيىن ۇستىندە «ءبىزدىڭ اۋىز ادەبيەتىمىزدىڭ تەرمە جانرىن ماعاۋيا جولداس ساحناعا قايتا كوتەردى، بۇدان كەيىنگى قيمىلداردا، ءسوزسىز، جالعاستىرامىز» دەدى. كەلەسى جىلى ىلە قازاق اۆتونوميالى وبلىسىنىڭ 30 جىلدىق تورقالى تويىندا ءار ايماقتان ەكىدەن تەرمەشى قاتىناساتىندىعىن وبلىستىق مادەنيەت مەكەمەسى ۇقتىردى. سودان باستاپ مەن تەرمە ونەرىنە قاراي ويىسا بەردىم. ال تەرمە جانرىن حالىق تانىپ، 2008 - جىلى مەملەكەتتىك قورعالاتىن بەيزاتتىق مادەني مۇراعاتتار قاتارىنا قوسىلدى.

نۇرلان: قازىرگە دەيىن قانشا ولەڭ - تولعاۋ، ءان اۋەنى مەن تاماشا تەرمەلەر جازدىڭىز؟ اتىن اتاپ، ءتۇسىن تۇستەپ كورسەتىپ، سولاردىڭ ىشىندەگى ۋاكىلدىك سيپاتتى شىعارمالارىڭىزدىڭ مازمۇنىن قىسقاشا بايانداي كەتسەڭىز؟

ماعاۋيا: مەن ءبىرتالاي ولەڭ - تولعاۋ، 15 ءان اۋەنىن، 30 دان استام تەرمە جازدىم. وسى جازعاندارىمنىڭ ىشىندە 10 تەرمەگە ماقام (اۋەن) جازىپ ورىندادىم، بالام گۇلزينات 7 تەرمەمە ماقام جازىپ ورىندادى. تانىمالى سازگەر توققوجا اپەن ۇلى «تەرىڭدى توكسەڭ ەلىڭە» اتتى تەرمە تەكسىنە جاڭا زامان ۇلگىسىندە اۋەن جاساپ MDY قوسىپ، گۇلزيناتتىڭ ورىنداۋىندا تەلەۆيزيادا تاراتىلدى. مەنىڭ تەرمە جاسامپازدىعىمدا حالىق جىلى قابىلداپ، كەڭ تارالىپ جۇرگەنى «سەندەرمەن كەڭەس قۇرايىن» اتتى تەرمە، بۇل تەرمە تەك ەلىمىزدە عانا ەمەس، قازاقستان ساحنالارىندا دا ورىندالىپ جۇرگەنىن سول جاقتاعى ازاماتتارىمىزدان ەستىدىك. ودان سوڭ «قادىرلەسەڭ حالقىڭدى» اتتى تەرمەم جاڭا ساباق رەفورماسى بويىنشا قۇراستىرىلعان باستاۋىش مەكتەپ 6 - كلاس مۋزىكا وقۋلىعىنا ەنگىزىلدى. «ايتايىن اقىل، اعايىن» اتتى تەرمەم اينۇر قالاي قىزىنىڭ ورىنداۋىندا ورتالىق حالىق راديو ستانسياسى مەن شينجياڭ حالىق راديو ستانسياسىندا تاراتىلىپ كەلەدى. بۇلاردان باسقا «بالاما»، «اقيقات اقتالمايدى دەمەڭىزدەر»، «ءمىناجات» سياقتى تەرمەلەرىم توي - توپتاردا ورىندالىپ، دىبىس تاسپالارى ارقىلى تارالىپ ءجۇر. ۇلىلاردىڭ «دوستىق جوعالسا، قوعام ازادى؛ ماحاببات جوعالسا ۇرپاق ازادى» دەگەنىندەي مەنىڭ بۇل تەرمەلەرىمنىڭ مازمۇنى: اقىليالىق مازمۇندى قامتىعان حالىقتى ىنتىماق - بەرەكەگە شاقىرۋ، ونەر بىلىمگە ۇندەۋ؛ التىننىڭ باعاسى شەكتى، ادامگەرشلىكتىڭ باعاسى شەكسىز ەكەنىن تۇسىندىرەتىن قوعامدىق تاربيەلىك ماندەردى قامتىپ جاتادى.

نۇرلان: ەلىمىزدىڭ ءىشى - سىرتىنداعى تەرمە ونەرىمەن شۇعىلدانىپ جۇرگەن قالامداس ساپتاستارىڭىزدان كىمدەردى اتار ەدىڭىز؟ مۇمكىن بولسا، ولاردىڭ تەرمەلەرى تۋرالى ءوز وي - پىكىرىڭىزدى بايانداي كەتسەڭىز؟

ماعاۋيا: «اقىن ەلدىڭ ءدۇلدۇلى، ءانشى ەلدىڭ بۇلبۇلى» دەگەن عوي دانا حالقىمىز، ەلىمىزدىڭ سىرتىنداعى ونەر قايراتكەرلەرىنەن مەنىڭ ۇستاز تۇتىپ ءتانتى بولاتىنىم - نارتاي بەكەجانوۆ ەدى. نارەكەڭنىڭ باس تەرمەسى «نارتاي» ۇشقىر وي، شەشەن تىلمەن ۇندەسىپ، قابىسىپ، قاباتتالىپ كەلىپ تىڭدارماننىڭ الپىس ەكى تامىرىن ءيىتىپ، كوڭىلىنەن شىعادى. ودان سوڭ جانىبەك كارمانوۆتىڭ «ءومىر تولعاۋى» كىسىنى تولعاندىرارلىق ايرىقشا تارتىمدى تەرمە. ال ەلىمىزدەن الىپ ايتساق، قىدىرقان مۇقاتايەۆتىڭ «ارمان - اي» تەرمەسى، ايتىس اسپانىنىڭ اقيىعى قۇرمانبەك زەيتىنعازى ۇلىنىڭ «نەمەنەدەن بەلگىلى» اتتى تەرمەسى مەن جامالقان قاراباتىر قىزىنىڭ «سالەمدەمە» اتتى تولعاۋى سياقتىلار، مەنشە حالىقتىڭ ويىنان شىعاتىن تارتىمدى تۋىندىلار.

نۇرلان: ءسىز تەرمەنىڭ تەكستىن دە، اۋەنىن دە ءوزىڭىز جازىپ، ءوزىڭىز ورىنداۋمەن حالقىمىزدىڭ جۇرەگىنەن تەرەڭ ورىن العان تەرمەشى بولۋمەن بىرگە، ىلە پەداگوگيكا شۋەيۋانى كۇيتۇن وقىتۋ رايونىندا اشىلعان «تەرمە ونەرى» كلاستارىنا تەرمە تۋرالى ساباق بەرىپ كەلەسىز. بۇل ءسىزدىڭ تەرمە ونەرىن زەرتتەۋدى دە قولعا العاندىعىڭىزدى كورسەتەدى. ەندەشە، تەرمە تەگى قانداي ونەر؟ ونىڭ وزگە ونەر تۇرلەرىنەن پارىقتالاتىن بوگەنايى قايسىلار؟

ماعاۋيا: ونىڭ راس، ۇرپاق تاربيەلەۋ ۇلاعاتتى ءىس ەمەس پە، ونەر جولىن قۋعان ۇرپاقتارعا ۇستاز بولعانىما ماقتانامىن. ۇرپاق ءبىزدىڭ مۇراتىمىز عوي، حالقىمىزدا «ۋىقتى باسقۇر ساقتايدى، ۇلتتى ءداستۇر ساقتايدى» دەگەن اتالى ءسوز بار، وسىنداي ۇلتتىق كوركەمونەر مۇراگەرلەرىن تاربيەلەيتىن مەكتەپ اشىپ بەرگەن پارتيا مەن ۇكىمەتكە، ۇلت مادەنيەتىنىڭ جوقشىسى بولىپ جۇرگەن ارقالى ازاماتتارىمىزعا، بابالارىمىزدىڭ ونەرىن ۇيرەنسىن دەپ وسى مەكتەپكە بالالارىن جىبەرىپ جاتقان بارلىق ونەر سۇيەر اتا - انالارعا ۇلكەن قۇرمەت بىلدىرەمىن. ال تاقىرىپقا ورالار بولساق، تەرمە مازمۇنىندا بۇكىل ادامزاتتى، قوعامدى، ىزگىلىكتى ارقاۋ ەتىپ تىڭدارمانىن پاك تە ادال ءومىر كەشۋگە ۇندەپ، قيانات پەن جاۋىزدىقتىڭ جولىن كەسىپ، ادامدار تەڭدىگىن باستى ماقسات ەتەدى. تەرمەنىڭ وزگە مۋزىكالىق ونەر تۇرلەرىنەن پارىقتالاتىن ءوز الدىنا اۋەن، ماقامى بار. مۋزىكا اسپاپتارىنان دومبىرا، قوبىز، گارمونمەن سۇيەمەلدەپ ورىندالادى.

نۇرلان: ردايو - تەلەۆيزيادا تاراتىلىپ جاتاتىن كونسەرتتەردە، اۋەنىن دە، ءسوزىن دە ءوزىڭىز جازىپ، ءوزىڭىز ورىنداپ جۇرگەن ءسىزدى دە، ال ءوزى تەرمە جازبايتىن، تەك وزگەلەردىڭ تەرمەسىن ورىنداپ جۇرگەن ورىنداۋشىلاردى دا «ايگىلى تەرمەشى پالەنباي» نەمەسە «تەرمەشى تۇگەنباي» دەپ اتاپ جاتادى. سوندا تەرمە جاسامپازدىعىن جاراتۋشى مەن ونى ورىنداۋشىنىڭ اراسىندا ەشقانداي پارىقتىڭ بولماعانى ما؟ ءبىز بىلگەندە، ءوز جانىنان جىر شىعارىپ ايتاتىنداردى «جىراۋ»، ال باسقالاردىڭ جىرىن ورىنداعانداردى «جىرشى» دەۋشى ەدى، سول سياقتى ءوز جانىنان تەرمە شىعارۋشىلار مەن ءوز جانىنان تەرمە شىعارا المايتىن، تەك وزگەلەردىڭ تەرمەسىن ورىندايتىن ورىنداۋشىلاردى ءبىر - بىرىنەن پارىقتاۋ كەرەك سياقتى؟ بۇل ماسەلەگە ءسىز قالاي قارايسىز؟

ماعاۋيا: راس ايتاسىڭ، تەرمەنى ءوزى جاراتىپ، ءوزى ورىنداسا دا تەرمەشى، بىرەۋدىڭ جاراتقان تەرمەسىن ورىنداپ جۇرگەندەر دە تەرمەشى بولىپ ءجۇر. مەنشە، باسقالاردىڭ دايىن تەرمەسىن ورىنداعاندار «تەرمە ورىنداۋشى»، تەرمەنى ءوزى جاراتىپ، ءوزى ورىنداعانداردى «تەرمەشى» دەسە قايتەر ەدى. ءوزىڭ ايتقانداي، «جىراۋ» دەگەن اتاۋ مەن اتاۋعا بولار ما؟ كەيبىر زەرتتەۋشىلەردىڭ ايتۋىنشا، جىراۋ - ەرتەدەگى حانداردىڭ اقىلشىسى، قول باستايتىن قولباسىلارى نەمەسە ساياسي قايراتكەرلەرى ىشىندەگى ءوز جانىنان سۋىرىپ سالعان ولەڭدەرى ارقىلى حاندارىنا اقىل - كەڭەس بەرەتىن ويشىل، شەشەن كىسىلەر. جىراۋ دەگەن اتاۋدى كەز - كەلگەن ادامعا بەرە سالۋعا كەلمەيدى دەپ ءجۇر، قايسىسى اقيقات، قايسىسى جالعان ەكەنىن بىلە الماي قينالىپ جۇرگەن جايىم بار. ودان سوڭ تاعى ءبىر ءىس - راديو - تەلەۆيزيا دا تەرمەنىڭ اۋەنىن جاساعانداردى دا «تەرمەشى» دەپ جاريالاپ ءجۇر، مەنشە، تەرمەنىڭ اۋەنىندە تەرمەنىڭ مازمۇنى شىقپايدى، ويتكەنى ول - دىبىس، ءتىل ەمەس. تەرمەنىڭ تەكسىن باسپاعا باستىرساق «تەرمە» دەپ جاقشاعا الىنادى، ولاي بولسا، تەرمە نە ءۇشىن اۋەنىن جازعاندىكى بولادى؟! مەنىڭ ويىمشا، جوعارىداعى ەكى اتاۋدىڭ دۇرىس - بۇرىستىعىنا زەرتتەۋشىلەر زەر سالىپ، ادەبيەت - كوركەمونەرشىلەر بىرلەستىگى نە دەپ اتايتىندىعى تۋرالى شەشىم جاساسا ەكەن...

نۇرلان: ءسىز اۋەلدە ايتىس اقىنى بولىپ ساحناعا شىققان ەكەنسىز، قازىر مىنە ايتۋلى تەرمەشى بولىپ وتىرسىز. ءسىزدىڭ تەرمە ونەرىنە ويىسۋىڭىزعا نە سەبەپ بولدى؟ ەگجەي - تەگجەيلى تۇسىندىرە كەتسەڭىز.

ماعاۋيا: اۋەلدە ايتىس اقىنى بولعانىمدى جوعارىدا ايتىپ كەتتىم. ال ەندى تەرمەگە ات باسىن بۇرۋداعى سەبەبىم: بىرىنشىدەن، ايتىس ونەرىمەن سالىستىرعاندا، تابيعاتىمدا تەرمەگە بەيىمدىلىگىمنىڭ بار ەكەنىن بايقادىم؛ ەكىنشىدەن، تەرمە ادالدىققا، ادامدىققا، شاپاعات، مەيىرىمدىلىككە تاربيەلەيتىن اسا قۇندى ونەر ەكەنىن بىرتىندەپ تانىدىم. ۇشىنشىدەن، مەن كوسەم سوزگە بالا جاسىمنان قىزىعاتىنمىن، سوندىقتان شەشەندىك سوزدەر، ماقال - ماتەلدەر، اقىليالىق سوزدەردى وزگەلەردىڭ اۋزىنان ءبىر رەت ەستىسەم بولدى ەسىمدە قالاتىن. «ەر قازىناسى - باسقان ءىز، ەل قازىناسى- كونە كوز، ءسوز قازىناسى - ەسكى ءسوز» دەگەن ەمەس پە، مەن ەسكى ءسوز قامباسىن اقتارىپ، ءتىل قورىمدى بايىتىپ، ءناسيحات اقىلدىڭ كىلتى دەگەن راس بولسا، ءومىر تاجىريبەلەرىمدى سارالاپ حالقىمنىڭ كوڭىلىنەن شىعاتىن تەرمەلەر جاراتىپ، ۇمىت بولىپ بارا جاتقان وسى ءبىر ۇلاعاتتى ونەردى حالقىممەن قايتا تابىستىرسام دەيتىن مۇراتتى ۇستاندىم.

نۇرلان: ءبىزدىڭ بىلۋىمىزشە، ءسىز تەك تەرمە جاراتىپ، تەرمە ورىنداۋمەن عانا شەكتەلمەي، ۇستازدىق ەتىپ شاكىرت تاربيەلەۋدى ءبىر مۇراتىڭىز ەتىپ ۇستانىپ كەلە جاتىرسىز، سوندا ءسىز شاكىرت تاربيەلەۋ جولىنا قاشاننان باستاپ ءتۇستىڭىز؟ العاشقى شاكىرتتەرىڭىز كىمدەر بولدى؟

ماعاۋيا: دۇرىس ايتاسىڭ، «شاكىرتسىز ۇستاز تۇل» دەگەندى دانىشپان اتامىز اباي ايتپاپپا ەدى. مەن تەرمە ايتۋ مەن حالىقتىق اندەردى ايتۋ جاعىنداعى وزىندىك شەبەرلىگىمدى بەتپە - بەت وتىرىپ كورسەتىپ تاربيەلەگەن شاكىرتتەرىم بولدى. بۇدان تىس ءان تاسپالارىمنان ەلىكتەپ ۇيرەنىپ، ءسىزدىڭ شاكىرتىڭىزبىن دەپ جۇرگەن ونەرپازداردى دا كەزىكتىرىپ ءجۇرمىن، ولاردىڭ دەنى اۋىل اراسى نەمەسە باسقا ايماق، وبلىستاردا تۇرادى. ماسەلەن: ءوزىمنىڭ جەرلەستەرىمنەن توعىزتاراۋ اۋداندىق ءان -ءبي ۇيىرمەسىندەگى قاشاتاي جۇمانالى ۇلى، ىلە قازاق اۆتونوميالى وبلىستىق ءان - ءبي ۇيىرمەسىندە جۇمىس ىستەيتىن ءابدىباقىت سۇلتانبەك ۇلى مەن ءپاريدا مۇقتار قىزى، نىلقى اۋداندىق مادەنيەت مەكەمەسىنەن الپىسباي مۇقامەتجان ۇلى، بۇراتالا وبلىسىنان ەركىن زاكاريا ۇلى، التاي ايماعىنان قادىلبەك قابىل ۇلى، راقات سەيىتقامزا ۇلى قاتارلىلاردى اتاۋىما بولادى. بۇدان تىس ىلە پەداگوگيكا شۋەيۇانى كۇيتۇن وقىتۋ رايونىندا ساباق بەرىپ 70 كە جاقىن وقۋشى تاربيەلەدىم. بۇلاردىڭ اراسىنان شىعانداپ شىققالى تۇرعان شاكىرتتەرىم از ەمەس.

نۇرلان: ۇستازدىق ەتىپ شاكىرت تاربيەلەگەندە نەلەرگە ءمان بەرگەن ءجون؟ وزىڭىزگە شاكىرت تاڭداۋدا بەلگىلى تالعام، ولشەمىڭىز بار ما؟ جوق، الدە شاكىرت بولامىن دەپ تالاپتانىپ كەلگەندەردىڭ ءبارىن تاربيەلەي بەرەسىز بە؟

ماعاۋيا: بەلگىلى ونەر جولىن قۋىپ شاكىرت بولامىن دەگەن بالا ەڭ الدىمەن سول ونەرگە قىزىعۋى؛ ءوزى ۇيرەنبەكشى بولعان ونەردىڭ قادىر - قىمباتىن ياعني كيەسىن ءتۇسىنۋى؛ ونىڭ قاسيەتىن ءبىلۋى؛ سول ونەردى شىنايى ءسۇيۋى كەرەك. ەكىنشىدەن، ۇيرەنبەكشى بولعان ونەرىنە جاراتىلىستىق (تۋما) بەيىمدىلىگى بولۋى كەرەك. ۇشىنشىدەن، ۇيرەنۋدە تاباندى، قاجىرلى، جاپا - ماشاقاتقا ءتوزىمدى بولۋى كەرەك. تورتىنشىدەن، وجەت تە قاعىلەز، ءمورالدى دا كىشىپەيىل، حالىقتىڭ وزىندەي قاراپايىم بولۋى؛ «گاۋھار بالشىققا تۇسسە دە قۇنىن جويمايدى» دەگەندەي ونەردىڭ قاسيەتى سالاۋاتىنان ايگىلەنىپ تۇرۋى كەرەك. بەسىنشىدەن، ونەرپاز بولامىن دەگەن كىسى وپاسىز، توعىشار، قۋ، ارامزا بولماۋى؛ قاشان دا حالقىم دەپ جۇرەگى جارىلىپ تۇرۋى كەرەك. وسىنداي شارتتارعا تولعان شاكىرتتەردى جاقسى كورەمىن.

نۇرلان: جوعارىداعى سۇراۋىمىزبەن ساباقتاسىپ جاتاتىن تاعى ءبىر ءىستى سۇرايىن. ءسىزدىڭ تاجىريبەڭىزشە، تەرمە ونەرىنە تالپىنعان جاستار ەڭ كەمىندە قانداي شارتتاردى ازىرلەۋى كەرەك؟

ماعاۋيا: بۇل ءسوزدى وتە جاقسى سۇرادىڭ، ونەردىڭ وڭايى بولمايدى عوي، تەرمە ورىنداۋ ونەرى دە اسا قيىن ونەر. ءوز باسىم تەرمەنىڭ سوڭىنا تۇسكەنىمە 30 جىلعا تارتىپ بارادى، مەن ونىڭ قيىندىعىن ۇيرەنگەن سايىن، جاتىلعان سايىن، ءتىپتى، ايقىن سەزىنىپ كەلەمىن. ەگەر مەنەن ونەگە العىسى كەلەتىندەر بولسا، تەرمە ونەرىنە جول العان ءارقانداي ءبىر جاس ەڭ كەمىندە مىنداي شارتتاردى ازىرلەۋى كەرەك دەپ بىلەمىن.

ءبىرىنشى، حالىق اندەرى مەن حالىق كومپوزيتورلارىنىڭ اندەرىنەن 50 دە 60 ءاندى ناشىنا كەلتىرىپ ورىنداي الاتىن بولۋى كەرەك. سەبەبى، تەرمەنى توكپەلەتىپ، باستىرمالاتا، ساباۋلاپ ورىندايتىن بولعاندىقتان الدىمەن انگە ىسىلىپ توسەلمەسە، جىرعاعان تەرمە ورىنداۋشى بولا المايدى.

ەكىنشى، توكپە كۇيلەردەن كەمىندە 10 كۇي شەرتە الاتىن بولۋى كەرەك. سوندا عانا تەرمەنىڭ سۇيەمەلى ادەمى، ويناقى بولىپ ەستىلەدى.

ءۇشىنشى، تەرمەنىڭ تەكستىن جاتتاۋ قابىلەتى بولۋى؛ مازمۇنىن تۇسىنە الاتىن بولۋى؛ لوگيكالىق قاتەلىكتەرىن سەزە الاتىن بولۋى؛ سونىمەن بىرگە، تەرمەنىڭ تاقىرىبىن، اۆتورىنىڭ اتى -ءجونىن جاتتاپ الۋعا جاۋاپكەرلىكپەن قاراۋى كەرەك.

ءتورتىنشى، تەرمەنىڭ بۋىن - ىرعاقتارىنا، قاتاڭ - ۇياڭ جەرلەرىنە ءمان بەرۋى؛ دومبىرانىڭ ءۇنى باسىپ كەتىپ تەرمەنىڭ ءسوزى ۇعىلماي قالۋدان ساقتانۋى؛ ەكى ىشەكتى تەرمەلەپ اۋىسپالى قاعىپ، تەرمە ورىنداعاندا، دومبىرانىڭ ادەمى دىبىستارىنان ۇتىمدى پايدالانا ءبىلۋى؛ ساحنالىق وبرازىن تەرمەنىڭ مازمۇنىنا قاراي قۇبىلتا ءبىلۋى كەرەك.

نۇرلان: ەستۋىمىزشە، 2008 - جىلى وتباسىڭىزبەن قازاقستانعا تۋىسشىلاي بارعان ەكەنسىز، «ونەرلىنىڭ ءورىسى كەڭ» - دەمەكشى، تۋىسشىلاي ءجۇرىپ تە ونداعى ونەر سۇيەر جۇرت پەن اقپارات سالاسىنداعىلاردىڭ ىلتيپاتىنا بولەنىپسىزدەر، سول جولعى ساپارىڭىزدان تەرمە ونەرىنە قاتىستى اڭگىمە تىڭداعىمىز كەلىپ تۇرعانى؟

ماعاۋيا: 2008 - جىلى تامىز ايىندا جۇبايىم نازيگۇل، قىزىم گۇلزينات ۇشەۋىمىز قازاقستانداعى تۋىستارىمىزعا تۋىسشىلاي باردىق. ءبىز العاش تالدىقورعان وبلىسىندا بولدىق، سول اراداعى تۋىستار مەن دوستاردىڭ تانىستىرۋىمەن تۇڭعىش رەت جەتىسۋ تەلە ارناسىنىڭ «ءساتى تۇسكەن سۇحپات» ايدارىنىڭ جاۋاپتىسى گۇلناز دەگەن بويجەتكەن بىزبەن سۇحپات وتكىزدى. سۇحپاتتىڭ مازمۇنى ءبىزدىڭ ەلدەگى (جۇڭگوداعى) قازاق ونەرىنىڭ، اسىرەسە، تەرمە ونەرىنىڭ دامۋى تۋرالى بولدى. ءبىز بۇل جاقتاعى جاڭالىقتاردى تولىق جەتكىزدىك. سوڭىندا ءوزىمىز تەرمە ورىنداپ ونەر كورسەتتىك. 2 - رەت الماتىداعى راحات تەلە ارناسىنىڭ «عيبارات» باعدارلاماسىندا 45 مينۋت ۋاقىتپەن تىكە سۇحپاتتا بولدىق. مۇنداعى سۇحپاتتى ۇلبوسىن دەگەن بويجەتكەن جۇرگىزدى. قىزىم گۇلزينات ەكەۋمىز ەكىدەن تەرمە ورىندادىق. تەلە كورەرمەندەرىنەن ءتورت ادام تەلەفون ارقىلى سۇراۋ سۇرادى. سۇراۋدىڭ مازمۇنى - ءبىزدىڭ ەلدەگى قازاقتاردىڭ حالىق ونەرىنىڭ وركەندەۋى، تەرمە جانرىنىڭ تانىلۋى، باعالانۋى، دامۋى جاقتارىنداعى ناقتى ىستەلگەن جۇمىستاردان حاباردار بولماقشى ەكەن. مەن ءبىزدىڭ ەلدەگى قازاقتاردىڭ تەرمە ونەرىن 1983 - جىلدان بەرى قولعا العاندىعىن؛ سودان بەرى «قازاق تەرمەلەرى» اتتى توپتامالاردىڭ شينجياڭ حالىق باسپاسىنان ارت - ارتىنان شىعارىلعاندىعىن؛ دىبىس تاسپالارىنىڭ جارىق كورۋى؛ تەرمەنى اقىندار ايتىسى قيمىلىنا قوسىپ ساحنا تورىنە شىعارىپ باعالاپ وتىرعاندىعىن؛ ىلە پەداگوگيكا شۋەيانى كۇيتىڭ وقىتۋ رايونىندا 2007 - جىلدان بەرى ارناۋلى تەرمە كلاسى اشىلعاندىعىن؛ تەرمەنىڭ 2008 - جىلى جىل باسىندا مەملەكەتتىك قورعالاتىن بەيزاتتىق مۇرالار قاتارىنا قوسىلعانى سياقتى يگى ىستەردى بايانداپ بەردىم. 3 - رەت قازاقستان مەملەكەتتىك راديو ستانسياسى كوركەمونەر ءبولىمىنىڭ جاۋاپتىسى، ءانشى ايگۇل يمانبايۆامەن سۇحپاتتا بولىپ، قىزىم گۇلزينات ەكەۋمىز تەرمە مەن حالىق اندەرىنەن 15 - 16 ءنومىر ورىنداپ بەردىك.

نۇرلان: ماعاۋيا اعا، ەستىسەك، حالىق اندەرىن جيناپ، رەتتەپ ءجۇرىپسىز، بۇل ءوزى ءبىر ماشاقاتتى جۇمىس قوي، بۇعان قالايشا قىزىقتىڭىز؟ قازىرگە دەيىن قانشا ءان جينادىڭىز؟

ماعاۋيا: حالىق اندەرى اتا - بابالارىمىزدىڭ اسىل قازىناسى عوي، ول كىمدى بولسىن وزىنە قىزىقتىرماي قويماس. زەرتتەۋشىلەردىڭ كوزقاراسى - حالىق اندەرىنىڭ عاسىرلارعا جالعاسۋىنىڭ سەبەبىن ءۇش جاقتان، ياعني، ءبىرىنشى، حالىق اندەرى حالىق ونەرپازدارىنىڭ باستان كەشكەن وقيعالارىمەن تىعىز قابىسىپ، ولاردىڭ كۇيىنىش - ءسۇيىنىشى، ساعىنش - ارمانى سياقتى كوڭىل تولقىندارىنان تۋعاندىعىنان. ەكىنشى، حالىق اندەرى ونەرپازدارى جاساعان داۋىرمەن، تۇرمىس - تىرشىلىكپەن بىتە قايناسىپ، اۋەنى مەن ءسوزى ءومىردىڭ وزىندەي تابيعي تازا سۇلۋلىققا سۋارىلعاندىعىنان. ءۇشىنشى، حالىق اندەرىن كەز كەلگەن حالىق انشىلەرى ءوز مانەرىمەن، انشىلىك سەزىمىن قوسىپ كەم - كەتىگىن بۇتىندەپ وتىرعاندىعىنان دەپ قارايدى. مەن دە سول حالىق ونەرپازدارىنىڭ قاتارىندا جۇرگەنىم ءۇشىن، ءبىر قىدىرۋ اندەرگە تولىقتىرۋلار جاساپ، تىزگىن - شىلبىرىن ءتۇرىپ حالىق اراسىنا قايتا جىبەرگەنىم راس. قازىرگە دەيىن حالىق ىشىنەن «التىننان اياق»، «گۇل، گۇل جامال»، «اقمارقا» سياقتى 30 عا تارتا ءان جيدىم. بۇدان بىلايعى جەردە دە حالىق مۇراسىن جيناۋ جۇمىسىمەن جالعاستى شۇعىلدانا بەرمەكپىن.

نۇرلان: «ەلۋ - ەردىڭ جاسى» دەپ ءوزىڭىز ايتقانداي، تەرمە ونەرىندە كەمەلىمە كەلدىم دەپ ويلايسىز با؟ ءالى دە جەتپەي جاتقان جەرلەرىڭىز بارما؟

ماعاۋيا: ارينە، اعاش بەسىكتەن جەر بەسىككە جەتكەنشە ءبىلىم ىزدەمەك پارىز دەيدى عوي، ازىراق ەڭبەگىمە توقمەيىلسىپ وتىرعانىم جوق. ەجەلدەن وزىمە ءوزىم قاناعاتتانىپ كورگەن ەمەسپىن. ىلعي دا ءوزىمدى ءوزىم كىنالاۋمەن كەلەمىن. قانداي ادامدار جىلت ەتكەن ەڭبەگىنە بولا ساباسىنان اسىپ - توگىلىپ جۇرگەنىن تۇسىنسەم بۇيىرماسىن. دەگەنمەم، وتكەن ءومىرىم تىرناشتاپ جيعان تاجىريبە - ساباقتارىمىنىڭ قويماسى ەمەس پە، قۇلشىنا ۇيرەنىپ جۇرتتىڭ كوڭىلىنەن شىعارلىق جاڭا تۋىندىلار جاراتىپ حالقىما ارناسام دەيمىن. تەك اللا جار بولسا عانا.

نۇرلان: ءجا، ماعاۋيا اعا، باعانادان بەرى ونەرلى ءومىرىڭىز تۋرالى ءبىر تالاي سىر شەرتتىك. سوڭعى ءبىر سۇراۋىم - ونەر جولىندا ەتكەن ەسەلى ەڭبەكتەرىڭىز قارا ورمانداي حالقىڭىزدىڭ جۇرەگىنەن وزىندىك ورىنىن تاپقانىنا سەنىمىمىز كامىل. ال، ءسىزدەي ءبىر اسىل ۇلانىن پارتيا مەن ۇكىمەت تاراۋلارى ۇمىت قالدىرماعان بولار؟

ماعاۋيا: مەنىڭ ەڭبەگىمدى ءادىل باعالاعان پارتيا مەن ۇكىمەتكە العىستان باسقا ايتارىم جوق. سۇراپ قالعان سوڭ جاۋاپ بەرە كەتەيىن، 2006 - جىلى توعىزتاراۋ اۋداندىق مادەنيەت - دەنە تاربيە مەكەمەسى «مادەنيەت قايراتكەرى»، 2007 - جىلى ىلە قازاق اۆتونوميالى وبلىستىق حالىق ۇكىمەتى «ەڭبەگى سىڭگەن تەرمەشى»، 2006 - جىلى شينجياڭ ۇيعۇر اۆتونوميالى رايوندىق حالىق ۇكىمەتى «تاڭداۋلى حالىق ونەرپازى»، 2007 - جىلى ىلە پەداگوگيكا شۋەيۋانى كۇيتۇن وقىتۋ رايونى «تەرمە تاربيەشىسى - پروفەسسور»، 2008 - جىلى شينجياڭ ۇيعۇر اۆتونوميالى رايوندىق مادەنيەت مەڭگەرمەسى «تەرمە مۇراگەرى» اتاعىن بەردى.

نۇرلان: «اقىل كوپكە جەتكىزەر، ونەر كوككە جەتكىزەر» دەگەن عوي حالقىمىز، وزىڭىزگە جانە وتباسىڭىزعا باقىت، جاسامپازدىعىڭىزعا تابىس تىلەيمىن!

ماعاۋيا: راقىمەت! باۋىرىم، ءوزىڭنىڭ دە ونەرىڭ ۇستەم بولسىن.
جاۋاپتى رەداكتور: بارشا تەگىس قىزى

قوسىمشا جۇكتەلگەن سۋرەتتەرى:

كەلۋ قاينارى: http://www.elarna.net/oku.php?tur=11&id=1657

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە 99 دەپ جازىڭىز، راحىمەت!
98 + 1 = ? sozsiz sifermen tolteringiz.

ەل-ارنا ءوز گازەتى

ەڭ جاڭا ماقالالار


تولە ءبيدىڭ تۋى - قازاق 7 مينوت
تيانشان تورى 7 مينوت
چەحيا تۇرعىندارى پرەمەر 7 مينوت
وتباسىلىق اسحانا قامقور 7 مينوت
بەلارۋستىڭ جاڭارتىلعان 8 مينوت
ۆەنەتسياداعى پارتيتۋرال 17 مينوت
ەاەو: ءسۇتتىڭ تەحنيكالى 27 مينوت
ەلوردادا جولاقى ءبىر اي 1 ساعات
ەلىمىزدە ءسۇت ساپاسىنا 1 ساعات
نار يدىرگەن ء(ى نۇسقا) 1 ساعات
پاۆلودار وبلىسىندا مەمل 1 ساعات
الماتىدا ۇستەل تەننيسىن 1 ساعات
قازاقستاندا مىڭنان استا 1 ساعات
بالجىڭگەر ء(ى نۇسقا) - 1 ساعات
“يسلام جانە ۇلى د 1 ساعات
كايردە زاماناۋي قازاق ا 1 ساعات
وركەنيەتتىڭ ەڭ باستى مى 1 ساعات
18 قاراشا. تۋعان كۇن يە 2 ساعات
قازاقستاندىقتار ەرجان م 2 ساعات
كىتاپتى تىم كوپ وقىعان 2 ساعات
«س.عىلماني» مەشىتىندە س 2 ساعات
تاربيە ادامنىڭ ەكىنشى ك 2 ساعات
اتىراۋدا 10-سىنىپ وقۋشى 2 ساعات
18 قاراشا. قازاقپارات ك 3 ساعات
جارىقتى سوقىر كورمەگەنن 3 ساعات
باسەكەلەستەرىم مەنىڭ جو 3 ساعات
قازگيدرومەت: قاراشانىڭ 4 ساعات
ءجانناتتاعى ءسىز بىلمەي 4 ساعات
بۋراباي اۋدانىندا ءتاۋا 4 ساعات
رۋحتىڭ ەكىگە جارىلۋى 5 ساعات