ىلە پوچتاسى كوكتەم مەرەكەسى كەزىندە كۇندى تۇنگە جالعاپ قىزمەت وتەدى

    9 كۇندە 260 مىڭ جەدەل جولدامانى ٴبىر جاقتى ەتتى

    سۋرەتتە: پوچتاليون جەدەل جولدامالاردى كولىككە تيەپ تاراتۋ دايىندىعىندا.

 لي يافىڭ فوتوسى

    ٴتىلشىمىز لي يافىڭ حابارلايدى.كوكتەم مەرەكەسىندە «اۋىل دامىنەن» اۋىز تيۋگە، تۋىس – تۋعان، دوس – جارانداردىڭ «جاڭا جىلدىق ساۋعاسىن» تاپسىرىپ الۋعا جەدەل جولداما كوپتەپ سەپتىگىن تيگىزدى. 2 – ايدىڭ 18 – كۇنى ٴتىلشىنىڭ جۇڭگو پوچتا توبى شەكتى سەرىكتىگى ىلە وبلىستىق بولىمشە سەرىكتىگىنەن ۇعىسۋىنا قاراعاندا، مەرەكە كەزىندە كۇنىنە 150 دەن استام پوچتاليون 1 – شەپتە قىزمەت وتەپ، پوچتا جولدامالارىنىڭ باسىلىپ قالماۋىنا، جينالماۋىنا شىنايى كەپىلدىك ەتىپ، ٴار ۇلت حالىق بۇقاراسىنىڭ كوكتەم مەرەكەسى كەزىندە پوچتا جولدامالارىن جولداي الۋى مەن تاپسىرىپ الۋىنا مۇمكىندىك جاراتقان.

    ٴتىلشى 2 – ايدىڭ 18 – كۇنى جۇڭگو پوچتا توبى شەكتى سەرىكتىگى ىلە وبلىستىق بولىمشە سەرىكتىگى قۇلجا قالالىق پوچتا جولدامالارىن ٴبىر جاقتى ەتۋ ورتالىعىندا، ۇلكەندى – كىشىلى جۇك كولىكتەرىنىڭ ارت – ارتىنان جۇك ٴتۇسىرىپ جاتقانىن كوردى. كوكتەم مەرەكەسى كەزىندە پوچتا جولدامالارىن حاۋىپسىز جەتكىزۋگە كەپىلدىك ەتۋ ٴۇشىن، مەيلى جولدامانى قابىلداۋ - تاراتۋ، الدە يەلەرىنە جەتكىزىپ بەرۋ بارىسىندا بولسىن، قىزمەتكەرلەر تولىق ماسكا تاعىپ، قولعاپ كيىپ، پوچتا جولدامالارىن زارارسىزداندىرۋ قىزمەتىن ويداعىداي ىستەدى.

    «مىناۋ بۇگىنگى 2 – رەتكى كولىك، قاربالاس كەزدە كۇنىنە كەلەتىن كولىك 10 عا جەتەدى»، - دەدى قاربالاس جولداما ٴبولىپ جاتقان قۇلجا پوچتا جولدامالارىن ٴبىر جاقتى ەتۋ ورتالىعىنىڭ مەڭگەرۋشىسى ۋاڭ ۋەي تانىستىرىپ. ول تاعى بىلاي دەدى: «مەرەكە كەزىندە قىزمەت مولشەرى قاۋىرت ارتىپ، جۇمىسشى – قىزمەتشىلەر 75 ادامنان 90 ادامعا كوبەيتىلىپ، ٴار كۇنگى 8 ساعاتتىق قىزمەت 10 ساعاتقا ۇزارتىلىپ، ٴار ادامنىڭ جايشىلىقتاعى كۇنىنە 800 جولداما ٴبىر جاقتى ەتۋ مىندەتى ٴبىر مىڭ 600 جولداماعا ارتىپ، جولدامالاردى ٴتۇن جارىمىنا دەيىن ءبىر جاقتى ەتىپ وتىردىق».

    ۇعىسۋعا قاراعاندا، 2 – ايدىڭ 9 – كۇنىنەن باستاپ، ٴۇرىمجىنىڭ پوچتا جولدامالارى قالىپتى تاسىمالدانىپ، 2 – ايدىڭ 11 – كۇنىنەن باستاپ جالپى 260 مىڭ جولداما 59 كولىكپەن ىلەگە شوعىرلى جونەلتىلگەن. پوچتا جولدامالارىن ءبىر جاقتى ەتۋ قارقىنىن جەدەلدەتۋ ٴۇشىن جۇڭگو پوچتا توبى شەكتى سەرىكتىگى ىلە بولىمشە سەرىكتىگى ىشكى جاقتا ٴبىر جاقتى ەتۋ، تاسىمالداۋ، جەتكىزىپ بەرۋ سياقتى ٴارقايسى بۋىنداردى مۇقيات ورنالاستىرىپ، پارتيا مۇشەلەرى ەكپىندىلەر اترەتىن قۇرىپ، جۇمىسشى – قىزمەتشىلەردەن 100 دەن استام ادامدى جولدامالاردى ٴبولۋ، تيەۋ، ٴتۇسىرۋ قىزمەتىنە ۇيىمداستىرىپ، تاسىمالداۋ، جولداما ٴبولۋ، جەتكىزىپ بەرۋ قىزمەتىن ۇيىمداستىرۋعا كۇش سالدى.

    وڭتۇستىك اۋماق جولداما جەتكىزۋ بولىمىندە جولدامالار جىلدام بولىنگەن سوڭ پوچتاليون رىن فان ٴۇش شاقتى ارباسىنا تولتىرا جولداما تيەپ جولعا شىعۋعا ىڭعايلاندى. «مەن ينبيڭ جولى، قىزىلتۋ جولى، جەڭىس جولى وڭتۇستىك داڭعىلى سياقتى اۋماقتارعا جاۋاپتىمىن، مۇندا 2 ساۋدا سارايى، 6 مەكەمە، 9 شاعىن رايون بار، مەرەكە كەزىندە 260 جولداما جەتكىزگەن كۇندەرىم بولدى» دەدى رىن فان. ول تاعى بىلاي دەدى: «بيىل مەن پوچتاليون بولىپ ىستەگەن العاشقى جىل، مەرەكە كەزىندە جولداما جەتكىزۋ مولشەرى جايشىلىقتاعىنىڭ ٴبىر ەسەسىنە جەتىپ، كۇنىنە ورتاشا 200 دەن استام جولداما جەتكىزدىم. جولداما مولشەرى ارتقاندىقتان وتە قاربالاس بولدىم، تاڭ بوزىنان ٴتۇن ورتاسىنا دەيىن تىنىم تاپپاي، كوپشىلىكتىڭ زاتىن تولىق جەتكىزىپ بەرۋگە قۇلشىندىم».

    قۇلجا قالاسىنىڭ تۇرعىنى ليۋ حۇڭ قۋانىشتى بەينەدە بىلاي دەدى: «قىزمەتكە شىققان ءبىرىنشى كۇنى شىنجىنداعى دوسىم جولداعان ەرەكشە ءونىمدى تاپسىرىپ الىپ، ايرىقشا قۋاندىم، پوچتاليون جىگىتكە العىس ايتامىن».

    تىلشىلىك بارىسىندا ءتىلشى كوكتەم مەرەكەسى كەزىندە جۇڭگو پوچتا توبى شەكتى سەرىكتىگىنىڭ ىلە وبلىستىق بولىمشە سەرىكتىگى دەمالماۋ ءتۇزىمىن بەلگىلەۋ ارقىلى 6 اۋماقتاعى 38 ورىندا پوچتا جولدامالارىن ۋاكىلدىك قابىلداۋ دۇكەندەرىندەگى 150 دەن استام پوچتاليون كەلگەن پوچتا جولدامالارىن قالىپتى قابىلداپ جانە جەتكىزىپ بەرۋگە قامدانىپ جاتقانىن كوردى.

    جۇڭگو پوچتا توبى شەكتى سەرىكتىگى ىلە وبلىستىق بولىمشە سەرىكتىگىنىڭ ورىنباسار باس ديرەكتورى سۇن جاۋيۇڭ بىلاي دەدى: «كوكتەم مەرەكەسى كەزىندە، كوپ مولشەردەگى پوچتا جولدامالارى ىلەگە جولداندى، وبلىستىق پارتكوم مەن ۇكىمەت كوپ مارتە ءماجىلىس اشىپ، پوچتا جولدامالارىن ءبىر جاقتى ەتۋ بارىسىن، ءتارتىبىن رەتتەپ، پوچتاعا سايكەسىپ كەزدەسكەن قيىنشىلىقتار مەن ماسەلەلەردى شەشىپ، ارناۋلى قىزمەتكە ارناۋلى تىرەكتى كۇشتەردى ورنالاستىرىپ، قۇلجا قالاسىنداعى پوچتا جولدامالارىن ءبىر جاقتى ەتۋ ورتالىعىندا ناق مايداندا كومەكتەسىپ، جەتەكشىلىك ەتىپ، قيىنشىلىقتاردى شەشتى. مۇنان تىس، پوچتا قولباسشىلىق ەتۋ، ورنالاستىرۋ ورتالىعىندا 24 ساعات كەزەكشى بولۋ ارقىلى جولدامالاردى قابىلداۋ - جونەلتۋ، ىشكى جاقتا ءبىر جاقتى ەتۋ، تاسىمالداۋ، جونەلتۋ بۋىندارىن دەر كەزىندە باقىلاپ – مەڭگەرىپ، ءارقايسى بۋىنداعى ناقتى ۋاقىت پەن ساندى مالىمەتتەرگە نەگىزدەلىپ، جەتكىزۋ تورابىنىڭ اينالىم باعىتىنا تالداۋ جاساپ، ءار دارەجەلى ءبىر جاقتى ەتۋ ورتالىقتارىنا ارتۋ مولشەرى مەن اينالىم جاعدايىن الدىن الا مالىمدەپ، قامتاماسىزداندىرۋ شارالارىن كۇنى بۇرىن اتقارىپ، جەتكىزۋ تورابى اينالىمىنىڭ ىركىسسىزدىگىنە كەپىلدىك ەتتى».

    2 – ايدىڭ 9 – كۇنىنەن 17 – كۇنىنە دەيىن جۇڭگو پوچتا توبى شەكتى سەرىكتىگى ىلە وبلىستىق بولىمشە سەرىكتىگى 9 كۇن ىشىندە 260 مىڭ جەدەل جولدامانى ءبىر جاقتى ەتتى، ۇرىمجىدەن ىلەگە پوچتا جولدامالارىن جولداۋ قالىپىنا كەلىپ، پوچتا جولدامالارىنىڭ جولدانباي قالۋ جاعدايى بولمادى. قۇلجا پوچتا جولدامالارىن ءبىر جاقتى ەتۋ ورتالىعى 3 كۇن ۋاقىت جۇمساپ، ورتالىققا كەلگەن جانە كەلۋ ۇستىندەگى 22 اۆتوموبيلگە تيەلگەن پوچتا جولدامالارىن تۇرگە ءبولىپ، 3 كۇن ىشىندە جولدامالاردى ءبىر جاقتى ەتىپ، بۇقارانىڭ پوچتا جولدامالارىن دەركەزىندە تاپسىرىپ الۋىنا مۇمكىندىك جاراتتى.