ءتۇرى: اقجۇنىس ماقالالارى
جولدانعان ۋاقىتى: 20:02 - 2020/02/28
نۇر-سۇلتان پروكۋراتۋراسى دۋلات ءاعادىلدىڭ ءمايىتىن جۋ ورنىندا تۇسىرىلگەن ۆيدەوعا قاتىستى پىكىر ءبىلدىردى، - دەپ حابارلايدىTengrinews.kzتىلشىسى.
"الەۋمەتتىك جەلىلەردە ءاعادىلدىڭ ءمايىتىن جۋ ورنىندا تۇسىرىلگەن ۆيدەو تاراپ جاتىر، وعان زورلىق-زومبىلىق كورسەتىلدى-مىس دەگەن پىكىر ايتىلعان. بىردەن ايتايىن، بۇل ادەپ پەن مورالعا قايشى. ۆيدەو تۋىستارىنىڭ كەلىسىمىنسىز تارالىپ كەتكەن"، - دەپ مالىمدەدى قالا پروكۋرورىنىڭ ورىنباسارى ەلدوس كيلىمجانوۆ.
ونىڭ ايتۋىنشا، روليكتە مايىتتە داقتار بارى ايتىلعان. ء"وز تاراپىمنان ءمايىت داقتارى بيولوگيالىق ءولىمنىڭ بەلگىسى ەكەنىن ايتقىم كەلەدى. مەديتسينالىق تىلمەن ايتقاندا، داقتار جۇرەك قىزمەتى توقتاعاننان كەيىن پايدا بولادى. ول ادام قايتىس بولعاننان كەيىن ءبىر ساعاتتان سوڭ پايدا بولۋى مۇمكىن"، - دەپ ءتۇسىندىردى قيلىمجانوۆ.
"ازاماتتاردى اسىعىس شەشىم شىعارماۋعا جانە جالعان اقپاراتتى تاراتپاۋعا شاقىرامىز"، - دەدى ەلدوس قيلىمجانوۆ.
پروكۋروردىڭ ورىنباسارى دۋلات ءاعادىلدىڭ اناسى پروكۋراتۋراعا مارقۇمنىڭ وتباسى رۇقساتىنسىز ۆيدەو ءتۇسىرىپ، ونى تاراتقان ادامدارعا شارا قولدانۋ تۋرالى ارىزدانعانىن حابارلادى. "ول بەينەجازبا مەن پىكىرلەرگە وتە نارازى"، - دەدى ول.
ول دۋلات ءاعادىلدى ۇستاۋ شارالارى سوت سانكتسياسى نەگىزىندە جۇرگىزىلگەنىن، ونى تالاپكەر اۋىلى ەمحاناسىنىڭ مەديتسينالىق قىزمەتكەرلەرى تەكسەرگەنىن ايتتى. "زورلىق-زومبىلىققا ءتان قانداي دا ءبىر دەنە جاراقاتتارى تابىلعان جوق. ءىستى تەرگەۋ بارىسىندا ساراپتاما تاعايىندالدى. قايتىس بولعان ادامنىڭ قورعاۋشىسى مەملەكەتتىك سوت-ساراپتاما قىزمەتىنە قاتىسى جوق سوت مەديتسيناسى سالاسىنداعى مامانداردى ۇسىندى جانە تارتتى"، - دەپ تولىقتىردى قالا پروكۋرورىنىڭ ورىنباسارى.
"كەلەسى كۇنى ءمايىت ادۆوكات، ءاعادىلدىڭ اعاسى جانە ەكى مەديتسينالىق ماماننىڭ قاتىسۋىمەن قارالدى. ناتيجەسىندە، قايتىس بولعان ادامنىڭ اعاسى مەن ادۆوكاتى قانداي دا ءبىر نارازىلىق بىلدىرگەن جوق. بارلىعى ۆيدەوعا ءتۇسىرىلدى، ءبىراق ونى ەتيكالىق نورماعا ساي جاريا ەتە المايمىز"، - دەدى ەلدوس قيلىمجانوۆ.
ونىڭ ايتۋىنشا، ساراپتاما قورىتىندىسى لابوراتوريالىق زەرتتەۋ ناتيجەلەرى بويىنشا ۇسىنىلادى.
26 اقپاندا جاعدايدى ءادىل زەرتتەۋ ءۇشىن قىلمىستىق ءىستى قالانىڭ ارنايى پروكۋرورلارى باسقارماسى الدى، تەرگەۋ امالدارى ءجۇرىپ جاتىر.
