ءتۇرى: اقجول تور ماقالالارى
جولدانعان ۋاقىتى: 11:15 - 2021/04/08
قازاق ەلىنىڭ تاريحىنداعى تۇڭعىش كاسىپقوي پالۋان قاجىمۇقان مۇڭايتپاسۇلىنىڭ 150 جىلدىعىنا وراي نۇر-سۇلتان قالاسىنىڭ اكىمدىگى، قر قك ۇلتتىق اسكەري-پاتريوتتىق ورتالىعىنىڭ قولداۋىمەن «جاس سارباز» جاسوسپىرىمدەر اسكەري-پاتريوتتىق قوزعالىسى رقب نۇر-سۇلتان قالالىق فيليالىنىڭ ۇيىمداستىرۋىمەن ەلوردا تۇرعىندارى اراسىندا Instagram الەۋمەتتىك جەلىسىندە چەللەندج باستاۋ الدى.
اتالمىش چەللەندجگە ەلوردا تۇرعىندارىنىڭ ءبارى قاتىسا الادى. ءىس-شارانىڭ باستى ماقساتى – تۇرعىندار اراسىندا سالاۋاتتى ءومىر سالتىن ناسيحاتتاۋ، بىلەكتى، شىمىر جانداردى انىقتاۋ. جارىستىڭ باستى تالابى – 16 كگ بولاتىن گيردى كوتەرۋ. گير كوتەرگەندە شىنتاعىڭىز تىك تۇرۋى شارت. ال قولىڭىز شارشاعان كەزدە جۇلقىپ كوتەرۋىڭىزگە بولادى. دوستار، سپورتتىڭ قاي تۇرىنەن قاتىسساڭىز دا ساپاعا ءمان بەرىڭىز. ياعني شىنتاق، يىق بۋىندارىڭىز تولىعىمەن ءتۇزۋ بولۋى كەرەك. ال تۋرنيكتە اياعىڭىزدى ءبىر قالىپتا ۇستاپ يەككە دەيىن تارتىلۋىڭىز شارت. بارشا قازاقستان جاستارى وسى چەللەندجگە بەلسەنە قاتىسۋعا شاقىرىلادى.
چەللەندجگە قاتىسۋ ءۇشىن ءتۇرلى سپورت تۇرىنەن 150 مارتە جاساعان جاتتىعۋىن ۆيدەوعا ءتۇسىرىپ، Instagram جەلىسىنە #ۇلىدالاباتىرىمەنبىرتولقىندا #قاجىمۇقان150جىل حەشتەگىمەن جاريالايدى. جەڭىمپازدار باعالى سىيلىقتارمەن جانە سپورت كلۋبتارىنا بەرىلەتىن سەرتيفيكاتتارمەن ماراپاتتالادى. چەللەندج 10 ساۋىرگە دەيىن جالعاسىن تابادى.
