نۇر-سۇلتان. قازاقپارات - قر سىبايلاس جەمقورلىققا قارسى كۇرەس اگەنتتىگىمەن بىرلەسە «يندۋستريا جانە ينفراقۇرىلىمدىق دامۋ مينيسترلىگى - ادالدىق الاڭى» بىرلەسكەن جوباسى ىسكە قوسىلدى، دەپ حابارلايدى قازاقپارات ءتىلشىسى.
جوبانىڭ ميسسياسى - سىبايلاس جەمقورلىقتىڭ الدىن الۋ، ازاماتتاردىڭ قر يندۋستريا جانە ينفراقۇرىلىمدىق دامۋ مينيسترلىگى مەن ونىڭ قاراماعىنداعى ۇيىمدارعا دەگەن سەنىمىن ارتتىرۋ.
«سىبايلاس جەمقورلىققا قارسى ءىس-قيمىل بويىنشا جۇرگىزىلىپ جاتقان جۇمىستار اياسىنداعى كەيبىر ءىس-شارالاردى اتاپ وتكىم كەلەدى. ماسەلەن، كولىك، ونەركاسىپتىك قاۋىپسىزدىك، گەولوگيا جانە جەر قويناۋىن پايدالانۋ، تەحنيكالىق رەتتەۋ جانە مەترولوگيا سالالارىنداعى باقىلاۋ-قاداعالاۋ فۋنكتسيالارى شامامەن 30 پايىزى قىسقارتىلدى. كورسەتىلەتىن مەملەكەتتىك قىزمەتتەردىڭ ساپاسىن ارتتىرۋ بويىنشا ءىس - شارالار جۇرگىزىلدى»،-دەدى قر يدم جاۋاپتى حاتشىسى مەرەكە پىشەمباەۆ.
سونىمەن قاتار ول كولىك ماسەلەلەرى بويىنشا زاڭناماعا وزگەرىستەر ەنگىزىلگەنىن ەسكە سالدى. بۇدان بولەك، سىبايلاس جەمقورلىق كورىنىستەرىنىڭ جولىن كەسۋ ءۇشىن سىبايلاس جەمقورلىققا قارسى ءىس-قيمىل جونىندەگى ۋاكىلەتتى ورگانعا ناقتى ۋاقىت رەجىمىندە كولىكتىك باقىلاۋ بەكەتتەرىندەگى ينسپەكتورلاردىڭ جۇمىسىن باقىلاۋعا مۇمكىندىك بەرىلدى.
سىبايلاس جەمقورلىققا قارسى ءىس-قيمىل جونىندەگى جوبا كەلەسى سالالاردا جۇمىس ىستەيتىن بولادى: يندۋستريالىق دامۋ جانە ونەركاسىپتىك قاۋىپسىزدىك; جەر قويناۋىن پايدالانۋ; اۆتوموبيل جولدارى; ازاماتتىق اۆياتسيا; كولىك; قۇرىلىس جانە تۇرعىن ۇي-كوممۋنالدىق شارۋاشىلىعى; قورعانىس ونەركاسىبى.
كورسەتىلگەن باعىتتار اياسىندا ءبىرقاتار مىندەتتەر قاراستىرىلعان. وسى ورايدا قولدانىستاعى نقا-نى تالداۋ جانە جەتىلدىرۋ، ىشكى جانە سىرتقى بيزنەس-پروتسەستەردى تالداۋ، ولاردى وڭتايلاندىرۋ، ۇيىمداستىرۋ-باسقارۋ قىزمەتىن تالداۋ، سونداي-اق زاماناۋي تسيفرلىق تەحنولوگيالاردى ەنگىزۋ سەكىلدى قادامدار ەسكەرىلگەن.
وز كەزەگىندە قر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ولجاس بەكتەنوۆ «ادالدىق الاڭى» جوباسىنىڭ اۋقىمى كەڭەيىپ كەلە جاتقانىن اتاپ ءوتتى.
«بۇگىن يندۋستريا جانە ينفراقۇرىلىمدىق دامۋ مينيسترلىگىندە «ادالدىق الاڭى» جوبالىق كەسەسىن اشقالى وتىرمىز. بۇل ۇلكەن اۋقىمدى جۇمىس ەلباسىنىڭ تاپسىرماسىمەن جۇرگىزىلىپ جاتىر. بيىل وسى جوبا ەلىمىزدىڭ بارلىق وڭىرلەرىندە ءوز جۇمىسىن باستادى. سونىمەن قاتار، رەسپۋبليكالىق دەڭگەيدە دە ءتيىستى شارالار ىسكە اسىرىلۋدا. بىرنەشە مينيسترلىكتە وسىنداي جوبالىق كەڭسەلەر اشىلعان بولاتىن»، - دەدى اگەنتتىك وكىلى.
جوبالىق كەڭسە جۇمىسىنىڭ باستالۋىنا ۇيىتقى بولاتىن قۇجاتتى بۇگىن مەرەكە پىشەمباەۆ پەن ولجاس بەكتەنوۆ راسىمدەدى.
ءتۇرى: قازاقپارات جاڭالىقتارى
جولدانعان ۋاقىتى: 17:12 - 2019/07/12
