ءتۇرى: ەل-ارنا گازەتى | وسى ارادان ەلارنا گازەتىنىڭ بارلىق ماقالالارىن كورۋگە بولادى..
مەندە ال-ارناعا جازبا-ماقالا جازامىن، وندا وسى ارانى باسىڭىز!
جولدانعان ۋاقىتى: 00:11 - 2020/05/21
ماقالا جولداۋشى: ЗАЙДЫН ОРАЗАҚЫН
ماقالا اپتورى: زايدىن ورازاقىن ۇلى
اپتوردىڭ مەكەن-جايى: الماتى قالاسى ناۋرىزباي اۋدانى
وسى ماقالانىڭ كىرىلشە نۇسقاسى، وسى ارانى باسىڭىزОсы мақаланың кірілше нұсқасы, осы араны басыңыз
قازاقتىڭ ىدىستارى
زايدىن ورازاقىن ۇلى
قازاقتىڭ شەبەر ۇلى اعاسى نار ،
« استاۋ » مەن ءبىر قوي جەيتىن شاماسى بار .
« جان تورسىق » بايلاپ الىپ قانجىعاعا ،
ايعىر ءمىنىپ جورتادى الا شۇبار .
كۇمىس بىلەك ، التىن قول اناسى بار .
« پىسپەك » گىنىڭ موينىندا سىمبارداي تال .
قايىڭنىڭ قابىعىنا ىستاپ العان ،
سار قىمىز سارقىلمايتىن « ساباسى » بار .
« بۇلقىنشاق ، مەس پەن شاناق ، تورسىق ، تۇلىپ ، »
بىلقىلدايدى اتقا ارتساڭ جەردى سىزىپ .
كەرەگەدە ءىلۋلى قاشان بارساڭ ،
شولدەپ كەلسەڭ كەتەدى كوزىڭ كۇلىپ .
« شاناشى » تۇز ساقتايتىن تەرى قاپشىق ،
« بوردەكتە » تۇرادى ىلعي قىمىز اشىپ .
« سۇيرەتپەگە » ساقتايدى قازاق سۋسىن ،
« سامار » مەن ەت جەگەنى ادال كاسىپ .
قۇدىقتان سۋ تارتادى « قاۋعا » مەنەن ،
دارقان حالىق قازاعىم تاۋداعى ەرەن .
بيە ساۋسا ارناۋلى ىدىسى بار ،
« شەلەك » جانە شۇمەكتى « كونەك » دەگەن .
سۋ قۇياتىن تەرى ىدىس « تۇيە مويناق » ،
« كەسپەككە » ىركىت ساقتاپ تۇمەن قوي باق .
جايلاۋعا تۇرا قاشقىم كەپ تۇرادى ،
ايراندى اڭساعاندا « كۇبىنى » ويلاپ .
قازاق ۇلكەن تاباقتى « كەرسەن » دەگەن ،
قوناعىنا كادەلى اس بەرسەم دەگەن .
تەزەك جاعىپ « تاباعا » شوق قوزداتىپ ،
اپام قۇقساپ ءبىر تەرلەپ كورسەم دەپ ەم .
قازاق بىلگەن مۇراسىن قازىنا دەپ ،
اتالعان تاياز تاباق « زاعىما » دەپ .
« كەسە قاپتاي » تاپقىرلىق بولماعاندا ،
ىدىس – اياق كوشكەندە شاعىلار ەد .
باتىرلار قىمىز تارتقان « شارا » مەنەن ،
تۇتقالى سۋسىن ىدىس « سارقىم » دەگەن .
« ساپتاياقتى » جاساعان اتام قازاق ،
شەتتەرىنەن ۇستاعان وتكىر بەگەن .
قاقپاعى بار شارانى « زەرەن » دەيدى ،
بالالار « توستاعان » دەپ ەلەڭدەيدى .
شايلىق سۇتتى قۇيامىز « توپاتاي » عا ،
« تەگەنە ، تەگەش » تەكتەس جەر يەمدەيدى .
كوشكەندە ىدىس سالسا « اياق قاپقا » ،
« شىلاپشىن » قول جۋۋعا اياق جاقتا .
ۇلكەنگە ىززەت ەتىپ سۋ قۇياتىن ،
ۇيىڭدە « دارەت شاۋگىم ، قۇمان » ساقتا .
« قاسىق ، وجاۋ ، باقىراش ، شومىشتەرى ، »
شۇڭعىل قازان « شوگەن » دە كورىسكەنى .
« ساماۋىرىن » سارقىلداپ قايناعاندا ،
« شاينەكتىڭ » دە ماڭىزدى بولىسكەنى .
« كەرەڭكە » سۇت قۇياتىن قۇمىراسى ،
« بۇيەن ، قارىن » حالقىمنىڭ بۇل مۇراسى .
انالارىم « جۋاز » عا شايقاعان ماي ،
قازاقتىڭ دەرتكە شيپا عۇمىر اسى .
« كۇزە » دەگەن سۋ قۇيعان شاعىن ىدىس ،
« قۇتىسى » سۋسىن ىشكەن لاعىل ىدىس .
قازاعىم سىنىق اياق ۇستامايدى ،
تاۋدا جۇرىپ قىلماعان تاعى ءبىر ءىس .
قوسىمشا جۇكتەلگەن سۋرەتتەرى:
كەلۋ قاينارى: http://www.elarna.net/oku.php?tur=11&id=2348
