ءتۇرى: Ult.kz ۇلىت تورابى
جولدانعان ۋاقىتى: 21:20 - 2021/01/27
قازاقستاندا اۋىر دەرتكە شالدىققان بالالاردىڭ ارمانىن ورىندايتىن ارنايى قور قۇرىلدى، دەپ حابارلايدى "ۇلت اقپارات".
«Menin Armanym» كورپوراتيۆتى قورىنىڭ 3 ايلىق جۇمىسى بارىسىندا 120 ءوتىنىش قارالعان.
بۇگىندە 13 بالانىڭ ارمانى ورىندالدى.
«قازاقستاندا اۋىر دەرتتەن عۇمىرى ساناۋلى ون مىڭداعان بالا بار. جوبامىزدىڭ ماقساتى – بالالاردىڭ وسى ومىردەگى ارمانىن ورىنداۋ. ناۋقاس بالالار اۋرۋحانالاردا سۇرقاي قابىرعالاردىڭ ورتاسىندا كوپ ۋاقىتىن وتكىزەدى. ولاردىڭ ولشەۋلى عۇمىرىندا رۋح بەرۋ، اۋىر مەديتسينالىق پروتسەدۋرالاردان ءبىر مەزگىل كوڭىلىن اۋلاۋ ماقسات بولىپ وتىر. ءبىزدىڭ قور 3-18 جاس ارالىعىنداعى بالالاردىڭ ارمانىن ورىنداۋعا تىرىسادى. بۇگىندە 13 بالانىڭ ارمانىن ورىندادىق»، - دەيدى قوردىڭ اتقارۋشى ديرەكتورى شاميل ۆانكەەۆ.
جوبا اۆتورلارىنىڭ ايتۋىنشا، بالالاردىڭ ارمانى كوپ.
بىرەۋ زووباققا بارعىسى كەلەدى، ەكىنشى بالا باسقا قالالاردى ارالا عىسى كەلەدى. سۇيىكتى سپورتشىسىمەن، انشىسىمەن كەزدەسىپ، قولتاڭبا العىسى كەلەدى.
«بىز بارىنشا بالالاردىڭ ارمانىن ورىنداۋعا تىرىسامىز. از ۋاقىتقا بولسىن، پوليتسيا قىزمەتكەرى، سۋپەرباتىر بولۋعا مۇمكىندىك بەرەمىز»، - دەدى ول.
ماسەلەن، 4 جاسار ميراس - ءوزىنىڭ دەرتىنە قاراماستان وتە بەلسەندى، كوڭىلدى بالا. وعان «ماrvel» كينوالەمى ۇنايدى. ميراس سۋپەركەيىپكەرلەرمەن كەزدەسۋدى ارماندايدى.
«قور كومانداسىنا العىس ايتقىم كەلەدى. «Menin Armanym» قورىندا جاس بالالار جۇمىس ىستەيدى. ولار دا - بىرەۋدىڭ بالالارى. ولار ءومىرىن باسقا ارناعا بۇرسا دا بولار ەدى. ءبىراق، تاڭداۋى باسقا. وسىنداي مەيىرىمدى بالالاردى تاربيەلەگەن اتا-اناسىنا العىسىم شەكسىز»، - دەيدى ميراستىڭ اناسى ايگەرىم ۋرازاليەۆا.
ەرىكتىلەردىڭ قولداۋىنىڭ ارقاسىندا قور قازاقستان بويىنشا بولىمشەلەرىن اشىپ جاتىر. ءساۋىردىڭ سوڭىنا دەيىن قازاقستان بويىنشا 15 بولىمشە اشۋ جوسپاردا بار.
«بىزدىڭ قور ەمدەۋگە اقشا جينامايدى. جۇمىس باستالعالى بەرى ەرىكتىلەردەن 300 جۋىق ءوتىنىش تۇسكەن. ءبىزدىڭ قوردا كەز كەلگەن ادام جۇمىس ىستەي الادى»، - دەدى شاميل ۆانكەەۆ.
