كوكشەتاۋ. قازاقپارات - تاجىك-اۋعان شەكاراسىنداعى تمد-نىڭ سىرتقى شەكاراسىن كۇشەيتۋ ماقساتىندا جەكە قۇرامداعى اتقىشتار باتالونىنىڭ قۇرىلعانىنا 26 جىل تولۋىنا ۇيىمداستىرىلعان حالىقارالىق اۆتوشەرۋگە قاتىسۋشىلار كوكشەتاۋدا بولدى، دەپ حابارلايدى قازاقپارات ءتىلشىسى.
تاۋەلسىزدىك الاڭىندا وتكەن سالتاناتتى شارا اقمولا وبلىستىق پوليتسيا دەپارتامەنتى بولىمشەسىنىڭ، كوكشەتاۋ تەحنيكالىق ينستيتۋتى جانە №5510 اسكەر ءبولىمنىڭ ساربازدارى مەن كۋرسانتتارىنىڭ ساپ تۇزەۋىمەن باستالدى.
شارادا كوكشەتاۋ قالاسى اكىمىنىڭ ورىنباسارى التىناي امىرەنوۆا، «تاجىك-اۋعان شەكاراسىنداعى اسكەري قاقتىعىستارعا قاتىسۋشىلاردىڭ» رەسپۋبليكالىق قوعامدىق بىرلەستىگىنىڭ ءتوراعاسى مۇرات مۇحامەدجانوۆ، «سانگي-كابۋد» تاجىك ۇلتتىق-مادەني ورتالىعىنىڭ ءتوراعاسى ۋمار شونازاروۆ، «اۋعان سوعىسى ارداگەرلەرى مەن مۇگەدەكتەرىنىڭ قاۋىمداستىعى» قوعامدىق ۇيىمىنىڭ ءتوراعاسى دۋانباي ىبىراي جانە تاجىكستان اۋماعىندا كوز جۇمعان قازاقستاندىق جاۋىنگەردىڭ اناسى جانات بەكەباەۆا ءسوز الىپ، تاريحي داتا تۋرالى ايتىپ بەردى.
«تاجىك-اۋعان شەكاراسىندا جانقيارلىقپەن ەرلىك كورسەتكەن باتىرلاردىڭ قۇرمەتىنە تۇڭعىش رەت حالىقارالىق اۆتوشەرۋ ۇيىمداستىرىپ وتىرمىز. شارانىڭ ماقساتى – وسكەلەڭ ورەندەرگە باتىرلاردىڭ ەرلىگىن ناسيحاتتاۋ. ءبىزدىڭ جاۋىنگەرلەر ەرلىكپەن شايقاستى. اۆتوشەرۋىمىز كوكشەتاۋ قالاسىنان باستاۋ الدى. الدا نۇر-سۇلتانعا جانە ودان ءارى اتتانامىز»، - دەيدى مۇرات مۇحامەدجانوۆ.
ال، «اۋعان سوعىسى ارداگەرلەرى مەن مۇگەدەكتەرىنىڭ قاۋىمداستىعى» قوعامدىق ۇيىمىنىڭ ءتوراعاسى دۋانباي ىبىراي تاجىك-اۋعان شەكاراسىندا اسكەري بورىشىن وتەگەن جاۋىنگەرلەردىڭ ءاربىر ىزگى ىستەرى ۇرپاققا ۇلگى ەكەنىن اتاپ ءوتتى. ولاردان ونەگە الىپ، بولاشاقتا ەلىن، جەرىن، وتانىن قورعايتىن جاستاردى تاربيەلەۋ ماسەلەسىنە نازار اۋداردى.
بۇدان ءارى كوكشەتاۋعا ايالداعان حالىقارالىق اۆتوشەرۋگە قاتىسۋشىلار نۇر-سۇلتان قالاسىنا اتتاندى.
ايتا كەتۋ كەرەك، حالىقارالىق كەلىسىمدەرگە سايكەس، وسىدان تۋرا 26 جىل بۇرىن قازاقستاندىق جاۋىنگەرلەر تاجىك-اۋعان شەكاراسىنا اسكەري مىندەتىن وتەۋگە باردى. تاجىك-اۋعان شەكاراسىنداعى پشيحاۆر شاتقالىندا بولعان ۇرىس ءالى ۇمىتىلا قويعان جوق. سول 1995 جىلى بولعان قاندى وقيعادا 17 قازاقستاندىق جاۋىنگەر شەيىت بولىپ، 30-دان استامى اۋىر جارالانعان ەدى.
ءتۇرى: قازاقپارات جاڭالىقتارى
جولدانعان ۋاقىتى: 21:48 - 2019/08/13
