كەلەسى جىلى وتاندىق زاڭ عىلىمنىڭ اتاسى، قازاقستان رەسپۋبليكاسى مەملەكەتتىك سىيلىعىنىڭ، پرەزيدەنتتىڭ بەيبىتشىلىك جانە رۋحاني كەلىسىم سىيلىقتارىنىڭ يەگەرى زاڭ عىلىمدارىنىڭ دوكتورى، اكادەميك س. زيمانوۆتىڭ تۋعانىنا ءجۇز جىل تولعالى وتىر.

ول ەلىمىزدىڭ ۇلتتىق قۇقىقتىق جۇيەسىنىڭ قالىپتاسىپ، دامۋىنا ايرىقشا ۇلەس قوسىپ، ءوزىنىڭ اتىن وتاندىق يۋريسپرۋدەنتسيانىڭ تاريحىنا التىن ارىپتەرمەن جازعان تۇلعا دەسەك ارتىق ايتپاعاندىق بولار ەدى.

س. زيمانوۆتىڭ عىلىمي-زەرتتەۋ ەڭبەكتەرى نەگىنەن العاندا، مەملەكەت پەن قۇقىق تاريحى مەن تەورياسىنا قازاقستان مەن ورتالىق ازيانىڭ وزگە دە ايماقتارىندا ۇلتتىق مەملەكەتتەردىڭ قالىپتاسۋى مەن دامۋ جولدارىنا، تاۋەلسىز قازاق مەملەكەتىنىڭ قۇقىقتىق پلاتفورماسىنىڭ قالىپتاسۋىنا جانە ت.ب. وتە وزەكتى ماسەلەلەرگە ارنالعان.

ونىڭ ءومىر جولى – قازىرگى ۋاقىتتا وتە سيرەك قۇبىلىسقا اينالعان، عىلىمعا ادال عالىمنىڭ جانە ارى تازا مەملەكەتتىك قايراتكەردىڭ اقيقات بەينەسى. سالىق زيمانۇلى جوعارى بىلىكتى قۇقىقتانۋشى عالىمدار مەن تاجىريبەلىك زاڭگەر قىزمەتكەرلەردى دايىنداۋ ءتارىزدى اسا ماڭىزدى ورىستە دە تىنباستان ەڭبەك ەتتى. ول اسا ۇلكەن عىلىمي مەكتەپتى قالىپتاستاردى، ونىڭ شاكىرتتەرى قازىرگى تاڭدا ەلىمىزدىڭ تۇپكىر-تۇپكىرىندە، قۇقىق سالاسىنىڭ ءارتۇرلى ورىستەرىندە جەمىستى ەڭبەك ەتۋدە. ولاردىڭ قاتارىندا ۇستازدارىنىڭ اق باتاسىمەن وزدەرىن عىلىمي، اعارتۋشىلىق جانە قوعامدىق-ساياسي قىزمەتكە ارناعاندارى دا جەتەرلىك.

قازاق حالقىنىڭ قولىنا ۋاقىتتىڭ ءوزى بەرگەن تاريحي مۇمكىندىكتى پايدالانىپ، اتالارىمىزدىڭ ارمانى بولعان تاۋەلسىز مەملەكەتتى قالىپتاستىرۋعا دەگەن قاجەتتىلىك، كوپتەگەن ءبىرتۋار تۇلعالاردىڭ تاريح ساحناسىنا جارق ەتىپ شىعۋىنا سەبەپكەر بولدى. اكادەميك س. زيمانوۆ وسىنداي تاريحي تۇلعالاردىڭ ءبىرى جانە بىرەگەيى بولا ءبىلدى، دەدى قۇتتىقتاۋ سوزىندە ۋنيۆەرسيتەت رەكتورى ب. احمەتوۆ.

شارادا اكادەميك سالىق زيمانوۆ تۋرالى بەينەروليك كورسەتىلىپ، قوناقتار – ماڭعىستاۋ وبلىسى اكىمدىگىنىڭ، ماڭعىستاۋ وبلىستىق سوتىنىڭ وكىلدەرى، "بيلەر كەڭەسى" قوعامدىق بىرلەستىگىنىڭ وكىلى مەن ءتۇپقاراعان اۋداندىق ءبىلىم جۇيەسىن دامىتۋ ورتالىعىنىڭ» ديرەكتورى، ءتۇپقاراعان اۋدانىندا ورنالاسقان "س.زيمانوۆتىڭ ءومىرى مەن شىعارماشىلىعىنا ارنالعان مۇراجايدىڭ" قىزمەتكەرى ءسوز سويلەپ، س.زيمانوۆتىڭ جوعارعى وقۋ ورىندارىندا، عىلىمي ۇيىمداردا باسشى، قازاقستان رەسپۋبليكاسى پرەزيدەنتىنىڭ جانىنداعى كونسۋلتاتيۆتىك كەڭەستىڭ، قازاقستان رەسپۋبليكاسىنىڭ مەملەكەتتىك ساياسات جونىندەگى ۇلتتىق كەڭەسىنىڭ مۇشەسى، قازاقستان رەسپۋبلي­كاسى جوعارعى كەڭەسىنىڭ دەپۋ­تاتى اتانعان جىلدارىندا دا تۋعان ءتىلىمىز بەن ءتول مادەنيەتىمىزدىڭ تىنىسىن كەڭەيتۋگە، ەلىمىزدىڭ ىرىسىن كوبەيتۋگە ەڭبەك سىڭىرگەندىگىن، اتا زاڭىمىزدىڭ نەگىزىن قالاسىپ، زاڭدىلىقتىڭ سالتانات قۇرۋىنا اتسالىسقاندىعىن، سونداي-اق تاۋەلسىزدىكتىڭ العاشقى قيىن دا جاۋاپتى جىلدارىندا مەملەكەت باسشىسىنىڭ قاسىندا بولىپ، ازاتتىققا جاڭا قول جەتكىزگەن وتانىمىزدىڭ وركەندەۋىنە باعىت-باعدار بەردى، ۇلت زيالىلارىنىڭ ونەگەسىمەن حالىققا شىنايى قىزمەت ەتكەندىگىن باياندادى. بىلىكتى زاڭگەر مامان رەتىندە ەگەمەندىك، تاۋەلسىزدىك جولىن­داعى قازاقستاننىڭ حالىقارالىق قاتىناستارىن زاڭداستىرىپ، قازاق تىلىنە مەملەكەتتىك مارتەبە بەرۋ، پرەزيدەنتتىك باسقارۋ ينستيتۋتىن ەنگىزۋ، قۇقىقتىق-دەموكراتيالىق رەفورمالاردى جۇرگىزۋ ىسىنە بەلسەنە ارالاسىپ، قازاق حالقىنىڭ قۇقىقتىق جۇيەسىن زەرتتەپ، بيلەر مەن شەشەندەردىڭ بيلىك ونەرىن بۇگىنگى ۇرپاققا جەتكىزگەندىگى، قازاقستان ەگەمەن ەل بولعاننان كەيىن دە مەملەكەتتىڭ كونستيتۋتسياسى مەن قولدانىستاعى زاڭدارىن قابىلداۋ جانە جەتىلدىرۋ ماقساتىندا كوپ تەر توككەندىگى، رەسپۋبليكا جوعارعى كەڭەسىنىڭ دەپۋتاتى، كوميتەت ءتوراعاسى جانە جوعارعى كەڭەس ءتورالقاسىنىڭ مۇشەسى بولا ءجۇرىپ، ەل ءۇشىن اسا ماڭىزدى زاڭداردىڭ جۇيەلى جاسالىپ، ورنىقتى بەكىتىلۋىنە اتسالىسقاندىعى ايتىلدى.

"قۇقىقتانۋ" كافەدراسىنىڭ دوتسەنتى س.اليبەكوۆتىڭ ايتۋىنشا، اپتالىق اياسىندا "قۇقىقتانۋ" ماماندىعىنىڭ ستۋدەنتتەرى اراسىندا "قازاق بيلەر سوتى – بىرەگەي سوت جۇيەسى" اتتى شىعارمالار سايىسى ءوتىپ، "ادىلەتتىلىك –مەملەكەتتىڭ مىزعىماس تۇعىرى" اتتى برەين-رينگ ۇيىمداستىرىلادى. سونداي-اق ونلاين فورماتتا "سالىق زيمانوۆ – عۇلاما زاڭگەر، ۇستاز، قايراتكەر" اتتى اشىق تاربيە ساعاتى، "س.زيمانوۆ جانە ونىڭ وتاندىق زاڭ عىلىمىنىڭ نەگىزىن قالاۋداعى ءرولى" ونلاين عىلىمي-سەمينار ۇيىمداستىرىلادى.