بۇگىن قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي جاڭاوزەن قالاسىندا ءبىرقاتار الەۋمەتتىك، وندىرىستىك نىساندار اشىلدى، - دەپ حابارلايدى Tengrinews.kz ءتىلشىسى ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.

سالتاناتتى شاراعا ماڭعىستاۋ وبلىسىنىڭ اكىمى سەرىكباي ترۇموۆ جانە ءبىر توپ قوعام بەلسەندىلەرى قاتىستى. جيىندا ءسوز العان ايماق باسشىسى تۇرعىنداردى مەرەكەمەن قۇتتىقتادى. مەرەيلى مەيرام قارساڭىندا ءوز جۇمىسىن باستاپ، جاڭادان ىسكە قوسىلعان ءوندىرىس ورنى قانت شىعاراتىن زاۋىتى.

قالانىڭ وندىرىستىك اۋماعىندا ورنالاسقان "ORDA" جشس جىلىنا 3600 توننا قانت شىعارۋدى جوسپارلاپ وتىر. بۇل وبلىستاعى سۇرانىستىڭ 30 پايىزدان استامىن قامتاماسىز ەتۋگە مۇمكىندىك بەرەدى. مۇنان سوڭ وبلىس اكىمى دارىگەرلەرگە ارنالعان مەموريالدى ەسكەرتكىشتىڭ اشىلۋ راسىمىنە قاتىستى. مەديتسينا قىزمەتكەرلەرىنىڭ قاجىرلى ەڭبەگىنە ارنالعان ستەللا دەمەۋشىلەردىڭ ەسەبىنەن تۇرعىزىلعان. ەسكە الۋ قابىرعاسىنىڭ ءبىر بۇرىشى جاز ايىندا كوروناۆيرۋستىق ينفەكتسيادان قايتىس بولعان جاڭاوزەن قالاسى كوپسالالى اۋرۋحاناسىنىڭ باس دارىگەرى مۇرات سەرىەۆتىڭ ەسىمى جازىلعان.

"ارىپتەسىمىز مۇرات جارىلعاپۇلى ەل باسىنا تۇسكەن قيىن كەزەڭدە سوڭعى ۋاقىتقا دەيىن ازاماتتاردىڭ ءومىرى ءۇشىن كۇرەسىپ، ءوز ماماندىعىنا دەگەن ادالدىعىن كورسەتتى. ونىڭ ابىرويلى ەڭبەگى ماڭگى ەل ەسىندە قالادى"، - دەدى سەرىكباي ترۇموۆ.

جيىن سوڭىندا ءوڭىر باسشىسى جاڭاوزەندىك دارگەرلەرگە سۋ جاڭا 10 جەدەل جانە شۇعىل مەديتسينالىق جاردەم اۆتوكولىكتەرىن تابىستادى.

مەرەكە كۇنى ءوز جۇمىسىن باستاعان تاعى ءبىر مەديتسينالىق مەكەمە كوپبەيىندى قالالىق اۋرۋحاناعا قاراستى پوليمەرازدى تىزبەكتى رەاكتسيا (پتر) زەرتحاناسى. نىسان 2 گەكتاردان استام جەردى الىپ جاتىر. ونىڭ ىشىندە: عيمارات - 1 000 شارشى مەتر، قۇرىلىس كولەمى - 7 000 شارشى كولەمدى قۇرايدى. زەرتحانا 14 بولمەدەن تۇرادى.
بۇدان كەيىن وبلىس اكىمى باستاعان جۇمىس توبى كوپسالالى Neiron-Med مەديتسينالىق ورتالىعىن اشىلۋىنا قاتىستى. كۇردەلى جوندەۋدەن وتكەن مەكەمە مەديتسينالىق قۇرال-جابدىقتارمەن جانە جيھازبەن تولىق قامتىلدى. جەر كولەمىنىڭ اۋماعى 1 گەكتارعا جۋىق. عيمارات 2 قاباتتان تۇرادى. 1 قاباتتا 41 بولمە مەن 1 كونفەرەنتس زال، 2 انىقتاما ءبولىمى ورنالاسسا، 2 قاباتتا 46 بولمە بار.

كلينيكادا 120 ادام ەڭبەك ەتەدى. ايماق باسشىسى جۇمىس ساپارى بارىسىندا جاقىندا عانا جوندەۋدەن وتكەن پروۆيزورلىق ستاتسيوناردىڭ جانە "مۇنايشى" مادەنيەت ءۇيىنىڭ جاي-كۇيىمەن تانىستى.

وبلىس اكىمى ساپار سوڭىندا "قازگوز" قۋاتىن ارتتىرۋعا قاجەتتى ەلەكتر ەنەرگياسىن وندىرەتىن كاسىپورىننىڭ ىسكە قوسىلۋ راسىمىنە قاتىستى. قۇنى 5،4 ميلليارد تەڭگە بولاتىن جوبا 50 ادامدى جۇمىسقا ورنالاستىرادى.