تاعدىر تاۋقىمەتىن باسىنان وتكەرسە دە قيىندىققا مويىنسۇنباي جۇرگەن تۇلكىباستىق قايرات ەسىمدى ازامات ۇلگى بولارلىقتاي ەڭبەك ەتۋدە.

كەندىرباەۆ قايرات ءجۇنىسۇلى شاقپاق-بابا اۋىلىنىڭ تۇرعىنى. وتباسىندا 3 ۇل، 3 قىز تاربيەلەپ وتىر.

-1968 جىلى شاقپاق-بابا اۋىلىندا دۇنيەگە كەلگەنمىن. جاستايىمنان ءومىردىڭ اۋىر تالكەگىن باسىمنان وتكەردىم. 1 توپتاعى مۇگەدەكپىن. ياعني، سول اياعىم مەن قولىم جانە ءبىر كوزىم جاساندى پروتەز-دەيدى ول. ءبىراق تاعدىردىڭ بۇل قاتال سىنىنا مويىعان قايرەكەڭ جوق. ءقازىر ول ءبىر قولمەن قۇم كىرپىشىن قۇيىپ، ساتۋدا. بۇل كاسىپپەن 2017 جىلدان باستاپ اينالىسىپ كەلەدى. كاسىبىن باستاعان جىلى 15 مىڭ كىرپىش قۇيعان قايرەكەڭ، وتكەن 2019 جىلى تاپسىرىستىڭ ارتۋىنا بايلانىستى كىرپىش سانىنىڭ 30 مىڭنان اسقانىن ايتىپ وتىر. ويتكەنى، قايرەكەڭ ءبىرىنشى كەزەككە كىرپىشتىڭ ساپاسىن العا قويادى. ونى تاپسىرىس بەرۋشىلەر دە ايتىپ وتىر.

- كەيدە وزدەرى تۇك ىستەمەي، مەملەكەتتەن قول جايىپ كومەك سۇراي بەرەتىندەرگە تاڭعالامىن. اياق قولدارى بالعاداي قازاقتىڭ ۇل-قىزدارى ەڭبەك ەتكىلەرى كەلمەيدى. سودان سوڭ، وزدەرىن ايانىشتى قىلىپ، بىزگە ەش جاقتان كومەك جوق دەگەن اڭگىمە ايتادى. ەڭبەك ەتەم دەگەن ادامعا بۇگىنگى تاڭدا بارلىق جاعدايلار جاسالىنعان. مەن مىسالىعا، 2018 جىلى «بيزنەستىڭ جول كارتاسى 2020» باعدارلاماسى ارقىلى شىمكەنت قالاسىندا كىرپىش قۇيۋدىڭ قىر-سىرىن قىسقا مەرزىمدى كۋرس ارقىلى وقىپ، بۇگىنگى تاڭدا قۇدايعا شۇكىر كاسىپتىڭ ارقاسىندا بالا-شاعامنىڭ ءناپاقاسىن تاۋىپ وتىرمىن.

2017 جىلعا دەيىن 1 توپ مۇگەدەكتىككە بەرىلەتىن جاردەماقىعا قاراپ وتىرعان كەندىرباەۆتار وتباسىندا العا قويعان ماقساتتارى جەتەرلىك. وتاعاسىنىڭ ايتۋىنشا الداعى ۋاقىتتا مەملەكەت تاراپىنان گرانتتارعا قاتىسىپ، بۇگىنگى كاسىبىن ۇلعايتۋدى كوزدەپ وتىر. ءوزىنىڭ تۋىلىپ، وسكەن شاقپاق-بابا اۋىلىنان قۇرىلىستىڭ ءار-تۇرلى باعىتىنا جارايتىن كىرپىش تۇرلەرىن دايىندايتىن تسەح پەن ءوز ءونىمىن كوتەرمە باعادا ساتاتىن قۇرىلىس دۇكەنىن اشۋدى جوسپارلاپ وتىر.

ايتا كەتەرلىك، كەندىرباەۆتار وتباسىنىڭ قۇيعان كىرپىشتەرىنە سۇرانىس اۋدان اۋماعىندا عانا ەمەس، سونىمەن قاتار كورشىلەس جاتقان جامبىل وبلىسىنىڭ جۋالى اۋدانىندا دا ارتىپ وتىر.