ءتۇرى: Ult.kz ۇلىت تورابى
جولدانعان ۋاقىتى: 07:20 - 2021/03/04
«وتباسى – ورتا مەكتەپ» جوباسى اياسىندا جاستاردى تاربيەلەۋ ادىستەمەلەرى ازىرلەنىپ جاتىر. بۇل تۋرالى ءماجىلىس دەپۋتاتتارىنىڭ ساۋالىنا قر پرەمەر-مينيسترى اسقار ءماميننىڭ جاۋابىندا ايتىلعان، دەپ حابارلايدى قازاقپارات.
«بيىل «وتباسى – ورتا مەكتەپ» جوباسى اياسىندا پەداگوگتەر مەن اتا-انالار ءۇشىن ۇلتتىق قۇندىلىقتاردى ەسكەرە وتىرىپ، جاستاردى تاربيەلەۋ ادىستەمەلەرى قوسىمشا ازىرلەنۋدە. سونىمەن قاتار وتباسىلىق جانە ۇلتتىق تاربيەنىڭ قۇندىلىقتارى بالالاردىڭ بوس ۋاقىتىن، مادەني-بۇقارالىق ءىس-شارالاردى، جارىستاردى، سىنىپ ساعاتتارىن، اتا-انالار جينالىستارىن، ۇيىرمە جۇمىستارىن جانە تاعى باسقالارىن ۇيىمداستىرۋ اياسىندا ىسكە اسىرىلادى»، - دەدى ۇكىمەت باسشىسى.
پرەمەر-مينيستردىڭ اتاپ وتۋىنشە، قازاقستان رەسپۋبليكاسى ەڭبەك كودەكسىنىڭ 71-بابىنا سايكەس كۇندەلىكتى جۇمىستىڭ ۇزاقتىعى، ونىڭ باستالۋ جانە اياقتالۋ ۋاقىتى، جۇمىستاعى ۇزىلىستەر ەڭبەك تارتىپتەمەسى قاعيدالارىندا، ەڭبەك جانە ۇجىمدىق شارتتاردا بەلگىلەنگەن تالاپتاردى ساقتاي وتىرىپ ايقىندالادى.
«ەڭبەك زاڭناماسىنىڭ، ونىڭ ىشىندە جۇمىس ۋاقىتى رەجيمدەرىنىڭ ساقتالۋىن باقىلاۋدى مەملەكەتتىك ەڭبەك ينسپەكتورلارى تاۋەكەل دارەجەسىن باعالاۋ كريتەريلەرىنە جانە ەڭبەك زاڭناماسىنىڭ ساقتالۋىن2 تەكسەرۋ پاراقتارىنا سايكەس جۇزەگە اسىرادى. 2020 جىلى مەملەكەتتىك ەڭبەك ينسپەكتورلارى ەڭبەك زاڭناماسىنىڭ نورمالارىن ءتۇسىندىرۋ بويىنشا 5 مىڭنان اسا اقپاراتتىق ءتۇسىندىرۋ جۇمىستارىن جۇرگىزدى»، - دەدى اسقار مامين.
