ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-11-181794515640 %60 %
2019-11-192440715839 %61 %
2019-11-20413121045 %55 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: انا-ءتىل گازەتى

جولدانعان ۋاقىتى: 10:07 - 2019/10/24


قۋانىش جيەنباي

ادام-اۋ، اقىل-ەسى ءبۇتىن بە ءوزىنىڭ، الدىمەن ۇي-ىشىمەن اقىلداسىپ الماس پا؟! اكەمنىڭ مىنەزى شاتاقتاۋ ەدى دەسە، انە، شەشەسىنىڭ كوزى ءتىرى عوي، اياعى-اياعىنا جۇقپاي اۋىل-ايماقتى تۇگەل شارلاپ، شاپقىلاپ ءجۇر. سوعان-اق قۇلاققاعىس جاساسىن. ەسقۋات ماعان نەگە ەسكەرتپەدى دەپ قىڭىرايسا نە دەيسىڭ! ونداي جاڭالىقتى، جاڭالىق بولعاندا دا جۇرەگىڭدى سۋىرىپ الاتىنداي جاعداياتتى ىشكە بۇگىپ، ءۇنسىز جۇرەتىن شىدامدىلىق ىرىسبيكەگە قور بولىپ قايدان كەزىكسىن. ول سول ساتىندە شالا ءبۇلىنىپ، قاپەلىمدە توبەسىنە اسپان قۇلاپ كەتكەندەي الاس ۇرار. ەسقۋاتتان باسقا ارقا سۇيەيتىن كىمى بار. تىڭداسا دا، تىڭداماسا دا جەر تەپكىلەپ بار اشۋىن سودان الار.

سولاي ەندى، سولاي… كەنجەسى مەيرام­كۇل­­­ تالشىبىقتاي بۇرالىپ، حور قىزىنداي سىلانىپ-سيپانىپ بويجەتتى، انەكەي! وقىدى-توقىدى. وبلىس ورتالىعىنداعى اجەپتاۋىر مەكەمەنىڭ ورتاڭ قولداي قىزمەتكەرى. تۇرمىس قۇرامىن، ۋاقىت كەلدى دەسە، كىمنىڭ تالاسى بار. «جولىڭ بولسىن، شىراعىم، باقىتتى بولدان» باسقا ەسقۋاتتار نە تاۋىپ ايتا الادى. ودان اسقان تىلەك بولا ما، ءسىرا دا! سوسىنعى شارۋا ەل-جۇرتتى تاڭعالدىرماسا دا، قولداعى ازىن-اۋلاق دۇنيەنى جارقىراتىپ، قۇدا-جەكجاتتى كۇتىپ الىپ، شىعارىپ سالۋ. ماسەلە وسىندا. ەسقۋات توڭىرەكتەگى ءجىبى ءتۇزۋ، وڭدى-سولىن اجىراتا بىلگەننەن بۇرىن ءسوزدىڭ ءمان-ماعىناسىن تۇسىنەتىن، دۇرىسى – بىرەۋلەرگە ايتقانىن ورىنداتا الاتىن ءاتىبىرلى ازاماتتىڭ ءبىرى. سىيلى. اۋىل اراسىنداعى كاكىر-شۇكىر كيكىلجىڭگە ارالاسپايدى، بوي-سويىن تازا ۇستايدى. مىنە، سويتكەن كىسى ءسۇت كەنجەسىن جول-جورالعىسىمەن ۇيىنەن ىرعاپ-جىرعاپ شىعارىپ سالا الماسا – ۇيات، ۇياتتىڭ كوكەسى سوندا بولار!
«كەلەر ايدىڭ باسىندا قۇدالارىڭدى كۇتىپ الىڭدار!» دەپ حابار سالادى قىزى بار بولعىر! بارەكەلدى! شاي-سۋى، سويىس مالى، اراق-شارابى تابىلار عوي. ەسقۋات و جاعىنان قينالمايدى. ارتىنىپ-تارتىنىپ ءجۇز قارالى قۇدا كەلسە دە، ءبارىن-بارشاسىن دىمىن شىعارماي كۇتىپ الۋعا جاعدايى جەتەدى. قولدى بايلايتىنى – بىلايعى جۇرتقا باس اۋىرتاتىنداي كۇردەلى ماسەلە بولماسا دا، وزدەرى ءۇشىن ءالى كۇنگە دەيىن ءتۇيىنى تارقاتىلماي تۇرعان ءبىر گاپ بار. ول – مىنا تۇككە تۇرمايتىن ەلەكتر جارىعىنىڭ اۋرەسى. كەيدە كۇلەسىڭ، كەيدە جۇيكەڭ توزىپ، جىندانىپ تا كەتە جازدايسىڭ. بيلىكتەگىلەر قۇداي سالماسىن، ۇرتتارىن تولتىرىپ ىسىپ-كەۋىپ ۋادە بەرگەندە سۇراماڭىز، «مەن وسى قايدا ءجۇرمىن» دەپ قاراداي-قاراپ تاڭعالاسىڭ. «سەندەر نەمەنە، توقالدان تۋىپ پا ەدىڭدەر، تەزدەتىپ وركەنيەت كوشىنە ىلەسىڭدەر، ينتەرنەت پايدالانىڭدار، بالالارىڭدى اعىلشىنشا وقىتىڭدار!..» ءوي-دويت، «كوممۋنيزم» قول سوزىم جەردەن قول بۇلعاپ تۇرعانداي. باسقاسى-باسقا، ال دۇنيەجۇزىنە اتى ءماشھۇر بايقوڭىر كوسمودرومىنىڭ تۋرا ىرگەسىنە قونىستانعان ەسقۋاتتاردىڭ اۋىلىندا جارىق جوق. بارى بار عوي، ءبىراق پالەن دەۋگە بەتىڭنەن باساسىڭ. كوسمودروم، ودان ارىرەكتە قورقىت كەسەنەسى. جەر شارىنىڭ تۇكپىر-تۇكپىرىنەن اعىلىپ كەلىپ جاتقان تۋريستەردىڭ سانىنا شاشىڭنىڭ تۇگى جەتپەس. ناعىز الەمگە اشىلاتىن التىن قاقپا. كەۋدەڭمەن كوك تىرەپ، ارتىڭ جىرتىلعانشا ايقايلاعىڭ-اق كەلەدى. پەندە عوي، جول-جونەكەي بەيتانىستار كەزىككەندە، اسىرەسە، جۇردەك پويىزدىڭ جۇمساق ۆاگونىندا شايقاتىلىپ كەتىپ بارا جاتقان تۇستا بالكىم، ەسقۋات تا تالاي مارتە بوسكەن بولار. ءبوس، بوسە ءتۇس!
ايتتى نە، ايتپادى نە، وسى كۇنگى تىرلىكتەرىنە قارنى اشادى، جۇرەگى القىنىپ اۋزىنا تىعىلادى. ورتالىقتان شالعاي قونىستانعاندارى ءۇشىن بۇلار كىنالى مە؟ اۋداننىڭ گۇلدەنۋىنە، وركەندەۋىنە شاما-شارقىنشا بۇل اۋىل دا ۇلەس قوسقان. ءالى دە قاتاردان قالعاندارى شامالى. ءبىر شوعىر جاستار بولىمشەنىڭ اتىنان بارىپ، پورتتى قالاعا قاتىناپ، ءارتۇرلى جۇمىستار ىستەيدى. بارىنە بىردەي بيزنەسمەن بولۋ قايدا؟! ءبىرى قۇرىلىسشى، ءبىرى دانەكەرلەۋشى، ءبىرى قىزىل قۇمنان مالشىلارعا قۇدىق قازىپ بەرەدى. كومەك، جانە شەتىنەن تەپسە تەمىر ۇزەتىن مىقتى جىگىتتەر. ەسقۋاتتىڭ باسىندا بۇل دەرەكتەر تاسقا باسىلعانداي، سارتتا-سۇرت سايراپ تۇر. تەك تىڭدايتىن قۇلاق بولسا دەڭىز. مىنە قىزىق، اۋداندى ەلەكتر قۋاتىمەن جابدىقتايتىن مەكەمەدەگىلەر: «سەندەرگە وسى دا جەتپەي مە» دەگەندەي، جارىعى قۇرىعىر بىر-ەكى ساعات جانىپ تۇرادى دا قاس-قارايا، اس-سۋىڭدى اپىل-عۇپىل ءىشىپ بولا بەرگەندە جاۋ تيگەندەي جالپ ەتىپ، وشەدى دە قالادى. سودان كەلەسى كۇنگە دەيىن توڭىرەگىڭ تاس قاراڭعى. تەلەۆيزور مىلقاۋ. ايتىستى دا، تەرمە حابارىن دا كورە المايسىڭ.
حوش، ونىڭ ءجونى كەلەر عوي. وسىندايدا تۇرمىس قۇرامىن دەپ جۇلقىنىپ وتىرعان انا مەيرامكۇلگە نە تاۋىپ ايتادى. وعان ءبارىبىر، قينالاتىن ەسقۋات. قۇداسى اۋىل اراسىنان شىققان بىرەۋلەر بولسا ءسوز بار ما، بولعان جايدى تۇسىنەر ەدى عوي; قۇدالىقتىڭ ىرىم-جىرىمىن كۇن بارىندا جاساپ، كەرنەيلەتىپ-سىرنايلاتىپ، جالعىز كوشەنى باستارىنا كوتەرىپ، كەش باتا ۇيلەرىنە تاراسار ەدى عوي. ىرىسبيكەنىڭ اۋىز لامىنە قاراعاندا، كەلەتىندەر وبلىستى تىرەپ تۇرعان دوكەيلەر. كەزى كەلگەندە بىرنەشە جەڭىل ماشينەمەن بەرى شىقپاقشى. ايەلىندە دە ەس جوق، بار دۇنيە سوعان تىرەلىپ تۇرعانداي، قوناقتاردى شەكارادان كۇتىپ الۋىمىز كەرەك شىعار دەپ بەزەك­ قاعادى. جولىڭ بولعىر-اۋ، و نە ءتايىرى، سول دا جۇمىس پا؟! كەرەك ەكەن، ەسقۋات ولاردى قاراوزەكتىڭ بەرگى قۇلاماسىنان قارسى الار.
ال مىنا جاعدايدى كوزگە ەلەستەتۋدىڭ ءوزى ەرسى… قۇدالىقتىڭ شىرقاۋ شىڭىنا شىعىپ، قۇدا مەن قۇداعي ءتوس ءتۇيىستىرىپ، جاس جۇبايلار قوس اققۋداي ءتىزىلىپ، ەندى ورتاعا شىعا بەرگەندە جارىق جالپ ەتە قالسا… انە، ماسقارا! ويعا-قىرعا شاپقىلاعان ەسىل ەڭبەگىڭ ەش. ەلەرىپ، اققايناردىڭ كوبىگىن كوبىرەك سىلتەگەندەردىڭ نەلەرى ­كەتەر، ەتىنەن ەت كەسىپ العانداي جون ارقاسى دىمدانىپ، ىشپەي-جەمەي قارا تەرگە تۇسەتىن ەسقۋات-تاعى باياعى. ەرتەڭ وسى كەمشىلىك الدان شىقپاس ءۇشىن ەسقۋات نە ىستەۋى ­كەرەك؟ توبەدەن جاي تۇسىرگەندەي الاق-جۇلاق ەتىپ، مەيرامكۇل ءبىزدى ­بەكەرگە قيناماسىن. ۇيلەنۋ دەگەن گرافيكتەن جاڭىلماي، كوسمودرومعا ءدال ساعاتىندا، مينۋتىندا جەتىپ كەلەتىن جۇك تيەگەن ­توۆارنىي ەمەس شىعار. ءبىر اپتا كەيىن شەگەرسە ءومىر وزگەرىپ تۇسپەس. ونىڭ بەر جاعىندا ەسقۋاتتار دا قول قۋسىرىپ قاراپ وتىرا ما. ءبىراز تۇيتكىلدىڭ تىگىسىن جاتقىزار. ەڭ باستىسى، ەلەكتر قۋاتىن ءبىر جونگە كەلتىرگەنى ابزال.
ۇيقى شالا. ۇزاق ساپارعا شىعاتىنداي بۇگىن دە تاۋىق شاقىرعاننان توسەگىنەن تۇرىپ كەتتى. ىرىسبيكەنىڭ «قايدا بارا­سىڭىنا» ءتىل قاتقان جوق. الگى حاباردان كەيىن اقىل-ەستەن ايىرىلعان. ەسقۋاتتىڭ بۇرىندارى ءدال مۇنشالىق ۇمىتشاقتىعى جوق-تى. ال نە ىستەيسىڭ، كەشە كەشكىلىك اۋلانىڭ ارعى بۇرىشىنداعى قامىس سارايدىڭ ەسىگىن قۇلىپتاۋدى ەستەن شىعارىپ العان. اڭقيىپ اشىق جاتىر. جون ارقاسى شىم ەتە قالدى. وندايدا الدىمەن جامانشىلىقتىڭ سارت ەتىپ ويعا ورالاتىن ادەتى عوي. ءقازىر ۇرىنى الىس­تان ىزدەپ اۋرە بولمايسىڭ. زاماننىڭ نيەتى بۇزىلىپ، قوس وكپەنى قىسا تۇسكەنىن وسىدان-اق بىلە بەرىڭىز. ادامدار ءبىرتۇرلى… باياعى ارقا-جارقا كەڭپەيىل كوزقاراستىڭ جۇقاناسى قالماعان. ناعاشى-جيەندىگىن ارقالانىپ، ءازىل-قالجىڭ ايتاتىندار ­سيرەك. كەيىنگىلەردىڭ سالەم-ساۋقاتىن ساتىپ الاسىڭ. قۇلاعىنا قويدىڭ قۇمالاعىنداي بىرنارسەنى قىستىرىپ الادى­ دا، جىن سوققانداي وزىمەن-وزى سويلەسىپ، وزىمەن-وزى ىرجالاقتاپ كۇلىپ، جانىڭنان ىزديىپ وتە شىعادى. ولار ءۇشىن وسى وڭىرگە ءبىر ادامداي ەڭبەك سىڭىرگەن، بولىمشە باسقارعان، بريگادير بولعان، ونەگەلى وتباسى دەگەن دارەجەلى اتاعى بار ەسقۋات تا ءبىر; اۋزىنا ءجۇز گرام تيسە جامباسىنان سىز وتكەنىن ەلەمەي، ارىق-اتىزدىڭ باسىندا كوزى كىرتيىپ، سۇلاپ جاتاتىن ماسكۇنەم دە ءبىر. ال، كانە، نە دەمەكسىڭ؟! قۇندىلىق، قايداعى قۇندىلىق، اعايىن اراسىنداعى سىيلاستىققا سىزات تۇسكەن سوڭ، وزگەسىنە نە جورىق؟! ەسقۋات الدەن اقىرزاماندى ىرگەگە سۇيرەپ اكەلۋدەن اۋلاق. دەگەنمەن، كوزىڭ كورىپ تۇرعان تىرلىكتى مويىنداماسقا شاراڭ قايسى. اياۋشىلىق اتىمەن جويىلعان. ايتپەسە، وسى اۋىلداعى قالت-قۇلت ەتىپ، كۇندەرىن ارەڭ كورىپ وتىرعان امانباي قاريانىڭ بۇزاۋلى سيىرىن ايدىڭ-كۇننىڭ امانىندا بىرەۋلەر قوراسىنان جەتەكتەپ اكەتە مە؟!
قامىس سارايعا قورقاسوقتاپ باس سۇقتى. تويدىڭ جاساۋ-جابدىعى تۇگەلىمەن وسىندا. ءۇش اياقتى «ۋرال» موتوتسيكلىمەن اراق-شاراپتى دا جاشىكتەپ تاسىعان. ءتاتتى-ماتتىسى ەكىباستان. جوق، سۋىق قولدان امان ەكەن ازىرگە. اۋىر كۇرسىنىپ، ارتىنشا راقاتتانا دەم الدى. يىعىن قيقاڭ ەتكىزىپ، ميىعىنان كۇلدى. سويتسە، كىلتى تۇسكىر شيبارقىت كاستومىنىڭ قالتاسىندا ءجۇر سالاقتاپ. ازىن-اۋلاق مالدىڭ اقىرىنا ايىرمەن كوتەرىپ ءشوپ سالدى. ءبىرازى ەرتەڭ سويىلادى. مەيرامكۇلدەن ايايتىن نە بار. ءبارى دۇرىس، اناۋ-مىناۋ كەم-قۇتىقتى جول-جونەكەي جوندەپ الار. ەسقۋاتتىڭ بار شارۋاسىنا «ۋرال» موتوتسيكلى ­جاراپ تۇر. كولىك، كولىك بولعاندا قانداي! وكپەگە ءبىر تەبەسىڭ دە، دىرىلداتىپ اۋدانعا شاپقىلايسىڭ. وتىن-سۋىڭ دا وسىنىڭ موينىندا. بۇگىن دە اۋدانعا بارماقشى بوپ، الدىن-الا جوسپارلاعان. ەرتە تۇرعان سەبەبى سول. ىزدەگەن ادامىڭدى كەڭسەگە كىرەر جەردە ۇستاماساڭ، ودان ارعىسى بەكەرشىلىك. كەڭسەدەگىلەردىكى بىتپەيتىن دە قويمايتىن قاپتاعان جينالىس. ەرتەدەن قارا كەشكە دەيىن تۇگەسىلمەيدى. ولاردىڭ قاشان جۇمىس ىستەيتىندەرى جانە بەلگىسىز.
ەسقۋاتتىكى ءبىر بۇيىمتاي عوي باياعى. ماڭداي تەرىن سىعىپ ەڭبەك ەتكەنى بار، ەل اراسىنداعى بەدەلى بار، قۇدا كەلگەن كۇنى ەلەكتر جارىعى ءتۇن ورتاسىنا دەيىن جارقىراپ تۇرسا… سوعان قينالاتىن نە بار، تۇگە! پۇلىن تولەۋدەن دە قاشپايدى. «ۋرالدىڭ» و جەر، بۇ جەرىن شۇقىلاپ، سارايدان بەرى شىعاردى. كۇن جىلى. قارا كۇزدىڭ سوڭى جاۋىن-شاشىنسىز شۋاقتى بولاتىن ءتۇرى بار. اۋلانىڭ بەرگى بۇرىشىنداعى تال-تەرەكتىڭ سارعىش جاپىراقتارى وكپەك جەلمەن انتەك تەربەلەدى. الا قارعانىڭ قاي بۇتاققا قونىپ وتىرعانىن انىق اڭعارا المادى. قارق-قارق. جەردەن بارماق ­باسىنداي تاس الىپ، ۇشىرىپ جىبەرەيىنشى دەپ وقتالدى دا، كەيىن ىركىلدى. قۇستىڭ ءتىلىن تۇسىنەتىن شاما قايدا. ەسقۋاتقا اق جول تىلەپ تۇرسا، مۇنىكى كورەر-كوزگە قيانات.
– قايدا؟ – ىرىسبيكە اسىعىپ-اپتى­عىپ جۇقا كويلەكشەڭ سىرتقا شىعا ­سالىپتى.
– ايعا! – ەسقۋات تاعى قىڭىرايدى. سوڭعى كەزدەرى ايەلىمەن نەگە ءتىل تابىسا الماي جۇرگەندىگىن جانە تۇسىنبەدى. كاكىر-شۇكىرگە بولا ۇرىسادى دا قالادى. ىرىسبيكە دە وسىنىكى دۇرىس-اۋ دەپ قويا سالمايدى. ءبىراز جەرگە دەيىن تەكەتىرەسەدى. «مەيرامكۇلدى كۇلگە اۋناپ تۋعام جوق، سەن اكەسى بولساڭ، مەن شەشەسىمىن» دەگەندى الىس­تان اڭعارتادى. قۇدا كۇتۋگە قاتىساتىن، ياكي بۇلارعا قولعابىس تيگىزەتىن اعايىن-تۋمانىڭ ءتىزىمى ەڭ كەمى ون مارتە قايتا جازىلىپ، قايتا وشىرىلگەن شىعار. بىرىنە ۇناعانى، بىرىنە ۇنامايدى. «قىزىمىزدىڭ ۇزاتۋ تويى وتكەنشە ايىرىلىسىپ كەتپەسەك». ەسقۋاتتىڭ بۇل كۇدىگىنە دە ىرىسبيكەنىڭ تاق-تۇق جاۋابى دايىن: «مەيلى، توقال الىپ، بولەك شىعامىن دەسەڭ دە جولىڭ اشىق». ودان ءارى اڭگىمە جالعاسپايدى. «شىن ايتىپ تۇرمىسىڭ؟» دەگەندەي ەسقۋات ايەلىنىڭ جۇزىنە ۇرلانا كوز تىگەدى.
– شاي دايىن، ەرتەڭگى ورازاڭدى اشىپ كەتسەڭشى ەڭ بولماسا. – ىرىسبيكە جايلاپ كەلىپ، كۇيەۋىنىڭ ءوڭىرىن قاۋسىرمالادى. مىناداي قامقورسىعان قوڭىر داۋىستى ەسقۋات دۇنيەنى تۇگەل شارلاسا دا كەزىكتىرە الماس. بولار-بولماس سىناتىنداي سىڭاي بايقاتتى. ىرىسبيكەنى دە اياعانى ءجون ءبىر ەسەپتەن. ءقايبىر جەتىسىپ جۇرگەن دەيسىڭ. ابىروي ورتاق ەكەۋىنە. كەيدە ورەكپىپ ارتىقتاۋ كەتەتىندىگىن نەسىنە جاسىرادى. وتاعاسى ايتتى، ءبىتتى، سونىكى ءجون دەپ بەتتى ءبىر سيپامايدى. بۇيرەكتەن سيراق شىعارۋعا شەبەر. وۋ، وعان ءبىر شاڭىراقتى بيلەپ-توستەپ قالعان ەسقۋات كونە قويا ما؟! ازىرگە توقال الۋ ويىندا جوق-تى، ءبىراق كۇش-قۋاتى بويىندا.
– اسىعىسپىن! – موتوتسيكلدىڭ كىلتىن بۇراپ قالعانى سول، دار ەتە ءتۇستى جاراعىر. انشەيىندە ەكى-ۇش مارتە تەپكىلەگەندە وت الماي، ءبىراز اۋرەگە سالۋشى ەدى. ماي جۇرەتىن تەتىكتەردى تازالاعانشا، ىرىسبيكەنىڭ بوتقاسى دا دايىن بولار دەپ، ىشەك-قارنى شۇرقىراعان. قالادا بۇعان داستارقان جايىپ وتىرعان كىم بار.
– نە شارۋا؟ – ىرىسبيكە اشۋلى كىسىشە ەرشىككە دىك ەتىپ، شانشىلا قونجيعان ەسقۋاتتى شالعايدان تارتقىلادى: – بەكەرگە اۋرە بولاسىڭ! – قارا جۇمىس قاجىتقان ءارى ايەل ادامىنا سيرەك بىتەتىن كۇرەكتەي الاقانىمەن كۇيەۋىنىڭ قاقپاقتاي جاۋىرىنىن سيپالادى. وت العان موتوتسيكلدىڭ الدىڭعى دوڭعالاعىن بۇتىنىڭ اراسىنا قىستىرىپ، ەسقۋاتتىڭ كۇرەڭىتكەن جۇزىنە تىكتەلىپ قارادى.
– جولدى بوگەمە! – دەدى ەسقۋات. جەكىرىپ ايتتى. ءبىر جاعىنا قىڭىرايسا، ودان جۋىق ماڭدا جونگە ءتۇسۋى قيىن-دى. گازدى ودان ءارى ۇستەمەلەدى. اۋلانىڭ ءىشى كوك ءتۇتىن.
– ەلگە كۇلكى بولما!
– كۇلكى بولاتىنداي نە ىستەپپىن؟!
– بەكەرگە شارشايسىڭ، ول شارۋا ازىرگە شەشىلمەيدى.
– سەن ونى قايدان بىلەسىڭ؟
– بىلەم.
– بىلگىشىن.
– ونىڭ كىلتى اۋداندا ەمەس، وسىندا. ءبىر كىسىنىڭ ءتىلىن تاپساڭ، قالعانى ويداعىداي شەشىلەدى.
– وي، اۋليەم، كورىپكەلدىگىڭە بەرەكە بەرسىن! – جەل تيمەسىن دەپ كيەتىن كوزاي­نەگىن تۇمسىعىنا قىستىرعان ەسقۋات ايەلىن سول قولىمەن بىلايىراق نۇقىدى دا، ارتقى دوڭعالاقتان ۇشقان قويۋ شاڭداقتى بۇرق ەتكىزىپ، اۋلادان اتىپ شىقتى.

***

وتكەن جولى دا ءوستىپ قۇيىنداتىپ بارعانىمەن، ەش ناتيجەگە قول ىلىكتىرە المادى. اۋدان حالقىن ەلەكتر قۋاتىمەن جابدىقتايتىن اكتسيونەرلىك قوعام ءتوراعاسى ەسقۋاتتىڭ ءوتىنىشىن كوزى باقىرايىپ تىڭداعانىمەن ارتىن ءسوزبۇيداعا ­سالىپ، سيىرقۇيىمشاقتاندىرىپ جىبەردى. ەكى ارالىققا ەكى مارتە قاتىناعان ادام سوزگە شەشەن. ايتار ويىن ابدەن ءپىسىرىپ، ءيىنىن قاندىرعان. ەسقۋات كەڭ كابينەتتە وتىرىپ، جالقى ءسات مۇدىرسە نە دەيسىڭ. اۆتوماتتىڭ وعىنداي سارتىلداتتاي كەلىپ! «الدىڭىزعا ءبىرىنشى كەلۋىم، شىراق. تۇككە تۇرمايتىن-اق شارۋا، ءتىپتى كەزدەسپەگەندە بولار ما ەك. ءسىزدىڭ دە قىزىڭىز بويجەتەر. قۇدا-جەكجات قاشان سىڭىسكەنشە – سىنشى. جانە تانىمايتىن جۇرت. سوندىقتان قۇدا كەلگەن كۇنى ءبىزدىڭ اۋىلدىڭ جارىعىن وشىرمەڭىز! مەن دە بوتەن ەمەسپىن. وسى ءوڭىردىڭ وتىمەن كىرىپ، كۇلىمەن شىققان كوكەڭ، مىنە، الدىڭدا…»
«جارىقتى ءسوندىرۋدىڭ دە ءجون-جوسىعى بار شىعار. سۆەتكە قارىز بولساڭىزدار، مەن ونى قالتامنان تولەيىم بە؟! تۇرعىنداردى ءوستىپ تارتىپكە سالماساق، ءبىزدى ادام قۇرلى سانامايدى». اكىمدىكتە جينالىسىم بار ەدى دەپ، قوزى قارنىن ءۇستولدىڭ قىرىنا تىرەپ، ازەر كوتەرىلگەن ءتوراعا كەتۋگە ىڭعايلاندى. «مىنا كىسىگە دۇرىستاپ جاۋاپ بەرىڭدەر» دەپ حاتشىسىنا مۇقيات تابىستادى. ەسقۋات ىشىنەن ماي شىعاتىندا ءبىر-بىر كومپيۋ­تەردى قۇشاقتاپ، ەكرانعا ۇڭىلگەن ءبىر توپ قىز-كەلىنشەكتىڭ ورتاسىندا قالاي بۇرى­لارىن بىلمەي، ءبىرازعا دەيىن سوستيىپ تۇردى.
– بەرى، بەرى جاقىنداڭىز، – دەدى شاشىن سارعىش تۇسكە بوياعان اقسارى كەلىنشەك. الدە تۇرمىسقا شىقپاعان قىز.
– مەن – كونەبوگەن بولىمشەسىنىڭ بايىرعى تۇرعىنى ەسقۋات ازبەرگەنوۆ! – ساپتاعى سولداتتاي ءاتى-جونىن سارت ەتكىزدى.
– وتىرىڭىز. – كومپيۋتەردىڭ ەكرانى بىرنەشە مارتە ءوشىپ-جاندى. وڭشەڭ سۇلۋ بيكەشتەردى ىرىكتەپ وسىندا جيناعان با، بىرىنەن-بىرى وتەدى. ۇستىندەگى قولپىلداعان كيىمىنەن قىسىلدى ما، الدە شاڭ باسقان بۇزاۋباس باتەڭكەسى كوزگە سۇيەلدەي كورىندى مە، ايتەۋىر ەسقۋاتتىڭ بويىن ءبىرتۇرلى جايسىزدىق بيلەدى.
– ءسىز قارىز ەمەسسىز، – دەدى الگى شىراعىم ەكراننان كوز ايىرماعان كۇيى.
– باسە! – ۇستىنەن اۋىر جۇك تۇسكەندەي ەسقۋاتتىڭ داۋىسى قاتتىراق شىقتى، – ءبىز پەنسيا قولعا تيگەن كۇنى قارىزدان تۇگەل قۇتىلامىز. ءبىزدىڭ اۋىل سوعان ۇيرەنگەن.
– قارىزدان قۇتىلماعاندار دا بار ءالى…
– ولار كىمدەر، ماعان ءتىزىمىن بەرىڭىزشى، بۇگىن بارىپ اكەلەرىن كوزدەرىنە كورسەتەيىن! مەنىڭ قىزىم تۇرمىسقا شىققالى جاتقاندا… – ەسقۋات ماسەلەنىڭ ءتۇيىنىن تاپقانداي، ورنىنان ۇشىپ تۇرەگەلدى.
– كەلەسى كەلگەندە ءتىزىم قولىڭىزدا بولادى. كوردىڭىز عوي، ايدىڭ سوڭى. ەسەپ-قيساپ، مۇرنىمىزدان شانشىلىپ جاتىرمىز.
ەسقۋات شىنىلى ەسىكتىڭ تۇتقاسىنا قول اپارا بەرگەندە، الدەكىمدەردىڭ كۇڭكىلىن قۇلاعى شالىپ قالدى: – سۆەت نەگە كەرەك بۇلارعا. قايتا… وسىنداي مۇمكىندىكتى پايدالانىپ، قازاقتىڭ سانىن كوبەيتپەي مە. باياعىدا سۆەتسىز دە ءومىر ءسۇردى عوي بۇ حالىق. – بىرەۋلەر كۇلدى، بالكىم بىرەۋلەر باستارىن شايقادى. و جاعى ەسقۋاتقا قاجەتسىز ەدى.
موتوتسيكلدىڭ جىلدامدىعىن با­سەڭدەتىپ، جول ۇستىندە ءرولدى دەرەۋ كەرى بۇردى. «ىرىسبيكەنىڭ الگىسى نە ساندىراق! «ونىڭ كىلت وسى اۋىلداعى ءبىر كىسىنىڭ قولىندا». ول كىم، بۇكىل اۋىلعا جارىق بەرگىزبەيتىن ول قايدان شىققان قۇداي؟! – موتوتسيكل تۇمسىعىمەن داربازانى قيراتا جازداپ، اۋلانىڭ سىرتىنا كەلىپ ازەر توقتادى.

***

– تەز ورالدىڭ عوي، – دەدى ىرىسبيكە­ تاۋىق قورا جاقتان ەتەگىنە تورت-بەس جۇمىرتقانى سالىپ العان كۇيى تۇك سەزبەگەندەي، ءسال ەزۋ تارتىپ. ەسقۋاتتىڭ ءوڭى ءورت سوندىرگەندەي. «نەگە جەتىسىپ كۇلەدى مىنا سۇمىراي؟! وسى تۇرعاندا كوكجەلكەدەن قونجيتسام، ارا تۇسەتىن كىم بار؟ الدە مەنى مازاق قىلعىسى كەلە مە؟!» – قوڭىر كوزاينەگىن دالىزدەگى تەمىر كەرەۋەتتىڭ ۇستىنە تاستاي سالىپ، جانىنان ءوتىپ بارا جاتقان ايەلىنىڭ جۋان بىلەگىنەن ۇستاي الدى.
– مەنەن جاسىرعان نە قۇپياڭ بار، كانى، جانىڭنىڭ بارىندا ايت!
– ءوزىڭ عوي…
– نە ء«وزىڭ عوي».
– دۇنيەنى تىرەپ تۇرعانداي كىسىمەن سويلەسپەيسىڭ، ءجۇدا! – كۇيەۋىنىڭ قارۋلى قولىنان ارەڭ بوساندى.
– الدىمەن ايەلدى تىڭداۋ كەرەك، ايەل بىلمەيتىن قۇپيا جەر استىندا. بار پالەنى شىعارىپ جۇرگەن سەنىڭ دوسىڭ.
– كىم؟!
– كىم بولۋشى ەدى. ساڭكىباي.
– ساڭكىباي! – ەسقۋاتتىڭ داۋىسى ودان بەتەر جارىقشاقتانىپ، ىشقىنىپ ەستىلدى. – ول اقساق نە ءبۇلدىرىپ ءجۇر سوندا؟
– قايدان بىلەيىن، وزىنەن سۇرا. – ىرىسبيكە ماڭدايدان جىلجىپ بارا جاتقان اق قيىق ورامالىن تۇزەپ، ەكىنشى قولىمەن كۇيەۋىنىڭ الاۋ-دالاۋ ءوڭىرىن قاۋسىرمالاۋعا شاماسى جەتپەدى: – ەكەۋىڭ الدەنەگە شاتىسىپ، ەلگە مازاق بولماڭدار! سەندەردىكى كەۋدە كەرگەن كوكىرەك انشەيىن. ايتپەسە، ەكەۋىڭ دە كىشكەنتاي ادامسىڭدار. ال بۇگىندە كىشكەنتاي كىسىلەردى ەشكىم تىڭدامايدى.
– نە؟!
– نە ەستىسەڭ سول! – ىرىسبيكە دە ورايى كەلگەن ءسوزدى ىشكە ىركىپ قالعىسى كەلمەدى. جانە الىم-بەرىمسىز ەسقۋاتتىڭ جانىندا نەعىپ تۇرمىن دەگەندەي، شالت بۇرىلدى دا ەتەگىندەگى جۇمىرتقالاردى كۇيەۋىنىڭ كوزاينەگى جاتقان كەرەۋەت ۇستىنە جايلاپ جايعىشتادى.
– ول اقساقتىڭ ساۋ اياعىن سىندىرايىن! – دەپ ەسقۋات دايىن تۇرعان ەرتەڭگى استان دا اۋىز تيمەستەن، قىزۋى باسىلماعان «ۋرالدى» وكپەگە ءبىر تەپتى دە، ەرشىكتىڭ ۇستىنە قاقىرايىپ قايتا قوندى. سانكىبايدىڭ ءۇيى اۋىل سىرتىنداعى ءدوڭنىڭ ۇستىندە. وتكەن جىلى قالاداعى بالالارى ­جابىلىپ، قىزىل كىرپىشتەن كەلىستىرىپ ءۇي سالىپ بەرگەن. كوشىرىپ اكەتۋگە اكەسى كونبەدى. «سۇيەگىم وسىندا قالادى» دەپتى تابانداپ. دۇرىس ونىكى. ەسقۋاتپەن قۇرداس. قۇرداستىعىنان بۇرىن اۋىلداعى ءجىبى ءتۇزۋ ادامنىڭ ءبىرى سول. بولسا دا اۋىلدا جارىق جوق. ەرتەلەتىپ شاي-سۋلارىن ءىشىپ العان سوڭ، تاس توبەگە قاراپ بەكەر جاتا ما. بۇل اۋىلعا قاراڭعىلىقتىڭ ءوزى كەشتەۋ تۇسەدى. زامان تۇسىنىكسىز دەيدى، تۇسىنىكسىز بولسا «شالدار» شەتىنەن قالتالارىنا ۇيالى تەلەفون سالىپ جۇرە مە؟! بىرىمەن-بىرى لەزدە حابارلاسىپ، ەسكى كلۋبتىڭ جانىنا لەزدە جينالا قالادى. وي، شىركىن-اي، سودان ويدان-قىردان تۋىنداعان اڭگىمە تيەگى اعىتىلىپ بەرسىن كەپ! تاقىرىپ سان الۋان. ءارى قۇلاققا دا سونداي جاعىمدى. راس-وتىرىگىنە كوڭىل اۋداراتىن شاما قايدا، تۇپ-تۇگەلىمەن جۇرەككە جىلى تيەدى. جۇلدىز تۋا بىرنارسەنى قيراتىپ تاستاعانداي، «كورىسكەنشە» دەپ تالتاڭداپ ۇيلەرىنە ­تاراسۋشى ەدى عوي. سوڭعى كەزدەرى سول جيىنداردان شەتقاقپاي قالعان جالعىز ەسقۋات قانا، سىڭبىرۋگە شاما جوق.
«ۋرالدىڭ» قايقاڭ ەتىپ، بەلەسكە كوتەرىل­گەندىگىن ورىسكە مال قوسقان اۋىلداس­تاردىڭ ءبارى كوردى. «تەگىن ءجۇرىس بولعاي» دەستى ءبىرازى. نىسانا – ساڭكىبايدىڭ ءۇيى. ساڭكىباي اقساق اياعىن سىلتاۋراتىپ، اۋىل اراسى بولماسا الىسقا شىعا بەرمەيدى. اقساقتىعى سوعىستان تاپقان كەسەل ەمەس. جاستاۋ كەزىندە ناعىز باسبۇزاردىڭ ءوزى بولعان. ءبىر توبەلەستىڭ ۇستىندە ودان مىقتىلار تاپ كەلەدى دە، پويىزدىڭ تامبۋرىنان لاقتىرىپ جىبەرەدى. كۇن سۋىتا باستاسا جۋان ساننان كەسىلگەن اياق سىزداپ اۋىرادى. گيپستى اندا-ساندا كيەدى.
جىلدام جۇرىستەن ەسقۋاتتىڭ كوزى جاساۋرادى. «سەن ناعىز يت ەكەنسىڭ، ساڭكىباي! مەنىڭ ءبىر قولدى ەكى ەتە الماي، سۇرنىگىپ جۇرگەنىمدى كوردىڭ عوي. ەڭ اقىرى: «قىزىڭدى ۇزاتقالى جاتىر ەكەنسىڭ، وڭ بولسىن!» دا دەگەن جوقسىڭ! ايتپاساڭ ايتپا! ءبىراق كەسىرىڭدى تيگىزبە، قۇدايدىڭ جارىعىن بەرگىزبەي جۇرگەن دە سەن كورىنەسىڭ! بىلەم، قاعاز جازعاندا كىسى جاڭىلدىراسىڭ. ول بەلسەندىلىگىڭدى ءبىز شارۋانى ءبىر جايلى قىلعان سوڭ جالعاستىرارسىڭ! ال ايتپەسە، ساۋ اياعىڭدى سىندىرامىن!»
ساڭكىباي شويناڭداپ كەلىپ، ەسقۋاتتى ەسىك الدىنان كۇتىپ الدى. قۇرداسى­نىڭ قاتۋلى قاباعىنان تالاي سىردى اڭعارعانداي. اماندىق-ساۋلىق سۇراسپاق تۇگىلى، ۇسىنعان قولىن قىسۋدى دا ارتىق سانادى. مۇندايدا كىسى ءبىر-بىرىن شايعا شاقىرا ما، شايعا شاقىرعانىمەن ارتىنىڭ قايىرىمى بولا ما؟! ەستيار كىسىلەر تۇسىنبەستىك سالدارىنان بىرىمەن-بىرى كەرىلدەسىپ جاتسا، ۇيگە كىرىپ-شىعىپ جۇرگەن كەلىندەردەن ءولىم-اۋ!.. سوندىقتان ساڭكىباي قۇرداسىن قاقپايلاپ، جابىق قورانىڭ ارعى تۇكپىرىنە قاراي سۇيرەلەدى. كوكتەي جينالعان جۋساننىڭ ءيىسى ­تاناۋ قىتىقتايدى. قامىس قورانىڭ ءىشى مۇنتازداي. ساڭكىباي اقساڭداپ جۇرگەنىمەن قولعا العان ءىسىن ۇنەمى تياناقتى اياقتايدى. ءماتتاقان. كەز كەلگەنگە اشىلىپ-شاشىلمايتىندىعى جانە بار. ساڭكىباي بۇرىنعىشا تىزەسىنە قاعىپ-قاعىپ جىبەرىپ، ناسىباي شاقشاسىن ۇسىنعان-دى. ەسقۋات ول ءىلتيپاتقا ءتىپتى نازار اۋدارمادى.
– نە ءبۇلدىرىپ ءجۇرسىڭ؟!
– مەن بە، نە ءبۇلدىرۋشى ەم، ەڭ بولماسا سەندەر سەكىلدى ون ەكى مۇشەم دە ساۋ ەمەس! – ساڭكىباي شولتاق اياعىن جانىنداعى اعاش دىڭگەككە تىرەدى. ءسويتتى دە ءبىر شۇقىم اششى ناسىبايدى استىڭعى ەرىنگە تاستاپ جىبەرىپ، الاقانعا الاقانىن ۇيكەلەدى.
– سويتە تۇرا جان-جاعىڭدى جايپاپ باراسىڭ عوي. ون ەكى مۇشەڭ ساۋ بولعاندا كىم ءبىلسىن.
– ءجا، نەگىزگى شارۋاڭا كوشسەڭشى، وسى كۇنى ادامعا ۋاقىت قات، – ساڭكىباي قۇرداسىمەن تاپ وسى جولى ءتىل تابىسا الماسىن اڭعاردى دا، ەسقۋاتتان قۇتىلعانشا اسىقتى.
– سەن بىلاي جونگە كەل، ارىزىڭدى قايتىپ ال. مەنىڭ جاعدايىمدى بىلەسىڭ.
– قارىزعا اقشا سۇراساڭ بەرەيىن، ءبىراق مەنى بەكەرگە قيناما. شىندىقتى جازعانىم راس. ىشىندە ءبىر ءتۇيىر وتىرىگى بولسا، مەنى سوتقا بەرسىن.
– سوت سەندەي اقساقتى قايتۋشى ەدى! – ەسقۋات قىزبالىقپەن ءسال ارتىقتاۋ كەتكەندىگىن ارتىنان بايقادى. نامىسقا تيمەۋ كەرەك ەدى اسىلى. وسى ءسوز وزىنە باعىشتالسا قايتەر ەدى. اسىلىپ ولۋدەن تايىنباس. سونداي ءزىلدى ىشىنەن عانا قابىلداپ، سىرتىنا ينەنىڭ جاسۋىنداي قارسىلىق بايقاتپاعان ساڭكىبايدىڭ قايسارلىعىنا، شىدامدىلىعىنا ريزا بولدى. كۇدەگە سۇيەۋلى ايىردى الا جۇگىرسە نە ىستەمەك؟ اقساقتىعىن بەتىنە باسىپ، ۇپاي تۇگەندەمەك بولعان ۇشقالاق مىنەزىن جەردەن الىپ، جەرگە سالدى. كوكتەي جينالعان جۋساننىڭ ءبىر بۇتاعىن سۋىرىپ الىپ، تىسىنە باسقان كۇيى ءۇنسىز وتىرعان قۇرداسىن سۇمدىق جاقسى كورىپ كەتتى.
– جاعدايدى تۇسىنەمىن، – دەدى ءبىر كەزدە ساڭكىباي. ءۇستى-باسىن قاققىشتاپ ورنىنان باياۋ كوتەرىلدى دە، ارقاسىمەن جيناۋلى شوپكە سۇيەندى. – سەن ءبىراق ىسسىلاي ۇرىنىپ، وندا نە جازىلعانىن سۇرامادىڭ. اۋدان كولەمىندەگى ادام توزگىسىز بىلىق-شىلىقتى كوزىنەن ءتىزىپ، دالەلدەگەنىم ءۇشىن دە جازىقتىمىن با؟! قولىندا ­بولار-بولماس بيلىگى بارلاردىڭ كوزدەرىن اقشەل قاپتاعان. تۇك كورمەيدى، قاراپايىم حالىقتىڭ مۇڭ-مۇقتاجىن بەلدەن باسىپ جۇرە بەرگىلەرى كەلەدى. ءبىراز شالىقتادى عوي، توقتام، تىيۋ بولا ما ول كورىندە وكىرگىرلەرگە! جوق، كىسىنى كۇيدىرەدى شە، اياق باسساڭ – الاياقتىق. پارا بەرمەسەڭ مەكتەپكە ەدەن جۋشى بوپ تا ورنالاسا المايسىڭ. دارىگەرلىك انىقتاما سۇراساڭ، الدەكىمنىڭ اۋزىن مايلاۋعا ءتيىستىسىڭ. ءبىر قوراپ كامپيت بولسا دا… كونەبوگەن بولىمشەسىنە اپاراتىن جولدى اسفالتتاعانبىز دەپ اقپار بەرەدى جوعارى جاققا. اتاسىنىڭ باسى! ءسىرا، بۇ جول ەكەۋمىز و دۇنيەگە اتتانعان سوڭ جوندەلەر… ءوزىڭ بىلەسىڭ، امانباي اقساقالدىڭ جاڭا بۇزاۋلاعان جالعىز ­سيىرى كوزبە-كوز قولدى بولدى. ۇرىنىڭ ءىزىن سۋىتپاي ۇستايمىز دەپ ۋادە بەرگەن. ۇستادى ما؟.. كەيىن ەستىسەم، مالىنا يە بولمادى دەپ ولمەلى قاريانى كىنالاماقشى…
ەسقۋاتتىڭ كوز الدى بۇلدىرادى، ­تىنىسى تارىلدى. باسى اينالدى… اراق ءىشىپ رولگە وتىرعانى بىلاي تۇرسىن، كىسى قاعىپ كەتكەن باستىقتىڭ بالاسى تۇك بولماعانداي، شالقاقتاپ جۇرە بەرەدى. ءتىس دارىگەرى سوقىرىشەككە وپەراتسيا جاسايدى… مۋزىكالىق ءبىلىمى بار جاس مامان ءورت ءسوندىرۋ مەكەمەسىنىڭ مەڭگەرۋشىسى… بالاباقشانىڭ كەزەگىندە تۇرعانداردىڭ ۇل-قىزدارىنا مەكتەپكە بارعانشا ورىن بۇيىرمايدى… بۇل قالاي؟ ءومىر ءوستىپ وتە بەرە مە؟! وۋ، بۇلارىڭ نە ماسقارا، جان-جاقتارىڭا قاراساڭدارشى دەيتىن پەندە تاعى جوق. تىم-تىرىس… ىشىمە سىيماعان سوڭ جارىلىپ ولەيىن بە، جازدىم. ءالى دە جازامىن. مەن-اق كىنالى بولايىن، سەندەر-اق اقىلدى ازامات اتانا بەرىڭدەر! ساڭكىباي – وقۋ وقىماعان، ساۋاتسىز، كىشكەنتاي كىسى. قولىنان نە كەلەدى، ايتادى دا قويادى… قويمايمىن! ءبىر ناتيجە شىعارامىن تۇبىندە… ايىرباسىنىڭ ءتۇرىن قارا، مەنى ساتىپ الماقشى!.. ساڭكىباي جولاەۆ ارىزىن قايتىپ السىن، سوسىن بولىمشەنىڭ بار ۇيىنە جارىق بەرىلەدى…
ەسقۋات قۇرداسىن اياعىنا دەيىن اسىقپاي تىڭدادى. مەن وسىمەن ءبىتتىم دەگەندەي، ساڭكىباي ءبىر كەزدە سالماعىن ساۋ اياعى جاعىنا اۋدارىپ، كۇدەگە كوكتەي جينالعان جۋساننىڭ ءبىر ۋىسىن سۋىرىپ الىپ، ارمانسىز يىسكەدى. ەسقۋات ءۇن-تۇنسىز كەلىپ، قۇرداسىن قۇشاعىنا قىستى. تۇكپىردەگى قورادان تىسقا شىققانشا اسىقتى. ساڭكىبايدىڭ شاي ىشەيىك دەگەنىن ەستىمەدى. «ۋرالدى» قۇيىنداتىپ كەلدى دە، كەدىر-بۇدىرعا قاراماستان بيىك توبەنىڭ ۇشار باسىنا كوتەرىلدى. قالتا تەلەفونى وسى تۇستان دۇرىس ۇستايتىن-دى.
– باستىعىڭ قايدا، مەنى ۇلكەن باستىعىڭا قوسشى، قالقام! – دەپ ءوتىندى سان رەت تابالدىرىعىن توزدىرعان مەكەمەنىڭ قابىلداۋ بولمەسىنە تەلەفون شالىپ.
– باستىق جينالىستا…
– بوپتى. جينالىسىن جالعاستىرا بەرسىن. وعان مىنانى ايت، مەنى تانيدى. قابىلداۋىندا بولعام. كونەبوگەن بولىمشەسىنەن ەسقۋات ازبەرگەنوۆ ارنايى حابارلاستى دە. جارىعىن باسىنا جاقسىن! ەلەكتر قۋاتىنسىز-اق كۇنىمىزدى كورەرمىز!..
بار داۋىسىمەن تاماعىن ­كەنەپ، ايقايلاعىسى كەلدى. «ۇلكەن كىسى، كىشكەنتاي كىسى دەگەن بولمايدى، ادامنىڭ ءبارى بىردەي. جوق، بولادى دەسەڭدەر، ءتۇبى سەندەر كىشكەنتاي كىسىلەردەن كورەسىڭدەر كورەسىنى! قاعازعا تۇسكەن شىندىقتى اياقسىز قالدىرمايمىز! ال قۇدالىقتىڭ ءبىر ءجونى بولار…». جەڭىلدەنگىسى كەلگەندەي شيبارقىت كاستومىن شەشىپ الدى دا، موتوتسيكلدىڭ جۇك سالعىشىنا اتىپ ۇردى.


كەلۋ قاينارى: http://www.elarna.net/koru.php?tur=9&id=1063601

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەل-ارنا ءوز گازەتى

ەڭ جاڭا ماقالالار


中国哈萨克语广播网 27 مينوت
ءۇش قالادا اۋا ساپاسى ن 1 ساعات
شىمكەنت اۋرۋحاناسىنىڭ ب 1 ساعات
وسى ارانى باسىپ كورىڭىز 1 ساعات
20 قاراشا. قازاقپارات ك 1 ساعات
中国哈萨克语广播网 1 ساعات
ەلوردادا ءبىرىنشى اۋىسى 1 ساعات
中国哈萨克语广播网 1 ساعات
قازگيدرومەت: قاراشانىڭ 2 ساعات
Mario says he will resp 2 ساعات
中国哈萨克语广播网 2 ساعات
«Nur Otan» بالالاردىڭ ق 2 ساعات
«مانچەستەر يۋنايتەدتىڭ» 2 ساعات
تۇركىستانداعى جالعىز جە 3 ساعات
ورازا جانە ناماز كەستەس 3 ساعات
الماتىدا «Almaty Invest 3 ساعات
قادىر مىرزا ءاليدىڭ ء"و 4 ساعات
جامبىلدا زاڭسىز قىزمەت 4 ساعات
گەندەرلىك ساياسات الدە 4 ساعات
فۋتبولشى بولام دەسەڭ... 4 ساعات
12 Things You Need to K 4 ساعات
ەربول شايمەردەنۇلىنىڭ « 4 ساعات
سەمەيدە تۇراقتاندىرۋ قو 5 ساعات
جامبىل وبلىسىنىڭ 80 جىل 5 ساعات
Skateboarding is create 6 ساعات
سارىاعاش اۋدانىندا توتە 6 ساعات
中国哈萨克语广播网 6 ساعات
وسى ارانى باسىپ كورىڭىز 6 ساعات
ەسبولات ايدابوسىن | ادە 6 ساعات
中国哈萨克语广播网 6 ساعات