ءتۇرى: Ult.kz ۇلىت تورابى
جولدانعان ۋاقىتى: 01:10 - 2021/01/27
قازاقستانداعى دارى-دارمەكتىڭ ءبىرىڭعاي ديستريبيۋتورى «سق-فارماتسيا» كوروناۆيرۋس ناۋقاستارىنا تەگىن بەرىلەتىن دارىلەر ءتىزىمىن ايتىپ بەردى، دەپ حابارلايدى قازاقپارات.
«مەديتسينالىق ۇيىمداردا ناۋقاستاردىڭ سانى كوبەيىپ، ەمحانالاردا COVID-19 دەگەن جاڭا نوزولوگيا ەنگىزىلگەن. ياعني، وسى نوزولوگيا بويىنشا ەمحانالاردا COVID-19 دياگنوزى قويىلعان جاعدايدا، ۋچاسكەلىك دارىگەرىڭىز 5 ءتۇرلى ءدارىنى تەگىن بەرۋى كەرەك. مۇندا پتر انىقتاما تالاپ ەتىلمەيدى. ونىڭ ىشىندە ىستىق تۇسىرەتىن 2 ءدارى – يبۋپروفەن مەن پاراتسەتامول جانە قان سۇيىلتاتىن 3 انتيكواگۋليانت بەرەدى. تەگىن دارى-دارمەكپەن قامتاماسىز ەتۋ ماسەلەلەرى تۋىنداسا، 1439 قىسقا نومىرىنە حابارلاسىپ، شاعىمدانۋعا بولادى. بۇل رەتتە كوروناۆيرۋسقا قارسى دارى-دارمەكتىڭ 48 پايىزى قازاقستاندا شىعارىلاتىنىن اتاپ وتكەن ءجون»، - دەپ ءتۇسىندىردى «سق-فارماتسيا» كومپانياسىنىڭ ءباسپاسوز حاتشىسى ايگەرىم سمايلوۆا ەلوردالىق لوگيستيكالىق حابتا وتكەن مونيتورينگ بارىسىندا.
سونىمەن بىرگە، «سق-فارماتسيا» جشس امبۋلاتوريالىق دارىمەن قامتاماسىز ەتۋ جۇيەسىندە كوروناۆيرۋستان بولەك، 136 اۋرۋ تۇرلەرى بويىنشا دارى-دارمەك جەتكىزەدى.
ايتا كەتەيىك، «استانا – ادالدىق الاڭى» جوباسى اياسىندا نۇر-سۇلتان قالاسىنداعى سىبايلاس جەمقورلىققا قارسى قىزمەت دارىلىك زاتتار مەن مەديتسينالىق بۇيىمدار ساقتالاتىن «سق-فارماتسيا» لوگيستيكالىق حابىنا مونيتورينگ جۇرگىزدى.
