ءتۇرى: «ادىرنا» تورابى
جولدانعان ۋاقىتى: 01:00 - 2021/04/09
بۇل بۋرۋلاي تۇرداليەۆا ەسىمدى قىرعىز قىزى. 2018 جىلى 19 جاستاعى بۋرۋلاي پوليتسيا بولىمشەسىندە كىسى قولىنان قازا تاپتى.
بۋرۋلايدى 30 جاستاعى ەر ازامات الىپ قاشىپ، قالىڭدىق ەتپەك بولادى. الايدا پوليتسيا قىزدى الىپ قاشقان ساتتە، ولاردى قالا ىشىندە قولعا تۇسىرەدى. ءسويتىپ بۋرۋلايدى، ونى الىپ قاشقان جىگىتتى جانە جىگىتتىڭ دوسى بولعان كولىك جۇرگىزۋشىسىن بولىمشەگە الىپ كەلەدى. سول ساتتە جىگىت پوليتسيانىڭ باسقا بولمەگە شىققان ءساتىن پايدالانىپ، ەسىكتى تارس جاۋىپ، پوليتسيا بولىمشەسىنىڭ ىشىندە قىزدى پىشاقتاپ تاستايدى. پىشاقتى قايدان العان؟ پوليتسيا تەكسەرمەگەن با؟ول جاعى ۇلكەن سۇراق. قىز اۋرۋحاناعا جەتكىزىلگەنشە كوز جۇمادى. ال قىلمىسكەر 20 جىلعا، ونىڭ دوسى 7 جىلعا سوتتالادى. بۇل وقيعا قىرعىز قوعامىن ءدۇر سىلكىندىرگەن بولاتىن. شەتەلدىك باق جارىسا جازدى. كەيىننەن قىز وقىعان وقۋ ورنىندا مىنانداي مۋرال پايدا بولىپتى. وبال...
بۇگىن قىرعىزستان حالقى تاعى دا ميتينگكە شىقتى. 5 ءساۋىر كۇنى ەر ازامات 27 جاستاعى ايزادا ەسىمدى قىزدى الىپ قاشادى. ونى وزىنە كۇشتەپ جار ەتپەك بولادى. پوليتسيا ىزدەۋ شارالارىن ۇيىمداستىرىپ، كوپ ۇزاماي جىگىتتىڭ كولىگى تابىلادى. جىگىت قىزدى قىلقىندىرىپ ءولتىرىپ، ارتىنشا وزىنە قول سالىپتى. حالىق بۇگىن "ىشكى ىستەر ءمينيسترى قىزمەتىنەن كەتسىن" دەپ ۇرانداتىپ، نارازىلىق ءبىلدىردى.
جالپى ورتالىق ازيادا قىزدى الىپ قاشۋ قىرعىزستاندا وتە كوپ كورىنەدى. بۇۇ مالىمەتى بويىنشا ءار بەسىنشى قىز الىپ قاشۋ ارقىلى تۇرمىسقا شىققان. ونىڭ ىشىندە بىر-بىرىنە عاشىق بولىپ، ءوزارا كەلىسىممەن الىپ قاشۋ از كورىنەدى. سوندا وتباسىن قۇرعانداردىڭ 20% الىپ قاشۋ ارقىلى ىسكە اسقان بولىپ تۇر عوي. قازاقستاندا دا بۇل ءداستۇر بار. ءوزارا كەلىسىممەن، قىز بەن جىگىت ءبىر-بىرىن ۇناتىپ، شىنايى قوسىلىپ جاتسا جاقسى. ال تانىماستان باس قوسىپ، قىز قۇقىعىن تاپتاسا، وندا اياماي زاڭ اياسىندا تەمىر تورعا توعىتا سالۋ كەرەك. 1995-2005 جىلدارى كۇشتەپ، قىز ەركىنسىز الىپ قاشۋ فاكتىلەرى كوپ تىركەلىپتى. ءقازىر از جانە بۇل دۇرىس. بىزدە دە قىزدى كەلىسىمىنسىز كۇشتەپ الىپ قاشىپ، سوتتالىپ كەتكەندەر بار. جالپى الىپ قاشۋدىڭ تاريحىن بىلمەگەننەن-اۋ سول. اتا-بابامىز كوبىنە قىز بەن جىگىت ءبىرى-بىرىن ۇناتادى، ءبىراق قالىڭمالعا جاعدايى كەلمەسە الىپ قاشقان. نەمەسە قىز بەن جىگىت ەكى رۋدان، ال ول ەكى رۋ اراسىندا ارازدىق بولسا، وندا ەكەۋىنىڭ قوسىلۋىنا كەدەرگى بولاتىنىن ءبىلىپ الىپ قاشقان. ياعني جاستاردىڭ اراسىندا سەزىم بولعان.
اسحات قاسەنعالي،
"ادىرنا" ۇلتتىق پورتالى
