كومپيۋتەر نۇسقاسى Компйутер нұсқасы

قولايلى بەت | بۇگىنگى | كەشەگى | جالپى مالىمەت

ەل-ارناعا تىزىمدەلىڭىزدەر ...
قازاقتىڭ 1001 ەرتەگىسى
СанақКелген (IP)Көрілген (PWs)КомпйутерҚолфон
2019-10-221435476533 %67 %
2019-10-231391591239 %61 %
2019-10-2415668332 %68 %

中国哈萨克语广播网


ءتۇرى: جۇڭگو قازاق راديو تورابى

ۋاقىتى: 17:30 - 2019/10/09

: PDF Download - Жұктеұ - Скачать - ءتۇسىرۋ

elarna.net Printed Version.
اۋەلگى كەلۋ قاينارى: http://www.kazakcnr.com/zdgz2019/201910/t20191008_1365924.html

اۆتورى: ماقسات قيزات ۇلى


ءتىستىڭ كەيدە وقىستان ءتىلدى تىستەپ الاتىن كەزى بولادى. ءبىراق وعان بولا ەكەۋى اۋىزدان شىعىپ كەتپەيدى. ءتىلسىز ءتىس، ءتىسسىز ءتىل ءومىر سۇرە المايدى. ءتىستىڭ شايناعانىن ءتىل وتكىزەدى. ءتىلدىڭ بەزەگەنىن ءتىس توقتاتادى.


ءيا، ەشكىم دە ءبىر كۇندىك جۇمىسىنان قالجىراپ ۇيىنە جەتكەندە، الدىنان قاتۋلى قاباق پەن سۋىعان شاينەكتى كورگىسى كەلمەيدى.


ەشكىمنىڭ دە ۇيىنەن بەزىنىپ، جالعىزدان جالعىز عۇمىر كەشىپ، سۋىق تىرلىكتى دوس تۇتقىسى جوق. ادامنىڭ ءبارى دە جىلى قاباق پەن مەيىرىمدى وتباسىن اڭسايدى.


كەمەلدى وتباسىنا كەرەگى ءبىر ءومىر جۇمساسا دا تاۋسىلمايتىن قازىنا ەمەس، قايتا قارا لاشىقتا وتىرسا دا قارقىلداعان كۇلكى مەن ساڭقىلداعان سوزدەر.

ءبىزدىڭ اكە-شەشەلەرىمىز وتكەن كۇندەردە مىجىرايعان جامان تاس ۇيدە عۇمىر كەشتى، ول ءۇيدىڭ سىرتى سۇرەڭسىز بولعانىمەن، ءىشى سونداي جىلى ەدى.


ول تاس ۇيلەر ءبىر اۋىزدى تاس ۇيلەر ەدى، ول ۇيدە اتا-اپاڭىزبەن قوسقاندا ونعا تارتا جان ءومىر ءسۇرۋشى ەدى.


شاكەنە عانا سول تاس ءۇيدىڭ ىشىنەن بوراندى كۇندەرى ماڭىراعان قوزى-ىلاقتىڭ دا داۋىسىن ەستۋشى ەدىڭىز، ءمۇبادا بوران ءبىر اپتاعا سوزىلسا ىرگەدە جاتقان «تايماس»، «مايباس» دەيتىن كۇشىككە دە الا بۇزاۋدىڭ جانىنان ورىن تيۋشى ەدى.


ول كەزدە كىم-كىمنىڭ دە جانى دا، مالى دا ءبىر ۇيگە سيىپ كەتۋشى ەدى، اۋىزى-مۇرىنى جانعا تولعان سول تار تاس ۇيدە ەشكىمنىڭ دە شەكەسى تارىلماۋشى ەدى.


قورالانىپ اس ءىشۋشى ەدىك، ەزۋىمىزدەن كۇلكى كەتپەۋشى ەدى.


ول كەزدە ەشكىم دە: ارى جاتشى، بىلاي تۇرشى،-دەپ سيىسپايتىنداي ءسوز ايتپاۋشى ەدى. اعايىن ءىشى اپپاق، باۋىر ءىشى جۇمساق ەدى.

ءبىر-ءبىرىمىزدى قۇشاقتاپ ۇيىقتاۋشى ەدىك، ءبىر-ءبىرىمىزدى جەتەكتەپ سىرتقا شىعۋشى ەدىك. ءبىر-ءبىرىمىزدى اداستىرماۋشى ەدىك، ءبىر-ءبىرىمىزدى العا باستاۋشى ەدىك.


اۋىلدا ءتۇيىپ-ءتۇيىپ سويلەيتىن ءبىر ماڭعاز اعام بار ەدى، سول ايتۋشى ەدى:


كەڭ مىنەزدى كەرىمسال كەلىنشەگىڭ بولسا؛

ءتىلى بال، تاربيەسى شەكەر تەنتەگىڭ بولسا؛

ەر مىنەزدى ازاماتىڭ ەرتەگىڭ بولسا..

وندا جاعاڭ جايلاۋ، توبەڭ قىستاۋ بولىپ، اقىلىڭ تاسىر ەدى.


ال ەگەر،


العانىڭ شايپاۋ بولىپ، شەكەسى قۇرىسىپ تۇرسا؛

ازاماتىڭ القاۋسىز، القا كول تىرىسىپ تۇرسا؛

بالاڭ ءتىلازار، ايتقانىڭدى تىڭداماي ۇرىسىپ تۇرسا...

وندا وتباسىڭ ويران، اقىل ايران بولىڭ ميىڭ اشىر ەدى.


بۇل كىسىنىڭ ايتقانىنىڭ جانى بار، ەرتەدەگى ءبىر جازبادا: ناعىز باقىت – بەرەكەلى ەكى جاستىڭ وتاۋىندا،-دەپ ايتىلعان ەكەن.

ال قازىر كەڭ سارايداي اق ۇيدە وتىرعانداردىڭ كوبىسىنىڭ قاباعى كىربەڭ، كوڭىلى ءپاس، تاي شاپتىرىمداي بولمەدە كەلىن مەن ەنە، كۇيەۋ مەن قىز تەبىسىپ قالاتىن بولدى.


ايتەۋىر كوپ ادامنىڭ اۋىزىنان باردان گورى جوق شىعاتىن بولدى.


پالەنبايدىڭ باس پاناسىن قاراشى، قۇددى ورداداي، ال بىزدىكى دورباداي، انانىڭ مىنگەنى تۇيەدەي، بىزدىكى تۇيمەدەي، ونىڭ بالاسى انا مەكتەپتە وقيدى ەكەن، بىزدىكىن قارا، ءتۇبى وڭبايدى»،-دەپ ايتەۋىر تۇگەپ بەرمەس بازىنا مەن وكپەنىڭ كورىگى بۇلكىلدەيدى دە جاتادى.


ادامنىڭ زاتتىق بايلىققا دەگەن قوماعايلىعى تويىنعان با، ايتپەسە ءدال بۇگىنگدەي تۇرمىستىڭ تۇگەندەلگەن شاعى وتكەن ۋاقىتتا ەش جەردە بولىپ كورگەن جوق.


وتكەن عاسىردا قانشاما ادام ىشەر اس، كيەر كيىمگە جارىماي ءوتتى دەمەيسىڭ بە، اقىسىز ەڭبەك ىستەپ، جالدانبالى پاتەردە تىرلىك كەشىرگەن قانشاما پەندە ءوتتى ومىردەن، ءبارى ۇمىتىلىپ كەتىپ وتىر عوي، ايتپەسە اكەڭ مەن اتاڭ ءتىرى بولسا، بىرەۋىنەن سۇراپ كورەلىك، جەتپىس جىلدىڭ الدىنداعى ءومىر قانداي ەدى، قازىر قانداي ەكەن؟


«ول كەزدى جوقشىلىق جايلاعانمەن ادامنىڭ نيەتى تارىلماعان ەدى، ول كەزدە تۋىستار جىلاپ كورىسەتىن، ءبىر-ءبىرىن اي كورمەسە ساعىناتىن، كەلىن توركىنىنە بوزداپ، ازامات جۇرتىنا جىلاپ جەتەتىن. ول كەزدە ساعىنىش بار ەدى، ول كەزدە باۋىرمالدىق بار ەدى، ول كەزدە قيماستىق بار ەدى»،-دەيدى سەكسەنگە كەلگەن بۇركىتشى قارت بەكارىس.

ال قازىر ءبارى بار، مەن بۇنداي توقشىلىقتى ءومىرى كورمەگەن ەدىم، ءبىراق قازىر بالالارىمنىڭ اۋىزىنان باردان گورى جوق،-دەگەن ءسوز كوپ شىعادى، ءبىر-بىرىمەن كەلىسىپ ەمەس، تەبىسىپ ءومىر ءسۇرىپ ءجۇر، قاناعات پەن قايىرىمدىلىقتى قانات قىلماعان وتباسىنان قايىر كەتەدى، ءبىز ونى كوزبەن تالاي كورگەنبىز بالام،-دەيدى كوپتى كورگەن قارت كەۋدە كوزىن ءسۇرتىپ.


راس-اۋ، بارلىق قاسىرەت قايىرىمسىزدىق پەن قاتىگەزدىكتەن باستاۋ الماي ما، وتباسىنىڭ التىن ارقاۋى – ايالاۋ مەن ءسۇيىنۋ ەمەس پە.


ەركەگى ايەلىنىڭ قالجىراعانىن سەزىپ، قۇشاعىنا باسسا، ايەلى ەرىنىڭ ەڭبەگىن باعالاپ، ەتىگىن مايلاسا، ەر ايەلدەن اجىراپ، ايەل ەردەن بەزىنىپ كەتەر دەيمىسىڭ؟!


بالا اكە-شەشەسىنىڭ اجىمىنا كوز سالىپ، اقىلىنا باس يزەسە، اتا-انا ۇل-قىزىنىڭ مۇراتىنا دەمەۋ بولىپ، قولتىعىنان دەمەسە، ءبىر-بىرىنە مەيىر توگىپ، ءبىرىن-ءبىرى تۇسىنسە، شاڭىراقتىڭ شاتتىعى ۇزىلمەس ەدى.

ۇيدەگىلەرىڭ قالجىراسا، جۇباتۋ ايتىپ، جانىنا سايا بول.


ۇيدەگىلەرىڭ اۋىرسا، كوبىرەك قارايلاس، ۋاقىتىڭدى ءبول.


ۇيدەگىلەرىڭ قينالسا، قاراپ تۇرما، قولتىعىنان دەمە، سۋىق قاباق تانىتپا.


وتباسىنىڭ اماندىعىنان، ۇيدەگىلەرىڭنىڭ ساۋلىعىنان ارتىق ەشتەڭە جوق ومىردە.


ۇساق-تۇيەك ىسكە بولسا، جان جارىڭنىڭ جاراسىن تىرناپ، جانىن ورتەمە. مەزەتتىك اشۋعا بولا جاقىندارىڭا قاتتى ءسوز ايتىپ، كوڭىلىن قالدىرما.

تانىمالى جازۋشى پاۋەل گورچاگين: بىرەۋلەر وتكەنىن ەسكە العاندا قاتتى وكىنەدى. ونىڭ وكىنىشى كوبىندە جاقىندارىنىڭ جانىن جارالاۋدان تۋىندايدى. ال بىرەۋلەر وتكەنىن ەسكە العاندا قاتتى قۋانادى. ولار كوبىندە وتباسىنا مەيىرىمدى دە كەشىرىمشىل بولعاندار،-دەگەن ەكەن.


ءبىزدى الدا قانداي سىناق كۇتىپ تۇرعانىن كىم ءبىلسىن، ءومىر بولعان سوڭ كەدەرگىلەر كوپ بولادى.


وعان بولا وتباسىڭدى ويىرانداساڭ وكىنىش ارقالايسىڭ.


مازاسىزدىق، قىساستىق، كورە الماستىق، وپاسىزدىق ءبارى، ءبارى دە جاقىندى جات قىلاتىن جاۋىزدار.


«دۇنيەنىڭ راحاتىن كورەتىن ادامدار كوركەم مىنەزدى ادامدار»،-دەگەن ەكەن ءبىر دانىشپان، سول ايتپاقتايىن جاراسىمدىلىقتان ارتىق دوس جوق بىزگە، وتباسىمىزداعى جاقىندارىمىزدىڭ بىزدەن كۇتەتىنى جارقىراعان جارماق ەمەس، ىستىق جۇرەكتەن اعىپ شىققان اياۋلى باۋىرمالدىق.


    كەلۋ قاينارى: http://www.elarna.net/koru.php?tur=37&id=1057770

    پىكىرلەر:

    juz dep sifirmen jazingiz.