نۇر-سۇلتان. قازاقپارات – پارلامەنت سەناتىنىڭ جالپى وتىرىسىندا «2007 جىلعى 6 ناۋرىزداعى قازاقستان رەسپۋبليكاسىنىڭ ۇكىمەتى مەن گرۋزيا ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.
اتالعان حاتتاما ەكىجاقتى جانە ترانزيتتىك، سونداي-اق ءۇشىنشى ەلگە/ەلدەردەن اۆتوكولىكپەن جۇك تاسىمالداۋعا رۇقسات جۇيەسىن ەنگىزۋدى كوزدەيدى.
«قازىرگى كەزدە ەكى ەل اراسىندا ءقاۋىپتى جۇكتەر مەن اۋىر سالماقتى جۇكتەردى قوسپاعاندا، اۆتوكولىكپەن ەكىجاقتى، ءترانزيتتى جانە ءۇشىنشى ەلدەرگە جۇك تاسىمالداۋ رۇقساتسىز نەگىزدە جۇزەگە اسىرىلادى. رۇقساتسىز جۇيە اۆتوموبيل تاسىمالىن ورىنداۋ كەزىندە گرۋزيانىڭ كولىك وپەراتورلارىنا باسىمدىق بەرىپ، ۇلتتىق تاسىمالداۋشىلاردىڭ مۇددەسىن تولىقتاي قورعاۋعا مۇمكىندىك بەرمەيدى. اتاپ ايتقاندا، 2020 جىلى ەكسپورت-يمپورت باعىتىندا تاسىمالدانعان 18 مىڭ 96 توننا جۇكتىڭ 29 پايىزى وتاندىق تاسىمالداۋشىلار ەنشىسىنە كەلسە، 57 پايىزىن گرۋزين كولىك وپەراتورلارى تاسىمالدادى»، - دەدى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.
وسىنداي جاعدايدىڭ باستى سەبەپتەرى:
- گرۋزيادا حالىقارالىق تاسىمالداعى اۆتوكولىك پاركى ارتقان. ەلىمىز پاركى 7 مىڭ 754 بولسا، گرۋزيادا 8 مىڭ 901-گە جەتتى;
- سوڭعى كەزدەرى گرۋزيا اۋماعىندا گرۋزيا-تۇركيا، گرۋزيا-ۋكراينا سياقتى بىرلەسكەن اۆتوتاسىمال كاسىپورىندارى اشىلدى;
- گرۋزيا ەلىنىڭ تەڭىزگە شىعۋعا مۇمكىندىگى بار.
«سوندىقتان رۇقسات جۇيەسىن ەنگىزۋ ەكى ەل اراسىنداعى اۆتوكولىكپەن جۇك تاسىمال نارىعىندا تەپە-تەڭدىكتى ورناتۋعا مۇمكىندىك بەرەدى. ەكىنشىدەن، وتاندىق كولىك وپەراتورلارىنىڭ تاسىمالداعى ۇلەسىن ارتتىرۋعا ىقپال ەتەدى. ۇشىنشىدەن، وتاندىق تاسىمالداۋشىلار تاسيتىن جۇك كولەمى ۇلعايىپ، ولاردىڭ تابىسى ارتادى. اتالعان حاتتامانى راتيفيكاتسيالاۋ بيۋدجەت قاراجاتىن جۇمساۋدى قاجەت ەتپەيدى»، - دەدى مينيستر.
ءتۇرى: قازاقپارات جاڭالىقتارى
جولدانعان ۋاقىتى: 10:51 - 2021/01/21
