ەل پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا ءۇش ءجۇزدىڭ باسىن قوسقان ابىلاي حاننىڭ الىپ مونۋمەنتىنىڭ سالىنۋى جونىندە ءباسپاسوز ءماسليحاتى ءوتتى. جيىنعا يدەيا اۆتورى، ۇلتتىق قوعامدىق سەنىم كەڭەسىنىڭ مۇشەسى، قر قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى ارمان شوراەۆ قاتىستى، دەپ حابارلايدى Baq.kz پورتالىنا سىلتەمە بەرگەن Oinet.kz.

- مەنىڭ ويىمشا، وسىنداي مونۋمەنتتى ءبىز قوياتىن بولساق، بۇل تەك جالعىز شوراەۆتىڭ نەمەسە قوعام بەلسەندىلەرىنىڭ ازاماتتىق بورىشى ەمەس نەمەسە سولارعا عانا تيەسىلى دۇنيە بولمايدى. ەستەرىڭىزدە بولسا، وتكەن جىلى مونۋمەنت قويۋ بويىنشا ۇسىنىسىمىزدى الەۋمەتتىك جەلىدە بولىسكەنبىز. سونداعى ازاماتتاردىڭ 90 پايىزدان استامى ويىمىزدى قۇپتاعان بولاتىن، - دەيدى ارمان شوراەۆ.

ونىڭ ايتۋىنا قاراعاندا، جارتى جىل بويى مونۋمەنتتى قاي جەرگە قويۋ كەرەك دەگەن ماسەلەمەن، ىڭعايلى ورىن ىزدەگەن.

- كوپ جەردى قارادىق. ۇلىتاۋ، سەمەي، الماتى وڭىرلەرى ۇسىنىلدى. بۇل ۇسىنىستاردى قاراستىردىق. ناتيجەسىندە ابىلاي حان ءوزىنىڭ ورداسىن تىككەن جەر بۋراباي مەن كوكشەتاۋدىڭ ورتاسىنداعى كەنەسارى اۋىلى ماڭىن تاڭدادىق. وندا بيىكتىگى 90 مەتر بولاتىن جوتانى تاپتىق. ءبىزدىڭ ويىمىز مونۋمەنت عارىشتان دا كورىنەتىندەي بولسا، – دەيدى يدەيا اۆتورى.

ارمان شوراەۆ مونۋمەنتتىڭ سىرت بەينەسى قانداي بولاتىنىن دا ايتتى.

- مونۋمەتتىڭ بيىكتىگى شامامەن 50 مەتر. مونۋمەنت عارىشتان كورىنەتىن عيمارات بولادى دەپ ويلايمىن. بۇل تەك جاي ءمۇسىن عانا ەمەس ۇلكەن عيمارات. ونىڭ ىشىندە مۋزەي ەكسپوزيتسياسى، كونگرەسس حولل نەشە ءتۇرلى عىلىمي جيىنداردى دا وتكىزۋگە بولادى. مەنىڭ ويىمشا، اقمولا وبلىسى بۋراباي ايماعىندا ءتۋريزمنىڭ دامۋىنا سەپتىگىن تيگىزەدى دەپ ويلايمىن – دەيدى ول.