نۇر-سۇلتان. قازاقپارات – ەلوردادا قازاقستان مەن رەسەيگە تانىمال سۋرەتشى كاميل مۋللاشەۆتىڭ جەكە كورمەسى اشىلدى، دەپ حابارلايدى قازاقپارات ءتىلشىسى.
سۋرەتشى كاميل مۋللاشەۆ 1970 جىلدارى تانىلا باستادى. 1978 جىلى ادامنىڭ عارىش كەڭىستىگىنە شىعۋى جانە تىڭ جەرلەردى يگەرۋىن «جەر جانە ۋاقىت. قازاقستان» تريپتيحىندا بەينەلەدى. ترەتياكوۆ گالەرەياسى بۇل جۇمىستى بىردەن ءوز كوللەكتسياسىنا ەنگىزدى.
«بۇل كورمەگە قازاقستاندا وتكىزگەن 50 جىل شىعارماشىلىق ومىرىمدە سالىنعان 130 كارتينا قويىلدى. بۇل مەنىڭ عانا تاريحىم ەمەس، قازاقستاننىڭ دا تاريحى. تۋىندىلاردى قازاقتىڭ رۋحاني قۇندىلىعى دەپ ايتۋعا بولادى. مەن ءوز ءداۋىرىمدى، كەڭەستىك كەزەڭدى جانە ەڭ ماڭىزدى تاريحي ۋاقىت – قازاقستاننىڭ تاۋەلسىزدىك جىلدارىن كورسەتكىم كەلدى. ءوز زامانىمداعى ءومىر ءمانىن كورسەتكىم كەلدى. تاريحي كەيىپكەرلەر مەن قوعام قايراتكەرلەرىن سالدىم. مەنىڭ تۋىندىلارىمنىڭ باستى تاقىرىبى وسى. سوندىقتان دا، حالىق مەنىڭ شىعارمالارىمدى جىلى قابىلداپ، تۇسىنە الدى. اسىرەسە، «نازىكتىك اۋراسى» اتتى تۋىندىمنىڭ كوشىرمەلەرى كوپ ۇيدە ساقتاۋلى. مەن ءالى دە جۇمىس ىستەيمىن، ويعا العان جوسپارلارىم بار. ودان بولەك، جاستارعا ساباق بەرىپ ءجۇرمىن»، - دەدى سۋرەتشى كورمەنىڭ اشىلۋ سالتاناتىندا.
كورمەنىڭ اشىلۋىنا قوعام قايراتكەرلەرى، تاتار، باشقۇرت بىرلەستىكتەرىنىڭ وكىلدەرى جانە ستۋدەنتتەر كەلدى. قر مادەنيەت جانە سپورت ءمينيسترى اقتوتى رايىمقۇلوۆا مەن نۇر-سۇلتان قالاسى اكىمىنىڭ ورىنباسارى باقتيار ماكەننىڭ قۇتتىقتاۋ حاتتارى وقىلدى.
كاميل مۋللاشەۆ 1944 جىلى قىتاي حالىق رەسپۋبليكاسىنىڭ ءۇرىمشى قالاسىندا دۇنيەگە كەلگەن. 1963 جىلدان بەرى قازاقستانعا قونىس اۋدارعان. 1967 جىلى ن. ۆ. گوگول اتىنداعى الماتى كوركەمسۋرەت ۋچيليششەسىن، 1978 جىلى – سۋريكوۆ اتىنداعى ماسكەۋ مەملەكەتتىك كوركەمسۋرەت ينستيتۋتىن بىتىرگەن. قازىرگى ۋاقىتتا كاميل مۋللاشەۆ – قازاقستان رەسپۋبليكاسىنىڭ ەڭبەك سىڭىرگەن قايراتكەرى جانە تاتارستاننىڭ حالىق سۋرەتشىسى، قازاقستان مەن تاتارستاننىڭ مەملەكەتتىك سىيلىعىنىڭ لاۋرەاتى، رەسەي كوركەمونەر اكادەمياسىنىڭ قۇرمەتتى اكادەميگى، چاو-جاو قالاسىنداعى حان-شان پەداگوگيكالىق ينستيتۋتىنىڭ جانە شان-تاو ۋنيۆەرسيتەتىنىڭ قۇرمەتتى پروفەسسورى، «استانا» حالىقارالىق ۋنيۆەرسيتەتىنىڭ پروفەسسورى.
ءتۇرى: قازاقپارات جاڭالىقتارى
جولدانعان ۋاقىتى: 02:33 - 2019/11/23
