كومپيۋتەر نۇسقاسى Компйутер нұсқасы

قولايلى بەت | بۇگىنگى | كەشەگى | جالپى مالىمەت

ەل-ارناعا تىزىمدەلىڭىزدەر ...
قازاقتىڭ 1001 ەرتەگىسى
СанақКелген (IP)Көрілген (PWs)КомпйутерҚолфон
2019-09-181453485241 %59 %
2019-09-191340442541 %59 %
2019-09-205411182776 %24 %

كىتاپ مەرەكەسى — «انا ءتىلى» ۇلت گازەتى


ءتۇرى: انا-ءتىل گازەتى

ۋاقىتى: 22:56 - 2019/09/11

: PDF Download - Жұктеұ - Скачать - ءتۇسىرۋ

elarna.net Printed Version.

الماتىدا كىتاپقۇمار جانداردىڭ بىر-بىرىمەن جاقىن تانىسىپ، وي ءبولىسىپ، پىكىر الماسۋىنا مۇمكىندىك جاساعان، وقىرمانىن سۇيىكتى جازۋشىسىمەن تابىستىراتىن كىتاپ فەستيۆالى ءوتتى. بيىل التىنشى مارتە وتكىزىلىپ وتىرعان ء«KitapFest»-تىڭ وقىرمان اراسىندا بەدەلى جىل وتكەن سايىن ارتىپ كەلەدى. 

كىتاپ وقۋ مادەنيەتىن قالىپتاس­تى­رىپ، جازۋشى مەن وقىرمان ءۇشىن ورتاق الاڭ قۇرۋ ماقساتىن كوزدەيتىن يگى شارانى «باۋىرجان» قايىرىمدىلىق قورى ۇيىمداستىرىپ، الماتى قالالىق اكىمشىلىگى قولداۋ ءبىلدىردى. قۇرامىنا 26 كىتاپحانا ەنەتىن الماتى قالاسى ورتالىقتاندىرىلعان كىتاپحانالار جۇيەسى بەلسەندى جۇمىس ىستەپ، ءوز شاتىرىندا «جاڭا گۋمانيتارلىق ءبىلىم. 100 جاڭا وقۋلىق» جوباسى جانە «وتباسى حرەستوماتياسى» اۆتورلارىمەن كەزدەسۋ ءوتىپ، تالدىقورعاننان ارنايى كەلگەن اقىن اينۇر تولەۋدىڭ «وتقاراعى»، شىڭعىس مۇقاننىڭ «كوشباسشىلىق» كىتابىنىڭ تانىستىرىلىمى ءوتتى.
شارانىڭ ۇيىمداستىرۋشىلارى كىتاپ وقۋ داعدىعا اينالىپ كەلە جات­قانىن، اسىرەسە جاستاردىڭ قازاق­ستان­دىق جازۋشىلارعا بەت بۇرعانىن ايتادى. ء«اۋ باستا كىشىگىرىم كىتاپ الماسۋ رەتىندە باستالعان جوبانىڭ قاناتى كەڭەيىپ فەستيۆالگە اينالدى. الەمدىك تاجىريبەدە مۇنداي فەستيۆال ءۇش كۇن، ءبىر اپتا وتكىزىلەدى. كەلەسى جىلى ەلىمىزدىڭ شىمكەنت، قاراعاندى، اقتاۋ، اقتوبە سىندى 18 قالاسىندا ۇيىمداستىرساق دەگەن ارمانىمىز بار. بيىل جاستار جىلى اياسىندا نۇر-سۇلتان قالالىق اكىمدىگىنىڭ، قالا جاستارىنىڭ قولداۋىمەن ەلىمىزدىڭ باس قالاسى نۇر-سۇلتاندا ۇيىمداستىردىق، وتە جوعارى دەڭگەيدە ءوتتى. جاستاردىڭ اراسىندا كىتاپ وقۋ سانگە اينالدى، اسىرەسە ءوزىمىزدىڭ جازۋشىلاردىڭ ەڭبەگىن وقۋ ءۇردىسى ارتىپ كەلەدى. بۇل قۋانتارلىق ءارى قۇپتارلىق. ءبىزدىڭ ­باستى ماقساتىمىز دا كىتاپ وقۋدى ­ناسيحاتتاي وتىرىپ، وقىرماننىڭ كىتاپقا دەگەن قۇرمەتى مەن سۇيىسپەنشىلىگىن ارتتىرۋ»­ دەيدى «KitapFest» جوباسىنىڭ ۇيلەستىرۋشىسى مايرا ورازمۇحانقىزى.
فەستيۆالدىڭ ماقساتى – كىتاپ وقۋعا سۇيىسپەنشىلىكتى ارتتىرۋ، قازاقستاندىق باسپا ۇيلەرى مەن كىتاپ دۇكەندەرىن، جازۋشىلاردى قولداۋ دەگەنىمىزبەن، كىتاپقۇمار وقىرمان ءۇشىن دە ۇتىمدى ەكەنىنە كوز جەتكىزدىك. وسى ۇتىمدى تۇستى پايدالانىپ، باسپانىڭ باعاسى­مەن قالاعان كىتابىڭىزعا قول جەتكىزۋگە مۇمكىندىك مول.
قازداي تىزىلگەن كىتاپتارعا ۇڭىلە تۇسكەن كوپشىلىكتىڭ «اتامۇرا» باسپاسىنىڭ ونىمدەرىنە ءىلتيپاتى ەرەكشە ەكەنى بايقالدى. «اتامۇرا» كىتاپ دۇكەنىنىڭ قىزمەتكەرى ءمادينا ماقسۇتقىزىنىڭ ايتۋىنشا، جاستار، اسىرەسە جاسوسپىرىمدەر تاريحي ­رومانداردى، شەتەل ادەبيەتىنىڭ قازاق تىلىندەگى اۋدارمالارىن كوپ وقيدى ەكەن. سونىمەن قاتار ءا.نۇرشايىقوۆتىڭ «ماحاببات، قىزىق مول جىلدار»، «اقيقات پەن اڭىز»، ءق.جۇمادىلوۆتىڭ ەكى تومدىق «دارابوزى»، «سوڭعى كوشى»، و.پامۋكتىڭ «مەنىڭ اتىم قىرمىزى»، «سەزىم مۋزەيى» سۇرانىسقا يە ەكەنىن جەتكىزدى. بۇگىنگى شارادا قىزدار ۋنيۆەرسيتەتىنىڭ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ، ءال-فارابي اتىنداعى قازاق ۇلتتىق ۋنيۆەرسيتەتىنىڭ، ت.جۇرگەنوۆ اتىنداعى ونەر اكادەميا­سىنىڭ ستۋدەنتتەرى كوپ كەلگەنىن، م.ماقا­تاەۆتىڭ «اماناتى»، دۋلات يسابەكوۆتىڭ «گاۋھارتاسى»، ­«بو­نا­پارتتىڭ ۇيلەنۋى» جانە ت.ب. ­شى­عارمالارعا قىزىعۋشىلىق جوعارى بولعانىن اتاپ ءوتتى.
تاعى ءبىر بايقاعانىمىز – كىتاپ جاناشىرى، «مازمۇنداما» قورىنىڭ جەتەكشىسى شىڭعىس مۇقاننىڭ اينالاسىنا ۇلكەن-كىشىلى وقىرماننىڭ كوپ جينالىپ، ەمىن-ەركىن سۇحبات قۇرۋى. ء«سىزدىڭ قانشا كىتابىڭىز ­ساتىلدى؟» ­دەگەن قىزىعۋشىلىقپەن قويىلعان ساۋالعا «فەستيۆالدىڭ ماقساتى كىتاپ ساتۋ ەمەس، كىتاپپەن تانىستىرۋ عوي. كىتاپ دۇكەندە دە ­ساتىلادى» دەي كەلە، جاقىندا جارىق كورگەن «كوشباسشىلىق» كىتابىنا، «مازمۇنداما» قورىنىڭ جۇمىس ­جوسپارىنا توقتالدى. ونىڭ ايتۋىنشا، كوشباسشىلىق تاقىرىبى الەمدە 7،5 مىڭ كىتاپ بولىپ جازىلعان ەكەن. «ەلدىڭ ءبارى اعىلشىنشا بىلمەيدى، سونىڭ ىشىن­دەگى وقىلىمى جوعارى ون كىتاپتىڭ قاي­ماعىن قالقىپ الىپ، ءار كىتاپتى ماز­مۇنداپ، وسى كىتاپقا بەردىك. دەمەك، ءبىر كىتاپتى وقىعان قازاق بالاسى ون كى­تاپ­تىڭ قۇندىلىعىمەن تانىسادى، ياعني ءبىر كىتاپتا ون كىتاپتىڭ جۇگى بار» دەدى ول.
بيىلعى فەستيۆالدىڭ جاڭالىعى دەسەك بولادى، الەم ادەبيەتىنىڭ ەڭ تانىمال كىتاپتارىن قازاق تىلىنە اۋدارىپ شىعاراتىن «Steppe and World» باسپاسىنىڭ نەگىزىن قالاۋشى رايسا سايراقادىرقىزىمەن تىلدەسۋدىڭ ءساتى ءتۇستى. ء«بىز، اسىرەسە بالالار ادەبيەتىنە كوپ كوڭىل ءبولىپ جاتىرمىز. «اننا فرانكتىڭ كۇندەلىگى» مەكتەپتىڭ وقۋ باعدارلاماسىنا ەنۋى ءتيىس ەڭبەك. بۇرىن قازاق تىلىندە سويلەمەگەن كىتاپتىڭ رەسمي اۆتورلىق قۇقىعىن الىپ، قازاقشا شىعاردىق. وقىرمان، اسىرەسە جاسوسپىرىمدەر وسى كىتاپتى وقۋ ­كەرەك. اۋدارما دەگەن وڭاي ەمەس. جۇمىس تا، جوسپار دا كوپ. ماقساتىمىز – قازاق تىلىندەگى ساپالى كىتاپتىڭ ­سانىن كوبەيتۋ» دەيدى موڭعوليادا تۋىپ، ءومىرىنىڭ جەتپىس پايىزىن تاياۋ شىعىس پەن ەۋروپادا وتكىزىپ، جاقىندا ءوز ەلىنە كەلىپ جۇمىسىن جالعاستىرۋدى كوزدەگەن اۋدارما سالاسىنىڭ ­مامانى ر.سايراقادىرقىزى. بۇل ءىستى قازاق ەلىندە جالعاستىرۋىنا دۇكەننەن بالالارعا ارنالعان ساپالى كىتاپ تابا الماعاننان كەيىن، ءوزى ىسكە كىرىسكەن ەكەن.
«وقۋعا ۇسىنامىن» قايىرىمدىلىق اكتسياسىنىڭ جۇمىسىن جۇرگىزىپ جۇر­گەن الىشەر ماراتۇلى ءوزىنىڭ ەكىن­شى توپتاعى مۇگەدەك ەكەنىن، بۇل قايى­رىم­دىلىق اكتسياسىنىڭ تۇسكەن ءاربىر تيىنى مۇمكىندىگى شەكتەۋلى جاندارعا بەرىلەتىنىن، ونىڭ ءوزى ساۋاپتى ءىس ەكەنىن مەڭزەدى. «فوليانت» باسپاسىنىڭ قىزمەتكەرى تالعاتتىڭ ايتۋىنشا، ورتا جاستاعى جانە زەينەت جاسىنداعى ۇلكەن­دەر نەمەرە-شوبەرەلەرىنە قازاق حالىق ەر­تەگىلەرىن الىپ جاتقانىن تىلگە تيەك ەتتى.
كىتاپ فەستيۆالىنە العاشقى جىلدارى مىڭنان اسا وقىرمان قاتىسسا، سوڭعى جىلدارى ولاردىڭ سانى بەس-التى مىڭنان اسقان. دەمەك، بىزدە كىتاپ وقۋدىڭ وزىق ءداستۇرى قالىپتاسىپ كەلەدى.

باعداگۇل بالاۋباەۆا
«انا ءتىلى»


كەلۋ قاينارى: http://www.elarna.net/koru.php?tur=9&id=1046854

پىكىرلەر:

juz dep sifirmen jazingiz.