جيىندى ۋنيۆەرسيتەت رەكتورى ەرلان سىدىقوۆ جۇرگىزدى. پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ كونفەرەنتسيانى پرەزيدەنت قاسىم-جومارت توقاەۆتىڭ قۇتتىقتاۋ حاتىمەن اشتى. ء«اليحان بوكەيحان – ءتول تاريحىمىزدا وشپەس ءىز قالدىرعان ءبىرتۋار تۇلعا. ول حح عاسىردىڭ باسىندا «الاش» ۇلت-ازاتتىق قوزعالىسىنىڭ كوشىن باستاپ، دەربەس ەل بولۋدىڭ العىشارتتارى مەن نەگىزدەرىن ايقىندادى. حالقىنىڭ بوستاندىعى ءۇشىن بۇكىل عۇمىرىن سارپ ەتتى. تاريحي تۇلعانىڭ مەرەيتويى قازاقستان تاۋەلسىزدىگىنىڭ 30 جىلدىعىمەن تۇسپا-تۇس كەلىپ وتىر. مۇنىڭ سيمۆولدىق ءمانى بار. شىن مانىندە بۇگىنگى ەگەمەندىگىمىز – ءاليحان باستاعان ۇلت زيالىلارىنىڭ ورىندالعان ارمانى» دەلىنگەن پرەزيدەنتتىڭ قۇتتىقتاۋ حاتىندا.
كونفەرەنتسياعا قاتىسقان ءبىلىم جانە عىلىم ءمينيسترى اسحات ايماعامبەتوۆ ءاليحان بوكەيحاننىڭ ءبىلىم جانە عىلىم سالاسىنا قاتىستى ەڭبەكتەرى مەن مازمۇندى ويلارى مەرەيتوي اياسىندا جيناقتالىپ، اۋقىمدى ىستەرگە وزەك بولاتىنىن جەتكىزدى. ياعني بيىل جانە كەلەسى جىلدارى ورتا مەكتەپتەر مەن كوللەدجدەردە، جوعارى وقۋ ورىندارىندا ءتيىستى ءىس-شارالار وتكىزىلىپ، الاش مۇراسىنا قاتىستى عىلىمي-زەرتتەۋلەر قولعا الىنباق.
كەلەسى ءسوز كەزەگى تيگەن پارلامەنت سەناتىنىڭ دەپۋتاتى، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى مۇحتار قۇل-مۇحامەد ءاليحان بوكەيحاننىڭ قازاق حالقىنىڭ ءوز ەركىمەن، ءوز قولىمەن قۇرعان ۇلتتىق ۇكىمەتىنىڭ ۇكىمەت باسشىسى، جيىرماسىنشى عاسىر باسىنداعى قازاق ساياسي قايراتكەرلەرىنىڭ كوشباسشىسى بولعانىن اتاپ ءوتىپ، ونىڭ ماقساتى قازاق حالقىن ەۋروپالىق دەڭگەيدە دامىعان مەملەكەتتەردىڭ قاتارىنا قوسۋ بولعانىن ايتتى. «ول الاش اۆتونومياسى اتتى جاڭا مەملەكەتتىك قۇرىلىمدى جاريالادى. ساياسي جۇمىسىن قامتاماسىز ەتۋ ءۇشىن جاڭا تيپتەگى «الاش» پارتياسىن قۇرىپ، ونى ۇلكەن ساياسي ۇيىمعا اينالدىردى. ونىڭ ەكونوميكا، ساياسات، تاريح، گەوگرافيا، ادەبيەت، فولكلور سالاسىنداعى ەڭبەكتەرى قازاق وقىرماندارىنىڭ يگىلىگىنە اينالدى»، دەگەن م.قۇل-مۇحامەد ءاليحان بوكەيحان ەڭبەكتەرىن شيرەك عاسىر بۇرىن عالىمدار ءمۇسىلىم بازارباەۆ پەن سۇلتانحان ءجۇسىپتىڭ تۇڭعىش رەت جارىققا شىعارعانىن، ودان بەرىدە الاشتانۋشى عالىم ءس.جۇسىپتىڭ قۇراستىرۋىمەن كورنەكتى تۇلعانىڭ 15 تومدىعى ازىرلەنگەنىن، بۇل ەڭبەكتەردىڭ ءاليحانتانۋشىلار ءۇشىن ىرگەلى نەگىز بولاتىنىن باياندادى.
كونفەرەنتسيا بارىسىندا پارلامەنت سەناتىنىڭ دەپۋتاتى التىنبەك نۇحۇلى، «اق جول» قدپ ءتوراعاسى ازات پەرۋاشەۆ، پارلامەنت ءماجىلىسىنىڭ دەپۋتاتتارى بەرىك ءابدىعالي، قازىبەك يسا، بەرىك دۇيسەمباەۆتار قۇتتىقتاۋ ءسوز سويلەدى. ال ەۇۋ «الاش» عزي ديرەكتورى ءس.جۇسىپ، قاجى بايرام ۆەلي ۋنيۆەرسيتەتىنىڭ پروفەسسورلارى گۇلجانات قۇرمانعاليەۆا-ەردجيلاسۋن مەن حۋليا كاساپوگلى چەنگەل، ميمار سينان كوركەم ونەر ۋنيۆەرسيتەتىنىڭ پروفەسسورى ءابدىۋاقاپ قارا، ءش.ۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەكۇلى سىندى الاش تاقىرىبىن تەرەڭ بىلەتىن وتاندىق جانە شەتەلدىك تانىمال عالىمدار ارنايى باياندامالار جاسادى.
ءتۇرى: ەگەمەن قازاقستان ماقالالارى مەن جاڭالىقتارى
جولدانعان ۋاقىتى: 08:00 - 2021/03/04
