كومپيۋتەر نۇسقاسى Компйутер нұсқасы

قولايلى بەت | بۇگىنگى | كەشەگى | جالپى مالىمەت

ەل-ارناعا تىزىمدەلىڭىزدەر ...
قازاقتىڭ 1001 ەرتەگىسى
СанақКелген (IP)Көрілген (PWs)КомпйутерҚолфон
2019-09-181453485241 %59 %
2019-09-191340442541 %59 %
2019-09-205411182776 %24 %

ۇرپاققا امانات — «انا ءتىلى» ۇلت گازەتى


ءتۇرى: انا-ءتىل گازەتى

ۋاقىتى: 22:28 - 2019/09/11

: PDF Download - Жұктеұ - Скачать - ءتۇسىرۋ

elarna.net Printed Version.

(وكىمەت وتەلباەۆتىڭ كىتابى جايلى تولعانىس)

بەلگىلى ساتيريك جازۋشى، «ارا» جۋرنالىندا باس رەداكتور، قازاقستان جازۋشىلار وداعىندا ەكىنشى حاتشى، ليتفوند ديرەكتورى، وزگە دە بيىك لاۋازىمدى قىزمەتتەر اتقارعان، بۇگىندە جاسى سەكسەننىڭ بەل ورتاسىنداعى قادىرمەندى قالامگەر، اقيقاتتى تۋ ەتۋدەن تانباي كەلە جاتقان ايتۋلى تۇلعا، كەزىندە مەنىڭ «جازۋشى» باسپاسىنان جارىق كورگەن ەكى بىردەي سىقاق اڭگىمەلەر كىتابىما ءسات ساپار تىلەپ، پىكىر جازعان سىيلاس، تىلەكتەس، ازامات عابەڭ، عابباس قابىشەۆتىڭ ءبىر اڭگىمەسى كۇللى قازاق تاعدىرىنا ورتاق شىنشىلدىعىمەن كوكەيدە ءجۇرۋشى ەدى، تومەندە ءسوز بولاتىن جايلارعا وراي، ءالقيسسانى سودان باستاۋدى ءجون كورىپ وتىرمىز. قوش،  عابەڭ نە دەدى دەيسىز بە؟ «وسى كۇندەردە وتكەن عاسىردىڭ 29-32 جىلدارىنداعى كوللەكتيۆتەندىرۋ، شامالى داۋلەت بىتكەن ادامداردى باي-كۋلاك دەپ، مالدارىن تاركىلەۋگە بەلسەنە ارالاسىپ، وزدەرىن كوز كورمەسكە جەر  اۋدارىپ، بالا-شاعالارىن قاڭعىرتىپ جىبەرگەندەردىڭ اتتارىن اتاسام، ولاردىڭ قازىرگى ۇرپاقتارى بىر-بىرىمەن ارازداسىپ، قىرىق پىشاق بولاتىنى ءسوزسىز. سوندىقتان جاق اشپاۋدان بولەك لاج جوق. مۇنى ايتقانىم، بولشەۆيكتەردىڭ ايتاعىنا ەرىپ، جاقىندارىن جاۋ ساناعان كەدەي-كەپشىك، قىزىل كوزدەردىڭ ءوز اعايىندارىنا جاساعان قاتىگەزدىك، ۇستەرىنەن جازعان ارىز-شاعىمدارى ءالى كۇنگە ساقتالاتىن جەردە ساقتاۋلى تۇر. ولاردى جاريا ەتىپ كەرەگى جوق. كەيىنگىلەرگە اۋىزبىرلىك، تاتۋلىق بەرسىن».

عابەڭ ايتقان (بارشاعا ورتاق) اقيقاتتىڭ ءمانزالاسى، شاماسى، وسىلاي بوپ كەلەدى. ونى ەستىگەن بويدا مەنىڭ دە بۇيرەگىم بۇلك ەتىپ، كەيبىر كوز كورىپ، كۋا بولعان جاي-جاپسارلار ويعا ورالا كەتكەن-دى. اتا-انالارى قۇلاق بوپ، ءار ءۇيدىڭ بوساعاسىن جاعالاعان جەتىمەكتەر، انا اۋىل، مىنا اۋىل تۇرعىندارىنىڭ ەل ىشىندە بەتتەرىنە كون جاماپ، تۇك بولماعانداي بوپ جۇرەتىن الدەكىمدەر جايلى «ولارعا جاقىنداماڭدار، شەتتەرىنەن كەشەگى جۇرتتى سورلاتقان بەلسەندى عوي» دەيتىندەرى ەسكە ءتۇستى. دەسە دە، سول بەلسەندىلەردىڭ كەيبىرىنىڭ بالا-شاعالارىمەن بىرگە ويناپ، بىرگە وستىك. قۇدايدىڭ قۇدىرەتى شىعار، قاراۋلىعى الدارىنان شىققان وندايلاردىڭ وزدەرى دە ايدالىپ، ون-ون بەس جىلدان سوڭ ەلگە ورالىپ، ءىز-تۇزسىز كەتكەندەر دە بولاتىن. ايداۋدان ورالعاندار اعايىن اراسىندا جۇرمەي قايدا ءجۇرسىن. ءبىراق كۇنى كەشەگى ارامزا قىلىقتارىن ەشكىم بەتتەرىنە باسپايتىن. ەسەسىنە، ۇيلەرىنە ەشكىم باس سۇقپايتىن، توي-تومالاق، جيىندارعا شاقىرمايتىن…
بۇل جولى ۇزاق جىلدار بويى اۋىزعا الىنباي، اۋىزەكى اڭگىمە اراسىندا ءسوز بولۋدان قالعان وسىنداي دايىستىكتەردى ازىن-اۋلاق جاڭعىرتۋعا سەبەپكەر بولىپ وتىرعان – بۇدان ەكى-ۇش جىلداي بۇرىن ومىردەن وزعان، كەلەس اۋدانىنا قاراستى بۇرىنعى «جولباسشى» كولحوزى، قازىرگى «مامىت» اۋىلىنان ات جالىن تارتىپ شىققان ساناۋلى ەتى ءتىرى ازاماتتىڭ ءبىرى، پارتيا، سوۆەت ورگاندارىندا جاۋاپتى قىزمەتتەر اتقارعان وكىمەت وتەلباەۆتىڭ زەينەتكە شىققان سوڭ، تۋىپ-وسكەن اۋىلدىڭ ۇل-قىزدارى، سونداي-اق ءدام-تۇز بۇيىرعان جەردە ەڭبەك ەتىپ، ابىروي بيىگىنەن كورىنىپ جۇرگەن وزگە دە تۇلەكتەرىنىڭ ء(بارى بولماسا دا) ءبىرازىن تۇگەندەپ، ءوزى تۋعان قارا شاڭىراقتىڭ دا كيەسىن ۇمىتپاي، ارۋاق ءتىرىلتىپ، كەيىنگى ۇرپاققا قالدىرعان «ۇرپاققا امانات» اتتى كىتابى (دەر ەدىك).
وكىمەت وتەلباەۆ قازىرگى كەلەس اۋدانىنا قاراستى «جولباسشى» («مامىت») كولحوزىنىڭ تۋماسى. 1939 جىلى ءومىر ەسىگىن اشىپ، 1956 جىلى «لەنين جولى» ورتا مەكتەبىن بىتىرگەن سوڭ، تاشكەنت يرريگاتسيا ينستيتۋتىن تامامدايدى. ەڭبەك جولىن قاتارداعى ينجەنەرلىكتەن باستاپ، العىرلىعىنىڭ ارقاسىندا ساتىدان-ساتىعا كوتەرىلىپ، تۇلكىباس، شاردارا اۋداندىق، وبلىستىق پارتيا كوميتەتتەرىندە قىزمەت اتقاردى. 1975-1985 جىلداردا بوگەن اۋداندىق اۋىلشارۋاشىلىق باسقارماسىن باسقاردى. ودان كەيىن وبلىستىق «اۆتوموبيل جولدارى»، «كازسەلحوزتەحنيكا»، مۇناي ونىمدەرى باسقارماسىنىڭ تىزگىنىن ۇستادى. ءبىراز جىل «كازاحويل» مەكەمەسىندە ىستەدى. وردەن، مەدال، گراموتالارى جەتەرلىك. زەينەتكە شىققان سوڭ دىنگە بەت بۇرىپ، زايىبى ەكەۋى قاجىلىققا بارىپ، مۇسىلماندىق پارىزىن وتەدى. قايىرىمدىلىق راسىممەن اينالىستى.
«ۇرپاققا امانات» اتتى كىتابىنىڭ اۆتورى ەرىككەننىڭ ەرمەگى ەمەس، (جوعارىدا ايتقانىمىزداي) ەشكىمگە سالماق، مىندەت ارتپاي، ارتتاعىعا ءسوز قالدىرۋ ءۇشىن كورگەن-بىلگەنىن حاتقا ءتۇسىرۋ نيەتىمەن جازعانىن كىتاپتىڭ كىرىسپە سوزىندە (اسا قاراپايىم، كىشىپەيىلدىك تۇرعىدا) ءوزى دە جاسىرمايدى: «قۇرمەتتى وقىرماندار! مەنىڭ بۇل شىعارمامنىڭ ماقساتى… وسكەلەڭ ­جاستار، تۋما-تۋىس، زامانداستارعا ءومىردىڭ وتكىنشى ەكەنىن باعامداي وتىرىپ… باۋىرمال، تاتۋ، سىيلاس بولۋدى… ادامي جوعارى قاسيەتتى جوعارى ۇستاپ… بەرەكەلى، باقىتتى عۇمىر كەشسە دەگەن ىزگى نيەتىمدى ءبىلدىرۋ… بارىڭىزگە اللانىڭ نۇر-شاپاعاتى جاۋسىن…» دەگەن اق تىلەكپەن. سونداي-اق، ارينە… ول…
ءوز باعاسىن بىلەتىندىكتەن، اقىن، جازۋشىلىق ەگىننەن اۋلاق، ءبىراق ءاۋ دەمەيتىن قازاق جوعىن، شاما-شارقىنشا قالام تەربەگەنىن اڭعارتۋدى دا ۇمىتپايدى. كىتاپتا دەرەكتى حيكايا، ەستەلىكتەر، ءازىل اڭگىمە، ليريكالىق، ازاماتتىق، ارناۋ ولەڭدەر، ءبىرقاقپايلار، ومىردەن وتكەن تۇلعالار جونىندە دەرەك-مالىمەت، فوتوسۋرەتتەر توپتاستىرىلعان. ءتىلى دە، مازمۇنى دا شۇرايلى، شىرايلى، تارتىمدى، تاعىلىمدى. وكىمەت ءىنىم ءار ءسوز، ءار قادامىنا ءمان بەرىپ، «ۇشا بىلگەن قاناتقا دۇنيە كەڭدىگىن» (ت.ايبەرگەنوۆ) دالەلمەن كورسەتەدى. سونى ءتۇسىنىپ، ۇعا بىلگەندىكتەن شىعار، كىتاپقا بەرگەن «اعا لەبىزى» دەگەن باتا سوزىندە شەرحان مۇرتازانىڭ «وكىمەت وتەلبايۇلىنىڭ قولجازباسىن وقىپ، تانىسا كەلە… ايتارىم، ماعىناسى ءماندى، ­ساپاسى قۇندى…» دەپ باعالايتىنى رۋشىلدىق شەڭبەردە قالىپ قويماعان دەگەندى اڭعارتاتىنى بەلگىلى.
ايتۋلى ابىز، كلاسسيك جازۋشى، كورنەكتى قوعام قايراتكەرىنىڭ پىكىرىنە قوسىلامىز، ارينە. سوندىقتان دا…
وكىمەتتىڭ بۇل فانيدەن وسىنداي تانىمدىق ماۋەسى مول كىتاپ جازباي-اق وتسە دە (وندايلار از ەمەسىن سەن بىزدەن دە جاقسى بىلەسىڭ) ەشكىم پالەن دەمەسى تاعى انىق ەكەنىن دە بىلەمىز. وكىمەت ىنىمە كۇللى وقىرمان، بولمىسى بولاتتاي، بىرلىگى بەرىك، تاتۋلىعى رياسىز، وتىرىك-وسەكتەن ادا، قىزعانىش، ءىشتارلىق، كۇنشىلدىكتەن جۇرداي، ءبىر-بىرىن قادىرلەپ، ماقتان ەتۋگە جەتىك، ادامي ۇستانىمنان اينىمايتىن بۇگىنگى سانالى دا ساليقالى قاۋىمنىڭ قاراپايىم مۇشەسى رەتىندە ءوز اتىمنان اتا-بابا ارۋاعى قولداپ، ريزا بولعانداي ەڭبەك جازىپ قالدىرعانى ءۇشىن العىس ايتامىن، رۋحىنا تاعزىم ەتەمىن، باس يەمىن. نۇرىڭ پەيىشتە شالقىسىن – سوڭعى رەت ۇشىراسىپ، ءۇش-تورت ساعات بىرگە جۇرگەندە كوزىڭە مۇڭ ۇيالاپ، قيماستىقپەن قوشتاسقان – ارداقتى باۋىرىم!
شەرحان مۇرتازانىڭ باتاسىمەن جارىق كورگەن كىتاپتىڭ ء«ومىرباياندىق دەرەك»، «اۆتوردان»، «اعا لەبىزى»، ء«العىسوز»، «تۇپكى اتادان ماعان دەيىن»، «ۇرپاققا امانات» اتتى قىسقا دا نۇسقا، شاعىن تۇسىنىكتەمەلەردەن كەيىن «ەستەلىكتەر، ارناۋلار»، «ەلىم، جەرىم، ءومىر تۋرالى جىرلار»، «بالالىق شاق… تۋرالى جىرلار»، «ساعىنامىن، ويلانام»، «تابيعات جانە جەر مەن كوك»، «ەستە قالار جاندار، ەستەلىكتەر»، «ەستەلىكتەر، سۋرەتتەر، ارناۋ، وسيەتتەر» دەگەن تاراۋلاردان تۇراتىنىن دا ايتا كەتۋدى ءجون سانايمىز. ءار تاراۋدىڭ ءوز سۇرلەۋ، ءوز جول، ءوز باعىت، ماقسات-مۇددەسى بارى تۇسىنىكتى. بۇگىنگە دەيىن اتالمىش ەڭبەكتى كوزىقاراقتى كوپ ءمۇمىن وقىعانى ءشۇباسىز. سوندىقتان كىتاپ مازمۇنى، اۆتوردىڭ تۇپكى نيەتى، نە جازىلىپ، نە ايتىلسا، ءبارى… ءبارى ايداي انىق، راۋشان دەپ قارايمىز. ءبىزدىڭ دە ماقساتىمىز – كىتاپتى جىلىكتەپ تالداۋ، ەكشەۋ، تارازىلاۋ ەمەس، كەرىسىنشە، ءبىر قاۋىم ەل-جۇرت تاريحىنان (تۇڭعىش رەت دەسە دە بولاد) از دا بولسا ساز دەرلىكتەي تۇسىنىك-دەرەكتەر بەرىپ، بىلگەنىن ورتاعا سالعان وكىمەتكە ريزالىق ۇستىنە ريزالىق ءبىلدىرۋ، بارەكەلدى دەۋ.
وكىمەت ءىنىم، سەن جازىپ قالدىرعان وسى كىتاپتان الپىس جىل بۇرىن ارتتا قالعان بالالىق، جاستىق كەزدە نە ءجۇز كورىسىپ، نە سىرتتاي بىلگەن زامانداستار مەن كەيىن ءوسىپ جەتىلگەن، ەلگە ­تانىمال اعا، ءىنى، قۇرداس، قۇربىلاردىڭ دەرەگىن ءبىلىپ، سۋرەتتەرىن كورگەنىم، ارناۋ ولەڭدەرىڭمەن تانىسقانىمدى ۇلكەن ولجاعا بالايمىن. وسى سوزىمە دالەل رەتىندە بىر-ەكى ايعاق كەلتىرە كەتەيىن… ءمۇسىر ارتىقوۆ. ارداقتى اعامىز. بايىرعى ۇستاز. پەداگوگ. سۋرەتى بەرىلىپتى. وزبەكالى جانىبەكوۆ، لەنينشىل رۇستەموۆ، ءبىز وقىعان ورتا مەكتەپتىڭ ديرەكتورى، كەلەس اۋدانىنان سوعىسقا دەيىن ساگۋ بىتىرگەن بىردەن-بىر مامان ومار ەسىموۆ، بايىرعى پەداگوگتار ارتىق دارحانباەۆ، اقتوبەلىك زۇلقاش دۇيسەنوۆتەردىڭ سۋرەتتەرى العاشقى لەكتە بەرىلگەنى دە بەك دۇرىس. سول توپتىڭ باس جاعىندا ءۇشىنشى بوپ ء(وز اعاڭ) مەن دە تۇر ەكەنمىن. «ەكەنمىن» دەيتىن سەبەبىم، كىتاپتى سەن قايتىس بولعان سوڭ، ۇيىڭە كوڭىل ايتا بارعاندا جار قوساعىڭ – قاجى اپا اتالاتىن – كەلىن بەرگەن ەدى. ول ءۇشىن كەلىنگە شەكسىز العىس!
سونداي-اق كىتاپتا جاريالانعان سۋرەتتەر ىشىنەن مەن 1958 جىلى الماتىدا جولىقتىرىپ، كازگۋ-دىڭ كونكۋرسى قيىن جۋرفاگىنە تۇسە المايتىنىن بىلگەندىكتەن، فيزكۋلتۋرا ينستيتۋتىنا جول سىلتەپ جانە سول وقۋ ورنىن تابىستى اياقتاپ، تۋعان جەرگە الماتىدا ۇيلەنگەن كەلىنمەن بىرگە ورالعان مارقۇم ءسابيت، ءىنىسى ءابيت، ءقازىر شىمكەنتتە تۇراتىن پروفەسسورلار شاپاي ­اساباەۆ، ايۋباي قۇرالوۆ، يكرام تولەەۆ، ونىڭ تۋعان اعاسى، مارقۇم ءشازىندا تولەەۆ، نۇر-سۇلتان قالاسىندا تۇراتىن ­مەديتسينا عىلىمىنىڭ دوكتورى، پروفەسسور، وزبەكستان مەملەكەتتىك سىيلىعىنىڭ لاۋرەاتى­ امان شاكىرۇلى اساباەۆ،­ قازاقستاننىڭ وزبەكستانداعى ەلشىسى دارحان ساتىبالدى، مارقۇم قارجىگەر قۇرباۋ ۇسىباليەۆ، دارىگەر باقىتجان ءالىموۆ، كاسىپكەر ءابدىراش تاشمانوۆ، ت.ب. سۋرەتتەرىن كورىپ، كوڭىلىم مارقايدى. ءاي، جارايسىڭ! يماندى بول!
وسى اتالعان، اتالماعان پەندەلەردىڭ ءبىرازىنا ارناعان ولەڭدەرىڭ دە كەلىستى، ورىندى. شىمكەنتتەگى مەديتسينا ينستيتۋتىنىڭ وقىتۋشىسى، عىلىم دوكتورى، پروفەسسور، وبلىستىق اۋرۋحانانىڭ باس دارىگەرى، اتتەستات الىپ، وقۋعا ءتۇسۋ ءۇشىن تاشكەنتكە بارا جاتقان جەرىنەن مەن كەزدەيسوق ۇشىراسىپ، الماتىعا بۇرىپ جىبەرگەن – ەكەۋمىزگە ءتول ءىنى – يكرام تولەەۆكە باعىشتاعان ارناۋ ولەڭىڭدە «تولە اتامنىڭ جالعاسى، يكرامۇلى مامىتتىڭ، جالعىز مامىت قانا ەمەس، پەرزەنتى بۇكىل حالىقتىڭ» دەسەڭ، وسى جولدار اۆتورى – مەن پاقىردى دا ۇمىتپاي: «مامىتتان شىققان ءبىرتۋار، توپتى جارعان تۇلپارسىز. ءبىراز قاۋىم ىشىندە، بيىكتەگى سۇڭقارسىز. ەلگە سىيلى اعانى، تۇتامىز ماقتان ءبىز دەگەن، سىزدەي اعا تاپپايدى، الەمدى كەزىپ ىزدەگەن» دەپ، اعىڭنان جارىلعانىڭا ءپالى! مەيلى! كۇندە ماقتالىپ جاتاتىنداردىڭ قاسىندا ول نە ءتايىرى! توزەيىك، شىدايىق، ءا، يكرام! سولاي ما؟ ارينە، سولاي! (دەيسىڭ).
ەندى مارەگە جەتەر الدىندا…
قاراپايىم جازىلعان كىتاپقا قاراپايىم پىكىر ءبىلدىرۋ سوڭىندا ءسوز باسىندا اتالعان عابباس قابىشەۆتى اۋىزعا العان سەبەبىمىزگە كەلسەك، توق ەتەرى… ءيا، ءيا، كوللەكتيۆتەندىرۋ، تاركىلەۋ، اتۋ، اسۋ، قىرۋ، جويۋ، اشارشىلىق جىلدارداعى سۇرگىن-ناۋبەتتىڭ ادام ايتقىسىز جاۋىزدىقپەن ورشۋىنە ءوزىمىزدىڭ دە (قازاقتىڭ) قوسقان ۇلەسىمىز اتان تۇيە بولماسا دا، ءبىر ەسەككە جۇك بولارداي ەكەنى ايان. عابەڭنىڭ ايتىپ وتىرعانى دا سول. قازاق جەرىنىڭ بارلىق تۇكپىرىنەن ەت جاقىن، اتالاس اعايىنداردىڭ ەشتەڭەگە قاراماي، اتىن ءوشىرىپ، جوق ەتۋ ءۇشىن ءبىرىنىڭ ۇستىنەن ءبىرى قولدارى قالتىراماي جازعان وتىرىك-جالا، ارىز-شاعىمدارى، نەگە ەكەنىن قايدام، ءتيىستى جەرلەردە ءالى كۇنگە ساقتاۋلى. ءبىراق، قۇپيا. بەرىلمەيدى. كورسەتىلمەيدى.
ەگەر جاريا بولسا، جۇلقىنبايلىق الاۋىزدىعى ءبىر-اق ساتتە ويانا سالۋى بەك مۇمكىن، ءتاتۋ-تاتتى، ءبىرىن-بىرى كوپسىنۋ، كورە الماۋ، كۇندەۋدەن ماقۇرىم، ءوزىم دەگەندەرگە الدەبىر قاڭسىقتى تاڭسىق ساناپ، وز-وزدەرىن جاتتاي سىيلاۋعا شەبەر، قىر كورسەتۋ ويىنا كەلمەيتىن اعايىندار اراسىندا سول باياعى جاعا جىرتىساتىن ايتىس-تارتىس قايتا لاپ ەتۋى تۇك ەمەس. دەگەنمەن، ءقادىرلى عابەڭنىڭ التى باقان الاۋىز قازاقتىڭ سول اۋمەسەرلىگىنىڭ ء(بىرىن-بىرى قارالاعان ارىز-شاعىم) كەيبىرىنە نازارى تۇسسە كەرەك، ايتپەسە، نەگە ايتتى جوعارىداعىداي ەسكەرتۋدى؟ ال مەن ءوز باسىم اعايىننىڭ دا كەيبىر قاراۋلىعىنا قانىقپىن. ويتكەنى كولحوزداستىرۋ، كونفيسكەلەۋ كەزىندە ءوزارا جاۋلاسىپ، تورتكە بولىنگەن بەيباقتاردىڭ ءبىر-بىرىن ولتىرە جامانداعان ارىز-شاعىمدارىنىڭ بازبىرلەرىن – عابەڭ قۇساپ مەن دە – ءوز كوزىممەن كوردىم، وقىدىم. سەنىمدى (پولكوۆنيك) دوستىڭ ارقاسىندا. ودان بەرى كوپ جىل ءوتتى. ماعان كومەكتەسكەن پولكوۆنيكتىڭ ءالى كوزى ءتىرى. كىمنىڭ كىمگە قانداي قىساستىق ىستەگەنى سول قۇجاتتاردا قاتتاۋلى. اتى-جوندەرى دە كورسەتۋلى. شەتى شىقسا ءبىتتى، تەنتەك جەل ۇيىتقىپ بەرەرى تۇرعان گاپ (دەدىك قوي). بۇل عابباس قابىشەۆتىڭ پىكىرى. مەن قوسىلامىن. سوندىقتان…
بارشا قازاققا ىنتىماق، اۋىزبىرلىك تىلەيمىن. «ۇرپاققا امانات» كىتابىن جازىپ قالدىرعان وكىمەت وتەلباەۆتىڭ دىتتەگەنى دە سول ەكەنى ءبىر اللاعا ايان. البەتتە، ءبىرىن-بىرى ءىشتارلىق سالدارىنان ولەردەي جەك كورىپ، تورتكە بولىنگەن كوپ اۋىلدىڭ بىرىندە تۋىپ-وسكەن مەن كىمنىڭ كىمنەن قالاي جاپا شەككەنىنىڭ شەت پۇشپاعىن سيپاي قامشىلاپ ايتقان بولدىم. ودان ارىعا جول جابىق. وسى كۇندەردە ءوزارا تاتۋ، بىر-بىرىنە مەيىرىمدى، ادامگەرشىلىگىندە ءمىن جوق، قىزعانىش، ءىشتارلىق، كۇنشىلدىك دەگەندەردىڭ نە ەكەنىن بىلمەيتىن جاڭا بۋىن جاس وركەن باۋىرلارىما جارقىن بولاشاق تىلەيمىن. وزىڭە تىلەيتىن جاقسىلىقتى وزگەگە ارتىعىمەن تىلەسەڭ، ساۋاپقا كەنەلەسىڭ! مەككەگە بارعان پارىزىڭ وتەلەدى!

زاكىر اساباەۆ،
حالىقارالىق «الاش» ادەبي سىيلىعىنىڭ لاۋرەاتى


كەلۋ قاينارى: http://www.elarna.net/koru.php?tur=9&id=1046841

پىكىرلەر:

juz dep sifirmen jazingiz.