ءتۇرى: Ult.kz ۇلىت تورابى
جولدانعان ۋاقىتى: 02:00 - 2021/02/24
مەملەكەت باسشىسى قاسىم-جومارت توقاەۆ قازاقستان رەسپۋبليكاسى پرەزيدەنتىنىڭ تەلەراديوكەشەنىنىڭ جاڭا اپپاراتتىق-ستۋديا كەشەنىن ارالاپ كوردى، دەپ جازدى بەرىك ءۋالي Facebook-تەگى پاراقشاسىندا.
«بيىل قازاقستان رەسپۋبليكاسى پرەزيدەنتىنىڭ تەلەراديوكەشەنىنە 25 جىل. بۇگىن مەملەكەت باسشىسى قاسىم-جومارت توقاەۆ ترك-نىڭ جاڭا اپپاراتتىق-ستۋديا كەشەنىن ارالاپ كورىپ، ۇجىمدى مەرەيتويىمەن قۇتتىقتادى. پرەزيدەنت تەلەراديوكەشەنى جۇمىسىنىڭ نەگىزگى ناتيجەلەرىمەن تانىستى. شيرەك عاسىر ىشىندە ونىڭ قىزمەتكەرلەرى 800 دەرەكتى فيلم تۇسىرگەن. 2019 جىلدىڭ 20 ناۋرىزىنان بەرى مەملەكەت باسشىسىنىڭ قىزمەتى تۋرالى 600 ساعاتتىق ۆيدەوتۇسىرىلىم جاسالىپ، 56 دەرەكتى فيلم، 450 ۆيدەوروليك دايىندالعان. كوپتەگەن ۆيدەوماتەريالدار Telegram جانە YouTube الەۋمەتتىك جەلىلەرىنە جۇكتەلگەن« دەپ جازدى ول.
بەرىك ءۋاليدىڭ كەلتىرگەن دەرەگىنە ساي، پرەزيدەنتتىڭ تەلەراديوكەشەنى قازاقستان تاۋەلسىزدىگىنىڭ 30 جىلدىعىنا وراي «ابايدىڭ قارا سوزدەرى» جانە «قۋاتتى وڭىرلەر – قۋاتتى قازاقستان» دەرەكتى فيلمدەر تسيكلىن ءتۇسىرۋدى جوسپارلاپ وتىر.
سونداي-اق، پرەزيدەنت تەلەراديوكەشەننىڭ ۇجىمىنا ەل ومىرىندەگى اسا ماڭىزدى وقيعالاردى جەدەل ءارى ساپالى جاريالاپ كورسەتكەنى ءۇشىن ريزاشىلىعىن ءبىلدىردى.
«قاسىم-جومارت توقاەۆقا «اقوردا» رەزيدەنتسياسىندا ورناتىلعان UHD (4K) اپپاراتتىق-ستۋديا كەشەنى تانىستىرىلدى. بۇل كەشەن جوعارى ساپالى ۆيدەوتۇسىرىلىم جاساۋعا مۇمكىندىك بەرەدى. مەملەكەت باسشىسى تەلەراديوكەشەننىڭ ۇجىمىنا ەل ومىرىندەگى اسا ماڭىزدى وقيعالاردى جەدەل ءارى ساپالى جاريالاپ كورسەتكەنى ءۇشىن ريزاشىلىعىن ءبىلدىرىپ، ترك قىزمەتكەرلەرىنە جاڭا شىعارماشىلىق تابىس تىلەدى» دەپ جازىلعان حابارلامادا.
