ەلوردا اكىمىنىڭ باستاماسىمەن ىسكە قوسىلعان «BIRGE» سايتى ارقىلى استانالىقتاردان كوپتەگەن يدەيالار ءتۇسىپ جاتىر. قالانى دامىتۋ بويىنشا ەڭ تارتىمدى ءارى ءتيىمدى ۇسىنىستار «نۇر-سۇلتان – جايلى قالا» ماستەر-جوسپارىندا كوزدەلگەن جوبالاردىڭ اياسىندا جۇزەگە اسىرىلاتىن بولادى. وسى ورايدا نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا باس قالانى اباتتاندىرۋ جۇمىسى قالاي جۇرگىزىلەتىنىن ءمالىم ەتتى. 

«بيىل اۋماقتاردى اباتتاندىرىپ، قالا تۇرعىندارى مەن قوناقتارى ۋاقىتىن پايدالى وتكىزەتىن جاڭا كوپشىلىك ورىندار قۇرۋ جۇمىستارىن جالعاستىرامىز. مىسالى، قالا ساياباقتارىن جاسىل ارتەرياعا اينالدىرۋدى جوسپارلاپ وتىرمىز: ۆەلوسيپەد پەن جاياۋ جۇرگىنشىلەر جولدارى جاسالادى.
تۇرعىندار جازدىڭ شۋاقتى مەزگىلدەرىن ەرەكشە جاقسى كورەدى. قالاعا ءبىر جاعاجاي جەتكىلىكسىز. اقبۇلاق وزەنىنىڭ جاعالاۋىن اباتتاندىرۋدى شەشتىك. قالادا جاڭا جاعاجاي پايدا بولادى. وقۋشىلار سارايىنىڭ جانىندا تاعى ءبىر سكەيت-ساياباق اشىلماق. پرەزيدەنتتىك ساياباقتا تاقتاي توسەلگەن جاعالاۋ جاساۋدى جوسپارلاپ وتىرمىز.
كەزدەسۋ كەزىندە سپورت فەدەراتسيالارىنىڭ باسشىلارى – ساياباقتاردا سپورتشىلار مەن باسقا دا سپورتپەن شۇعىلداناتىن ادامدار كيىم اۋىستىرىپ، سپورت جابدىقتارى مەن زاتتارىن ساقتاي الاتىن ورىن-جايلاردىڭ بولماۋى ماسەلەسىن كوتەرىپ ەدى. سوندىقتان ترياتلون پاركتە سپورت پاۆيلونىن اشامىز. وندا كيىم اۋىستىراتىن بولمەلەر، جاتتىقتىرۋشىلار مەكتەبى ورنالاسادى. بۇل جوبانى قالانىڭ باسقا ساياباقتارىنا كەڭەيتەتىن بولامىز. پاركتەردى مۇمكىندىگى شەكتەۋلى ادامداردىڭ مۇددەلەرىن ەسكەرە وتىرىپ دامىتامىز. بىلتىر جاڭا قوعامدىق كەڭىستىكتەرىمىز كوپشىلىكتىڭ كوڭىلىنەن شىقتى. مىسالى، كوكتال ەلدى مەكەنىندە ۇلكەن ساياباق اشىلدى، سارايشىق كوپىرىنىڭ استىندا سپورتتىق ايماقتار پايدا بولدى، قالانىڭ جاس تۇرعىندارىنىڭ ءوتىنىشى بويىنشا العاشقى سكەيت-ايماق اشىلدى. 76 گەكتاردان استام جەر اباتتاندى. قالانىڭ ەسكى بولىگى مەن ەلدى مەكەندەرگە باسا نازار اۋدارىلدى. بيىل دا بۇل جۇمىس جالعاسادى.
مەملەكەت باسشىسىنىڭ تاپسىر­ماسى بويىنشا جاڭا قوعامدىق كەڭىستىكتەر (ساياباقتار، سكۆەرلەر، بۋلۆارلار) قۇرۋ، اۋلا اۋماقتارىن اباتتاندىرۋ – قالا تۇرعىندارىنا سپورتپەن اينالىسۋعا، سالاۋاتتى ءومىر سالتىن ناسيحاتتاۋ ءۇشىن جاعداي جاساۋعا مۇمكىندىك بەرەدى. سونىمەن قاتار، قالانىڭ بارلىق اۋداندارىن كوگالداندىرۋدى جالعاستىرامىز. ەلباسى اتاپ وتكەندەي، قالانىڭ باس جوسپارى عيماراتتاردىڭ، جاسىل جەلەكتەر مەن ورماننىڭ سيمبيوزى رەتىندە جاسالدى – «ۇيلەر مەن عيماراتتاردىڭ اينالاسىندا اعاشتار وتىرعىزىلىپ، اۋماق جاسىل بولۋى كەرەك، عيماراتتىڭ اينالاسىندا بوس جەرلەردىڭ بولماۋى شارت». ءسىز دە قالانى كوگالداندىرۋعا قاتىسىپ، ءوز ۇلەسىڭىزدى قوسا الاسىز!
ەلوردانى «نۇر-سۇلتان – جايلى قالا» ماستەر-جوسپارى اياسىندا دامىتۋدامىز. ەلوردامىزدى بىرلەسىپ دامىتۋ جانە قالانى شىن مانىندە جايلى ەتۋ ءۇشىن BIRGE (BIRGE) سايتى ىسكە قوسىلدى https://birge-elorda.kz/nur-sultan/). وسى پلاتفورمادا ءسىز ءارتۇرلى باعىتتار بويىنشا ۇسىنىستار مەن ءوز كوزقاراسىڭىزدى قالدىرا الاسىز. پلاتفورمانىڭ جۇمىس ىستەۋ پروتسەسى قاراپايىم: ءبىرىنشى – يدەيانى ۇسىنۋ، ەكىنشى – ىرىكتەۋ، ءۇشىنشى – جوبانى جۇزەگە اسىرۋ. وسى اپتادا 115-تەن استام ۇسىنىس ءتۇستى. قالادا تۇرعىنداردىڭ ەڭ جاقسى ۇسىنىستارىن جۇزەگە اسىرامىز» دەپ جازدى ەلوردا اكىمى.