ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-10-12711272041 %59 %
2019-10-13946291737 %63 %
2019-10-1421780840 %60 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: Islam.kz رۋحاني اقپاراتتارى

جولدانعان ۋاقىتى: 16:00 - 2019/07/12

«وتكرىۆاشكا» اتانعان اكىم

 

«قۇردىمعا كەتكەن» اۋىلىنا اۋدان اكىمى بارادى ەكەن، حالىققا ەسەپ بەرەدى ەكەن» دەگەن حابار قۇلاعىنا تيگەلى، اۋداندىق «اكىمنىڭ شاپاعاتى» گازەتىنىڭ باس رەداكتورى جاعىنبەك مايموڭكەۇلى قالاي جاعىنۋدىڭ جوسپارىن قۇرا باستادى. قانشاما اكىمدى قۇراق ۇشىپ قارسى الدى، ولاردىڭ بىتپەيتىن باياندامالارىن، جۇرگەن ءجۇرىسى مەن كۇلكىسىن، ءسۇيىپ ىشەر اسىن، جاساعان «ەڭبەگىن» الاقانداي گازەتتىڭ ءتورت بەتىنە ءتىزىپ شىعۋدان الدىنا قارا سالعان ەمەس. ولارعا باعىشتالعان ارناۋ ولەڭدەرگە قوسا، ارعى اتا - تەكتەرى تۋرالى جازىلعان ماقالالار مەن داستاندار شاش ەتەكتەن. ءبىر جولى «رەسەيگە بارعان اۋدان اكىمى» دەگەن ماقالاسى «سەنساتسيا» تۋعىزىپ، وقىرماندار ۋ-شۋ بولعانى بار. «رەسەيدىڭ ءبىر وبلىسىنىڭ گۋبەرناتورى اناۋ – مىناۋ اكىمدى قابىلداي بەرمەيدى. دەمەك قازاقستاندىق اكىمنىڭ بەدەلى زور. بۇل تاريحي وقيعا» دەپ باسىڭقىراپ جىبەرگەنى ەسىندە.

   جاكەڭ تالاي اكىمنىڭ الدىن كورگەن ءتىس قاققان اككى  ەمەس پە وتە قاتتى قينالا قويعان جوق،  بىردەن اۋدان اپپاراتىنا حابارلاسىپ،  اۋدان اكىمى تۇكبىتىرمەس جايجۇرگەنوۆتىڭ اۋىل تۇرعىندارىنا وقيتىن بايانداماسىن قولىنا ءتۇسىردى. باياندامانىڭ نەگىزگى نوبايىن قاعاز بەتىنە ءوزى ءتۇسىرىپ بەرگەنى  وقىپ وتىرعاندا ويىنا ورالدى. «اباي جولىنىڭ» قالىڭ ەكى تومىنداي كەرە قارىس بايانداما دا «رۋحاني جاڭعىرۋدى» دەر ۋاقىتىندا قولعا العاننىڭ ارقاسىندا اۋىل حالقىنىڭ تومەندەپ كەتكەن رۋحتارىنىڭ كوتەرىلە باستاعانى تاپتىشتەپ جازىلىپتى. سوسىن «ديپلوممەن» اۋىلعا كەلگەن جاستاردىڭ «ەندى كورمەگەنىمىز الماتى مەن استانا بولسىن، ول جاقتا قاڭعىرىپ ۇيسىز-كۇيسىز جۇرگەنشە اۋىلدا قالۋعا بەكىندىك» دەگەن باستامالارىن قولداپ وتىرعانى ايتىلىپتى.  ەڭ قىزىعى: اۋدان اكىمى يت جىلىندا قاڭعىباس يتتەرگە اياۋشىلىق بولمايتىنى، وعان بيۋدجەتتەن قىرۋار قارجى بولىنگەنى، وزىنە دەيىنگى اكىمنىڭ «يتكە بولىنگەن» اقشانى اڭ اۋلاۋعا جۇمساپ جىبەرىپ سونىڭ كەسىرىنەن يتكە تالانعان بالا – شاعانىڭ كوبەيگەنىن دە تۇيرەپ ءوتىپتى.

اۋىلشارۋاشىلىق سالاسىن دامتۋعا ارنالعان «سىباعا»، «قۇلان»، «التىن اسىق» باعدارلامالارى ءوز دەڭگەيىندە اتقارىلعانى سونداي، قۇلايىن دەپ تۇرعان سامان ۇيلەرىن كەپىلدىككە قويىپ نەسيە العاندار سانى ارتىپتى. ء«ابساليۋتتى» بۇقالاردىڭ كەسىرىنەن اۋىلداعى جەڭىل سالماقتاعى سيىرلار مەرتىگىپ ءىرى قارانىڭ ازايۋىنا اپارىپ سوعۋدا – مىس. باياندامادا اۋىز سۋ ماسەلەسى تولىعىمەن شەشىلدى دەگەن ءتۇيىن بار بولىپ شىقتى. سونىڭ ارقاسىندا كەي اۋىل تۇرعىندارى فيلتردەن وتكەن تازا سۋدى ساۋداعا شىعارىپ، قالتالارىن قامپايتىپ جاتقان كورىنەدى. 

ونى ايتاسىز، قىستىڭ كوزى قىراۋدا ويقى-شويقى تاس جولدارعا بيۋدجەت قارجىسىن ۇنەمدەۋ ماقساتىندا سۋ قۇيىلعانى، ءسويتىپ ماشينالاردىڭ ەركىن جوڭكىلۋىنە بار جاعداي جاسالعانى ناقتى فاكتلەرمەن كورسەتىلىپتى.

مۇنىڭ ءبارى جاعىمدى جاڭالىقتار بولعانىمەن، جاعىنبەككە بالەندەي ۇناي قويعان جوق.

ەلەڭ ەتەرلىك اقپارات ىزدەپ كوز مايىن تاۋىسىپ ءتۇنى بويى باياندامانى ءۇتىر – نۇكتەسىنە دەيىن قالدىرماي وقىدى. تاڭ سىبىرلەپ اتا باستاعاندا، «قۇردىمعا كەتكەن» اۋىلىنداعى جەرگىلىكتى جۇرتتان الاقان جايىپ جينالعان قارجىعا سالىنعان «امبەباپ دارەتحانانىڭ»  اشىلۋىندا اۋدان اكىمىنىڭ ءسوز سويلەيتىنى، كەيىن لەنتاسىن قيىپ، اۋىل اكىمىنىڭ ۇيىنەن ءبىر قويدىڭ باسىن ءمۇجىپ كەتەتىن جولداردى كەزدەستىردى. ايەلى ۇل تۋسا مۇنداي قۋانباس. مىنە، ماقالاعا تۇزدىق! ۇيقىسى شايداي اشىلىپ، قالامسابىن قولىنا الىپ، اۋدان اكىمىنە ودا ماقالا جازا باستادى. «اۋدانىمىزدىڭ ۇلكەن ادامى، حالىقتىڭ قالاۋلىسى، اقىل –پاراساتى قاتار ورىلگەن ازاماتتىڭ ءوز ەڭبەگىمەن وسكەنى ءبىر قىرى دەسەك جاراسار. جاستايىنان تاس قالاعان، كاچەگوردا قارا كومىردى پەشكە لاقتىرىپ، حالىقتىڭ ءۇيىن عانا ەمەس، جۇرەگىن جىلىتقان، ءسويتىپ ءجۇرىپ، جوعارى ءبىلىمدى سىرتتاي وقىپ تاۋىسقان تۇكبىتىرمەس جايجۇرگەنوۆ جايلى اۋدان كولەمىندە بىلمەيتىن ادام جوق. نەگىزگى ماماندىعى تاۋ – كەن سالاسى بولسا دا، ساياساتقا جەلىستى، ەكونوميكاعا ۇشقىر، تاريحقا جورعا، اۋىلشارۋاشىلىعىنا جۇيرىك جان. وزگە اۋداندارداعى اكىمدەردەن وزگەشەلىگى ەلۋدە – ەلۋ ساياساتىن قاتتى ۇستاناتىنى. تازا قازاق اۋىلىن باسقارىپ وتىرسا دا، قاراماعىنداعىلاردى ورىسشا سىباپ تاستايتىنىمەن ەرەكشەلەنەدى. ەل بىرلىگىن، ىنتىماعىن ويلاعاندا ءبىر بەت باياندامانى قاققا ايىرىپ، ەكى تىلگە قىلداي بولەدى. قازىرگى تاڭدا وبلىسقا كۇنارا قاتىناپ، اعىلشىن ءتىلىن ۇيرەنۋگە كۇش – جىگەرىن سارپ ەتۋدە. بولاشاقتا ءۇش تۇعىرلى ءتىلدى جانداندىرۋعا كۇش سالماق ويدا. سوڭعى جىلدارى وتە تولىسىپ بارادى، اكىمىمىز. كەلگەندەگى كيىمدەرى شاق كەلمەي قالىپتى.  دارىگەرلەر «قيمىل - قارەكەت وتە از» دەگەن دياگنوز  قويىپتى. ەل باسقارۋ وڭاي ما، ءجۇرىپ – تۇرۋدان دا قالدى ءقازىر. قارىم – قابىلەتىن بىلەتىندەر، تالاي اكىمدى كورىپ ەدىك، ءبىراق تاپ مۇنداي لەنتا قيعىش «وترىۆاشكا» اكىمدى كورمەدىك دەپ تاڭداي قاعىسادى. تاعى ءبىر تۇلعالىق قابىلەتى – ءتىل العىشتىعى. جوعارى جاقتان تاپسىرما بولماسا، ءوز بەتىمەن ءىس تىندىرۋعا مۇلدە جوق. ونىسى، بيۋدجەت قارجىسىن دالاعا شاشپايىن دەگەن نيەتتەن تۋعانى كورىنىپ تۇر...

وسى ارداقتى اكىمىمىز «قۇردىمعا كەتكەن» اۋىلىندا جاڭا دارەتحانا اشۋدى كوپتەن ويلاپ، ۇيقىسىز تاڭ اتىرىپ جۇرگەنىن  ايتا  بەرۋشى ەدى. سونىڭ ورايى بۇگىن كەلدى.  دارەتحانا – تازالىق كەپىلى. تازالىق جوق جەردە – ۇيات تا جوق. الەمنىڭ الدىڭعى قاتارلى ەلدەرىنە قوسىلۋ ءۇشىن –  تۋا ءبىتتى ۇيىمداستىرۋشىلىق تالانت ءار اكىمنىڭ بويىنان تابىلا بەرمەيدى وكىنىشكە وراي. بۇل جاعىنان ءبىز باقىتتىمىز. ەندى اۋىل تۇرعىندارىنان وسى دارەتحانانى تازا ۇستاۋدى، قىستا جىلۋى مەن سۋى بارىن ەسكەرىپ «پلاتنىي» قىلۋدى اۋدان اكىمى بايانداماسىندا ناقتىلاپ بەردى. ەندى سونى ىسكە اسىرۋ عانا قالدى.

 تۇكبىتىرمەس جايجۇرگەنوۆ مىرزا ەلدىڭ قامىن ويلاپ جۇرەتىن كورەگەن باسشى ەمەس پە،  اۋىل اكىمدەرىنە ايبارلى بۇيرىقتار بەرىپ، جەمقورلاردىڭ جەلكەسىن قيۋدى تاپسىردى. جۇمىسسىزدىقپەن كۇرەستە ناتيجە بار ەكەنىنە توقتالىپ، ءبىراق وعان ماساتتانۋعا ءالى ەرتە ەكەنىن جەتكىزدى. اكىمنىڭ بايانداماسىن ءۇش ساعات بويى تاپجىلماي تىڭداعان اۋىل تۇرعىندارىنىڭ كوپشىلىگى ء(قايتسىن ەندى) قالعىپ كەتىپ وتىردى.  بۇل دا بولسا باياندامانىڭ قانشالىقتى اسەر ەتكەنىن كورسەتسە كەرەك. جيىن سوڭىندا اۋىل حالقى  اۋدان اكىمىنىڭ الىستان ات ارىتىپ كەلىپ دارەتحانانىڭ لەنتاسىن قيىپ كەتكەنىنە ريزاشىلىقتارىن ءبىلدىرىپ، ۇزاق قول سوعىپ شىعارىپ سالدى».

ماقالاسىن ءبىر شولىپ شىققان باس رەداكتور كۇنى ەرتەڭ اۋدان اكىمىنىڭ ءوزىن كابينەتىنە شاقىرىپ الىپ ارقاسىنان قاعىپ، العىس ايتارىنا ءشۇباسىز سەندى. گازەت نومەرى شىعاتىن كۇن بولعاندىقتان اكيمات عيماراتىندا ورنالاسقان رەداكتسياعا ەرتەرەك كەلدى.

تۇكبىتىرمەس جايجۇرگەنوۆ بوزالا تاڭنان تۇرىپ «قۇردىمعا كەتكەن» اۋىلىنا جول ءجۇرىپ كەتىپتى.  اۋىل كەڭسەسىنە تەلەفون شالىپ ەدى ەشكىم كوتەرمەدى. «قاربالاسىپ جاتىر –اۋ، بايعۇستار» دەپ راحاتتانا ءبىر كۇلىپ الدى. شالعايداعى اۋىلدارمەن ۇيالى تەلەفون ارقىلى بايلانىسۋ قيامەت – قايىم ەكەنى وزىنە ءمالىم.  شىققالى جاتقان نومەردىڭ ەكىنشى بەتىنە ءتۇنى بويى شيمايلاعان ماقالاسىن ورنالاستىرىپ، لەنتاسى كەسىلگەلى جاتقان «دارەتحانانى» باستى بەتكە شىعارىپ، قاسىنا كۇلىپ تۇرعان اكىم تۇكبىتىرمەس جايجۇرگەنوۆتى جايعاستىردى. ءتۇس اۋا بەرگەندە، اكىم شارۋاسىن ءبىتىرىپ ورالادى - اۋ دەگەن شامادا اۋداندىق گازەتتە «اۋدان اكىمى دارەتحانا سالدىرىپ اۋرە» دەگەن ماقالا جارق ەتتى.

 

 "قازاقستان ءداۋىرى" گازەتى

ناعاشىباي قابىلبەك

 

 

 


كەلۋ قاينارى: http://www.elarna.net/koru.php?tur=52&id=1022349

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەل-ارنا ءوز گازەتى

ەڭ جاڭا ماقالالار