كومپيۋتەر نۇسقاسى Компйутер нұсқасы

قولايلى بەت | بۇگىنگى | كەشەگى | جالپى مالىمەت

ەل-ارناعا تىزىمدەلىڭىزدەر ...
قازاقتىڭ 1001 ەرتەگىسى
СанақКелген (IP)Көрілген (PWs)КомпйутерҚолфон
2019-11-201983628842 %58 %
2019-11-212416771848 %52 %
2019-11-222102532748 %52 %

دامەتكەن ومارباەۆا. ىزدەپ كەلەم | ادەبيەت پورتالى


ءتۇرى: جۇلدىز جۋرنالى

ۋاقىتى: 10:30 - 2019/11/08

: PDF Download - Жұктеұ - Скачать - ءتۇسىرۋ

elarna.net Printed Version.

ومارباەۆا دامەتكەن اقىن. 1950 جىلى تۋعان، تۋعان جەرى شىعىس قازاقستان وبلىسىنىڭ جارما اۋدانى. جەتىارال ورتا مەكتەبىن بىتىرگەن. سەمەي پەداگوگيكالىق ينستيتۋتىنىڭ فيلولوگيا فاكۋلتەتىن اياقتايدى. قازاقستان رەسپۋبليكاسىنىڭ مادەنيەت قايراتكەرى.

1975-1985 جج. اۋداندىق جانە وبلىستىق ايتىستارعا قاتىسىپ، جۇلدەلى ورىنداردى يەلەنگەن.

ايتىستا بەلگىلى ايتىسكەر قاليحان التىنباەۆتى، ءومىر جولىندا قانيپا بىتىباەۆانى وزىنە ۇستاز تۇتادى.

دامەتكەن ومارباەۆا سەمەي قالاسىنداعى «حالىقتىق اقىندار ورتالىعىنىڭ» جەتەكشىسى.

دامەتكەن ومارباەۆانىڭ شاكىرتتەرى بۇگىنگى كۇنى قازاقستانعا تانىمال. ولار: رينات زايىتوۆ، سارا توقتامىسوۆا، قارلىعاش اۋباكىروۆا، اسەم جۇماعازينا، دينا بازىلوۆا، ميراس قۇسايىنوۆ، نۇرجان ومىرباەۆ، جالعاس زەينوللاەۆ، جاسۇلان تاجيەۆ، باۋىرجان يگىلىك، جاسۇلان ماقاەۆ، ايدانا سەگىزباەۆا.

ىزدەپ كەلەم

جوتاسى تارباعاتاي تىزبەكتەلگەن

جولدارى وزگەرمەپتى-اۋ ءبىز كەتكەنمەن.

توسىندە ورنەك سالىپ وسكەن جەردەن،

ەلەسىن جاستىعىمنىڭ ىزدەپ كەلەم.

كونەكوز ىزدەپ كەلەم دانالارىن،

اق پەيىل اقجاۋلىقتى انالارىن.

ساز كەشىپ، كۇنگە كۇيگەن جالاڭ اياق،

اۋىلدىڭ قاراتابان بالالارىن.

ساعىندىم جىلقى كەتپەس قاپتالىڭدى،

سىرلارىم سەندە تالاي اقتارىلدى.

ىركىگەن جاڭبىر سۋى ويدىم-ويدىم،

ايمالاپ سۇيەر مە ەدىم تاستارىڭدى.

جەتىارال قالاي عانا ءتىل قاتتىڭ دەر،

سەندە ءوتتى بالعىن شاعىم، قىمبات كۇندەر.

سيقىرلى سىرلى ءۇنىن كوكىرەگىڭنىڭ

جۇر ەكەن باياعىداي تىڭداپ كىمدەر؟

تاپتالعان تۇلپارلارعا دالا جونى،

ۇيىرىپ قۇيىندايىن بارادى ونى.

جاياۋ-اق، الىپ-ۇشىپ جەتكىزەتىن،

قايران سول قامىستىنىڭ قارا جولى.

جوتالار وركەش-وركەش تۇيدەكتەلگەن،

ەلىگىڭ ەم ەركەلىك كۇيدى وتكەرگەن.

جارتاستان تىكەن-تىكەن توشالا ىزدەپ،

تاۋ كەزىپ، بەتكەيىڭنەن جيدەك تەرگەم.

العاشقى قار تۇسكەندە شىڭدارىڭا،

سەزبەۋشى ەك قىركۇيەكتىڭ ىزعارىن دا.

جىرىم قالدى قابىرعا جولدارىڭدا،

ۇنىم قالدى جاڭعىرىپ قۇزدارىڭدا.

وسىلاي ەسكە الىپ وتكەنىمدى،

ىزدەپ كەلەم وزىڭنەن كوكتەمىمدى.

جاز عۇمىرىم جارمادا، ال سەمەيدە

قانجىعاما كۇز-عۇمىر بوكتەرىلدى.

تاتتى ولەڭ

بار ارينە،

ساتسىز ولەڭ، ءساتتى ولەڭ،

بىر تۇيسىك بار

مازالايتىن اتتەگەن.

اتتەگەنننىڭ

ادىبىندە بۇگىلگەن،

تاڭدايعا كەپ

تاق ەتەدى ءتاتتى ولەڭ.

تاتتى ولەڭنىڭ

سوزى از عانا، ويى كوپ،

تالاي-تالاي

كوپىرمەگە تويىپ ەك.

تىلدىڭ بالىن

تامشىلاتىپ ايتا الماي،

سودان كەيىن قويىپ ەك.

ايتا الماي

مارجان تىزگەن ىزگى ءۇندى،

بىلە المادىم،

مويىندادىق ءبىز كىمدى.

دام-تۇزى جوق

ۋىمىزدى ۇرتتاپ اپ،

ەرىكسىزدەن

تارتامىز-اۋ تىزگىندى.

يا، سولاي،

كەيىنگىلەر كەرەمەت،

سومداپ سوققان

ساف التىنداي شەگەلەپ.

وي ورنەگىن،

تىل كەستەسىن بەزەگەن،

ودان ارتىق

ەندى بىزگە نە كەرەك.

سىرشىل سەزىم

ەسىمىزدەن تاندىرىپ،

كەلە جاتىر

الدىمىزدان تاڭ كۇلىپ.

ەندى قانشا

كۇن كەشەدى كۇز كوڭىل،

جۇرىڭدەرشى

شولىمىزدى قاندىرىپ.

تاتتى ولەڭگە

ىنتىعاسىڭ قاراداي،

تۇسىڭ اۋىپ،

كەتكەنىنە قاراماي.

اندا-ساندا

تاڭدايىمىزدى ءجىبىتىپ،

ماز بولايىق

كامپيت جەگەن بالاداي.

ولكەم مەنىڭ

ولكەم مەنىڭ،

كەلەدى ولەڭىممەن كوركەمدەگىم.

وزەگىن جارىپ شىققان بۇرشىك ەدىم،

گۇل اتتىم، جەمىس بەردىم، وركەندەدىم.

جەرۇيىعىم،

قورعانىم، ارقا سۇيەر، كەڭ يىعىم.

ساعىنعاندا توگىلىپ نوسەرلەرىم،

كوكىرەگىمە كەتەدى سەل قۇيىلىپ.

ۇجماعىم-اي،

كەۋدەمنىڭ اشىلماعان جۇمباعىنداي.

جالاڭ اياق جالداعان بۇلاعىڭدى،

قايتا ورالماس قايران سول جىلدارىم-اي.

ولكەم مەنىڭ،

بايتەرەكتەي تەربەلدى وركەندەرىڭ

سولقىلداعان تالشىبىق ءورىمتالدار،

ويلاپ الاڭ بولادى ەرتەڭدەرىڭ.

وسكەن ەلىم،

ورتىنە شالدىرماعان وسكەلەڭىن.

سەنى سۇيگەن جۇرەگىم اينىماستان،

توپىراعىڭا اينالىپ كەتسە دەدىم.

و، عاجاپ، ولكەم مەنىڭ،

سامالىڭمەن تەربەلىپ تەڭسەلگەنىم.

بايلىعىمدا، باقىتىم، بارىم دا سەن،

سەنەن باسقا تۇگىم جوق سەنسەڭ مەنىڭ!

ۇكى

بالا كەزدەن

شابىت العان دالادان،

تالانتىنا

تامسانىپ ەل قاراعان.

قوش كەلدىڭدەر

قوس قۇلىنى شىعىستىڭ،

جال-قۇيرىعىن

كۇلتەلەپ جەل تاراعان.

كوڭىلدىڭ

كوك اسپانى كورىنسىن ءبىر،

كەرىمسال

كەۋدەلەردەن توگىلسىن جىر.

قاراشا ايى

جايىپ ساپ اق كورپەسىن،

ويلانىپ

سەرى كوڭىل سەمەيىڭ تۇر.

تالاي كەتكەن

تاڭىردىڭ سىيىن الىپ،

قيماستىقتى

كەۋدەگە جيىپ الىپ.

تابارىك ەتىپ

رۋحىن ۇلىلاردىڭ،

ورالمادىڭ

شەتىنە ءتۇيىپ الىپ.

اسىر سالىپ

وسكەن ۇل كۇرەڭ بەلىڭ،

كۇرەڭ بەلدەن

كۇي تىڭداپ، جىر ەمگەنىم.

كۇپى جىردى

جامىلىپ كەلىپ وتىر،

كۇلدىر-كۇلدىر

كىسىنەتىپ كۇرەڭدەرىن.

داريا-كوڭىل

تۇرسا دا تاسىپ-اعىپ،

وي قوزعايىن

الىپتىڭ ارتىن باعىپ.

تارپاڭ مىنەز

تاعدىردىڭ كوزى وتپەسىن،

جىبەرەيىن

جىرىمنان ۇكى تاعىپ.

اسىل دوس

سۋسىنداپ

داريانىڭ تۇنىعىنان،

سەزىمنىڭ

تەرەڭىنەن سىر ۇعىنعان.

ان سالعاندا

ۇمىتىپ دۇنيەنى،

تۇيعىنداي

قانات قاققان تۇعىرىنان.

قۇدىرەتتى ءان

كەلەدى قۇلاپ قىردان،

جۇرت تىم-تىرىس،

تاناداي قۇلاققا ۇرعان.

وي، پالە-اي، دەپ

شىرقاتىپ قۇبىلتادى،

«قىزدار-اي» دەپ،

كەڭكىلدەپ جىلاپ تۇرعان.

عايىپ بولىپ

كەتتىڭ-اۋ سەن قاس-قاعىمدا،

مىنا جالعان

دۇنيەنى تاستادىڭ دا.

قارا دومبىرا،

قولىڭنان ۇشىپ كەتتى،

انىڭ قالدى،

قالىقتاپ اسپانىڭدا.

اڭقىلداعان

اق جۇرەك قايران ساناق،

ومىردەن

ونەرگە ۇلكەن العان ساباق.

كوزدەن بۇلبۇل

ۇشتىڭ-اۋ، اسىل دوسىم،

بىزدەر ءجۇرمىز

اي مەن كۇن، جىلدى ساناپ.

سىرعىتىپ

بارىمىزدى بارادى ءومىر،

ساناعا

ويلاردى دا سالار نەبىر.

ساقتالىپ

ار كوڭىلدە قالدى ساناق،

اق پەيىل،

ۇلكەن جۇرەك، بالا كوڭىل!

عۇمىرى ءماندى،

سانالى ساپارداعى،

انشى بولىپ،

وتتىڭ-اۋ قاتارداعى.

قاسيەتتى،

ونەردىڭ مايتالمانى،

قاراپايىم،

ومىردىڭ قاھارمانى.

ومىر ءسۇردىڭ،

مايراڭمەن ماعىنالى،

نەمەرەلەرىڭ

اتاسىن ساعىنادى.

مۇراتىڭ دا،

جالعىزدىق كورىپ ءجۇر-اۋ،

قىزدار، كەلىن،

كەمسەڭدەپ قامىعادى.

قينالامىز

بىلسەك تە كەلمەيتىنىن،

بىر قيماستىق،

كەۋدەگە بەرمەي تىنىم.

ادالدىقتى

جانىنا سەرىك ەتكەن.

بىلەمىز

رۋحىڭنىڭ ولمەيتىنىن.

كورىپ كەلەم

بايلىق تۇر دومالاتىپ ورگە تاسىن،

حان سايلاپ توعىشاردىڭ قارا باسىن.

قابىرعاسى سىقيعان عيماراتتاردان،

كورەمىن تامشىلاعان كوزدىڭ جاسىن.

قاجىعان ادامداردىڭ ءجۇزىن كورەم،

ۇمىت-اي قايتەم سەنى ۇزىلمەگەن.

بازاردان اربا سۇيرەپ، جۇك كوتەرگەن،

جانكەشتى پەندەلەردىڭ ءوزىن كورەم.

باعا ءوسىپ، شارىقتاعان «جۇتتى» كورەم،

جاناردان جاۋتاڭداعان شىقتى كورەم.

وزەگىن تالدىرماستىڭ قامىن ويلاپ،

ولمەستىڭ كۇيىن كەشكەن جۇرتتى كورەم.

ويناعان تاعدىرمەنەن پۇلدى كورەم،

جالدانعان قۇلاق كەستى قۇلدى كورەم.

ساناسى ساڭىلاۋسىز قۇلدىراعان،

ارزان قىز، ازعىنداعان ۇلدى كورەم.

بارىن دە ولمەگەن سوڭ كورىپ كەلەم،

ۇندەمەي ءتىلدى تىستەپ، كونىپ كەلەم.

دەرتىنەن ارىلماعان بۇل قوعامدا،

تۋادى قايدان عانا كورىكتى ولەڭ.

نە كەرەك ايتا الماي وقتالعانىم،

جاقسى ەدى ودان داعى جوق بولعانىم.

وسىنىڭ ءبارىن كورىپ كۇيزەلگەنشە،

مەن نەگە سۋ قاراڭعى بوپ قالمادىم!

قاراشا 2010 جىل



ماتەريالدى كوشىرىپ جاريالاۋ ءۇشىن رەداكتسيانىڭ نەمەسە اۆتوردىڭ جازباشا، اۋىزشا رۇقساتى قاجەت جانە Adebiportal.kz پورتالىنا گيپەرسىلتەمە بەرىلۋى ءتيىس. اۆتورلىق قۇقىق ساقتالماعان جاعدايدا قر اۆتورلىق قۇقىق جانە ساباقتاس قۇقىقتار تۋرالى زاڭىمەن قورعالادى. Adebiportal@gmail.com 8(7172) 79 82 12 (ىشكى – 112)

ماقالا اۆتورىنىڭ كوزقاراسى رەداكتسيانىڭ كوزقاراسىن بىلدىرمەيدى.




كەلۋ قاينارى: http://www.elarna.net/koru.php?tur=30&id=1069385

پىكىرلەر:

juz dep sifirmen jazingiz.