نۇر-سۇلتان. قازاقپارات - بۇگىن ەلوردالىق «بارىس» قۇرلىقتىق حوككەي ليگاسىنداعى كەزەكتى كەزدەسۋىندە رەسەيدىڭ «اۆتوموبيليست» (رەسەي) كومانداسىن قابىلدادى، دەپ حابارلايدى قازاقپارات ءتىلشىسى.
«بارىس» سوڭعى جەتى كەزدەسۋدە ءساتسىز ويىن كورسەتتى. جەتى ويىننىڭ التاۋىندا قارسىلاسىنا ەسە جىبەرىپ قويدى. سوندىقتان ەلوردالىق كلۋب بۇگىن جەڭىسكە جەتۋ جولىندا بار كۇشىن سالاتىنى انىق بولاتىن.
دەسە دە ەسەپتى العاش بولىپ رەسەيلىك كلۋب اشتى. ولاردىڭ قاتارىنان 9-مينۋتتا پيتەر حوللاند مەرگەندىك تانىتتى. بۇدان كەيىن قازاقستاندىق حوككەيشىلەر قانشا شابۋىل ۇيىمداستىردى. سوعان قاراماستان تابلوداعى ەسەپ وزگەرگەن جوق.
ەكىنشى كەزەڭدە دە ەلوردالىق حوككەيشىلەر العا ۇمتىلدى. الايدا ءبىرازعا دەيىن قارسىلاستارىن قاپى قالدىرا العان جوق. ال 29-مينۋتتا «بارىس» حوككەيشىسى دميتري شەۆچەنكو تارازى باسىن تەڭەستىردى. ء
ۇشىنشى كەزەڭ باستالعاننان كەيىن «اۆتوموبيليست» تاعى دا العا شىقتى. بۇل جولى نايدجەل دوۋستىڭ قانجىعاسىن مايلاندى. نايدجەل دوۋس بىلتىر ەلوردالىق كوماندا نامىسىن قورعاعان بولاتىن. ال 45-مينۋتتا «بارىس» ساپىنا جاقىندا عانا قوسىلعان لينۋس ۆيددەل تارازى باسىن تەڭەستىردى. بۇدان كەيىن قوس كوماندا ويىنشىلارى اشىق شابۋىلعا شىقتى. ويىننىڭ نەگىزگى كەزەڭى 2:2 ەسەبىمەن تەڭ اياقتالدى. ويىن وۆەرتايمعا ۇلاستى. وۆەرتايمدا داررەن ديتس سوققان گول «بارىسقا» جەڭىس سىيلادى.
بۇگىنگى ويىننان كەيىن ەلوردالىق كلۋب جالپى تۋرنير كەستەسىندە جەتىنشى ورىنعا كوتەرىلدى. ال شىعىس كونفەرەنتسياسىندا ءتورتىنشى، چەرنىشەۆ ديۆيزيونىندا ءۇشىنشى ورىنعا جايعاستى.
«بارىس» ەندى ەكى ويىنىن ەلوردادا وتكىزەدى. الدىمەن 22 قاراشادا رەسەيدىڭ «اك بارس» (قازان)، ودان كەيىن «امۋر» (حاباروۆسك) كوماندالارىن قابىلدايدى.
ءتۇرى: قازاقپارات جاڭالىقتارى
جولدانعان ۋاقىتى: 22:06 - 2019/11/19
