الماتى. قازاقپارات – الماتىدا تاۋدا جوعالعان تۋريست اسەل پانارعاليەۆانى ىزدەستىرۋ جۇمىستارى تاعى توقتاتىلدى. قازاقپارات بۇل تۋرالى رەسپۋبليكالىق جەدەل-قۇتقارۋ جاساعىنا سىلتەمە جاساپ حابارلايدى.

«بۇگىن، تاڭەرتەڭگى ساعات 8-دەن باستاپ قاراڭعى تۇسكەنگە دەيىن تاۋدا ىزدەستىرۋ-قۇتقارۋ جۇمىستارى جۇرگىزىلدى. وكىنىشكە قاراي، ولار ناتيجە بەرمەدى. ىزدەستىرۋ توقتاتىلدى»، - دەپ ءمالىم ەتتى قر ىشكى ىستەر مينيسترلىگى توتەنشە جاعدايلار كوميتەتى رەسپۋبليكالىق جەدەل-قۇتقارۋ جاساعىنىڭ ءباسپاسوز قىزمەتىنەن.

ۆەدومستۆو اقپاراتىنا سايكەس، تاۋدا ىزدەستىرۋ-قۇتقارۋ جۇمىستارى جۇرگىزىلەتىن ۋاقىت 3 كۇندى قۇرايدى. ودان ءارى، ەگەر قوسىمشا ءمان-جاعدايلار انىقتالىپ جاتسا جانە تۋىستار تاراپىنان ءوتىنىش تۇسسە، قۇتقارۋشىلار جۇمىستاردى قايتا جانداندىرا الادى.

ەسكە سالايىق، بويجەتكەننىڭ جوعالعانى تۋرالى 10 قاراشا كۇنى بەلگىلى بولدى. ول تاۋ تۋريزمىمەن اينالىسىپ جۇرگەن. 9 قاراشا ساعات 13:00 شاماسىندا ول ۇلكەن الماتى (جوسالى) كولىندە تۇسكەن فوتوسىن الەۋمەتتىك جەلىگە جاريالاعان. ودان كەيىن بايلانىسقا شىقپاعان.

بۇعان دەيىن جۇرگىزىلگەن ىزدەستىرۋ جۇمىستارى قىزدىڭ تۋىستارىنىڭ ءوتىنىشى بويىنشا توقتاتىلعان بولاتىن. ءبىراق كەيىن ا.پانارعاليەۆانىڭ جاقىندارى ىزدەستىرۋدى جالعاستىرۋدى قايتا سۇرادى.