نۇر-سۇلتان. قازاقپارات – ەلوردادا iKOMEK109 ءبىرىڭعاي بايلانىس ورتالىعىنىڭ اياسىندا ناركولوگيالىق كومەك ماسەلەلەرى بويىنشا سەنىم تەلەفونى ىسكە قوسىلدى، دەپ حابارلايدى قازاقپارات.
نۇر-سۇلتان قالاسىنىڭ تۇرعىندارىنا ناركولوگيالىق كومەكتى مامانداندىرىلعان پسيحيكالىق دەنساۋلىق ورتالىعى كەپىلدەندىرىلگەن تەگىن مەديتسينالىق كومەك اياسىندا كورسەتەدى.
ەلوردا اكىمدىگىنىڭ مالىمەتىنشە، ورتالىق قىزمەتى پسيحواكتيۆتى زاتتارعا، ياعني ەسىرتكى سەكىلدى دارىلىك زاتتارعا تاۋەلدىلىكتەن زارداپ شەگەتىندەردى ەمدەۋگە، وڭالتۋعا، ولارعا كونسۋلتاتسيا بەرۋگە باعىتتالعان.
«بۇگىننەن باستاپ iKOMEK109 ءبىرىڭعاي بايلانىس ورتالىعى نۇر-سۇلتان قالاسىنىڭ تۇرعىندارىنا ناركولوگيالىق كومەك ماسەلەلەرى بويىنشا تاۋلىك بويى 109 قىسقا ءنومىرى ارقىلى كونسۋلتاتسيا بەرەدى. ءموبيلدى جانە قالالىق تەلەفونداردان حابارلاسۋ تەگىن.
ناركولوگيالىق تاۋەلدىلىككە قاتىستى بارلىق قوڭىراۋلار مەن وتىنىشتەر جاسىرىن رەجيمدە وڭدەلەتىنىن ايتا كەتكەن ءجون.
ناشاقورلىق، ماسكۇنەمدىك، قۇمار ويىندارعا تاۋەلدىلىك – بۇل تەك ءبىر عانا ەمدەلۋشىنىڭ باسىنداعى ماسەلە ەمەس، ول بۇكىل وتباسىنىڭ پروبلەماسى. سەبەبى تاۋەلدىلىكتەن زارداپ شەگەتىندەر وزىنە جانە اينالاداعى بۇكىل جاقىندارىنا قيىندىق كەلتىرەدى.
پسيحواكتيۆتى زاتتارعا تاۋەلدىلىكتەن ارىلۋعا قاتىستى كومەك بويىنشا iKOMEK ءبىرىڭعاي بايلانىس ورتالىعىنا 109 ءنومىرى ارقىلى نەمەسە تومەندەگى جولدارمەن جۇگىنۋگە بولادى:
- اكىمدىكتىڭ رەسمي سايتى astana.gov.kz;
- iKOMEK109 ءموبيلدى قوسىمشاسى (PlayMarket/AppStore);
- Telegram چات-بوتى (t.me/nursultanikomek109_bot);
- Smart Astana ءموبيلدى قوسىمشاسى (PlayMarket/AppStore);
- aitu.city پورتالى.
ءتۇرى: قازاقپارات جاڭالىقتارى
جولدانعان ۋاقىتى: 03:42 - 2021/01/27
