مەملەكەتتىك ءتىلدى بالا كەزىنەن جەتىك بىلەتىن ناتاليا ساحاروۆا قازاقتىڭ ءسالت-داستۇرىن دە جاقسى بىلەدى، دەپ حابارلايدى "ۇلت اقپارات"Pavlodarnews.kzسايتىنا سىلتەمە جاساپ.

- مەن باياناۋىل اۋدانى بىرلىك اۋىلىندا ءوستىم. بالا كەزىمنەن قازاق ءتىلىن بىلەمىن. وتباسىمىزدا 5 قىز. بارلىعىمىز قازاقشا سويلەسەمىز. ۇلتىم ورىس بولسا دا ءوز ەلىمنىڭ ءتىلىن، ءدىنىن، سالتىن قۇرمەتتەيمىن. قازاق حالقى قوناقجايلىلىعىمەن تانىلعان. ءبىز دە سودان قالىس قالمايمىز. كەز كەلگەن مەرەكەدە قوناق شاقىرىپ، ەت اسىپ، باۋىرساق پىسىرەمىز. ناۋرىز كوجەنى دە جىل سايىن دايىندايمىن، - دەيدى ناتاليا ساحاروۆا.

ناتاليا ساحاروۆا دامير ەسىمدى ۇلىن تاربيەلەپ وتىر. ۇلى دا قازاق ءتىلىن مەڭگەرىپ كەلەدى. ناتاليانىڭ ايتۋىنشا، قازاق ءتىلىن وڭاي ۇيرەنۋ ءۇشىن ءتىلدى بىلەتىن ادامدارمەن ارالاسۋ كەرەك.

- مەن ءوزىم 7 جاسىمنان قازاق تىلىندە سويلەپ كەلە جاتىرمىن. مەكتەپتى قازاقشا وقىپ، ءبىتىردىم. قازاق بالالارمەن ارالاسقاننىڭ، ءجيى سويلەسكەننىڭ ارقاسىندا ءتىلدى جەڭىل مەڭگەردىم دەپ ويلايمىن، - دەدى ناتاليا ساحاروۆا.

ناتاليانىڭ ماماندىعى ەرەكشە. ول KSP Steel كومپانياسىندا كران ءماشينيسى بولىپ جۇمىس جاسايدى. بۇل سالادا قىزمەت اتقارىپ كەلە جاتقانىنا 4 جىل بولعان.
- وندىرىستە جۇمىس جاساۋ باس كەزىندە قيىن بولعانمەن، كەيىن ماشىقتانىپ، ۇيرەنىپ كەتەسىڭ. جۇمىس اۋىر ەمەس. وقىپ، ۇيرەنىپ الدىم. بۇل ماماندىقتى اپكە-سىڭلىلەرىمە ايتقان كەزدە ولار قارسى بولدى. مەنىڭ دوستارىم، سىنىپتاستارىم ءالى تاڭ قالادى. كران ءماشينيسى بولىپ جۇمىس جاسايمىن دەسەم، كەيبىرى قالجىڭداپ وتىر دەپ ويلايدى، - دەيدى ناتاليا ساحاروۆا.

كەيىپكەرىمىز جۇمىستىڭ اق-قاراسى بولمايتىنىن ايتادى. باستىسى، ادال ەڭبەك اتقارۋ. وندىرىستىك ورىنداردا نازىك جاندىلار اتقاراتىن جۇمىس كوپ. ناتاليا ءوزىنىڭ قىزى بولسا، وندىرىستىك ورىندا جۇمىس جاساۋىنا قارسى بولمايتىنىن ايتادى.