نۇر-سۇلتان. قازاقپارات - قر يندۋستريا جانە ينفراقۇرىلىمدىق دامۋ مينيسترلىگى جالعان تەحنيكالىق بايقاۋ ورتالىقتارىمەن كۇرەستى كۇشەيتپەك، دەپ حابارلايدى قازاقپارات ءتىلشىسى.

2019 جىلدىڭ ساۋىرىندە «جول قوزعالىسى تۋرالى» زاڭعا تەحنيكالىق بايقاۋ وپەراتورلارىنىڭ باقىلاۋ-دياگنوستيكالىق جابدىقتارىنان اقپارات بەرەتىن ارنايى باعدارلامالارعا قويىلاتىن تالاپتارعا وزگەرىستەر مەن تولىقتىرۋلار ەنگىزىلگەن بولاتىن.

بۇگىنگى تاڭدا ول تالاپتار جوباسى قر ادىلەت مينيسترلىگىندە مەملەكەتتىك تىركەۋدەن وتۋدە.

اتالمىش تالاپتار ءاۆتوموبيلدى تەحنيكالىق بايقاۋ جەلىسىنە ۇسىنباستان قۇجات جاساۋ فاكتىلەرىن بولدىرماۋعا، سونداي-اق دەرەكتەردى «قولدان» ەنگىزۋدىڭ (فوتوشوپ) جولىن كەسۋگە باعىتتالعان.

«ەلىمىزدە تەحنيكالىق بايقاۋدى جويۋ ماسەلەسى قاراستىرىلمايدى. ويتكەنى مەرزىمدى تەحنيكالىق بايقاۋ الەمدىك تاجىريبەگە ساي. ەڭ باستىسى، بۇل شارا ادام اماندىعىن، قوزعالىس قاۋىپسىزدىگىن قامتاماسىز ەتۋگە جانە قورشاعان ورتاعا كەلەتىن زياندى ازايتۋعا مۇمكىندىك بەرەدى. باسقا ەلدەردە تىركەلگەن كولىكتەرگە تەحنيكالىق بايقاۋ جۇرگىزەتىن تۇلعالاردىڭ قىزمەتىنە كەلەتىن بولساق، يندۋستريا جانە ينفراقۇرىلىمدىق دامۋ مينيسترلىگى تەحنيكالىق بايقاۋدى ۇيىمداستىرۋ جانە وتكىزۋ ءتارتىبىن قاتاڭ قاداعالايتىن بولادى»، - دەلىنگەن مينيسترلىكتىڭ مالىمەتىندە.

دەگەنمەن، تەحنيكالىق بايقاۋ وپەراتورلارىنىڭ تىزىلىمىنە ەنبەسە دە، اتالعان قىزمەتتى كورسەتىپ، تابىس تاۋىپ جۇرگەن تۇلعالاردىڭ ارەكەتىن تەكسەرۋ اتالمىش مينيسترلىكتىڭ قىزمەتىنە كىرمەيدى.