نيدەرلاندى اۋماعىنداعى اۆتوماگيسترالداردا وسى ۋاقىتقا دەيىن رۇقسات ەتىلگەن ساعاتىنا 130 شاقىرىمعا دەيىنگى جىلدامدىقتى بۇدان بىلاي كۇندىزگى ۋاقىتتا 100-گە تومەندەتپەك. بۇل شەكتەۋ شاراسى ادەتتە جول-كولىك اپاتىنىڭ الدىن الۋ ءۇشىن نەمەسە جول-كولىك قاۋىپسىزدىگى ءۇشىن ەمەس، قاتتى جىلدامدىق كەزىندە اتموسفەراعا بولىنەتىن ازوت ديوكسيدىن ازايتۋ ماقساتىندا قولعا الىنىپ وتىر. جول-كولىك قوزعالىسىنا قاتىستى جاڭا ەرەجە كەلەسى جىلى – 2020 جىلدان باستاپ، قولدانىسقا ەنەدى. ال ساعاتىنا 130 شاقىرىمدىق رەجيمگە كەشكى جانە تۇنگى ۋاقىتتاردا رۇقسات ەتىلەدى. اتالعان ەل مۇنىمەن عانا شەكتەلىپ قالماي اتموسفەراعا ازوتتىڭ ءبولىنۋىن ازايتۋدىڭ باسقا دا شارالارىن قاراستىرىپ جاتىر: مال جەمىندەگى اقۋىزدىڭ مولشەرىن ازايتۋ ارقىلى دا قورشاعان ورتانىڭ لاستانۋ دەڭگەيىن تومەندەتپەك. كارى قۇرلىقتاعى اتالمىش ەلدىڭ جوعارعى سوتى 2019 جىلدىڭ مامىر ايىندا ەل اۋماعىنداعى بارلىق قۇرىلىس جانە ينفراقۇرىلىمدىق جوبالاردىڭ تەكسەرىلۋىن مىندەتتەيتىن شەشىم قابىلداعان بولاتىن. اتموسفەرانى لاستاۋ دەڭگەيى بەلگىلەنگەن مولشەردەن اسىپ كەتەتىن 18 مىڭ جوبانى توقتاتقان ەدى.