تۇركىستان وبلىسىندا مال ۇرلىعى قىلمىسى بىلتىر 34،1%-عا كەمىگەن. مۇنداي مالىمەتتى بۇگىن حالىققا بەرگەن ەسەبىندە تۇركىستان وبلىستىق پوليتسيا دەپارتامەنتىنىڭ باستىعى، گەنەرال-مايور قايرات دالبەكوۆ ءمالىم ەتتى.

وڭىردە كەرىسىنشە كەنتاۋ قالاسى مەن شاردارا اۋدانىندا مال ۇرلىعىنىڭ وسكەنى بايقالادى.

-كەنتاۋداعى مال ۇرلىعى سانىنىڭ ءوسۋ سەبەبى، بۇرىنعى تۇركىستان قالاسىنىڭ اۋماعىنا قاراستى 12 اۋىلدىق وكرۋگ بۇگىندە كەنتاۋ قالاسىنىڭ قۇرامىنا ەنگەن. وعان قوسا قورا-جايلاردى دۇرىس بەكىتپەۋى، جايىلىمدارعا جىبەرە سالۋى سەكىلدى تۇرعىندار تاراپىنان ورىن الاتىن سالعىرتتىقتار دا ۇرلىقتىڭ كوبەيۋىنە سەپ بولىپ وتىر،-دەدى ق.دالبەكوۆ.

تارتىپ ساقشىلارى مال ۇرلىعىن جەدەل اشۋ ماقساتىندا جالپى چات دەگەن ءادىستى پايدالانۋدا. ياعني، زاڭسىز تاسىمالدانعان مالدار پوليتسەيلەر تاراپىنان انىقتالىپ، بەينە تىركەگىشتەرگە، سۋرەتكە ءتۇسىرىلىپ، ارنايى چاتقا جىبەرىلەدى. مال ۇرلىعى تۋرالى ارىزدانىپ كەلگەن ازاماتتارعا چاتتاعى بەينە جازبالار مەن سۋرەتتەر كورسەتىلەدى. بۇگىنگى تاڭدا مۇنداي ءادىس ءوز ناتيجەسىن بەرۋدە.

-وبلىس اكىمدىگى جانىنداعى ۆەدومستۆوارالىق قۇقىق بۇزۋشىلىق پروفيلاكتيكاسى جونىندەگى كوميسسيا وتىرىستارىندا مال ۇرلىعىنىڭ الدىن الۋدى جانداندىرۋ جونىندە بەرىپ جاتقان تاپسىرمالارىنا قاراماستان، الىدە بولسا كەمشىلىكتەر ورىن الۋدا. سوندىقتان كەمشىلىكتەردى بولدىرماۋ ماقساتىندا ءۇش جاقتى كەلىسىمدى مىقتاپ جۇزەگە اسىرۋىمىز قاجەت. تەك پوليتسەيلەر تاراپىنان عانا ەمەس، اكىمشىلىك قىزمەتكەرلەرى مەن مال يەلەرى دە بىرگە وسى مال ۇرلىقتارىنىڭ الدىن الۋعا جاۋاپكەرشىلىكتى سەزىنۋلەرى ءتيىس. ءدال وسى مال ۇرلىعىنىڭ سالدارىنان اۋىلداعى قاراپايىم جۇمىسسىز تۇرعىندار زارداپ شەگىپ، جەپ وتىرعان نانىنان ايىرىلادى. ال ۇرى قارىعا باي مەن باعلان دا، كەدەي مەن جارلى دا بىردەي،-دەدى وبلىستىڭ باس پوليتسەيى.