ҚМДБ Төрағасы, Бас мүфти Наурызбай қажы Тағанұлының тапсырмасымен «Qamqor-Sharapat» орталығының директоры Камалжан Тұрдыбаев Өскемен аймағында болды.

Камалжан Бекбосынұлы «Халифа Алтай» мешітінде өңірдің аудан, қала имамдарымен онлайн және дәстүрлі форматта кездесу өткізді. Жиынды ашқан Өскемен аймағының бас имамы Ермек Қасболатұлы: «ҚМДБ-ның жанынан құрылған салттық қызмет көрсету орталығының бөлімшесі Өскемен аймағында іске қосылды. Өңір имамдарына осы орталықтың іс-қызметін жан-жақты насихаттау бағытында осы кездесуді ұйымдастырып отырмыз» деп атап өтіп, бұл бағыттағы шаралар жайлы айтып өтті.

Жиында «Qamqor-Sharapat» орталығының директоры Камалжан Бекбосынұлы салттық қызмет орталығының мақсаты, қызметтік бағытын кең көлемде таныстыра келе: «ҚМДБ Төрағасы, Бас мүфти хазіреттің бастамасымен жерлеу рәсімдерін ел көлемінде бірізге түсіру, ысырапты болдырмау, салт-санамыздың ұтымды тұстарын жаңғырту мақсатында «Qamqor-Sharapat» орталығы құрылды. Заман талабына сай мұсылманша қызмет көрсетін орталық жоралғыларды шариғат шеңберінде, салт-дәстүрге сай өткізеді. Жерлеу қызметінің жабдықтары мен бағасы айқындалып, зират тұрғызудың бірыңғай үлгісі әзірленіп, халыққа ұсынылды. Баға және жабдықтар құны қолжетімді болады» деп баяндап, қазіргі таңда қолға алынған шаруаларды талдап-түсіндірді.

Кездесуде имамдар осы саладағы мәселелерге байланысты сауалын қойды. Алдағы уақытта бұл бағытта халыққа жерлеу рәсімдері, зиярат ету және ас беру мәдениетін түсіндіру жұмыстарын қарқынды жүргізу мәселелері талқыланды.