Жол түсіп «Жаркент-Арасан» шипажайына жолдама алып, Алматыдағы Сайран автобекетінен Жаркент бағытымен жолға шықтым. Республикамыздың көп жерлерін араласам да, бұл өңірді алғаш рет көруім еді. Табиғаты өте әсем таулы өлкемен автобусымыз, жолшыбай Кеген, Нарынқол және «Шарын» шатқалын артқа тастап,  «Жаркент-Арасан» шипажайына да жеттік. Бұл емдеу-сауықтыру орны – жан-жағы биік таулармен қоршалған.

«Көктал» деп аталған сылдырап ағып жатқан өзені бар, ауасы да, суы да таза, табиғаты көркем жерге орналасқан екен. ­Шипажай қызметкерлері демалушыларды жылы жүзбен қарсы алып, жайлы орындарына жайғастырды. Кешкілік шипажай директоры Санат Сағынбекұлы жаңадан келген демалушыларды шипажайдың тыныс-тіршілігімен, тәртібімен, атқарылып жатқан іс-шаралармен таныстырды. Бұл демалыс орны 1952 жылы геологиялық барлау экспедициясының таза, мөлдір емдік суын табуына байланысты 1963 жылы аудан әкімі Сапиевтің ұсынысымен демалыс орны болып ашылған. Алғашқы жылдары басшы қызметкерлер ғана емделсе, кейін Ресей жобалаушыларының көрсетуімен үлкен ғимараттар салынып, өзгелер де демала бастаған.
Мұндағы негізгі емнің түрі – «Родон» деп аталатын таза жерасты суы мен шипалы ыстық «батпағы» көп­теген ауруларға, атап айтқанда, аяқ-қолдың сыр­қы­рауына (полеартрит), остеохондроз, тыныс алу, қолқа жүрек, асқазан ауруларына, семіздіктен арылуға таптырмас шипа. Шипажайда бір мезгілде (12 күн ішінде) 280 адам, ал жаз мезгілінде 300-ден аса адам тынығады. Негізгі еммен бірге уқалап емдеу (массаж), электр тоғы (физиолечение), ауыз қуысын шаю, т.б. емдері бар.
Демалушылардың «Осындағы үлгілі қызметкерлер туралы айтсаңыз?» деген сұрағына осында 33 жылдан бері еңбек етіп келе жатқан бас дәрігер Карл Кәкімжанұлының еліміздегі жоғары санаттағы бес кардиолог дәрігердің бірі екендігі, Сақатай Шалта­байқызының аға медбике және асхана меңгерушісі болып 38 жыл бойы үздіксіз еңбек етіп келе жатқандығы, ал жас жігіт Ринат Дәулетханұлы мен Әсем Тоқтарқы­зының әкімшілік-тіркеуші, тынығушыларға, жағдай жасау қызметтерін адал атқарып жүргендігі айтылды. Осы шипажайға Шонжы аудандық білім беру бөлімінің «Қамқор» деп аталатын кәсіподақ қоғамдық бірлестігінің төрағасы Кәрібай Ізбасарұлы жыл сайын жазғы демалыста аудан мұғалімдерін, ал күзгі, қысқы демалыс кездерінде техникалық қызметкерлерін кәсіподақтың жеңілдігімен тынықтырып алады екен.
Бұл тынығу орны – өзін-өзі жабдықтайтын мекемелердің санатында екен. Қазіргі күнде мекеменің өз күшімен жаңа клуб, екі тынығу ғимараты салынып, бұл жұмыстың 90 пайызы бітіп тұр. Реті келгенде айтқан жөн болар, шипажай ­директоры Санат Сағынбекұлы жас та болса, бас бола білген «сегіз қырлы, бір сырлы» деуге лайық азамат екен. Өзі домбырамен ән айтып, ара-арасында әзіл-қалжыңдармен көпшілікті өзіне баурап алатындығы ұнады. Мұндағы қызметкерлердің жылы жүздері мен сөздері де жақсы емнен бірде кем болмады. Сондықтан да шипажайдың барлық қызметкерлерінің еңбектеріне жеміс тілеп, қимай қоштастық.

Айбол Битуғанов,
журналист