سولتۇستىك قازاقستان وبلىسىندا اۋىل تۇرعىندارىنا ءوزىن كورىپكەلمىن دەپ تانىستىرعان بەيتانىس ايەل رەسەيدەن كەلگەن الاياق بولىپ شىقتى. بۇگىن، ونى ەلدەن شىعارىپ جىبەرۋ تۋرالى سوت ۇكىمى شىقتى، دەپ حابارلايدى zakon.kz پورتالىنا سىلتەمە بەرگەن Oinet.kz.

ايىرتاۋ اۋدانىنىڭ پوليتسيا ءبولىمىنىڭ قىزمەتكەرلەرى مامليۋت اۋدانىنداعى ارىپتەستەرىمەن بىرلەسىپ 81 جاستاعى اۋىل تۇرعىنىنىڭ الدانۋىنا قاتىستى الاياقتىقتى انىقتادى.

بەيتانىس ايەل اۋىل تۇرعىندارىنىڭ ۇيىنە بارىپ، كورىپكەل رەتىندە ءوزىن تانىستىرعان. ءبىر زەينەتكەردىڭ 400 مىڭ تەڭگە كولەمىندە اقشاسىن الداپ العان. اتالعان فاكتى قر قىلمىستىق كودەكسىنىڭ 190-بابى “الاياقتىق” بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە ەنگىزىلدى.

- وبلىس اۋىلدارىن ارالاپ جۇرگەن الاياق ەمشى، وقيعا ورنىنان تەز ءىزىن سۋىتىپ وتىرعان. سول سەبەپتى وبلىس بويىنشا وعان ىزدەۋ جاريالانىپ، نۇسقاۋلىق بەرىلدى. الاياق ايەل اقىرى مامليۋت اۋدانىندا ۇستالدى. كۇدىكتى 1983 جىلى تۋعان رەسەي فەدەراتسياسىنىڭ ازاماتى بولىپ شىقتى. ول ءوز كىناسىن مويىنداپ، شىعىندى وتەپ، زەينەتكەردەن كەشىرىم بەرۋىن وتىنگەن. تەرگەۋ بارىسىندا شەتەلدىكتىڭ ءار ۇيگە كىرىپ تۇرعىندارعا ءارتۇرلى سىلتاۋلار ايتقانى بەلگىلى بولدى. بىرىنە كورىپكەلمىن دەپ تانىستىرىپ، بىرىنە ءارتۇرلى ۇسىنىستار ءبىلدىرىپ، الداعان. كوشى-قون قىزمەتى ونىڭ ارەكەتىن قر اكىمشىلىك قۇقىق بۇزۋشىلىق تۋرالى كودەكسىنىڭ 449-بابى بويىنشا “قوعامدىق ورىنداردا ءتيىسۋ” دەپ باعالادى. وسى باپتىڭ 3-بولىگى شەتەلدىك نە ازاماتتىعى جوق ادام جاساعان ارەكەتتەر – بەس ايلىق ەسەپتىك كورسەتكىش مولشەرىندە ايىپپۇل سالۋعا نە بەس تاۋلىككە دەيىنگى مەرزىمگە اكىمشىلىك قاماققا الۋعا نە قازاقستان رەسپۋبليكاسىنىڭ شەگىنەن اكىمشىلىك جولمەن شىعارىپ جىبەرۋگە اكەپ سوعادى. بۇگىن كورىپكەلدى قر-نان شىعارىپ جىبەرۋ تۋرالى ۇكىم شىعارىلدى، - دەيدى ايىرتاۋ پب باستىعىنىڭ ورىنباسارى گريگوري لۋكيانەنكو.

جىل باسىنان بەرى سقو-دا 178 الاياقتىق تىركەلگەن. وسى تۇردەگى 110 قىلمىس اشىلدى، ونىڭ ءبىر بولىگى وندىرىستە.