تاۋەلسىزدىگىمىزدىڭ وتىز جىلدىق مەرەكەسى اياسىندا ۇلتتىق اكادەميالىق كىتاپحانا قازاقستاننىڭ بىرىككەن ۇلىبريتانيا كورولدىگىندەگى ەلشىلىگىمەن بىرلەسىپ، بريتاندىق جازۋشى-جۋرناليست نيك فيلدينگتىڭ «شوقان ءۋاليحانوۆتىڭ تاڭدامالى ەڭبەكتەرى» جانە «ۇلى دالا ساياحاتشىلارى» اتتى كىتاپتارىنىڭ حالىقارالىق ونلاين-تانىستىرىلىمىن وتكىزدى.نيك فيلدينگ ءبىزدىڭ ەلگە بىرنەشە مارتە كەلگەن. بۇدان بۇرىن قالامگەردىڭ ەرتەدە قازاق جەرىنە تابانى تيگەن اعىلشىن ساياحاتشىلارى توماس پەن ليۋسي اتكينسوننىڭ ۇرپاقتارى تۋرالى جازعان كىتابى شىققان بولاتىن.
جازۋشى ۇلى عالىمنىڭ تاريحي-ەتنوگرافيالىق زەرتتەۋلەرىن اعىلشىن وقىرماندارىنا العاش ۇسىنىپ وتىر. الماتىداعى شوقان ءۋاليحانوۆ اتىنداعى تاريح جانە ەتنوگرافيا ينستيتۋتىمەن ىنتىماقتاس­تىقتا جارىق كورگەن بۇل جيناقتا شوقان بابامىزدىڭ ورتالىق ازيانىڭ گەوگرافياسى، تاريحى، ەتنوگرافياسى مەن ەكونوميكاسى جايىنداعى اسا ماڭىزدى عىلىمي ەڭبەكتەرى توپتاستىرىلعان. ارداقتى تۇلعانىڭ 1865 جىلى لوندوندا جاريالانعان جيناقتاردا تەك ءتورت ەسسەسى اۋدارىلعان ەكەن. مىنە، سودان بەرى 150 جىل سىرعىپ ءوتىپتى. وسى جىلداردان كەيىن تۇعىرلى تۇلعامىزدىڭ ەڭبەكتەرىنىڭ اعىلشىنعا اۋدارىلۋى ايتارلىقتاي وقيعا دەۋگە بولادى.
سونىمەن بىرگە اۆتوردىڭ «ۇلى دالاداعى ساياحاتشىلار: پاپالىق ەلشىلەردەن ورىس رەۆوليۋتسياسىنا دەيىن» اتتى جاڭا كىتابى ازيانى مەكەندەگەن ەلدەر ءۇشىن ماڭىزى زور ەڭبەك دەۋگە بولادى. مۇندا الەمگە ءمالىم زەرتتەۋشىلەردىڭ، ەسىمدەرى ۇمىت قالعان ساياحاتشىلاردىڭ اڭگىمەلەرى جيناقتالعان. ولاردىڭ ساياحات بارىسىنداعى قيىندىقتارى، جەتىستىكتەرى مەن ساتسىزدىكتەرى تولىق سيپاتتالعان. كىتاپ ءتۇرلى ءتۇستى يلليۋستراتسيالىق سۋرەتتەرمەن، كارتالارمەن سيپاتتالعان.