كوكشەتاۋ. قازاقپارات - قر سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكباەۆ «حالىق زاڭگەرى» اكتسياسى شەڭبەرىندە كوكشەتاۋ قالاسى تۇرعىندارىن قابىلدادى، دەپ حابارلايدى قازاقپارات ءتىلشىسى ۆەدومستۆونىڭ اقمولا وبلىسى بويىنشا دەپارتامەنتىنىڭ ءباسپاسوز قىزمەتىنە سىلتەمە جاساپ.
ۆەدومستۆونىڭ مالىمەتىنشە، حالىققا تەگىن زاڭگەرلىك كومەك كورسەتۋ جانە ولاردىڭ قۇقىقتىق ساۋاتتىلىعىن ارتتىرۋ ماقساتىندا كوكشەتاۋ قالاسىندا جالپى رەسپۋبليكالىق «حالىق زاڭگەرى» اكتسياسى ءوتتى.
حالىققا جوعارى بىلىكتى زاڭگەرلىك كومەك كورسەتۋ ءۇشىن ءارتۇرلى سالالاردان 36 كاسىبي زاڭگەر جۇمىلدىرىلدى. ولاردىڭ ىشىندە تانىمال قورعاۋشىلار، نوتاريۋستار، پروكۋرورلار، تەرگەۋشىلەر، سوت ورىنداۋشىلارى، ادىلەت قىزمەتكەرلەرى، مەملەكەتتىك ورگانداردىڭ باسشىلارى بولدى.
اكتسياعا اگەنتتىك ءتوراعاسى اليك شپەكباەۆ جانە اقمولا وبلىسىنىڭ اكىمى ەرمەك مارجىقپاەۆ قاتىسىپ، ءتۇرلى ماسەلەلەر بويىنشا ازاماتتارعا كونسۋلتاتسيالىق كومەك كورسەتتى.
سونىمەن قاتار، وبلىس تۇرعىندارى ەلىمىزدىڭ ەڭ مىقتى قورعاۋشىلارىنىڭ ءبىرى - ايمان وماروۆادان تەگىن كەڭەس الا الدى.
«اتالمىش اكتسيا قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ، Zakon.kz جەلىلىك باسىلىمىنىڭ جانە «پاراگراف» اقپاراتتىق جۇيەسىنىڭ بىرلەسىپ ۇيىمداستىرۋىمەن وتكىزىلدى.
وبلىس تۇرعىندارى اتاۋلى الەۋمەتتىك كومەك تاعايىنداۋ، سوت اكتىلەرىن ورىنداۋ، سالىق اۋدارىمدارى، الەۋمەتتىك قورعاۋ، جەرگە قاتىستى ساۋالدارىن قويدى.
اكتسيا تەك كوكشەتاۋ قالاسىندا عانا ەمەس، وبلىستىڭ بارلىق اۋداندارىندا ءوتىپ، سونىڭ ارقاسىندا شالعاي وڭىرلەردىڭ تۇرعىندارى دا تەگىن بىلىكتى كومەك الدى«، - دەيدى ۆەدومستۆونىڭ ءباسپاسوز قىزمەتىندەگىلەر.
ءتۇرى: قازاقپارات جاڭالىقتارى
جولدانعان ۋاقىتى: 22:03 - 2019/11/22
