ءتۇرى: Ult.kz ۇلىت تورابى
جولدانعان ۋاقىتى: 21:50 - 2021/01/27
كوروناۆيرۋس ۆاكتسيناسىن ساقتاۋ ءۇشىن ءوڭىر اكىمدىكتەرى توڭازىتقىش قۇرىلعىلارىن الىپ جاتىر. بۇل تۋرالى وكق وتكەن ءباسپاسوز ءماسليحاتىندا دەنساۋلىق ساقتاۋ ءبىرىنشى ۆيتسە-مينيسترى مارات شورانوۆ ءمالىم ەتتى، دەپ حابارلايدى قازاقپارات.
«ۆاكتسينانىڭ ساپاسىن قامتاماسىز ەتۋ ءۇشىن وڭىرلەر توڭازىتقىش قۇرىلعىلارىن الىپ جاتىر. ول توڭازىتقىشتاردا ۆاكتسينا ساقتالادى ءارى سول ارقىلى تاسىمالدانادى»، - دەدى مارات شورانوۆ وكق-دا ءوتىپ جاتقان ءباسپاسوز ءماسليحاتىندا.
ونىڭ ايتۋىنشا، ۆاكتسينانى جەتكىزۋ جۇمىسى نەگىزگى 4 كەزەڭنەن تۇرادى.
ەڭ الدىمەن وندىرۋشىدەن ءبىرىڭعاي ديستريۋتوردىڭ قويماسىنا جەتكىزىلەدى. ودان كەيىن ءبىرىڭعاي ديستريۋتوردىڭ قويماسىنان وڭىرلەردەگى دەنساۋلىق ساقتاۋ باسقارمالارىنىڭ ءدارىحانا قويمالارىنا اكەلىنەدى. وسىدان كەيىن ءۇشىنشى كەزەڭدە وڭىرلەردەگى دەنساۋلىق ساقتاۋ باسقارمالارى بۇل ۆاكتسينالاردى قالالار مەن اۋداندارداعى مەديتسينالىق ۇيىمدارعا تاسىمالدايدى. ءتورتىنشى كەزەڭدە ۆاكتسينا سول مەديتسينالىق ۇيىمداردا ساپالى كۇيدە ساقتالۋى كەرەك.
ەسكە سالا كەتسەك بۇعان دەيىن مارات شورانوۆ ۆاكتسيناتسيا جۇرگىزەر الدىندا ازاماتتاردىڭ دەنە تەمپەراتۋراسى ولشەنىپ، جۇرەك-قانتامىر جۇيەسىن اۋسكۋلتاتسيالاۋ جانە جۇتقىنشاقتى تەكسەرۋ شارالارى جاسالاتىنىن ايتقان ەدى. ەگەر تەمپەراتۋرا 37°C-تان اسسا، ۆاكتسيناتسيا كەيىنگە قالدىرىلادى.
