قاراعاندى. قازاقپارات – قاراعاندى وبلىسىندا وبلىس اكىمدىگى، كاسىپوداق جانە جۇمىس بەرۋشىلەر قاۋىمداستىعىنىڭ باسشىلارى اراسىندا الەۋمەتتىك ارىپتەستىك تۋرالى ءۇشجاقتى كەلىسىم جاسالدى، دەپ حابارلايدى قازاقپارات ءتىلشىسى.
بۇل قۇجات 2021-2023 جىلدارعا ارنالعان، ءار ءۇش جىل سايىن جاڭارتىلىپ وتىرادى. بۇل جولى جۇمىسپەن قامتۋعا، جۇمىس ورىندارىن ساقتاۋعا، قىزمەتكەرلەردى الەۋمەتتىك قورعاۋعا باسا نازار اۋدارىلدى.
پاندەميا جاعدايىندا اتالمىش العىشارتتار ءبىرىنشى ورىنعا شىقتى. ەپيدەميولوگيالىق جاعدايعا بايلانىستى كەلىسىمگە قول قويۋ ءراسىمى ونلاين-رەجيمدە ءوتتى.
جاڭا كەلىسىمگە قىزمەتكەرلەردى الەۋمەتتىك قورعاۋ جانە كەپىلدەندىرۋ، ءوندىرىستى قىسقارتۋ، كادرلاردى كاسىبي دايارلاۋ جانە قايتا دايارلاۋ، ەڭبەك قاۋىپسىزدىگى جانە ەڭبەكتى قورعاۋ سالاسىنداعى قوعامدىق باقىلاۋدى قامتاماسىز ەتۋ جانە باسقا قوسىمشا تارماقتار ەنگىزىلدى.
«بۇگىن قول قويعان بۇل قۇجات بىزگە ەڭبەك جاعدايىن جاقسارتۋعا كومەكتەسەدى. بيلىك ەكونوميكالىق تۇراقتىلىقتى ساقتاۋعا ودان ءارى ىقپال ەتەدى دەپ ۇمىتتەنەمىن. كاسىپوداقتاردىڭ ۇجىمداردا تۇراقتى اتموسفەرا قۇرۋعا، راتسيوناليزاتورلىقتى دامىتۋعا، قىزمەتكەرلەردىڭ بىلىكتىلىگىن ارتتىرۋعا كومەكتەسۋىن قالايمىن»، - دەپ اتاپ ءوتتى تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارى رەسپۋبليكالىق قاۋىمداستىعىنىڭ اتقارۋشى ديرەكتورى نيكولاي رادوستوۆەتس.
قاراعاندى وبلىسى كاسىپوداق ورتالىعىنىڭ ءتوراعاسى بولات جۇمابەكوۆتىڭ ايتۋىنشا، بۇعان دەيىنگى كەلىسىم اياسىندا جاس ماماندارعا الەۋمەتتىك قولداۋ كورسەتۋ ماسەلەسى كەڭەيە تۇسكەن.
جاڭا قۇجاتتا جۇمىسشى كاسىپتەرىنىڭ ءيميدجىن ارتتىرۋعا باسا نازار اۋدارىلدى.
جەڭىس قاسىمبەك الەۋمەتتىك سەرىكتەستەرگە كونسترۋكتيۆتىلىك پەن جاۋاپكەرشىلىك ءۇشىن العىس ايتتى.
«شىنىندا دا، ءبىر عانا جەڭىمپاز بولۋى مۇمكىن ەمەس. ءبىز بارلىق تاراپتاردى بارىنشا قاناعاتتاندىراتىن ورتاق شەشىم تابۋىمىز كەرەك. قول قويىلعان كەلىسىم – بۇل ءبىز قاجەت بولعان جاعدايدا وزگەرىستەر ەنگىزە الاتىن نەگىزگى قۇجات ەكەنى تۇسىنىكتى. ەڭبەك جانە الەۋمەتتىك قاتىناستارعا اسەر ەتۋى مۇمكىن كوپتەگەن اسپەكتىلەر بار. وتكەن جىلى ءبىز سىزدەرمەن، ەڭ الدىمەن جۇمىس بەرۋشىلەرمەن بىرگە پاندەميا كەزىندە وتە تىعىز جۇمىس جاسادىق. جۇمىس ورىندارىن ساقتاپ قالدىق، سونىمەن قاتار ءبىرقاتار كاسىپورىندار جالاقىسىن كوتەردى»، - دەپ ەسەپتەيدى ءوڭىر باسشىسى.
الەۋمەتتىك ارىپتەستىك تۋرالى وسىنداي كەلىسىمدەرگە وبلىستىڭ بارلىق قالالارى مەن اۋداندارىندا قول قويىلادى.
ءتۇرى: قازاقپارات جاڭالىقتارى
جولدانعان ۋاقىتى: 00:21 - 2021/04/09
