جىل سايىن ماۋسىم ايىندا ماقتارالدان كۇنىنە 200-300-گە تارتا قاۋىن-قاربىز تيەلگەن جۇك كولىگى تمد، پريبالتيكا، تۇركيا، گەرمانيا، گرەتسيا ەلدەرىنە جول تارتادى. بيىل اۋدان شارۋالارى 10 مىڭ گەكتارعا قاۋىن، 1500 گەكتاردان اسا جەرگە قاربىز ەككەن، دەپ حابارلايدى "ۇلت اقپارات" اۋدان اكىمدىگىنىڭ ءباسپاسوز قىزمەتى.

بۇرىننان بالداي تاتتىلىگىمەن، ەرەكشە ۇلكەندىگىمەن تانىمال بولعان ء«مىرزاشول» قاۋىنىن ەكسپورتقا ىڭعايلاستىرىپ، بۇگىندە وبلىستاعى بىرنەشە اۋداننىڭ ديقاندارى جاپپاي ەگىپ جاتقان «جيەنبەت»، «ۆالەت» سياقتى ت.ب. قاۋىننىڭ سورتتارىن جاساپ شىعاردى.

جاڭا سورتتاردىڭ ءدامى ءتىل ۇيىرەدى جانە تاسىمالداۋعا ءتوزىمدى، ياعني ۇزاق جولعا بەيىمدەلگەن. كولەمى دە ىڭعايلى، ءبىر قوراپقا 6-7 قاۋىن سىيادى. جاڭا سورتتاردىڭ ارقاسىندا سوڭعى جىلدارى ديقاندار ۇلكەن تابىس تاۋىپ، رەسەي مەن ەۋروپانىڭ بىرنەشە ەلىنىڭ نارىعىنا كىرىپ وتىر.

قازىرگى تاڭدا ماقتاارال اۋدانىنىڭ كىرەبەرىسىندەگى لوگيستيكالىق ورتالىق جۇك كولىكتەرىنە لىق تولعان. ەۋروپادان جانە باسقا دا ەلدەردەن كەلگەن كاسىپكەرلەر ءۇشىن ورتالىقتا بارلىق جاعداي جاسالعان. اتاپ ايتقاندا، قوناق ءۇي، ءدامحانا، اۆتوتۇراق، باسسەين كەشەنى مەن قوسالقى بولشەك دۇكەنىنىڭ قىزمەتتەرى قاراستىرىلعان. الداعى ۋاقىتتا كوكونىس ساقتاۋ قويماسى دا ىسكە قوسىلادى.

وسىلايشا قاۋىن-قاربىز بيزنەسى ماقتاارال اۋدانىندا تۇتاس ءبىر يندۋستريانىڭ دامۋىنا جول اشىپ وتىر.