بۇگىن ەلوردادا باس ءمۇفتي ناۋرىزباي قاجى تاعانۇلىنىڭ توراعالىعىمەن قازاقستان مۇسىلماندارى ءدىني باسقارماسىنىڭ كەزەكتى اپپارات جينالىسى ءوتتى. كۇن تارتىبىندە جەتى باعىت بويىنشا قاڭتار ايىندا اتقارىلعان جۇمىس ەسەبى تىڭدالدى.

ماجىلىستە جەتى باعىتقا جاۋاپتى قمدب ءبولىم مەڭگەرۋشىلەرى بايانداما جاساپ، ەسەپ بەردى. ءبولىم مەڭگەرۋشىلەرىنىڭ ەسەبىن تىڭداعان باس ءمۇفتي ناۋرىزباي قاجى تاعانۇلى: ء«بىز كۇندەلىكتى ءدىني قىزمەتىمىزدە جەتى باعىتقا باسىمدىق بەرەمىز. سوندىقتان اي سايىنعى جۇمىس ەسەبىنە تىڭعىلىقتى تالداۋ جاسالسىن. جەتى باعىت بويىنشا اتقارىلعان ءىس-شارالار ەسەبى مەنىڭ ءجىتى نازارىمدا بولادى» دەپ اتاپ ءوتتى.

ايتا كەتسەك، جىل باسىندا باس ءمۇفتي ناۋرىزباي قاجى تاعانۇلى ءدىن قىزمەتكەرلەرىنە باعدارلامالىق بايانداماسىن جولداعان بولاتىن. وندا جەتى باعىت بويىنشا جۇمىستارعا باسىمدىق بەرىلەتىنى ايتىلدى. ولار – اقپارات جانە قوعاممەن بايلانىس، ۋاعىز-ناسيحات، قايىرىمدىلىق، وقۋ-اعارتۋ جانە كادرلىق الەۋەت، رۋحاني تاربيە يحسان ءىلىمى، ءدىن مەن ءداستۇر، جات ءدىني اعىمدارمەن جۇمىس.

قاڭتار ايىنىڭ ەسەبىنە سايكەس اقپارات جانە قوعاممەن بايلانىس باعىتى بويىنشا ءدىني باسقارمانىڭ www.muftyat.kz سايتىندا 177 ماتەريال جاريالاندى. اقپارات سالاسىندا «تاۋحيد»، «يمام ماتۋريدي»، «كىتاپ» اپتالىقتارى جاريالانىپ، تاقىرىپقا وراي 3 الەۋمەتتىك روليك، 21 فلەش-باننەر، 3 «سارسەنبىلىك سۇحبات»، ءدىني اقپارات بەرۋ ورتالىعىندا 3 رەت كەزدەسۋ ءوتتى.

قايىرىمدىلىق باعىتى بويىنشا «تايقازان» قايىرىمدىلىق اكتسياسى اياسىندا 12 171 وتباسىعا كومەك بەرىلدى. «ەل ۇلەسى – پاتەرگە» جوباسى بويىنشا باسپاناعا اسا مۇقتاج 8 وتباسىعا پاتەر كىلتى تابىستالدى.

قاڭتار ايىندا 954 رەت ۋاعىز-ناسيحات ايتىلدى. وعان قاتىسقان ادام سانى – 404 490.

جات ءدىني اعىمدارمەن جۇمىس باعىتى بويىنشا 380 رەت جەكە ىقپال ەتۋ ءىس-شارالارى جۇزەگە استى.