كومپيۋتەر نۇسقاسى Компйутер нұсқасы

قولايلى بەت | بۇگىنگى | كەشەگى | جالپى مالىمەت

ەل-ارناعا تىزىمدەلىڭىزدەر ...
قازاقتىڭ 1001 ەرتەگىسى
СанақКелген (IP)Көрілген (PWs)КомпйутерҚолфон
2019-10-151347355232 %68 %
2019-10-161489390735 %65 %
2019-10-1710518424 %76 %

::::يلياس جانسۋگۋروۆ. ولەندەر جيناگى. (1921-1924) ::ولەڭدەر جيناعى. ءىى

كىتاپحاناعا قايتۋ

ولەڭدەر جيناعى. ءىى ->تۇڭعىش توعىسۋ
اپتورى: ءىلياس جانسۇگىروۆولەڭدەر
ولەڭدەر جيناعى. ءىى - كورىلىم: (1092)


تۇڭعىش توعىسۋ

اق اۋىل. اۋىلدا وردا دۇمبىرلەگەن

ول اۋىل، وردادا ونداي كىم جۇرمەگەن.

قاقشيىپ كەجىمدى كەر كەرمەدە تۇر

قاتىرعان، ۇكىلەگەن، ءدۇلدۇل دونەن.

ويىسىپ وردا اۋزىنا ۇسىنعان جان

تىرەسىپ ءبىر - بىرىنە ءجۇر - جۇرلەگەن.

جايۋلى ءۇي ۇستىندە جاستىق جاتىر

دابىرمەن جيناپ ءالى ۇلگىرمەگەن.

«ۋا، سويلەس!»

وردا ارتىندا تۇرا قالدىق;

شىعادى دومبىرا ءۇنى دۇڭگىرلەگەن.

ەڭكەيىپ ەكىندىدەن كۇن قۇديدى،

كەلە جاتىر اۋىلعا مال ءبىر - بىرلەگەن.

اسپانعا اقىن ءانى شىعادى ورلەپ،

اسقاقتاپ الاتاۋدىڭ تاۋىن تەربەپ.

ۇشقىر ءۇن كوككە كۇلىپ تولقىعاندا،

كوبىكتەي كوكشە بۇلتتار قاعادى كولبەپ.

شىنايى ءۇن شىرقاۋىمەن شىڭنان شىعىپ،

قايتادان قالىقتاسا جاي تومەندەپ،

الدارتار ادەيى قوسقان تىڭ تۇياقتاي

دومبىرا قوسىلادى سوندا سويلەپ.

بىردە ويدا، بىردە وردە جارىسقانداي

داۋىس تىنسا جۇيرىكتەي ءان دىرىلدەپ.

جەلپىلدەگەن جۇيرىك تەرىڭ جەلشە سارناپ،

ىلىپ اپ توگىلەدى كۇي مايموڭدەپ.

تاڭىرقاپ قاراي قالدى كەلىنشەك قىز.

«شىق!» - دەدى قورعاسىن ءۇن ۇيدەن دىبىس.

شىقتى ۇيدەن شاقشا ۇستاعان شۇبار جىگىت،

تۇكىرىپ ناسىبايىن، باسىپ نىعىز.

− جول بولسىن! جاقىن كەلدى ءجون سۇرادى.

− قۇدايى قوناق ەدىك، جولاۋشىمىز...

− ءتۇسىڭىز.

شىلبىرلاردى شۇبار الدى;

مايماڭداپ ۇيگە تامان كەلە اتىرمىز.

− اسسالاۋماعالەيكۋم...

− الەك ءسالام.

− جوعارى. تورگە تامان...

− قوش كەلدىڭىز!

وتىردىق ورداسىندا التى قانات،

جايناعان جاساۋ كوزدىڭ جاۋىن الادى.

تەگەرىش، تەرمە باسقۇر وردا وراعان،

ۋاقتىڭ قارنى كۇمىس جارقىل قاعادى.

تۇس كيىز شىم كەستەلى، ءشاي شىمىلدىق،

ىشىكتەر ءىلۋلى تۇر تۇلكى، جانات.

ساندىقتار بىلعارى قاپ كۇمىستەگەن،

جيۋلى كورپە - جاستىق قابات - قابات.

كەبەجە بايمۇڭكەلى، جۇقاياقتار

سىرلانعان، سۇيەكتەگەن توسەك اياق.

ىرگەدە ەمىزىكتەپ قارا سابا،

پىسپەگى شەكەمىكتى الما ساعاق.

تەكەمەت توسەگەنى كىلەم، كورپە.

بوساعا جاق ەر - توقىم اۋىر تۇرمان.

ون جاقتا بايشەشەكتەي قىز توسەگى،

شىمىلدىق شاعي، نۇرى شومىلدىرعان.

كەر قۇبا كامشاتىمەن كەربەز وتىر،

كەرگىشتىڭ ءبىزى سىرت - سىرت، ساۋساق، سۋماڭ.

جۇنىن جۇلعان تايلاقتاي تازىعىر شال،

جاس توقال جانىندا وتىر قاققان قىلماڭ.

ارسا ارىق، كۇرەڭ كوسە تەر سورعالاپ

اق بۋرىل اقىنى وتىر ءان سالدىرعان.

انتالاپ اششىلاعان قويداي بولىپ،

ماز - مەيرام سالعان اننەن وسى دۋمان.

بايسالدى بايبىشە وتىر بوستەگىندە،

ەكى اينا اينالىپتى توستەگى ىنگە.

سەكىلدى كۇيگەن تەرى بەتى بوپتى،

يتيگەن يەك، اۋىز تۇسكەن كوردەي

تۇسىپتى وپىرايىپ ىشكەرىگە.

مولاداي جاۋىن شايعان مۇرىن قاپتى،

قارتايسا اناۋ اق قىز وستەدى مە؟

پىشىندى كارلى كارىلىك پىشكەنى مە؟

الايدا اقىلى تىي، ايتىپ وتىر

جالشىعا، جاس توقالعا، قىز - كەلىنگە:

«مال الدىر، مەيمانىڭا مەزگىلىمەن،

اتانىڭ ۇلى شىعار باتا تىلە!»

تۇستەيىن توقالدى دا ءتۇس توقتاتىپ:

قارا كوز، قايماق ەرىن، قاسى جاتىق.

قايراقتاي قارا جايداق، قايماڭ قاققان،

قايقى ءتوس، جاتاعانداۋ، ءتىلى تاق - تۇق.

كىرسىز اق كيمەشەگى جاراسىپ تۇر،

تىكتىرگەن جاعىن مارجان، وقالاتىپ.

وراسى شۇبەرەكتىڭ و ءبىر شاتاق

سالپيتىپ ەكى قۇلاق ۇشىن سارقىپ.

سامساۋلى ساۋساقتارى ساقينادان،

ومىراۋ ىلگەك، تۇيمە، مارجان، اقىق.

باي بيلەپ، بايبىشە يلەپ العان ادام

قوساعىن قويعان كىسى قاقشاقتاتىپ.

اق وردا شىپىلداعان شىبىعىنان

تور تولى تومار شالدار تومىرايعان،

ەڭسەگەي، ەڭگەزەر بار ومىرايعان.

ەبەلەك، ەرگەجەلى - ءبارى سوندا،

قوشقارداي قوجىرلار بار قوجىرايعان.

جۇن ساقال، كۇمىس ساقال، كوسە، شوقشا،

كوزدەر كەپ سىعىرايعان، باجىرايعان.

مايتالمان، ءدىلمار، تۇيىق، تومىرىقتا

بار پىسىق تا، بوقباسار دا، قىلشىق ايران.

تۇكىرىپ الدى - ارتىنا بىلىش - بىلىش،

ساتالا ساقال بىتكەن ناسىبايدان.

قوزعالدى اقىن ءانى قايتا قوزىپ،

قوناق كەپ، قوبىراۋمەن قويا قويعان.

ەڭكەيدى ەمىزىكتى قارا سابا،

القىمعا تەگەش توستى الا سالا.

قۇلاشتاپ قول قايىرىپ ءۇي يەسى

ساپىرىپ قىمىز بەردى شارا -شارا.

تۇرۋلى توڭىرەكتى قامادى جۇرت،

قالماي جان قاتىن - قالاش، بالا - شاعا.

قىدىرىپ قىمىزىمەن قىزىل شارا،

قىلعىنتتى كەزەك - كەزەك جانە شارا.

توي - توپىر، تۇياق باستى بوپ وتىرمىز،

تاپجىلماي تامام حالىق تاماشادا.

تارلان كوك، تازى، تۇلپار سالدى قۇلاش،

تالا ما، تالىقسي ما، تاڭ اسا ما؟

− ارعىنمىن، اتىم اسەت، ارىنداعان.

ارىنداپ ءان سالا مادارىماعان.

اسپاننىڭ اياسىندا ءان شالقىتقان

بۇلبۇلمىن داۋسى كوكتە دامىلداعان.

كومەكەي كوك قاپىسىن انمەن اشسا،

توگىلىپ مەرۋەرت، مارجان ساۋىلداعان.

تۇلپارمىن توپتان وزعان، توسىرقاما،

شارشى توپ، شارشى ءورىم جوق شابىشماعان.

جورعامىن جۇرتتان وزعان، جورتارمانمىن،

مايدامىن، مايدا جەلىس مامىرلاعان.

اۋلىمنان الىستاعى مەيمان كەلدى،

بۇگىنگى ءان ادىرا سالىنباعان.

تاۋىقپىن، تەردىم تارى نايمان شالدان.

نايمان - ەل ايى تۋعان ماڭدايشادان.

ۇيرەكتەي، قازداي قالقىپ، ءجۇرمىن ءجۇزىپ

كول ەلدە، كوپ نايماندى قىدىر شالعان.

ەرتىس، سىر، ەدىل، جايىق وزەنىم بار،

تاۋ وتپەس تارباعاتاي، تيان - شانننان.

شىعىسىم قىتاي، قالماق، ماڭعولدى ورلەپ،

اۋىلىم بار اۋعانعا دا تەۋىپ بارعان.

ان قۇمار الەۋمەتىم انتالاپ تۇر،

ورلە ءانىم، شاپشى شىڭعا ء«ىنجۋ-مارجان».

− امين! –

دەدى، مالعا باتا قىلدىق.

تەرشىتكەن قىزۋى بار قىمىز زىمعىپ.

تەگەشتى تايقازانداي تاقىرلاتىپ،

وتىردىق كەكىرىسىپ، كەيىن سىرعىپ.

− اسەتجان، ءان جاڭالا، - دەدى اقساقال،

شۇكەيت شال، ءۇي يەسى بورتە بىرتىق.

تولقىنتىپ توقسان بۋىن انگە سالدى،

تارلان بوز تارتقان سايىن تۇسەدى ىرعىپ.

بەس ساۋساق پەرنە بيلەپ، ويناق سالادى،

ەكى ىشەك ەنتەلەيدى، ساۋساق لىپ - لىپ.

قولقالاپ جاننىڭ ءسىرا قۇشتارلاندى:

− اسەت اعا، «قىز جىبەكتى» سويلە جىر قىپ

تۇيىق توپ تۇردىك قۇلاق، تۇرا قالدىق،

− وزگەنى، «قىرعاۋىلدى» ايت، سۇرامالىق!

سامايدان سارى وزەندەي ساۋلاپ اققان

اقىن دا تەرىن ءسۇرتتى تۇرا قالىپ.

قىمىزدى شاعىن شارا جانە ۇسىندى،

ساپىرىپ، سالقىنداتىپ، سەكەر سالىپ.

كوز مۇلگىپ، تاربىقتاناۋ تاڭىرايىپ،

كۇلتىلدەپ كۇرە تامىر قالدى قاعىپ.

الدى دا دومبىرانى وڭتايىنا،

تيەككە ءبىر تۇكىرىپ، بۇراپ الىپ،

«ا» دەدى «قىرعاۋىلعا» ءتۇسىپ كەتتى،

اسپانداپ ءان اسقاعى كەتتى لاعىپ.

ان شىقتى كەيدە اسقاقتاپ، كەيدە باياۋ،

الىستاپ كەيدە تالدى، كەيدە تاياۋ،

تاقىمداپ، تابەتىڭە تاپ - تاپ بەردى،

كوڭىلدى كەيدە ۇيتقىتىپ، كەيدە وياۋ.

ايقاسىپ الدەنەشە ءۇن اۋدارىستى،

جامىراپ جارىسقانداي اتتى - جاياۋ.

وق جىلان ءۇن وقتارى يرەڭ قاقتى،

تارىس - تۇرىس كەيدە ۇيتقيدى تۋلاق، ساباۋ.

كوتەرىپ كوڭىل كۇيىن، ورلەتتى ويدى:

سۋرەتىن سارىارقانىڭ تارتتى اناۋ.

كوكتە كۇن قىرعا قاراپ قىلماڭ قاقتى،

سايدا سۋ سىڭقىلدادى توعىز تاراۋ.

قالىڭ كوش بۇلتتايىن بۇلارلاڭدى،

قالىڭ قول قاپتاپ كەتتى قولدا جالاۋ.

قوي ماڭىراپ، تۇيە بوزداپ، جىلقى ورقىراپ،

سامالمەن شايقاپ قاقتى بالعىن، بالاۋ.

اسپاندا اي، استىندا كول كۇلمەڭ قاقتى،

اق اۋىل، وردا. وتاۋى وڭاشالاۋ;

سۇيگەنىن ءسۇيىپ سۇلۋ سىلق - سىلق كۇلدى،

كەرمەدە قاتتى جۇيرىك — قامشى جاراۋ.

ان باۋراپ الەۋمەتتى الىپ كەتتى،

قوزدىردى وي، ىرعاقتى ءۇنى سالىپ قوزعاۋ.

تولى توپ:

− ۋادە، جازعان، - دەدى، - ءبالى - اۋ!

ان سالساڭ اسەتتەي سال اسەمدەتىپ،

قوزدىرىپ دەلەبەنى داسەرلەتىپ.

سالدىرتىپ، ساڭقىلداتىپ، ساۋ جەلگىزىپ،

ورلەتىپ، ورەلەنتىپ، باسەڭدەتىپ.

سەرپىلتىپ، سەكەكتەتىپ، سەكسەن ىرعاپ،

قىرىق قارپىپ، توقسان تولعاپ، بەس ورلەتىپ.

شىرقاتىپ، شىعانداتىپ، شالىقتاتىپ،

شاپشىتىپ، شۇمەكتەتىپ، نوسەرلەتىپ.

تالدىرىپ، تالىقسىتىپ، تامىلجىتىپ،

ورعىتىپ، وراعىتىپ باسا ورلەتىپ.

قارقىندى ءۇن قان قايناتىپ، جۇرەك جۇلىپ،

جان جالماپ، كوڭىل تەربەپ، اسەرلەتىپ.

سارايىم - سابا، قۇيام ءپىسىپ، ءپىسىپ،

قويا المان ءان شىركىندى وي كەرنەتىپ.

سوز - جاڭبىر، داۋسىم - داۋىل، ءانىم - ەسكەك،

ويناقتاپ باسىلايىن از جەلدەتىپ.

تانداپ ءسۇي، سۇمەڭدەتتىم ءسوز سۇلۋىن،

تىلىن بال، سىلەكەيىن سەكەرلەتىپ.

1923 جىل.


پىكىرلەر:


پىكىرلەر:
قانشا بولادى؟
98 + 1 = ?