اگروونەركاسىپتىك كەشەن سالاسىنداعى مەملەكەتتىك باعدارلامالاردىڭ ءساتتى ءارى ناتيجەلى جۇزەگە اسىرىلۋىنا كەدەرگى بولىپ تۇرعان جاعدايلاردى انىقتاۋ كەرەك. بۇل تۋرالى قر پارلامەنتى سەناتىنىڭ ءتوراعاسى داريعا نازارباەۆا ءمالىم ەتتى، دەپ حابارلايدى قازاقپارات ءتىلشىسى.

«2010 جىلدان باستاپ قازاقستاندا 3 مەملەكەتتىك باعدارلاما قابىلداندى. اگروونەركاسىپتىك كەشەندى دامىتۋدىڭ قولدانىستاعى ءۇشىنشى مەملەكەتتىك باعدارلاماسى 2021 جىلى اياقتالادى. 2017-2021 جىلدار ارالىعىندا اۋىل شارۋاشىلىعىنىڭ جالپى ءونىمىن 2 ەسەگە ارتتىرۋ جوسپارلانۋدا. ستاتيستيكا كوميتەتىنىڭ مالىمەتتەرى بويىنشا 2017 جىلدان باستاپ 2019 جىلعا دەيىنگى اۋىل شارۋاشىلىعىنىڭ جالپى ءونىمى 4،5 ترلن تەڭگەدەن اسپاعان. ال 2021 جىلعا قاراي سالانى دامىتۋ باعدارلاماسى اياسىندا ول 8،2 تريلليونعا دەيىن ءوسۋى كەرەك. باعدارلامانى جۇزەگە اسىرۋدىڭ 3 جىلىندا 2 تريلليون تەڭگەگە جۋىق قاراجات تەك اگروونەركاسىپ كەشەنىن سۋبسيديالاۋعا جۇمسالعان»، - دەدى د. نازارباەۆا سەناتتا اگروونەركاسىپتىك كەشەندى دامىتۋ تۋرالى پارلامەنتتىك تىڭداۋدا.

سەنات سپيكەرىنىڭ پايىمىنشا، سالانى دامىتۋ باعىتىندا عالىمدار مەن اگروونەركاسىپتىك كەشەن مەن مەملەكەتتىك قۇرىلىمداردىڭ وكىلدەرى، عالىمدار مەن ساراپشىلار كەڭ اۋقىمدى ديالوگ جۇرگىزۋى كەرەك.

«مەملەكەت بۇل سالانى بەلسەندى دامىتۋعا العىشارتتار جاساپ، جاعدايدى جاقسارتۋ ءۇشىن ۇنەمى شارالار قابىلداپ ءجۇر دەپ بىلەمىز. اۋىل تۇرعىندارى جۇزەگە اسىرىلىپ جاتقان مەملەكەتتىك باعدارلامالاردان ەڭ كوپ جەڭىلدىكتەر مەن جاردەماقى الۋشىلار قاتارىندا دەپ ەسەپتەيمىز. ءبىراق ءىس جۇزىندە باعدارلامالار اۋىل تۇرعىندارىنىڭ ءال-اۋقاتىن جاقسارتىپ جاتىر ما؟ بىزگە مەملەكەتتىك باعدارلامالاردىڭ ءساتتى ءارى ناتيجەلى جۇزەگە اسىرىلۋىنا نە كەدەرگى ەكەنىن ءتۇسىنۋ كەرەك؟ بۇگىن وسى جانە باسقا دا كوپتەگەن ماسەلەلەر تالقىلانادى. سوندىقتان ءبىز اگروونەركاسىپتىك كەشەن مەن مەملەكەتتىك قۇرىلىمداردىڭ وكىلدەرىن، عالىمدار مەن ساراپشىلاردى، جەرگىلىكتى ءوزىن-وزى باسقارۋ دەپۋتاتتارىن جانە اۋىلدار مەن اۋىلداردىڭ تۇرعىندارىن ەلىمىزدەگى اۋىل شارۋاشىلىعىن دامىتۋ جونىندەگى كەڭ اۋقىمدى ديالوگقا شاقىرامىز. بۇگىنگى كۇنى ەشكىمدە دايىن فورمۋلا جوق. ءبىزدىڭ مىندەتىمىز - جان-جاقتى اشىق جانە ءادىل تالقىلاۋ ارقىلى جاعدايدى جان-جاقتى كورۋ جانە باعالاۋ»، - دەدى داريعا نازارباەۆا.