نۇر-سۇلتان. قازاقپارات – ەۋروپالىق فۋتبول قاۋىمداستىقتارى وداعى (ۋەفا) ناۋرىز ايىندا ەۋروپا چەمپيوناتىن وتكىزۋ فورماتىن ايقىندايدى، دەپ حابارلايدى SPORTINFORM تاسس اگەنتتىگىنە سىلتەمە جاساپ.
قازىرگى ۋاقىتتا كوروناۆيرۋس پاندەمياسىنا بايلانىستى ءبىرقاتار ەۋروپا ەلدەرىندە ستاديونداعى كورەرمەندەر سانىنا شەكتەۋ قويىلعان.
«بىزدە ۋەفا-نىڭ ەۋروچەمپيوناتتى وتكىزۋىنىڭ ءۇش جاھاندىق ستسەناريى قاراستىرىلادى دەگەن رەسمي ۇستانىم بار، ءبىز وعان دايىندالىپ جاتىرمىز. ستسەناريلەر انىق بەلگىلى، دەيدى ەۋرو-2020 رەسەيلىك ۇيىمداستىرۋ كوميتەتىنىڭ باس ديرەكتورى الەكسەي سوروكين.
كورەرمەندەردىڭ بولماۋىنان ءتۋرنيردى تولىق فورماتتا وتكىزۋگە دەيىنگى دياپازون قاراستىرىلعان. ۋەفا پاندەمياعا قاتىستى وڭ وزگەرىستەر بولادى دەپ ۇمىتتەنىپ وتىر، ويتكەنى باستاپقىدا-اق ءتۋرنيردىڭ قالىپتى فورماتتا وتكىزۋ نۇسقاسى قاراستىرىلعان. بۇعان دەيىن بىرنەشە باق تۋرنيرگە قاتىساتىن قالالار سانىن ءبىر قالاعا دەيىن قىسقارتۋ مۇمكىندىگى تۋرالى حابارلاعان بولاتىن.
ء
«بىز ۋەفا-نىڭ بارلىق 12 قالادا دايىندىق ءجۇرىپ جاتقانى تۋرالى رەسمي ۇستانىمىنا سۇيەنەمىز. بۇل تۇجىرىمدامادا ەشقانداي وزگەرىس جوق»، - دەپ جاۋاپ بەردى اگەنتتىككە سۇحبات بەرۋشى «كەلەسى جازدا ەۋروپا چەمپيوناتىنىڭ ماتچتارى وتەتىن قالالار سانى قىسقارۋى مۇمكىن بە؟» دەگەن سۇراققا.
ەۋروپا چەمپيوناتىن وتكىزۋ باستاپقىدا ەۋروپانىڭ 12 قالاسىندا جوسپارلانعان ەدى: سانكت-پەتەربۋرگ، لوندون، ميۋنحەن، باكۋ، ريم، بۋحارەست، دۋبلين، كوپەنگاگەن، بيلباو، گلازگو، بۋداپەشت جانە امستەردام. سانكت-پەتەربۋرگتە توپتىق كەزەڭنىڭ ءۇش ماتچى جانە شيرەك فينالدىڭ ءبىرى ءوتۋى ءتيىس.
ەۋروپا چەمپيوناتى 2020 جىلدىڭ 12 ماۋسىمى مەن 12 شىلدەسى ارالىعىندا ءوتۋى كەرەك ەدى. كوروناۆيرۋس پاندەمياسىنا بايلانىستى ۋەفا ءتۋرنيردى كەلەسى جىلدىڭ جازىنا اۋىستىرۋ تۋرالى شەشىم قابىلدادى. جارىس 2021 جىلدىڭ 11 ماۋسىمى مەن 11 شىلدەسى كۇندەرى وتەدى.
ءتۇرى: قازاقپارات جاڭالىقتارى
جولدانعان ۋاقىتى: 22:33 - 2020/12/01
