اتىراۋ. قازاقپارات – اتىراۋ وبلىسىنىڭ تەڭىز كەنىشىندە 5 اۆتوبۋستىڭ ورتەنۋ سەبەبى انىقتالدى، دەپ حابارلايدى قازاقپارات ءتىلشىسى.
بۇعان دەيىن جىلىوي اۋدانىندا ورنالاسقان تەڭىز كەنىشىندە 5 اۆتوبۋس ورتەنىپ كەتكەنىن جازعان ەدىك.
«سسەر» كومپانياسى ءباسپاسوز قىزمەتىنىڭ مالىمەتىنشە، قىزمەتتىك اۆتوبۋستار تەڭىز ۆاحتالىق قالاشىعىنداعى تۇراققا ساعات 19:00-دە كەلىپ، جولاۋشىلار تۇسىرىلگەننەن كەيىن قوزعالىستى توقتاتقان. تۇراققا قويىلعان اۆتوبۋستاردىڭ ءبىرىنىڭ موتور بولىگىنەن شىققان ءورتتى «سسەر» كومپانياسىنىڭ سيگنال بەرۋشى قىزمەتكەرى بايقاعان.
«العاشقى قىزمەتتىك تەكسەرىس كورسەتكەندەي، سيگنال بەرۋشى ارتقى جاقتا تۇرعان اۆتوبۋستاردىڭ ءبىرىنىڭ قوزعالتقىش بولىگىنەن شىققان ءتۇتىندى بايقاعان. نۇسقاۋلىققا سايكەس، ول دەرەۋ كەزەكشىگە حابارلاعان. وقيعا ورنىنا «سسەر» كومپانياسىنىڭ ءورت ءسوندىرۋ كومانداسى، سونداي-اق «تەڭىزشەۆرويل» كومپانياسىنىڭ اپاتقا قارسى قۇرامىنىڭ (پاس) قىزمەتكەرلەرى مەن ءۇش ارنايى تەحنيكاسى جەدەل جەتتى»، - دەپ حابارلادى كومپانيانىڭ ءباسپاسوز قىزمەتىنەن.
الايدا، سەكۋندىنا 15-20 مەتر كۇشپەن سوققان جەلدىڭ ەكپىنىمەن جالىن جاقىن ماڭداعى اۆتوبۋستارعا تەز تاراعان. سونىڭ سالدارىنان 5 اۆتوبۋس ورتەنگەن.
«ساعات 21.00-دە ءورت تولىعىمەن ءوشىرىلدى. قازا بولعاندار مەن زارداپ شەككەندەر جوق. ءورت سوندىرىلگەننەن كەيىن وقيعا ورنى قوقىستاردان تازارتىلدى. كومپانيا قىزمەتكەرلەرى شتاتتىق رەجيمدە قايتا جۇمىس ىستەي باستادى.
ساراپشىلاردىڭ پىكىرىنشە، ءورتتىڭ تۇتانۋىنا اۆتوبۋستىڭ موتور بولىگىندەگى ەلەكتر سىمدارىنىڭ قىسقا تۇيىقتالۋى سەبەپ بولعان. ءورتتىڭ ناقتى سەبەبىن «سسەر» كومپانياسى «تەڭىزشەۆرويل» جانە مەملەكەتتىك ورگاندار وكىلدەرىمەن بىرلەسىپ قۇرعان جۇمىسشى كوميسسيا انىقتايدى»، - دەپ ءمالىم ەتتى كومپانيادان.
اقپاراتقا سۇيەنسەك، قىزمەتتىك اۆتوبۋستار كۇن سايىن رەيسكە شىعار الدىندا تەكسەرىستەن ءوتىپ تۇرادى. بۇدان بولەك، «تەڭىزشەۆرويل» كومپانياسىنىڭ تالابىنا سايكەس، بەلگىلەنگەن مەرزىمدە مىندەتتى تەحنيكالىق بايقاۋدان وتەدى.
ءتۇرى: قازاقپارات جاڭالىقتارى
جولدانعان ۋاقىتى: 02:18 - 2021/03/06
