نۇر-سۇلتان. قازاقپارات - قازاقستاندا ءبىر قىزمەتكەردىڭ ورتاشا ايلىق اتاۋلى جالاقىسى 2019 جىلدىڭ شىلدە ايىندا باعالاۋ بويىنشا 186 221 تەڭگەنى قۇرادى، دەپ حابارلايدى قازاقپارات قر ۇلتتىق ەكونوميكا مينيسترلىگىنىڭ ستاتيستيكا كوميتەتىنە سىلتەمە جاساپ.

الدىن الا مالىمەت بويىنشا، حالىقتىڭ جان باسىنا شاققانداعى ورتاشا اقشالاي تابىسىنىڭ كولەمى 2019 جىلدىڭ ماۋسىم ايىندا باعالاۋ بويىنشا 99،003 تەڭگەنى قۇرادى. ناقتى ايتقاندا، حالىقتىڭ كىرىسى 2018 جىلدىڭ ماۋسىم ايىمەن سالىستىرعاندا 9،4%، ناقتى كورسەتكىشتە 3،8% ءوستى.

حالىقتىڭ اتاۋلى اقشالاي تابىسىنىڭ قۇرىلىمىندا جالدامالى جۇمىسپەن قامتۋدان تۇسكەن تابىس 71،1%، الەۋمەتتىك اۋدارىمدار تۇرىندەگى تابىس 17%، جەكە كاسىپكەرلىك قىزمەتتەن تۇسكەن كىرىستەر 11،1% جانە باسقا اقشالاي كىرىستەر 0،8% قۇرادى.

اۆتور: اسحات احمەتبەكوۆ