ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-11-181794515640 %60 %
2019-11-192440715839 %61 %
2019-11-20386107545 %55 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: انا-ءتىل گازەتى

جولدانعان ۋاقىتى: 20:28 - 2019/11/06


مىنۋار اكىمحانوۆ، حالىقارالىق «الاش» سىيلىعىنىڭ لاۋرەاتى 

شوكتىرە الماس  داڭقىڭدى

اقىن ەدىڭ وي ءورىسى ىرگەلى،
ارمان قۋدىڭ، قادام باستىڭ ىلگەرى.
سىرت تەپپەدىڭ ماڭدايىمنان سيپادىڭ،
جارتى عاسىر مەن جانىڭدى بىلگەلى.

ايتار ويىن جان دۇنيەسىن جۇرت ۇققان،
اقىن ەدىڭ وقىرمانى ءپىر تۇتقان.
الامانعا قوسىلعاندا شىعارماڭ،
تالاي مارتە وزا شاۋىپ جۇلدە ۇتقان.

دەگەن ادام ەمەسپىن عوي بىلەم كوپ،
بەرە المايمىن بار ءىسىڭدى تۇگەندەپ.
قاتارىڭنان وزا شاۋىپ سەن كەتتىڭ،
بيىكتەرگە قانات قاعىپ تىك ورلەپ.

بولماساڭ دا ەلگە بيلىك جۇرگىزگەن،
جان ەمەس ەڭ جۇرەگىنەن جىردى ۇزگەن.
الاڭداما ابىرويعا جەتكىزەر،
كەلەدى ۇلىڭ ءوزىڭ سالعان نۇرلى ىزبەن.

كوڭىل كوزىن ساعان قاراي بۇرسام ءبىر،
اق قاعازعا جازىپسىڭ عوي مىڭ سان جىر.
جاقۇتتايىن جارقىلداعان ويىڭدى،
تۇسىنۋگە بالاڭ كۇشىن جۇمساپ ءجۇر.

سۇيدىڭ جاستان قارا ورمانداي حالقىڭدى،
وعان ارناپ جازعان جىرىڭ بار قۇندى.
العا وزسا دا الاقۇيىن زامانا،
شوكتىرە الماس سەنىڭ تاۋداي داڭقىڭدى.

قول ۇزبەيىن

جۇرگەنىڭ بەلگىلى الىس شاقىرىمدا،
سەنى ىزدەپ كوڭىل شىركىن شارق ۇرۋدا.
ءتۇستى مە اياعىڭا تۇساۋ بالكىم،
كەلمەدىڭ تەلەفونعا شاقىرۋعا،

ەسىمنەن كورگەن جوقسىڭ شىعىپ ءبىر كۇن،
ءقادىرىن ساعىنىشتىڭ شىن ۇقتىردىڭ.
كەۋدەمنىڭ تۇكپىرىنە ورناپ قالدىڭ،
ۇستىنە وسكەندەي ءبىر شىبىق قۇمنىڭ.

بىلەمىن كەتتىڭ ءۇنسىز شالعايعا ۇزاپ،
دەمەدىڭ جولعا قاراپ سارعايدى ۇزاق.
جىر ارناپ، جاريا ەتتىم گازەتتەرگە،
ءبىر ساتكە قيالىمدى قالماي تۇساپ.

جۇرەكتى ساعىنىشتىڭ شىرماعانى،
تاعدىردىڭ شىعار بالكىم شىڭداعانى.
كەشىرگىن، كەش ءتۇسىندىم، امالىم نە،
مەن ءۇشىن جان ەكەنسىڭ شىن باعالى.

وزىڭە جولىعاتىن جول ىزدەيىن،
تاماشا تابىستىرسا سول ءىز كەيىن،
بەينەڭدى كۇندە ەسىمە تۇسىرەتىن،
ايتەۋىر ساعىنىشتان قول ۇزبەيىن.

***
كوپ كورسەم دە قاتال تاعدىر تەپكىسىن،
دەمەدى ەشكىم سەن ىسىلعان ەپتىسىڭ.
وقىرماننىڭ جۇرەگىنە جول تارتسا،
وكىنبەيمىن ولەڭ ورگەن تەكتى ءىسىم.

ولەڭ – ونەر قويعان اۋىر ويدى ارتىپ،
تۇرادى اركەز كوكىرەگىمدە ول تارپىپ.
بىرەۋلەرگە تۇسپەسىن دەپ كولەڭكەم،
جۇرەم ىلعي جاماندىقتان بوي تارتىپ.

***
تەرەكتىڭ باسىن قار بۇركەپ،
مايىسىپ قالدى بۇتاعى.
الا قارعا قاڭعىپ كەپ،
شىقىلىقتادى بۇل تاعى.

ىشقىنىپ بوران سوعادى،
كەزى سيرەك تىنشيتىن.
اياز بەتتى سورادى،
مىنەزى قىزىق شىمشيتىن.

وتتى دەمدە دۇركىرەپ،
قىسقى باقتىڭ كۇلكىسى.
دامىل تاپپاي ءجۇر كۇرەپ،
قالىڭ قاردى ءبىر كىسى.

***
ءبىر دەمدە اشۋ قىسىپ، الابۇرتىپ،
كورمەدىم جاقىنىممەن جاعا جىرتىپ.
قالادان قاشىپ شىقسام ىزعار بۋىپ،
الادى ءوزىم وسكەن دالا جىلىتىپ.

جۇرگەن جوق، دوس-جارانعا سىيىم كەتىپ،
ءسوز ايتتىم ءوز بويىما، سىيىمدى ەتىپ.
تابىسقا تەڭەستىرەم ءبىر تانىسقا،
تۇرسا ەگەر جىر ارقىلى سىرىم جەتىپ.

ەسكە الىپ، وتكەن كۇندى تىزبەكتەسەم،
مەن ساعان تالاس-تارتىس كىل بەتتەسەم.
تىربانىپ قاراپايىم تىرلىك كەشتىم،
بولمادىم مىقتى مانساپ ىزدەپ كوسەم.

تارتسام دا تاپشىلىقتى جان قىسىلا،
مىقتىنىڭ باس ۇرمادىم جارعىسىنا.
ونە بويدى وڭمەڭدەمەي تازا ۇستاپ،
ەشكىمنىڭ قالعان جوقپىن قارعىسىنا.

قاسقىرعا قارسىلىق

(باللادا)

اش بورىدەن شوشىنعان الابۇرتىپ،
ءبىر توپ ەلىك زىمىراپ، بارادى ۇركىپ.
ەنەسىنەن كەيىندەپ قالعان لاق،
بوتالاعان كوز جاسىن الادى ىركىپ.

تاڭعى نۇرعا جاتقاندا دالا كىلكىپ،
جايىلىمنان توپ ەلىك بارادى ۇركىپ.
الگى نازىك لاقتى كورە سالا،
كوتەرىلدى اسپانعا قارا بۇركىت.

قيىن ءساتتى سالعان سوڭ تاعدىر باسقا،
قوس وكپەنى امال جوق تالدىرماسقا.
الاڭدايدى ارتىنا ەلىك-انا،
جاۋ قولىنا لاعىن قالدىرماسقا.

اق قويىن ورىستەتكەن جالعىز ءوزى،
جىگىتتىڭ توپ ەلىكتى شالدى كوزى.
ويى بار، قاسقىردى ۇرماق تۇرا شاپتى،
بولاتىن اتىنىڭ دا ءالدى كەزى.
دانىگىپ، جەگەن تالاي جاس قۇلىندى،
وكشەلەپ جەتتى جىگىت قاسقىرىڭدى.
ۇرماققا ۇمتىلعاندا قۇلاق تۇپتەن،
تۇياعى تۇلپارىنىڭ تاسقا ۇرىندى.

بولسا دا جىگىت اۋلاق جاسىق ەزدەن،
كوڭىلىن كىم جۇباتار جاقسى سوزبەن؟
انەكەي، ات جىعىلدى ءۇزىلدى ءۇمىت،
وكىنىپ جەرگە تامدى جاسى كوزدەن.

جاس لاقتى دەمەڭىز مىقتى شىعار،
قۋاتى جوق قۋعىنعا، ءتىپتى شىدار.
وسى ساتتە قيقۋلاپ ءبىر بۇيىردەن،
قاسقىرعا قارسى شاپتى جىلقىشىلار.

قامشى ۇستاپ اتقا قونعان ءدۇيىم مىقتى،
قاسقىردى قۇلاق تۇپتەن ۇرىپ جىقتى.
جىلقىشى جىگىتتەردىڭ جىگەرلى ءىسى،
بولەدى قۋانىشقا مۇقىم جۇرتتى.

تىنىشتىق بۇزىلماسىن قايتالاپ ءبىر،
دەگەندەي جادىرايدى اي قاباق قىر.
اش بورىدەن قۇتىلعان ەلىك-انا،
لاعىن باۋىرىنا الىپ ايمالاپ تۇر.

كوكتەرەك

ساعىندىم تۋعان اۋىل – كوكتەرەكتى،
وزىمە سودان الدىم كوپ كەرەكتى.
جانىما جاقىن تارتقان ارۋ ءبىراق،
كەۋدەمنەن كەرى يتەرىپ وكپەلەتتى.

سەرۋەندەپ جۇرگەنىمدە قىرمەن كەشكى،
سول ارۋ كوپ جىلدان سوڭ ءبىر كەزدەستى.
ەسەيىپ، ەگدەلىككە بوي ۇرعاندا،
وڭاشا وي بولىستىك سىرمەن دە ەسكى.

شومىلعان اي نۇرىنا قىر سىلەمى،
تىلدەستىك ۇيىپ قالعان تىلسىم ەدى.
كورىسكەن ەسكى تانىس سول ارادا،
اقتاردى تالاي-تالاي سىر سۇبەلى.

كونەنىڭ تەرەك سىرلى بەينە كوزى،
جان سىرىم وسىناۋ ءبىر جەردە مە ءوزى؟
تىنشيمىن سول تەرەكتىڭ ساياسىندا،
بولعاندا تىرشىلىكتەن كەيدە مەزى.

ىزىڭ جاتىر 
نارىنقول كوشەسىندە…
ء(ابىتاي ادەنوۆكە)

جۇرەگى سىرقاتتانسا جىر ەمدەگەن،
جان ەدىڭ، «جاۋعا» نامىس جىبەرمەگەن.
تۇبىندە كوكىرەگىمنىڭ تۇنەپ قالدى،
ءتاتتى ءۇنىڭ، قاتار باسىپ جۇرەم دەگەن.

ونەردى بيىك قويعان كۇن كورىستەن،
دوس ەدىك،تالاي ءتاتتى سىر بولىسكەن.
سىيلاسىپ، سىر الىسىپ، تاتۋ جۇردىك،
ەمەسپىز ءجۇز شايىسىپ، ءبىز كەرىسكەن.

بىرى ەدىڭ ماقتان تۇتار ءور تۇلعانىڭ،
گازەتتە ءوتتى ەڭبەكپەن كوپ جىلدارىڭ،
تويلاۋعا الپىسىڭدى از قالعاندا،
وكىنىش بولدى-اۋ، سەنىڭ كوز جۇمعانىڭ!

و، ءتاڭىر، پەندەلىكتى كەشەسىڭ بە؟
كوز جاس تۇر وكىنىشتىڭ كەسەسىندە.
وي قۋىپ، سايران سالعان نارىنقولدىڭ،
ءابىتاي، ءىزىڭ جاتىر كوشەسىندە.

بولعانسىڭ قۇرداسىم دا، سىرلاسىم دا،
ءجۇرۋشى ەڭ ءازىل ايتىپ كىل قاسىمدا.
جان-جاقتى ءبىلىمىڭدى بىلدىرەتىن،
بار ەدى باتىل ويلار ءبىر باسىڭدا.

كەي-كەيدە سويلەپ كەتسەڭ كوڭىلدەنىپ،
جۇرەتىن اسىل-ارمان سوزىڭدە ەرىپ.
نىق باسىپ وسى كۇنگە جەتسەڭ ەگەر،
سەكسەندى قالار ەدى كوزىڭ كورىپ.

ەسكە الدىم ءوتىپ كەتكەن سول ءبىر كەزدى،
قالامگەر بولدىڭ انىق وتكىر ءسوزدى.
بىلەمىن، ءتىپتى سەنى جاقتىرمايتىن،
جانداردى ويى تاياز سەكپىل كوزدى.

كەمىمەس قانشا جىلدار ءوتسىن باعاڭ،
قايسار ەڭ قايعى ۇرعاندا مورت سىنباعان.
وتىرىپ وڭاشادا ءبىر كەڭسەدە،
شەرتكەنىڭ ەسىمدە ءالى كوپ سىر ماعان.

تىرلىكتەن ەمەس تەگى از تۇيگەنىم،
ءومىرىن تالايلاردىڭ جاس قيدى ءولىم.
جان-جارىڭ، بالا-شاعاڭ، قابىل كورسىن،
بۇل مەنىڭ رۋحىڭا باستى يگەنىم.

***
ەسەيدىم مەن ۋاقىت ءوتىپ سىرعاناپ،
تارلان تارتتىم، مازاسىز وي جۇلمالاپ.
كوپ ادامعا اعا ەكەنمىن، اڭعاردىم.
جىگىت بولعان جان ۇلىما ءبىر قاراپ.

بولماسا كوپ كەۋدەمە ارمان تۇنعانى،
ازداۋ ءالى جازعان جىرىم تۇلعالى.
تالاي جىلدى وتكەرىپپىن الدا ەندى،
بەلگىسىز عوي قانداي سىندار تۇرعانى.

***
ءبىر ساتكە اتىڭدى اتاپ حابارلاسپاي،
كەتتىڭ عوي ءبىزدىڭ جاققا قادام باسپاي.
شىقپايسىڭ تۇندە تۇستەن، كۇندىز ەستەن،
جابىستىڭ ساعىنىش بوپ ماعان جاستاي.

ۇشقان جوق سەزىم گۇلىڭ جەلگە سەنىڭ،
كەتپەدى كوڭىلىمدەگى سەلگە سەنىم.
كەزدەيسوق ۇشىراسساڭ باقىتتى بوپ،
سالماعىن ساعىنىشتىڭ سەزبەس ەدىم.

***
سەرتىڭنەن سول ساتتەگى تايدىڭ با شىن،
بەلگىلى ەندى ماعان قايرىلماسىڭ.
سەنىمىم بىرگە كەتكەن سەكىلدى ءبىر،
سەن دەسەم، قۋانىشتان، قايعىم باسىم!

گۇل ەدىڭ وقشاۋ وسكەن جانىم ءبىر ءتۇپ،
ەلىكتەي ەلسىز شەتكە باردىڭ با ۇركىپ؟
وڭاشا وتىرعاندا سەنى ويلاسام،
كەتەدى مەنىڭ دەمىم جالىن بۇركىپ.

***
ءومىردىڭ كورگەن تالاي قارلى كۇزىن،
تىڭدايمىن، قارتتارىمنان اڭگىمە ۇزىن.
تاڭداعان ءوز جولىممەن ءجۇرىپ كەلەم،
بىرەۋدىڭ كورگەنىم جوق اڭدىپ ءىزىن.

دەمەيمىن، جۇرت بىلمەيتىن جاڭانى اشتىم.
كولدەنەڭ كوپ ويمەنەن جاعالاستىم.
بال كۇنىن بالالىقتىڭ ۇزاتىپ ساپ،
ازامات مىندەتىنە ارالاستىم.

كوپ ويدى جارقىلداعان ىشتەي تەرەم،
كەيبىرىن قول جەتپەيتىن كۇشتەي كورەم،
اسۋىن البىرت شاقتىڭ اسسام-داعى،
توبىنا مىقتىلاردىڭ تۇسپەي كەلەم.

* * *
ساعىنتىپ كەلەر حابارداي،
ىزدەيمىن سەنى جىرىم-دوس.
باقىتتان اجىراپ قالارداي،
قورقامىن وتسە كۇنىم بوس.

جولىقسا دا اۋىر بەينەتتەر،
كەۋدەمدە جاتتىڭ جىر تۇنىپ.
قاپ-قارا شيماي كەي بەتتەر،
داپتەردەن كەتتىڭ جىرتىلىپ.

ىزدە دەپ ناعىز جىرعا ازىق،
شارلاتسا قيال الەمدى.
شابىتتان كەيدە ءبىر جاسىق،
تۋمايدى ويلار ادەمى.

ىڭكار عىپ مەنى ءجۇر تۇسپەي،
ارماننىڭ قۇسى قولعا ءالى،
جارق ەتىپ جانىپ، ءبىر تۇستەي،
بىتپەسەڭ ولەڭ بولعانى.

***
اق ەركەم ارمانىڭا مەن ەگىز ەم،
قالايشا ءۇمىتىمدى سەنەن ۇزەم؟
بەينە ءبىر جوق ىزدەگەن ادامعا ۇقساپ،
قاي كۇنى جولىعار دەپ ەلەگىزەم.

ورانىپ وت سەزىمگە الىپ ۇشقان،
ارىلعان ءبىر كۇنىم جوق ساعىنىشتان.
مەنى ىزدەپ كەلە جاتقان سەن بە ەكەن دەپ،
قارايمىن قارا جولدىڭ شاڭىنا ۇشقان.

ازاماتپىن ەڭسەلى

اسىل انام تۇرمىن ساعان جىر جولداپ،
اق تىلەۋىڭ قۋات بەرىپ، ءجۇر قولداپ.
ماعان قاراي قول كوتەرسە ءبىر مىقتى،
قالار دەيسىڭ سەنەن وزگە كىم قورعاپ؟

بولسا-داعى باۋىر امان، باس ءبۇتىن،
اقتالعان جوق ازىرگە انام اق ءسۇتىڭ،
بۇلت بۇركەپ، قاراۋىتسا كۇن كوزى،
تىلەيسىڭ سەن جان ۇلىنا جاقسى ءتۇن.

كوكسەگەنمەن كۇندە كورىپ تۇرساق دەپ،
بەرمەيدى ءومىر وعان راس مۇرسات كوپ.
تابىسقاندا قۋانامىن، اناشىم،
تاۋ بۇلاعىن تاپقانداي ءبىر سۋساپ كەپ.

وتتىڭ تالاي، اۋىر سىننان، بەلەستەن،
جاداۋ كۇندەر شىقسىن وڭاي نەگە ەستەن؟!
جولىڭا ەندى گۇل ەگۋدى كوكسەپ ءجۇر،
قوس قۇلىنىڭ سەنەن ءوربىپ، تەل وسكەن.

نەگە كەرەك، كوكىرەككە مۇڭ تاڭىپ،
وڭ مەن سولىن ۇلىڭ بۇگىن ءجۇر تانىپ.
ەستي قالساڭ جاقسى اڭگىمە مەن جايلى،
كەتەر بىلەم، جانارىڭنان نۇر تامىپ.

قولىندا بار جاۋعا سىلتەر سەمسەرى
قايراتى مول ازاماتپىن ەڭسەلى،
باقىتتى بوپ جۇرەر ەدىم، جان انا،
قۋانىشىممەن جاسارتا السام مەن سەنى.

اق تۇتەك

بايلىعىن توگىپ اسپان ۇستەمەلەپ،
تاستادى دالانى اپپاق تۇسكە بولەپ.
ءانشى قۇس جىلى جاققا جىلىستاپتى،
كەلەرىن قاتال قىستىڭ بىلسە كەرەك.

جاڭىلىپ اۋەنىنەن جۇرت ۇناتقان،
وزەندەر جۋاسىپتى جۇلقىنا اققان.
مۇرتىنا مۇز بايلانىپ، شالعا ۇقساپتى،
جاس جىگىت كەڭ دالادا جىلقى باققان.

تەرەكتەن بوران قاردى قالعاندا ۇرلەپ،
سىپىردى اق جاۋلىعىن العان بۇركەپ.
تاڭدايىن ءجىبىتىپ تۇر جىلتىر مۇزدىڭ،
ەرتەڭگى كۇن كوزىنەن تامعان نۇر كەپ.

اق تۇتەك سوققانىمەن قانشا وزانداپ،
تىرشىلىك قالماس، ءسىرا، ارقا قوزعاپ.
ايتسە دە، جالقاۋ جاستى وسى ءبىر قىس،
ءتۇرى بار جىبەرەتىن قايتا سومداپ.

***
تاعى دا دالامىزعا كوكتەم كەلدى،
جۇمسارتتى جۇمىر جەردەن وكتەم جەلدى.
كۇلىمدەپ كۇن كوزىنەن تۇسكەن ساۋلە،
قۇلپىرتتى ساي-سالانى، كوك پەن جەردى،

جۇزىنە كارى جەردىڭ نۇر جۇگىرىپ،
توڭ ەرىپ، تاۋ دا، تاس تا تۇر جىلىنىپ.
كوپ وتپەي جاسىل كوكتەم جازعا ۇلاسسا،
كەتەدى شوق بوپ جانىپ، قۇم جىلىنىپ.

بويىنا ىپ-ىستىق ءبىر تىلسىم تاراپ،
ءتۇستى انە، تاۋ توسىنەن مۇز سىرعاناپ.
قوناق بوپ قالىپتى تەك شىڭدا اپپاق قار،
دەگەندەي ادام كوزى تۇرسىن قاراپ.

كۇن جىلى، اۋا دا جوق ىزعارلى اعىن،
سىپىردى تاۋ شىڭدارى مۇز قالپاعىن.
دۇنيەگە كۇلىپ كىرگەن ارۋ كوكتەم،
دالاما شاشۋ ەتتى قىزعالداعىن.

جەر كوكتەپ، ورمان گۇلدەپ، قۇستار كەلىپ،
كوڭىلگە قوناقتادى قۇشتار جەلىك!
نانباساڭ قاراشى ءوزىڭ تاۋعا شىعىپ،
ءورىپ ءجۇر سوناۋ قيا، قۇزداردا ەلىك!

اياڭداپ، تاۋ ساعالاپ، جىلعا قۋساڭ
كورەرسىڭ قاپتاعانىن قىرعا جۋسان.
قاۋىشىپ قالاردايسىڭ جاستىعىڭمەن،
ءجۇزىڭدى اناۋ اپپاق نۇرعا جۋساڭ.
***
اينىماس ادال دوستاي جانىم سەنەر،
ءوزىڭسىڭ جۇرەگىمە جالىن سەبەر.
انامدى كورگەندەي بوپ قۋانامىن،
كوزىمە سەنىڭ توبەڭ شالىنسا ەگەر.

ساعىنباي تۇرمان اۋىلىم، كوزىم جەتكەن،
بال داۋرەن بالالىعىم وزىڭدە وتكەن.
سۇيگەن جار الاقانى دەپ بىلەمىن،
ايقارا قۇشاق جايىپ، جەلىڭدى وپكەن.

باستاعام مەن وزىڭنەن جىردىڭ باسىن،
سەندەگى ەل جۇرەگىمنەن سىر تىڭداسىن.
اۋىلىم وسىپ-ونگەن ورەنىڭنىڭ،
ولەڭگە وزەك ەتەم نۇر تۇلعاسىن!

بوزقاراعان

قاپتالعا قاۋلاپ وسكەن بوزقاراعان،
جان ەدىم، ساعان جاستاي كوز قاداعان.
ەسەيىپ، ەرجەتكەندە جىردان بۇگىن،
كەۋدەمە ءوزىڭ بولدىڭ ءسوز قاداعان.

تىلدە تۇر كەرمەك ءدامىڭ مۇرىن جارعان،
دەسەم مەن، دەمەيدى ەشكىم بۇنىڭ جالعان.
ايماققا اجار بەرىپ جاتقانداي ءبىر،
جالتىلداپ، جاپ-جاسىل بوپ، نۇرىڭ جانعان.

جاس شاقتا قۇربىلارمەن ويىن قۋعان،
ءوزىڭسىڭ بۇعىنباققا تويىندىرعان،
جارقىلداپ قاق ورتاڭدا جۇرگەن شاقتا،
بولدى راس، تىكەنەككە، «تونىم قۇربان».

جاس داۋرەن قولىن بىزدەن ۇزگەنى مە؟
جەتىپپىز تالاي جەرگە ءبىز دە، مىنە.
بوزقاراعان تۇبىندە تۇسىنىكسىز،
ءبىر كەزدە شارپىلعان ەم قىز دەمىنە.

تىم-تىرىس جاتقان جاسىل بوزقاراعان،
تالاي سىر تابار سەنەن كوز قاراعان،
دۋمانىم باسىلماسىن دەسەڭ ەگەر،
قوينىڭدى اش، قولىڭدى ۇزبە، بوزبالادان.

جول اشقان ماحابباتقا بوز دالادان،
سەنىمدى سەرىگىم ەڭ بوزقاراعان.
ورتاڭا بارا قالسا بالعىن جاستار،
سىرلاسسىن، سىرت قاراما، ءسوز بەر وعان!

بوزدالا، بوزقاراعان، بوزقىراۋلى،
ءبىر ساتكە سەنى كورىپ كوز قۋاندى.
جاسىرمان جاسىل اعاش وزىڭە ارناپ،
يگەرگەن سەكىلدىمىن ءسوز قۇراۋدى.

وسىناۋ بوز دالانى جارىپ تاقىر،
جاتىرسىڭ جان-جاعىڭا جايىپ تامىر.
بار دەسەم كوز تارتاتىن كورىك سەندە،
بۇيىرماس الدەكىمدەر ايىپقا ءبىر.

بۇلاق سۋىن كەشتىم دە

قىردا تۋىپ، تاۋ ساعالاپ ءوستىم دە،
بۇلاق سۋىن جالاڭ اياق كەشتىم دە.
جاپونداردىڭ داياشىسى سەكىلدى،
قول قۋسىرىپ، يلىككەم جوق ەشكىمگە.

سودان بولار، جاقپاي ءجۇرمىن كوپ ەلگە،
ەندى قۇرىق سالعان جانعا كونەم بە؟!
العان بەتتەن قايتپاسىما سەنەمىن،
الماس قىلىش ويناپ تۇرسىن توبەمدە.

***
كەز بولعالى ونەرلى ويعا كيەلى،
قاراۋ ىستەن قاشىپ ءجۇرمىن كۇيەلى.
دوس ادامعا ايتسام ارتىق ءسوز كەيدە،
كوڭىلىم جاسىپ، جانىم وتقا كۇيەدى.

تىلدەسكەلى ارلى اداممەن سۇيكىمدى،
كوكىرەگىمە ساۋلەلى ءبىر سىر تۇندى.
جۇعىمى جوق، جانعا كەيدە كەزدەسسەم،
ارقام مۇزداپ، بەرىپ تۇرام سىرتىمدى.

وي ۇشقىندارى

قالعان جوق كەۋدەمدەگى ءبىتىپ ارمان،
(سەكىلدى سەلدىرى جوق بىتىك ورمان).
كەي كەزدە اسىعامىن الىستارعا،
تۇرعانداي مەنى بىرەۋ كۇتىپ الدان.

سۇيەنگەن ديقانشىداي كەتپەنىنە،
قارايمىن الىسقا ۇزاپ كەتكەنىمە.
بۇل كۇنى از ۇيىقتايمىن، ەرتە ويانام،
شىنىمەن مازاسىزدىق جەتكەنى مە؟

اقتارماي قۇپيامدى بۋىپ ساقتاپ،
جۇرگەم جوق الدەكىمدى سۇيىق ماقتاپ،
ەرتە-كەش الدى-ارتىما كوز جىبەرىپ،
تارتامىن ءومىر سىرىن سۋىرتپاقتاپ.

كەيبىرەۋ كوزىمدى الداپ، كۇلسىن جالعان،
جانىمدى ەمەس قايعى بۇلتى شالعان.
ەلەمەي قيىندىقتى كوكىرەگىمە،
سەنەمىن ارمانىما بۇرشىك جارعان.

***
الدىمدا كۇلىپ اتار تاڭ تۇرعانمەن،
كورمەدىم كوپ جەڭىلدىك تاعدىردان مەن.
ونەردىڭ ورىنە ءالى شىققانىم جوق،
جۇرەكتەن قانشاما سىر ايتىلعانمەن.

كوپ ويىم جۇتىلسا دا ەسىل كۇنگە،
ومىردەن تۇڭىلەيىن نەسىن مۇلدە.
ادامدار قاباق تۇيسە، جابىرقايمىن،
اپىرىم-اي، تيگىزدىم دەپ كەسىر كىمگە!؟

جۇرگەم جوق، جۇرەگىمدى وراپ مۇڭعا،
كەلمەيدى قايعىنى استە جولاتقىم دا.
جىرىما سۋسىندار ەل ازداۋ بىلەم،
شىنىمەن سىر ايتۋعا ولاقپىن با؟

***
قيالىما قىم-قۋىت وي تاستاۋمەن،
وقتاي زۋلاپ ءوتىپ كەتتى جاس داۋرەن.
الار كەزدە الا المادىم بايگەنى،
ءوزىمدى-وزىم كەيىن تارتىپ جاسقاۋمەن.

اسۋىنان اسقان جوقپىن كوپ ءوردىڭ،
ەسىگىن دە كەشتەۋ قاقتىم ونەردىڭ.
جاقسى ولەڭدەر جازباعان كۇن قينالام،
تالعامىنا تاتىر مىناۋ ءور ەلدىڭ.

جىر تالابى كەتتى مۇلدە قيىنداپ،
ارمان، مەنى زۋلا ءزاۋلىم قيىرعا اپ.
كونە اۋەندى قايتالاماي، جاڭاشا،
كوكىرەگىمنەن قۇيىل، كوركەم كۇي-ىرعاق.


كەلۋ قاينارى: http://www.elarna.net/koru.php?tur=9&id=1068744

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەل-ارنا ءوز گازەتى

ەڭ جاڭا ماقالالار


中国哈萨克语广播网 7 مينوت
ءۇش قالادا اۋا ساپاسى ن 13 مينوت
شىمكەنت اۋرۋحاناسىنىڭ ب 22 مينوت
وسى ارانى باسىپ كورىڭىز 27 مينوت
20 قاراشا. قازاقپارات ك 1 ساعات
中国哈萨克语广播网 1 ساعات
ەلوردادا ءبىرىنشى اۋىسى 1 ساعات
中国哈萨克语广播网 1 ساعات
قازگيدرومەت: قاراشانىڭ 2 ساعات
Mario says he will resp 2 ساعات
中国哈萨克语广播网 2 ساعات
«Nur Otan» بالالاردىڭ ق 2 ساعات
«مانچەستەر يۋنايتەدتىڭ» 2 ساعات
تۇركىستانداعى جالعىز جە 3 ساعات
ورازا جانە ناماز كەستەس 3 ساعات
الماتىدا «Almaty Invest 3 ساعات
قادىر مىرزا ءاليدىڭ ء"و 3 ساعات
جامبىلدا زاڭسىز قىزمەت 4 ساعات
گەندەرلىك ساياسات الدە 4 ساعات
فۋتبولشى بولام دەسەڭ... 4 ساعات
12 Things You Need to K 4 ساعات
ەربول شايمەردەنۇلىنىڭ « 4 ساعات
سەمەيدە تۇراقتاندىرۋ قو 5 ساعات
جامبىل وبلىسىنىڭ 80 جىل 5 ساعات
Skateboarding is create 5 ساعات
سارىاعاش اۋدانىندا توتە 5 ساعات
中国哈萨克语广播网 6 ساعات
وسى ارانى باسىپ كورىڭىز 6 ساعات
ەسبولات ايدابوسىن | ادە 6 ساعات
中国哈萨克语广播网 6 ساعات