تاراز. قازاقپارات –بيىلعى ءۇش ايدا جامبىل وبلىسى اۋماعىندا جول-كولىك وقيعالارىنىڭ سانى 8،7 پايىزعا تومەندەدى، دەپ حابارلايدى قازاقپارات ءتىلشىسى.
وسىلايشا وڭىردەگى جول اپاتىنىڭ كورسەتكىشى رەسپۋبليكالىق ماڭىزى بار اۆتوجولداردا 3،8 پايىزعا، جەرگىلىكتى ماڭىزى بار اۆتوجولداردا 29،6 پايىزعا جانە قالالار مەن ەلدى مەكەندەردىڭ كوشە-جول جەلىلەرىندە 6،6 پايىزعا تومەندەگەن.
جالپى العاندا جولداعى قاۋىپسىزدىك جاعدايىن انىقتايتىن نەگىزگى فاكتور - جۇرگىزۋشىلەر مەن جاياۋ جۇرگىنشىلەردىڭ نەمقۇرايلىعى.
تالداۋ ناتيجەسى كورسەتكەندەي، جىل باسىنان بەرى تىركەلگەن 211 وقيعانىڭ 209-ى جۇرگىزۋشىلەردىڭ كىناسىنەن بولعان.
«ماسەلەن، رەسپۋبليكالىق كولىك جولدارىندا جۇرگىزىلگەن حرونومەتراجعا سايكەس، وبلىس اۋماعى بويىنشا تاۋلىگىنە 8 مىڭنان استام اۆتوموبيل،ونىڭ ىشىندە جەڭىل اۆتوموبيل سانى - 6 مىڭ 984 جانە 1 مىڭنان استام اۋىر جۇك كولىگى وتەدى. قولداعى بار ستاتيستيكاعا سۇيەنسەك، جكو-نىڭ باسىم بولىگى جۇرگىزۋشىلەردىڭ كىناسىنەن جول قوزعالىسى ەرەجەلەرىن ساقتاماعان كەزدە جاسالادى: جىلدامدىق رەجيمىن اسىرۋ، باعدارشامدار مەن جول بەلگىلەرىنىڭ سيگنالدارىن ەلەمەۋ، ءتيىستى قاشىقتىقتى ساقتاماۋ، قاراما-قارسى قوزعالىس جولاعىنا شىعۋ جانە باسقالار. الايدا، اۆتوكولىكتى ماس كۇيىندە جۇرگىزگەن جۇرگىزۋشىلەردىڭ كىناسىنەن بولاتىن جول اپاتىنىڭ سانى ەداۋىر ارتىپ وتىر» دەلىنگەن وبلىستىق پد ءباسپاسوز قىزمەتىنىڭ حابارلاماسىندا.
ايتا كەتەيىك، بۇگىنگى تاڭدا جول قوزعالىسى ەرەجەلەرىن بۇزۋدىڭ الدىن الۋ فاكتورلارىنىڭ ءبىرى – 10 جىلجىمالى پوستتى قامتيتىن «لاسسو» اپپاراتتىق-باعدارلامالىق كەشەنى.
ونىڭ كومەگىمەن جىل باسىنان بەرى 9 671 زاڭ بۇزۋ دەرەگى تىركەلدى.
ءتۇرى: قازاقپارات جاڭالىقتارى
جولدانعان ۋاقىتى: 23:57 - 2021/04/08
